الاثنين، 27 أكتوبر، 2014

فاتيما حلمنا كلنا


لو حكينا يا حبيبى نبتدى منين الحكاية طبعا اليوم فوق مستوى الحكى عشان كده مش هكتب اسماء اشخاص الا لو فى سياق البوست هحكى قبليها بيوم و انا مش عارف هلبس ايه اية قالتلى فى ايه يا ابراهيم انت رايح فرح و لا ايه قلتلها اكتر من فرح تعرفى انا نفسى البس بدلة و اسكارف او ببيون لكن خايف يبقى شكلى ملفت للنظر انا عايز البس بدلة كاملة و كرافت لكن انا عارف انى راشق من اول القعدة الى اخرها و انا مش بطيق الكرافت المهم خدت اية و ساليناز و روحنا محل الحلويات نحجز اغلى تورتة اشتريتها فى حياتى قلت للمسئول فى المحل انا عايز اكتب كلمة على التورتة كتبت له الكلمة قالى انت متاكد ان دى كلمة ده جواب مش هينفع يتكتب كل ده انت عايز جواب مش كلمة صممت اكتب و بعد حوارات و كلمات و اللى انتوا عارفينه كتبت كلمة معلش سموها كلمة
يوسف و فاتيما
قصة حب
احلى 
من حسن و نعيمة
تقريبا منمتش فى اليوم ده و انا فى الطريق اتصل بيا ارق قلب رامى فايز قلتله انا فى الطريق اتقابلنا فى رمسيس روحنا نشترى البلالين انا كنت عايز اشترى العاب نارية و صواريخ بس وجودنا فى دار الاوبرا كانت هتعملنا مشكلة لكن البلالين و هى بتفرقع قامت بالواجب و انا على باب الاوبرا اتصلت بيا كارول نبيل و قالتلى انا وصلت استنناها على باب الاوبرا انا و رامى طبعا كانت جاية مجهدة من السفر لكن على وشها ابتسامة جميلة ابتسامة لقاء يوسف و فاتيما و بعدين قابلنا مارو و دودو حسيت فعلا انى على باب قاعة افراح لقائى بيوسف مش هقدر احكيلكم عليه لان مجموعة مشاعر مختلطة كلها عكس بعض انا بحضن واحد حضن عميق جدا هو ميعرفنيش لكن انا عارفه كويس جدا و عارف كل شعرة و كل نقطة دم فيه بجد مش عارف احكى لكن اليوم ده كان اجمل حلم فى حياتى و انا مع انى مش بفتكر احلامى لكن ده الحلم الوحيد اللى فاكره و ربنا خلاه حقيقة 

هناك تعليقان (2):

شمس النهار يقول...

بجد كان نفسي اكون معاكم بس الحمد لله

rona ali يقول...

انا كان نفسي اقابل شموسه اوي :(

طيب علي فكرة يا خال انا كنت تالت رابع اهم حاجه في اليوم كان لازم اتذذكر باي شكل :))

انا سعيده اني لاول مرة بقابلكم وبقابل اكبر واكتر مدونين بفتخر وبتشرف بمعرفتهم

حقيقي سعيده واتمني اقدر اكررها تاني وماما تطلق سراحي ^_^