الأربعاء، 30 أكتوبر 2013

الدم الليلة ليلة عيده



الدم الليلة ليلة عيده
يارب يبارك يبارك و يزيده
يارب يبارك يارب
يارب يبارك و يزيده

حملة التبرع بالدم 
تحت رعاية نوران الشاملى
يعنى بت خيخة و اى كلام
يعنى مهرجان التبرع
يعنى جوائز و هدايا
يعنى مفأجات
يعنى تمبولا
يعنى شيكولاتات
تعالوا ستجدوا ما يسركم
الجمعة اول نوفمبر
موعدك بالصالة المغطاه بمعهد المصل و اللقاح بالدقى
للاستعلام 
بت خيخة و اى كلام
 

الاثنين، 28 أكتوبر 2013

التطور الطبيعى لعورة المراة




فى اواخر القرن الماضى ولدت ملك حفنى ناصف فى قرية من قرى الفيوم و ضع تحت قرية عدة خطوط بدأت تعليمها في المدارس (المكاتب) الموجودة آنذاك وبعضها فرنسي، ثم التحقت بالمدرسة السنيّة، حيث حصلت منها على الشهادة الابتدائية عام 1900. ثم انتقلت إلى قسم المعلمات بالمدرسة نفسها، وكانت أولى الناجحات في عام 1903 كتبت العديد من الكتب و بعضها شعرى و لعل اشهرها المطارحات الشعرية العائلية التي كانت تدور بينها وبين والدها نعم والدها والله العظيم. ولها مطارحة مع شوقي ردًا على قصيدته «بين الحجاب والسفور» ثم تلاها بعد ذلك مى زيادة و صالونها الشهير و اضيف  ان مسيرة المراة لم تختفى او تتوقف و قد تلاها نماذج مشرفة كسميرة موسى و سهير القلماوى وغيرهم كثيرين تلك كانت مقدمة لابد منها


المراة المصرية التى كانت صورتها تزين جميع الصالونات المصرية فى صورة عائلية جميلة يفخر بها رب كل اسرة من صورته بجانب زوجته اصبحت عورة وهبت علينا رياح غريبة و تطورت ملابسها الى ملابس غريبة لم يعرفها التاريخ المصرى نهائيا ملابس سوداء كالحة لا يظهر منها حتى عينها و مع تسليمنا بأن الملابس هى حرية شخصية الا ان لملابس كل شخص دلالات قد تعبر عن شخصيته و لعل المشهد الذى استفزنى يوم مظاهرة كامليا اختنا هو مظهر النساء وهم محاطين بحبال كالقطيع 
 
لم يكتفى دعاة وأد المراة بذلك بل تخطوها بأن صوت المراة عورة و مع ذلك لم نسمع احتجاجا بمعنى احتجاج بل همهمات سرعان ما تلاشت صوت المراة التى قاطعت عمر بن الخطاب و هو يخطب على الناس ثم تلاها بقوله صدقت امراة و اخطأ عمر طبعا كل ما سبق تبعه تأثير على المجتمع و تطور طبيعى و التطور الذى حدث ان اصبح اسم المراة عورة ايضا واصبح مألوفا جدا ان تشاهد رجلا مناديا يا برعى و تلتفت لتجد برعى هذا الذى يستجيب لندائه هو امراة او يسأل موظف السجل المدنى رجلا عن اسم امراته فتجده يلتفت يمينا و يسارا و خلفه ثم يدخل راسه الى شباك الموظف متحدثا بصوت خافت جدا لامؤخذة فلانة بينما سيد الخلق صلى الله عليه و سلم كان يصيح بصوت عالى مفتخرا يا عائشة و كان طبيعيا ان تكون الشتائم الموجعة للشخص ان يقال له يا ابن ال......... ضع مكان النقاط كل ما هو انثى و اصبح هذا هو سلو بلدنا تعايشنا معه و تعايش معنا حتى وصلنا اخيرا فى الحرب الاعلامية الاخيرة ان اطلق الاخوان اسم انثى على الفريق السيسى و على المتحدث الاعلامى العسكرى اسم انثى اخر كسخرية و سب لهم و الغريب انى لم اسمع صوت اى انثى تعترض على هذا بل ان اناث كثيرين جدا من المؤيدين لهم تردده و تكتبه على صفحاتهم و اصبح الموضوع عادى جدا لهم و ها نحن ننتظر التطور الطبيعى بعد ان اصبح اسم المراة عورة ثم تطور ليصبح رمزا للسخرية و السب فكروا معى هل سيستبدل مثلا اسماء المراة مستقبلا باسماء رجالى و لن نستغرب مثلا ان نجد فتاة اسماها ابيها حازم او عاصم او ياسر او وجدى ام ان عورة المراة ستتطور و نجد صناديق خشبية مغلقة بمسامير  تتحرك على عجل توضع بداخلها المراة ام يعود حزام العفة من جديد لقد اصبح عقلى عاجزا عن استيعاب التطور التكنلوجى لعورة المراة من سرعة تطوره
ملحوظة
 لم اضع صورة النساء و هم يسيرون بمسيرة كامليا اختى ومحاطين بحبال يمسكها رجال حفاظا على شعور كل انثى

بلد مجانين صحيح  

الخميس، 24 أكتوبر 2013

جاكوزى جاكوزى


رن هاتفى امسكت الموبايل انه صديقى رجل الاعمال والذى اتجه للانتاج الفنى فى تجربة فاشلة ايه يا عم اخبار دبى ايه ؟ . طبعا انت فى دنيا تانية فاجابنى لا انا فى القاهرة وصلت امس انت فين انا موجود فى الاوبرا بجيب الجدول الشهرى للعروض . فقال لى  طيب انا موجود فى الفور سيزون تعاللى الفور سيزون جاردن سيتى مش الجيزة انا مستنيك فى اللوبى
ذهبت اليه وجدته جالسا مع سيدة اعمال لبنانية تمسك بين اصابعها سيجارة و فنجان القهوة امامها فى الاربعينات ترتدى ملابس انيقة جدا و محتشمة و تضع ميكب عن طريق محترفين و هتقوليلى عرفت منين يا ابراهيم انه ميكب محترفين اقولكم من عاشر القوم و انا عاشرت الفنانات سنين طوال المهم بادرنى تشرب ايه قلت حلبة حصى ابتسم وعاد وقالى تشرب ايه كانه لم يسمع قلت عصير المهم استمتعت بحديثهم فى البزنس اه والله حديثهم نيتكم مترحش بعيد و انا اتناول بعض المكسرات الموجودة على المائدة وانتهى الحديث ثم رسمت السيدة ابتسامة على وجهها  ثم استأذنت و انصرفت   
بعد ان انصرفت قالى ايه رايك انا عازمك على ال Health Club فقلت له لا يا عم انا تجاربى السابقة مع الساونا غير مبشرة ابدا و قررت الا اعيدها فقال لى الوضع هنا مختلف و هتشوف المهم اقنعنى و ذهبت معه و بمجرد دخولى وجدت الوضع مختلف جدا بنات زى القمر يرتدون يونفرم يبدو انهم من اوربا الشرقية  ايه يا عم عادل ايه دول هو احنا فى تايلند و لا حاجة قالى متفرحش كده دول المسئولين عن الجيم بس المهم دخلت الجيم و استعملت بعض الاجهزة تحت اشراف استغفر الله استغفر الله البنات اللى قلتلكم عليها ثم اعطونا بشكير و بعض زجاجات الشامبو والشاور بتاعة الفنادق  عينات يعنى المهم اخذت حمامى و جاء وقت الجاكوزى لا اخفيكم الامر انى استمتعت جدا بالجاكوزى ثم جاءك الموت يا تارك الصلاه جاء موعد الساونا  دخلت غرفة الساونا و انا بداخلها شعرت كالارنب المسلوخ و عدت على الدقائق ساعات و بعد ان انتهينا من رحلة الجاكوزى و الساونا    اصطحبونى الى مكان مجهول وجدت رجلا من شرق اسيا قام بتدليك جسمى بمجموعة من الزيوت ذات الروائح المختلفة ميلت على صديقى و قلتله الراجل اللى بيكيس فى حمام الملاطيلى او القاضى او قلاون  او التلات او الاربع برقبته و جاء ال  receipt ايه ايه بتقولوا ايه 480 دولار ليه ياعم ده كل الشغل ده لو عملته فى حمام التلات ميجبش اربعين جنيه و ستين قرش وان كان على البنات اللى زى القمر و عيون ملونة نجيب كم بنت من بولاق او باب الشعرية و يلبسوا باروكة و لنسيز و بعدين هما بيحاسبوك بالدولار ليه ده انت مصرى و صعيدى كمان اجابنى اصلى حاجز فى الاوتيل بجواز سفرى الفرنسى 480 دولار يا مفترين فى حمومة يعنى 10 كيلو كباب و كفتة من عند ابو رامى يعنى عشر قدر فول من عند عم عبده دولار تأكل حى يعنى قسط من اقساط المدرسة و فى وسط انشغالى اذ فجاة اشاهد المطربة احلام فى برنامج قصر الكلام و هى تتحدث عن تصيفيها فى لندن و باريس و كان بتكلفة 3 مليون دولار و فساتينها السنيه وجدت نفسى اعقد مقارنة بين احلام بفساتينها السنيه والسيدة اللبنانية بملابسها الشيك البسيطة لاجد المقارنة ليست فى صالح احلام نهائى بل ازيد الطين بله انا ابراهيم رزق بكل لحوستى و قبل ال    Health Club فيا انوثة عن احلام ثم افاجىء بالطامة الكبرى اذ تخبرها ان ثمن العقد الذى ارتدته فى نهائى مسابقة ارب ايدول 39 مليون دولار نعم يا اختى 39 مليون دولار تضعينها على صدرك ليه هو صدرك ده بيحمل اثقال و لا ايه اوعى يكون صدرك ده اوناش كتربلر وبتقولها عشان خاطر المعجبين ليه يا ست احلام هو كل معجب هيطلع على صدرك يقعد شوية  ويشوف العقد اللى على صدرك كم قيراط 39 مليون دولار يعنى تجوز 3 مليون شاب مش قادرين يتجوزوا يعنى تحل مشكلة انقطاع الكهرباء فى غزة يعنى 80 الف مرة اروح ال  Health Club واتمتع با الجاكوزى
بلد مجانين صحيح
بل
وطن عربى مجانين صحيح 

السبت، 19 أكتوبر 2013

ترسو ابراهيم رزق

 محاولة للتخلص من سينما السبكى
اعود لكم بترسو ابراهيم رزق

لي لي فيلم مصرى قصير 
إخراج
 مروان حامد
 وبطولة
 عمرو واكد وسامى العدل و دينا نديم  
  والفيلم يناقش قضية الصراع بين الخير والشر في المجتمعات العربية، والفيلم مأخوذ عن قصة قصيرة للدكتور يوسف إدريس. وهو حاصل على جائزة لجنة التحكيم من مهرجان برلين
 تدور أحداث الفيلم حول إمام مسجد تم تعيينه في حي الباطنية في  الشهير بتجار المخدرات، ويسعى الإمام لهداية أهل الحي ويقنعهم بضرورة الصلاة. وبعد أن يستجيب الأهالي لأداء الصلاة في الجامع يتعرض الإمام الشاب للغواية من الفتاة الجميلة «لي لي» ويدور بداخله صراع نفسي كبير. الفيلم يدور حول صراع الإيمان والفضيلة ممثل فى الشيخ والغواية للنفس البشرية ممثلة في أهل الحى ولى لى


الجزء الاول

الجزء الثانى

الجزء الثالث
الجزء الرابع

الثلاثاء، 15 أكتوبر 2013

المشهد الاخير

جلس وحيدا هل من الممكن ان تكون تلك نهايته الف لماذا تدور براسه لماذا تلك النهاية ساصرخ و ساصرخ و ساسمع الجميع صراخى و لكن لن يسمعنى احد و لن يستجيب لى احد مثلما سبق و صرخ اخوتى و ايضا لم يستجيب احد على ان استجيب لقدرى و طالما هذا الشىء فيه سعادة للجميع فليكن و على راى عبد الوهاب ضحيت هوايا فداه و مع ذلك فانا احسد جميع الحمير المحيطة بى لماذا لم اخلق حمارا 
اتفضل يا عم ادبحنا
بس اهم حاجة وصيتى
الكبدة و القلب تشيلوهم لابراهيم رزق
اه عشان هو بيحب الكبده بالليه
كل سنة و انتم طيبين
والسنة الجاية زى ما انتوا عايزين
و ادعوا ورايا الدعوتين الحلوين
كله يرفع ايديه

اللهم خلصنا من السبكى و افلامه
و اوضع اوكا و اورتيجا فى المعتقلات
و معه محمد رمضان و كل من يمثلوا ادوار الفتوات
اما الاخوات الراقصات
فاديهم فرصة تانية يمكن يكونوا من التائبات
و لو متابوش السنة الجاية
ايه رايكم نديهم فرصة تانية
اصل بجد هيوحشونى

كل سنة و انتم طيبين
عيد سعيد عليكم يارب
ودى هديتى ليكم

دماغكم متروحش بعيد
ده فوار
هههههههههههه

بلد مجانين صحيح


 
  

الخميس، 10 أكتوبر 2013

انتوا مال اهلكم


كنت عريس و نازل السوبر ماركت اشترى بجنية جبنة رومى و نصف جنية زيتون و بربع جنيه لانشون الا و اسمع من خلفى صوت ياتى من اعماق السوبر ماركت واد يا ابراهيم التفت لاجد ان الصوت لوالدة صديق لى و جارتنا نعم يا تانت و ذهبت لها فقالت لى بص بقى انت تقول لمراتك تانت **** بتقولك انتى خلاص اتجوزتى ماشية بشعرك ليه اتحجبى بقى طب دى ارد عليها اقولها ايه هى يعنى مراتى كانت بتمشى بشعرها عشان تصطادنى و اهو وقع الفار فى المصيدة المهم جزيت على سنانى و قلتلها حاضر يا تانت عاوزة حاجة تانى قالتلى لا بس المهم اوعى تنسى تقولها.
تكون لابس قميص و تلاقى واحد يسالك القميص ده جميل قوى ترد تقول متشكر لحد كده مفيش حاجة هو انت شاريه منين يخصك ايه شاريه منين افرض يا اخى جاى هدية المهم تجز على سنانك و تقول من المكان الفلانى فيتبعك بالسؤال الذى ليس له محل من الاعراب جايبه بكم ليه بتسأل سيادتك هو انت هتدفعلى تمنه
تكون البنت من دى قاعدة فى فرح و تلاقى واحدة جت من حيث لا تدرى عقبالك يا **** مش تشدى حيلك بقى عشان نشوفك فى الكوشة نعم يا اختى تشد حيلها ازاى يعنى تذاكر طول الليل فى كتب كيف تصطادين عريسا و لا تزود مجهودها و تلعب فى الجيم عشان تربى عضلات و تعرف تشد حيلها و تشيل العريس
البنت من دول شدت حيلها و اتزوجت لسه يا دوب نازلة من شقتها و تقابلها قدام الاسانسير ايه يا حبيبتى مفيش حاجة جاية فى السكة جاية منين يعنى ايه مش فاهمة حمل يعنى عايزين نفرح بيكم بنونو فترد لا فياتى الصوت ملاحقا شدوا حيلكم بقى ده ان لم تسالها هو انتوا رحتوا لدكتور و العيب عندك و لا عندوا
البنت تشد حيلها و تخلف نونو قاعدين فى اى مكان النونو يبكى فيطلع نفس الصوت قومى يلا رضعيه لحد هنا و الكلام شبه عادى لكن يظهر السؤال التقليدى انت بترضعيه طبيعى و لا صناعى لا بترضعه عبر الانترنت فتضطر لتجاوبها و يا ويلها يا سواد ليلها لو قالت صناعى تلاحقها الاسئلة و الاستفسارات من نوعية حرام عليكى و حاولى و مينفعش وبقية الاسئلة و الملاحظات
يقابلك فى الشارع يلاقيك مطول شعرك و لابس سلسلة ايه يا عم مطول شعرك ليه كده ده انت قربت تبقى زى البنات و عندما تقول له ان طول الشعر ليس له علاقة بالرجولة و ان الرسول صلى الله عليه و سلم كان شعره طويلا و يقول لك طب و السلسلة دى ايه و كانه مسك عليك غلطة فتقول له ان القواد المنتصرين قديما كانوا يفتخرون بالقلادات التى يلبسونها اللى هى السلسلة يعنى اى انها ليس لها علاقة بالرجولة
يشوف صورتك على الفيس فتاتى لك تعليقات لا يعجبها لبسك او مظهرك او شكلك  طب انا مش عاجبك مطلوب منى ايه اعمل لسيادتك ايه ده ذوقى و دى خلقة ربنا اعمل فيهم ايه
تكتب بوست فتجد التعليقات و التلميحات الغريبة و اشياء و اسئلة خاصة ببيتك و تعليقات ليس لها علاقة بالبوست يا عم خليك فى حالك و فى  اللى انا كتبه فى البوست ايه علاقتك بيا
الى كل هؤلاء
و هؤلاء و هؤلاء
  وهؤلاء  هولاء هؤلاء
و هولاء هؤلاء  هولاء هؤلاء
 و هؤلاء  هولاء هؤلاء  هولاء هؤلاء
 و هولاء هؤلاء هؤلاء  هولاء هؤلاء  هولاء هؤلاء
و هولاء هؤلاء هؤلاء  هولاء هولاء هؤلاء هؤلاء  هولاء هؤلاء
 زى ما قالت اية حماد
انتوا مال اهلكم
و البيضة بجنيه و اللى مش عاجبه يبيض هو
بلد مجانين صحيح
 

الثلاثاء، 8 أكتوبر 2013

من مخنوق سابق الى مخنوق حالى صديقى مصطفى سيف

أنا من ضيع في الأوهام عمره
نسي التاريخ أو أنسي ذكره
تعرف يا درش انت شجعتنى انى اكتب بعض من سيرتى الذاتى و سابدء ببيت الشعر  أنا من ضيع في الأوهام عمره نسى التاريخ أو أنسي ذكره فالشاعر يقصدنى فانا فعلا من ضيع فى الاوهام عمره
  من اين سأبدء حكايتى ابدء من  ثانوية عامة كانت امنية اهلى انى ادخل هندسة و كانت امنيتى معهد السينما و طبعا  مجموعى لم يصل لهندسة قلت الحمد لله طبعا اعترض اهلى على معهد السينما و دخلت تجارة لكن حلم السينما مازال يشغلنى كنت احضر جميع الندوات و جميع المهرجانات و فى سنة ثانية كلية اعجب بمناقشاتى فى الندوات صحفى سورى كبير  و طلب منى ان اعمل فى الصحافة وجدتها فرصة للتقرب من الوسط الفنى 
عملت سنتين الكلية و 6 سنوات بعد الكلية تعرفت فعلا على الوسط الفنى و الصحفى معا تعرفت على شلل الوسط الفنى و كل نجم و شلته الذين يسيطونه فى الوسط و ينقلون له الاخبار و يشتمون فى منافسه امامه عرفت الواسطة و المحسوبية عرفت كيف ان ابن فنان بمجرد تخرجه يسند له اخراج مسرحية ثم افلام و مسلسلات عرفت كيف ابن كاتب شهير و مذيعة بمجرد تخرجه يسند له اخراج فيلم ميزانيته 200 مليون جنيه يضم كل نجوم مصر بينما نحن من نحمل فكر جديد و مختلف نشاهد هذا العبث تعرفت على الوسط الصحفى و عرفت ان 95 % من العاملين به جهلاء اسماء كبيرة ممن يسمونهم الناقد الفنى الكبير يتصل بك ويقول لك انا عندى برنامج تليفزيونى اليوم عن الموضوع الفلانى فماذا اقول تقول له او تكتب له ماذا يقول او صحفى فنى ورئيس صفحة السينما فى اعرق الصحف المصرية يسألك عن رايك فى الفيلم فتفاجىء برايك مكتوب فى مقالته الاسبوعية فنانين تجامل صحفيين من اجل ان يكتبوا عنهم و صحفيين يجاملوا فنانين من اجل ان يقوموا بحوارات معهم و فى وسط كهذا من المتوقع الا تتحمل فانسحبت بحصيلة فيلمين تسجليين لى للاسف كانوا انتاج كندى .
نسيت انا اقول فى وسط هذه المعمعة كان يشاركنى صديق طبيب له نفس قصتى ولكن الاختلاف انه درس الاخراج اى انه مخرج و سينارست له تجارب افلام قصيرة من انتاجه و بعض الكليبات لمطربين عشرات الافكار و الافلام التى كتبناها و لكنها حبيسة ادراجنا لانها غير تجارية من وجهة نظر المنتجين و ليست شبه الحاحا و التفاحة و اللمبى او لاننا غير معروفين  و لسنا اسماء كبيرة كما اننا لسنا من نوعية من يطرقوا شركات الانتاج و يناموا بداخلها نحن نحترم ما نكتب و نريد ان يحترمنا من ينتج اعمالنا حتى عندما حاز احد افلامنا على دعم احدى الجهات الاروبية بدعم 150 الف دولار لم نستفيد منه لان الجهة الاروبية تشترط تصوير 25% من الفيلم قبل صرف الدعم فمن اين لنا هذه التكاليف فانا موظف و هو طبيب كل دخله يصرفه على شراء الكتب وانتاج بعض الافلام القصيرة

وتركت حلمى او هو تركنى و لكن لم تنقطع صلتى بالوسط الفنى حتى فوجئت بصديق لى رجل اعمال والدته خليجية يهوى التمثيل انشأ شركة انتاج انتج فيلما بطولته لم ينجح و برنامج مسابقات لسما المصرى على قناة موجة كوميدى و طلب منى برنامجا استعراضيا تعاقد به على قناة خليجية تقدمه مطربة لبنانية كنت مترددا فى البداية فالبرنامج ليس حلمى وليس اهتمامى لكن اعداد 30 حلقة رمضانية توفر مبلغ كبير اى عرض مادى كبير اتصلت  بصديقى الطبيب و كلمته و اقنعته واتفقنا على ان يكون البرنامج استعراضى و هادف و مفيد و فوضنا المنتج بأن نقوم بكل التفاصيل اى سنقوم بعمل المنتج المنفذ ايضا و اتصلنا بالمطربة اللبنانية و من تعامل مع المطربات اللبنانيات يعرف ان التعامل معهم صعب جدا عكس ما يظهروا به على المسرح فكل مطربة لها مدير اعمال و مدير اعلامى و تقابلنا مع المطربة اللبنانية و مدير اعمالها و مديرتها الاعلامية التى كانت مزة لبنانية هههههه سبق ان كنت اعرفها و هى صحفية لبنانية تعددت اللقاءت فى احد فنادق الخمس نجوم اكثر من مرة و اتفقنا على كل التفاصيل و قال لى صديقى من الافضل ان يسند البرنامج لمخرج اخر حتى نتفرغ انا و هو للاعداد اكثر من ثلاثة شهور نعد البرنامج و نجهز ال   materials  
 انتهينا من كل شىء خاص بالبرنامج الاستديو تم حجزه و المخرج تعاقدنا معه و الديكور تم تقريبا الانتهاء منه و اجرنا الكاميرات و انتهينا من تصميم الملابس و الاستعراضات و سجلت المطربة بعض الاغانى فى الاستديو و اتفقنا على تصوير اربع حلقات بايلوت تعاقدنا مع ضيوفهم و قبضوا عرابين وقبض ايضا جميع العاملين بالبرنامج عرابين الا انا و صديقى كنا نصرف من جيوبنا على ال materials  و المقابلات فى الفنادق فى انتظار تصوير البرنامج و لقد بنيت احلام كثيرة على البرنامج فاذا طلبت منى زوجتى ان اشترى مسحوق اقول لها انتظرى بعد البرنامج ساحضر لكى بيبى سيتر و شغالة فلبينية و اذا طلبت كيلو كباب اقول لها ساحضر لكى خروف مشوى  و قبل تصوير البرنامج بثلاث ايام حدث خلاف شديد بين المنتج و صديقى و تمسك كل منهما بوجهة نظره فالمنتج ذو اصول صعيدية كما ان صديقى من النوعية التى لا تتنازل ابدا و وقعت فى حيص بيص
فى اليوم التالى اتصل بى المنتج يطلب مقابلتى بمكتبه ذهبت اليه وجدت المطربة و مدير اعمالها هناك ترك لنا المنتج المكتب لتقول لى المطربة انا اريد ان تكمل انت البرنامج وحدك بادرتها قائلا و صديقى قالت لى كل واحد فيكم يشوف مصلحته و انت هتتقاضى اجرك مضاعف و لن يقتسمه معك احد طبعا رفضت بشدة كيف احترم نفسى بعد ذلك كيف انسى تعبنا معا و مشاويرى الى التجمع الخامس و مشاويره الى المطرية ليقابلنى كيف انسى سهرنا فى كافيه فى التحرير نجمع ال   materials حتى مواعيد غلق الكافيه و كيف انسى بعد ذلك عشرة السنين التى جمعتنا قد اكسب اموالا كثيرة و قد اخذ فرصة و لكن من المؤكد انى كنت ساخسر نفسى
الغريب ان فوجئت بالبرنامج على قناة الحياة فى العام التالى و لكن باعداد اقل هذه هى بعضا من قصتى ايها المخنوق الحالى او بعضا من سيرتى الذاتية

وأرجع وأقول
لسه الطيور بتفن .. والنحليات بتطن
والطفل ضحكه يرن
مع إن .. مش كل البشر فرحانين

 

السبت، 5 أكتوبر 2013

خذ الحكمة من افواه الصيادلة


ابدى بعض اصدقائى المساطيل اندهاشهم من انهم فقط الذين يقولون حكم
فقررت ان اكتب حكم عن جميع المهن
و احترت بمن ابدء
طلبت دعاء العطار ان ابدء بالصحفيين
و طلبت نور ريماس ان ابدء بالصيادلة
و بما ان دعاء قد تنازلت لنور ان ابدء بالصيادلة
اهدى هذا البوست لنور و دعاء العطار 
و كل الصيادلة مثل مصطفى سيف و شرين سامى و نوران سراج و سهاد و غيرهم كثرين


فى احيان كثيرة تصير المادة هى لبوس الحب الخافض لحرارته

وضعك للبلاستر لتدارى جروح الوجه لا يجمله و لكن يزيده تشوها عالج الجروح اولا

 استخدام الدين كمضاد حيوى لحل المشاكل السياسية ينفع فى البداية و لكن بتكراره يفقد تأثيره 

تحتاج الزوجة المصرية الى تناول انتوسيد  لكى تعالج احاديثها


لو تم اختراع فوار للمشاعر سيتم اخمادها بعد قليل اما فوار المشاعر الدائم فهو العطاء

الصراحة مثل الحقن فى العضل احيانا مؤلمة و لكن تصل لاهدافها بسرعة

 الفرق بين المراة الحامل الغربية و المراة الحامل المصرية  كالفرق بين الفولتارين و الاسبرين

المراة المصرية خدمة ليلية لابنائها فقط اما زوجها فبارت تايم

يقال ان الرجل المصرى مرهم خارج المنزل صبغة يوت داخل المنزل

الكذب هو ترامدول الساسة لا يستطيعون الاستغناء عنه

 قطرة المحب خروف

الحب الحقيقى ان تصرف لمن تحب الدواء الذى يحتاجه بدون روشتة