الخميس، 30 يونيو 2011

ابتسم انت روميو

استكمالا و بناء على طلب الجماهير نستكمل العبارات المكتوبة على السيارات او هتاف الصامتين نأتى الى الرجل الطيب ماذا يقول
سولار فى البنك و لا مليون دولار فى البنك
يقصد ان العمل و الاجتهاد افيد من الفلوس الجاهزة بدون تعب
و يكتب ايضا
طالعة مستورة و راجعة مجبورة
و يكتب ايضا للسادة رجال الاعمال اصحاب القروض
اكل فول و اخرج بعرض و طول
و لا اكل كباب و تجيلى الديانة ع الباب
و يكتب عن رزقه الحلال
على قد ما تعبنا
مارحش على الفاضى تعبنا
ناتى بقى لروميو السواقين عم الحبيب فيكتب عن موعد غرامى لحبيبته
الحلو ع الدائرى اول ما شافنى جرى
اكمنه لسه صغير و عضمه لسه طرى
و صاحبنا اللى متاثر من حبيبته يقولها
خلص الكلام
و اللى باعت رسالة الى الى زوجته
خلى بالك من الواد
انا نازل يا سعاد
ثم عم الحبيب الجامد اللى باعت لحبيبته بيقولها
حبك نار
ثم الحبيب الولهان اللى خد بمبة من حبيبته و سابته بيقولها
و قدرت تهجر
ثم يتبعه بتهديد و وعيد و يكتب لها
بكرة تعرف يا ناكر خيرى زمانى من زمن غيرى

و على نهج ما يحدث فى طره اتوقع ان يكتب فى المستقبل ما يلى

بيحسبنا عيال عاوز يجيب مكانه الغتت جمال
بعد ما كلنا هم هم خلع و سافر على شارم
انت بتقول عز يبقى انت اللى سرقت مصر اه يا مصر
اللى معاه جنيه و دولار يتجوز شاهيناز النجار
اللى يمسك الداخلية لازم يتجوز المانية
اتجمع الحرامى و التعبان و ورا اسوار الليمان
يا ترى انت فين يا موافى اه يا موافى
اللى يتكتبله يعيش فى سرور يراس مجلس من 400 طرطور
الحرامى السعيد يتمسك فى مدريد
لكن تبقى الحكمة الخالدة
عيش شريف و لو جعان
احسن من القاعدة يوم فى الليمان
بلد مجانين صحيح

ملحوظة اى كلام و خارج سياق البوست
اغلب الموجودون فى طرة زوجتهم توفوا و تزوجوا بعد وفاتها سريعا مثل نظيف و اكتفى بواحدة و العادلى و تزوج اثنان اما عز فقد تزوج ثلاثة بدون وفاة اما صفوت الشريف فلم يكن فى حاجة للزواج نهائيا  





الثلاثاء، 28 يونيو 2011

امان ربى امان

تشتد الطوارىء فى المنزل جميع الاعمال المنزلية تم عملها و ما لم يتم عمله يؤجل الى الغد يخيم الهدوء على المنزل لا صوت يعلو على صوت المعركة منتهى التركيز منتهى اليقظة باقى من الزمن عشر دقائق باقى من الزمن تسع دقائق باقى من الزمن ثمانى دقائق باقى من الزمن سبعة دقائق باقى من الزمن خمسة دقائق باقى من الزمن اربعة دقائق باقى من الزمن ثلاث دقائق باقى من الزمن دقيقتين باقى من الزمن دقيقة استنوا كده انتو مستعجلين ليه انتوا معندكوش صبر هو انتو مش بتتفرجوا على مسلسلات تركية طبعا مش امتحان ثانوية عامة ده حانت الحلقة سبعة و تسعون من الجزء العشرون من المسلسل التركى سيلا طبعا يسبق المسلسل اعداد الشاى و الفيشار و الكيك لزوم التركيز 
طبعا بعد مسلسل سيلا سيتم عرض مسلسل العاصى على قناة MBC1 بعدها قناة  MBC4 تعرض طريق الخريف يليه مسلسل الغريب ثم تعرض MBCدراما مسلسل ليلة حيزران ثم رجل من قلب و مسلسل العصفور
قناة ابو ظبى تعرض مسلسل دقات قلب و العشق الممنوع اما قناة دبى فتعرض حصريا رفيق الدرب
طبعا حاولت اتابع اى مسلسل تركى فشلت فشل زريع الدبلجة تفشل اى متابعة و محسوبكم فى اللغة التركى لا اعرف سوى  امان ربى امان و مش عارف معناها ايه و المسلسلات اجزاء شغال كل جزء مائة حلقة شغال و اسماء خليل و زياد و يحى و جودت عاصم و ناديا و سيلا و لميس و دارين  كله شغال تركب المترو تسمع بنتين بيكلموا يا حلاوة سليم شفتى قد ايه رومانسى ثم تسمع تنهيدة تحرق قفاك و انت واقف مديهم ضهرك ثم تنزل لمصلحة حكومية  تسمع الموظفة تقول لزميلتها شفتى عاصم بعد ما مات صحى تانى انا والله فرحت بعد ما كنت بعيط اقعدت ازغرط و جبت للعيال مصاصة طبعا انا افتكرت عاصم جوزها فسالتها محاولا التقرب منها لكى اقضى المصلحة هو عاصم بيه ده زوج سيادتك و لا اخوكى نظرت لى نظرة نيوتن الى اجهل الجاهلين عاصم ده فى المسلسل التركى يا ؟؟؟ طبعا مش محتاجين علامات الاستفهام دى معناها ايه دى تيييت كبيرة معناها كده انى مش عايش فى الدنيا و مش بفهم 
انتوا مش عارفين المسلسل التركى ده بيعمل  ايه
معناه انك تبقى قاعد بتتفرج على الكورة مع شوبير او مساء الانوار مع مدحت شلبى فى تلفزيون حجرة النوم و تضطر مرغما انك تغادر الحجرة لكى تشاهدهم فى تلفزيون الصالة
انك طول ما انتى ماشى تسمع يا حلاوة سليم يا جمال عاصم يا رقة مهند بينما الشباب المصرى اللى زى الورد محدش بيعبره الايجبيشن الاصلى مش عارف فيه ايه مهند ده حتى واد معصعص و رفيع و باين عليه عنده انميا لمعلوكاتكم الخاصة هو ممثل من الدرجة الثالثة فى تركيا و غير معروف تقريبا لكن الدنيا حظوظ
هاقولكم على حاجة هتغيظ الجنس الناعم انا اتكلمت مع مهند اثناء زيارته للقاهرة و الله حسيت باختلاف يتكلم انجليزية ركيكة ال يعنى انا بتكلم انجليزى برفكت متخدوش فى بالكوا و الفضل الكبير فى شهرته للممثل السورى صاحب الصوت
صحفية صديقة فى مجلة الشباب طلبت منى مساعدتها فى اجراء حوار مع مهند فقلت لها مهند ايه و نور ايه الراجل اللى قاعد فى اللوبى ده المخرج الانجليزى نيكولاس روج ده عمل فيلم و قبل ان اقل لها تاريخه بادرتنى قائلة القراء بتوعنا لوكل انا عايزة حوار مع  مهند يا سلام مهند بقى لوكل يعنى مولود فى الدرب الاحمر او باب الشعرية يعنى
المثير للغيظ ان المسلسلات التركية بها كم كبير من المط و التطويل يلاحظه اى دارس او متخصص بمنتهى السهولة لكن يتم متابعتها دون ملل و بمنتهى الجدية مما فكرنى بفترة غزو الافلام الهندية و امان يارب امان بلد مجانين صحيح
  

زمان و انا صعلوك

 الجزء الثالث من اتكلم


مش عارف ليه هافف عليا زمان يا سلام سلم زمن العز بصحيح كنت ممكن افرتك الماهية فى عشر ايام هى عيشة و لا اكتر يا نور النبى
يالله يا شباب عايزين نتعشى عند ابو رامى ثوانى و نكون هناك يالله يا شباب عايزين نروح اسكندرية جرى ع البيت شنطة هاند باك صغيرة كم تيشرت و كم شورت و فوطة و شبشب و جرى تخلص
نروح اسكندرية نلاقى نفسنا فى الساحل الشمالى معلش انا قديم شوية مكانش فى ام بى ثرى او فور وكمانك فى ودانك تسمع اللى يعجبك و عايش سافرت بقى لقيت شقة ملقتش شقة مش مهم احنا فى مرة سافرنا اسكندرية و كان فى العيد و بحثنا عن اى شقة ملقناش و الفنادق كلها محجوزة فى شقة كانت هتفضى ثانى يوم العيد نمشى يعنى لا طبعا اقنعنا البواب و اجرنا الغرفة بتاعته اليوم ده حياة كلها سعادة حياة صعاليك طبعا انتو مجربتوش الصعلكة 
الصعلكة فى اسكندرية مثلا انك الصبح تكون بتفطر فول و طعمية عند محمد احمد بمحطة الرمل بليل بتتغدا عند قصر حسنى للمشويات و الصبح بتتغدا سمك مشوى على الصاج بابوقير و العشاء وجبة سمك و جمبرى و كابوريا عند قدورة فلست مش مهم اول يوم تبقى فى الشاطبى تانى يوم فى المنتزه نرجع بالطائرة فى قطار الصحافة او حتى مسطح ع القطار مش مهم
حاليا من اول قبض المرتب يتم وضع ميزانية من اول الشهر ثم يتم جدولة المرتب اكثر من مرة طوال الشهر ثم تنعقد الجمعية العمومية انا و زوجتى لاعتماد الموازنة النهائية
ناتى للسفر للمصيف من شهر تقريبا يتم اعداد الحقائب و كأنك ستهاجر و يتم اعداد تقريبا من عشر حقائب الى اربعتاشر و ربع حقيبة واحد فلحوص هيطلع و يسألنى هو الربع الحقيبة دى بتاعة مين هاقوله الربع حقيبة دى خاصة بى
طبعا من اول يوم للسفر مفيش راحة لو قاعد جوه قرية سياحية تراقب العيال و هى بتلعب لاحسن يروحوا ناحية حمام السباحة لو قاعد على البحر طبعا لا تستطيع ان تنزل البحر بمفردك ساليناز على كتفك و زياد فى ايدك طبعا لا تستطيع ان تجلس بهدوء تحت الشمسية يأتى بتاع الفرسكا ثم الايس كريم ثم البالونات ثم ثم ثم ناتى الى المشكلة الكبرى و هى الماء و الخضرة و الوجه الحسن طبعا الماء لا نستمتع به و الخضرة مش موجودة اصلا اما الوجه الحسن فانت خاضع لرقابة حكومية اشد من رقابة الامم المتحدة و منظمات العمل المدنى لدرجة لا تستطيع الالتفات يمينا او يسارا او اماما الاتجاه المسموح به ارضا فقط و الا طبعا انتو فاهمين
طبعا لا تستطيع الجلوس على البحر اكثر من ساعات محدودة خوفا على الاطفال من التعرض للشمس فترة طويلة
طبعا الخروج ليلا عذاب و بالذات لو نام احد الاطفال طبعا هم واضعين جدول للنوم يوم زياد ينام و يوم ساليناز تنام اما اليوم الثالث فزياد و ساليناز معا يناموا فى اليوم الرابع يحتفظ زياد و ساليناز بكامل طاقتهم لكن امهم تخرج علينا بأن انا مرهقة اليوم و كابس عليا النوم يالله نروح
و هكذا تبدء و تنتهى الرحلة الميمونة و انا اتذكر الايام الخوالى ايام العز ايام الصعلكة و اتمنى لو ترجع يوم واحد لكن نسيت ان اقول لكم ان مجموعة الصعلكة موجودة معنا فى نفس الرحلة لكن للآسف مع زوجاتهم لا نستطيع الفرار من هذا الكمين الزوجى الا لحظات بسيطة اثناء استحمام الاولاد من مياه البحر
بلد مجانين صحيح             

الأحد، 26 يونيو 2011

العذاب شوبنج

اهدى هذا الجزء الى القلب الطيب ملك الزهرات الانسان الخلوق الحنون المثقف الواعى الاستاذ فاروق فهمى و اقول له ان شعب البلوجر كله يريده ان يفتح التعليقات مرة اخرى على ان يفعل خاصية الاشراف على التعليقات كما اهنيه ببوسته الاخير و ذكرياته مع كيمو و لولو

الجزء الثانى من اتكلم
الشوبنج يعنى ايه شوبنج يعنى تكون قاعد فى حالك كده مستمتع و انت بتتفرج على ماتش الاهلى و هو بيكسب او تكون مستمتع كده بمنتهى الروح الرياضية على ماتش للزمالك و هو بيخسر تقوم تسمع الصوت الحنين احنا عاوزين ننزل نشترى شوية حاجات للعيال طبعا ينزل الخبر عليك كالصاعقة و ترد بمنتهى الرقة هو مش احنا لسه مشترين حاجات للعيال الاسبوع الماضى فياتى الرد سريعا دى كانت حاجات للبس البيت
طبعا زياد و ساليناز بيراقبوا الموقف من بعيد طبعا لا اجد امامى الا الموافقة
طبعا محسوبكم لما بينزل يشترى بيشترى بسرعة الصاروخ انظر الى الفاترينة عجبنى البنطلون عجبنى التيشرت او القميص او الحذاء ادخل اشترى عندك مقاس كذا موجود اللون كذا موجود ادفع و امشى
طبعا كل ده عند الستات مرفوض تبدء الرحلة بمشاهدة المحلات و يحدث هذا الحوار
هى  ايه رايك فى الفستان ده
انا   جميل
هى  طب ايه رايك فى الفستان ده كمان
انا   جميل
هى  طب الفستان ده اجمل و لا الفستان الاول
طبعا انا نسيت شكل الفستان الاول او بمعنى اصح لم اهتم ان انظر اليه انا كان غرضى يعجبها و تشترى و اخلص
انا  لا ده اجمل 
هى بس انا شايفة الفستان الاول اجمل
انا  خلاص نشترى الفستان الاول
هى انت عمرك ما تريحنى خالص و تساعدنى
انا  الفستانين حلوين نشترى الاثنين
نسيت اقول لكم اننا لم نستطع دخول المحل نظر لان زياد و ساليناز يمسك كل منهما بايس كريم و ممنوع دخولهم المحل بالايس كريم و علينا الانتظار ساعة من العذاب تقريبا لحين انتهائهم منه و بعد دخول المحل و فحص الفستاتين لم يعجبها اى منهما لان احدهما قماشته غير جيدة و الاخر بعد ان قاسته الست ساليناز لم تجده جميلا عليها
طبعا طوال سيرك فى المول او الشارع يقابلك بائعى البلالين و العرائس و الفيشار و عليك ان تشترى او تتجهم و ترفض حسب الحالة المزاجية
طبعا تتكرر هذه المشاهد و الحوارات مع كل قطعة تشترى و قد نرجع لنشترى قطعة ملابس تركنا محلها منذ اكثر من ساعة و عليك ان تحفظ اى محل كانت موجودة به
طبعا تتخلل رحلة الشوبنج زيارة لاحد محلات الوجبات السريعة كنتاكى او مؤمن او تكا او بيتزا هت لان العيال لا تتحرك الا بالبنزين و ده بنزينهم
اخيرا اعجبها فستان فرحت جدا و طرت من الفرحة و صرت اقبل الزبائن و الكاشير و انا اقول جول جول لكنى فقت من الفرحة على  الغاء الهدف و راية تسلل مرفوعة من الانسة ساليناز لان الفستان لم يعجبها و تبدء المفاوضات معها لاقناعها بجمال الفستان لكنها تنتهى غالبا بالفشل
طبعا زياد مثل حالاتى ما نختاره يرضى به طبعا مع طول فترة الشوبنج تزداد المشتريات و تفلس الجيوب رويدا رويدا
عند الرجوع الى المنزل نكتشف اختفاء شنطة بها جاكت خاص بساليناز و على المرور على جميع المحلات التى زرتها للبحث عن جاكت ساليناز و خرج الفرمان بالنزول حالا للبحث عن الجاكت و فشلت المفاوضات باقناعها بالانتظار للغد طبعا نزلت فى التو و اللحظة و لكنى لم اذهب لابحث عن الجاكت بل ذهبت الى الكوفى شوب لمقابلة اصدقائى نتبادل الاحاديث و ننسى الهموم هايد بارك زوجى يعنى و عند عودتى اخبرتها ان المحلات اغلقت ابوابها و اخبرتها ساذهب غدا بعد العمل للبحث عن الجاكت
طبعا كما وعدت و وعد الحر دين عليه ذهبت لابحث عن الجاكت و لكنى وجدتها تجربة فاشلة و تعب على الفاضى فذهبت الى المحل اللى اشترينا منه الجاكت و اشتريت جاكت اخر و عدت الى البيت سريعا و دخلت مختالا و انا اصرخ لقيت الجاكت لقيت الجاكت انا تعبت تعب انهارده انا لفيت محل محل و سالت كل البايعين خدى الجاكت اهو
واذ فجاة افيق على مفاجاة اخرى الجاكت الاصلى موجود لقد نزلت زوجتى صباحا و بحثت عنه و احضرته و اصبح هناك اثنين جاكت هل تم استنساخ الجاكت امسكت الجاكت فى يدى و انا اقول حقا العذاب شوبنج بلد مجانين صحيح
         

السبت، 25 يونيو 2011

اتكلم

طالما اليومين دول حملة اتكلمى فلماذا لا اقود حملة اتكلم
البنت قاعدة فى بيت باباها واكلة نايمة شاربة لابسة لو لا تعمل تحصل على معاش يتقدملها الواد من دول و هى على صرخة واحدة مخدوش يا بابا مخدوش يا ماما مخدوش يا عمو مخدوش يا خالو ليه يا بنتى متخدهوش ليه ده بصى شوفى شكله مش كول خالص ده لابس قميص بحلقى على بنطلون فحفحى و لا الجزمة بتاعته فى حد بيلبس جزم دلوقتى الكل بيلبس سابوه و تحتيه شراب و بعدين ده لابس بنطلون عادى فين البراموده بتاعه و بعدين ده مش لابس تيشرت كت و فين التاتوه اللى على كتفه و ايه ده شنب فين السكسوكة بتاعة تمورا
ناتى للشاب الغلبان يتخرج من هنا و يبدء البحث عن عمل يتصفح اعلانات الوظائف
مطلوب سكرتيرة حسنة المنظر بمرتب مغرى
يقراء الاعلان ثم ينظر الى المراه و ينظر الى وجهه و يقول جتنا نيلة فى حظنا الهباب
مطلوب فتيات حسنة المظهر ممشوقة القوام للعمل كعلاقات عامة بشركة كبرى 
يقرا الاعلان و ينظر مرة اخرى الى المراه و ينظر الى قوامه الممشوق فلا يطيق قوامه فيكسر المراه
اخيرا يجد عمل باحد المصانع بالمدن الصناعية بمرتب لا يتجاوز ستمائة جنيها شهريا و العمل طوال 12 ساعة بعقد مجحف يستطيعون الاستغناء عنه بكل سهولة و يسر
يقبض الشاب مبلغ ستمائة جنيه تقسم كالاتى
فطار سندوتش فول و سندوتش طعمية 4 جنيه فى 30 يوم 120 جنيها
 الغذاء علبة كشرى مخصوص 5 جنيه فى 30 يوم 150 جنيها 
العشاء سندوتش كبدة و سندوتش سجق من سيد هوهو 5 جنيه فى 30 يوم 150 جنيها
تلاتة كوب شاى فى اليوم فى 30 يوم 90 جنيه
3 جنيه مواصلات فى اليوم للوصول الى المنزل 90 جنيه
مجموع المصاريف 600 جنيها شهريا
بلد مجانين صحيح
الى اللقاء فى باقى الحكاية

الجمعة، 24 يونيو 2011

يا بوى يا مصر

يا بوى يا مصر اما الواحد بيحبك حب
منين ما راح البال واخد حبك فى القلب


اولا اعتذر عن قطع سلسلة بلد مجانين صحيح و بأذن الله ساعاود قريبا جدا كتابتها و لكنى احاول ان اعود و ارجو ان تسامحونى على ما اسطره من تخاريف قد تبدو غير مهمة لكم او مملة و لكنها محاولة للعودة
ساتحدث اليوم عن الصعيد و عن الاقصر الوجوه السمراء الجميلة الطيبة ساحدثكم من طيبة و عن طيبة
فقط لى ملاحظة على مصر للطيران من غير المعقول الارتفاع بسعر التذكرة الى 633 جنيه اول حقوق المواطن الصعيدى سرعة الانتقال و التواصل مع العاصمة بسهولة و يسر واول سبل التواصل هو الطيران فيجب تخفيض اسعار الانتقال بالطيران عن طريق رحلات الشارتر فاذا عجزت عن توفير الرحلات يجب فتح المجال للقطاع الخاص  فمن غير المعقول ان تقلع الطائرة و على متنها بضع عشرات من الركاب بينما تعانى القطارات من الزحام كما ان اقلاع الطائرة بمثل هذا العدد غير اقتصادى  كان يجب تخفيض الاسعار
احدثكم عن الاقصر الجميلة من اول المطار وجوه طيبة فى استقبالك تواسيك بكل حب و شهامة و رجولة سيارات لا تعرف اصحابها فى انتظارك الكل يتسابق لخدمتك احسست ان مصر مازالت بخير طالما وجد هؤلاء محتفظين بالطيبة و الاصالة سارت السيارة فى طريق المطار الجميل الملىء بالخضرة و وصلت الى مكان العزاء الذى يسمى بالمندرة و هو مبنى لكل عائلة مخصص للعزاء وجدت جمعا كبيرا من الناس الكل يقف بجانبك جاء موعد العشاء فوجئت بعدد كبير جدا من صوانى الطعام عادة فى الصعيد لا يتكلف اهل المتوفى شىء بل ياتى الجيران و الاحباب بالطعام طعام اعد بكل جودة و حب من كثرة الطعام تقريبا بقيت صوانى بدون ان تلمسها يد اقوى الامثلة فى التكافل و الاخاء الاستاذ فتحى جرجس المحامى يحمل صنيته بنفسه و يقف و يدعونا بكل حب الى الطعام اقسم بالله دمعت عيناى من عظمة تلك الناس
العمل يسير بكل همة فى الاقصر و التجميل و التطوير على اشده  اصبحت الاقصر مثل العروس التى تستعد للزفاف و لا يبقى الا العريس و هم السائحين الذين قل عددهم جدا تكاد الطائرة ان تكون خالية اتمنى ان يقوم اهل الاقصر بوقفة امام معبد الكرنك او بالبر الغربى او على كورنيش النيل او بمحطة القطار لدعوة السائحين لزيارة الاقصر
و اتمنى ان تكون المليونية القادمة مليونية عودة السياحة و دعوة السائحين لزيارة مصر قولوا يا رب




الخميس، 23 يونيو 2011

شكر واجب

اشكركم جميعا على ما احاطونى به من مشاعر و مواساتى فى فقيدى الراحل و اخص بالشكر استاذى الكريم ملك الزهرات العزيز فاروق فهمى لاتصاله بى و نشره بمدونته الجميلة و الاخت الكريمة ام هريرة لنشرها بمدونتها
انا لله و انا اليه راجعون
لا اراكم الله جميعا مكروها فى عزيز لديكم


الأحد، 19 يونيو 2011

ابتسم انت بتتشتم

عمرك اتشمت و ابتسمت او عمرك اتشمت و مقدرتش تعمل حاجة
عمرك قريت على سيارة ميكروباص او نقل متبصليش يا عبيط انا جاية بالتقسيط ايضا الم تقرا متبحلقش كده يا لوح انا جاية بطلوع الروح و ايضا سوقوا بالراحة يا بهايم عشان السواق نايم وايضا لا تجحش محسوبك الجحش طبعا معروف لا مؤخذة من هو العبيط و اللوح و البهايم و الجحش
نأتى للبيه الحكيم طبعا الحكمة ليها ناسها تلاقيه بيقول
الرجولة مواقف و الندالة دروس
لو كان الرزق بالجرى ماكنش حد حصلنى
اللى يخاف من العفريت يعمل عبيط 
لما كنت عصفور اكلونى و لما بقيت اسد صاحبونى
اللى امه بتدعيله احسن من اللى امه تديله
عتاب الندل اجتنابه
مفيش صاحب يتصاحب
لو كان الجرى بالرتب كان زمانى لواء
نيجى للبيه اللى خايف من الحسد يقول ايه
دى قصة كفاح مش جاية على المرتاح
متبصليش بعين راضية ده انا طلع عين اهلى فى السعودية   
الحلوة من دمياط و عليها اقساط
الحلوة من حلوان و صاحبها راجل غلبان
الحلوة خوخة جت بعد دوخة
ماتقوليش دى بكام دى جات بدهب المدام
نيجى لصاحبنا اللى فرحان بنفسه كله يوسع ليه نشوفه هيقول ايه
من حق التقيل يدلع
ان عشت هذلكوا و ان مت ربنا يسهلكوا
شوفوا الجديد يا بلد التقليد
تركب معايا اسليك تنزل اولع فيك
تعمل حسابى اقدرك تهزر معايا اعورك
دلعها فى الغيارات و ريحها فى المطبات
الحلوة لما تدلع تخلى الاسفلت يولع
ان نام السبع شوية كلاب يكلوه
و لقد رصد ابو الاجتماع الراحل الدكتور سيد عويس هذه الظاهرة فى كتاب مهم جدا اسمه هتاف الصامتين لكن ما لم يرصده الدكتور سيد هتافات التكاتك مثل
مع روتانا توك توك مش ممكن هتمشى على رجليك
ماشى على رجلك ليه ده التوك توك بقى بجنيه
شغل المساحات و عاكس فى البنات
تروح شمال تيجى يمين احنا برده سواقين
بلد مجانين صحيح 




 
 

الجمعة، 17 يونيو 2011

توك توك فى الشقة

انا شارب تلاتة استيلا و يجى 8 كمان اى دى
انا راجل قوى مش قلة
انا عامل دماغ قراقيش
علشان مبقاش فيه حشيش
3 سبعات بسكوتة نفض و متقليش
كله معانا يعيش
خلاص مبقاش فى بنى ورجع الاخضر و ملى السوق
دماغى مبقتش تاكلنى و مش تعبان و عايز افوق
ما بقتش ارص حجارة ما بلفش اى سيجارة
انا عامل دماغ كتاكيت و بخبط فى العفريت
تلك هى المقدمة و اليكم باقى الاخبار


شربت حجرين ع الشيبشة 
مع توتو و سبع و ويشا
يانى يانى يانى
مش هاعمل كده تانى
و خدنى جعران و الكابتن
و رحنا عند عماد فيشا
و نزلت و انا ماشى فى الشارع
شوفت الا نازل للطالع
فضلت ماشى مع نفسى و قلت اشوف اللى فى نفسى
اروح ادور اروح ادور على نفسى
و يانى يانى يانى
من الحجر الاولانى
و يانى يانى يانى
ولعت الحجر التانى
شوفت تعلب كان بينط
كان بيلعب و يا البط
شوفت ديك كان شايل فيل
شوفت نملة ديلها طويل
و قابلنى قطر يا عم البيه
غصب عنى دوست عليه
و اتهيألى  ان انا فى بولاق
واللى شايفها كانت وراق
اوعوا تقولوا دماغى مش فيا
دى الوراق جنب المنوفية


دخلت ساليناز و بتسألنى يعنى ايه ستلا يا بابى بكل براءة الاطفال قلت لها يعنى النجم ضحكت و قالت هو النجم بيتشرب يا بابا قلتلها لا قالتلى ستلا دى بتتشرب و كمان اى دى انا عايزة اشربهم وقفت و فركت عينى ساليناز بنتى اللى فى كى جى 2 عايزة تشرب ستلا و كمان اى دى يا للعار و تقمصت يوسف وهبى و لسه هاقولها اخرجى عليكى اللعنة اذ فجاة اسمع من بعيد جهاز الكمبيوتر مشغل فيلم اسمه محترم الا ربع مش محترم و لا حاجة انتاج اللى مش محترم السبكى و بطولة اللى مش محترم محمد رجب تشاركه طفلة ترقص و تغنى على اغنية انا شارب 3 ستلا كل هذه المشهيات امام طفلة لم تتجاوز  عمرها خمس سنوات التقيل جاى ورا سمعت الاغنية وجدتها تحكى عن تفاصيل اخذت الاغنية و ذهبت الى متخصص فى الشئون المزاجية و اليكم هذا الحوار
انا                يعنى ايه اشرب 3 ستلا و كمان 8 اى دى
المتخصص     نظر باستغراب يعنى عامل دماغ كبيرة قوى
انا                يعنى ايه دماغ قراقيش
المتخصص    يعنى دماغ كيمياء يعنى برشام      
انا               يعنى ايه تلت سبعات بسكوتة
المتخصص   الحشيش المضروب قطعة حجم البسكوتة 
انا               ما هو البنى و ما هو الاخضر
المتخصص   البنى الحشيش و محدش لاقيه و الاخضر الترامدول 
 
خرجت مذهولا من هول التفاصيل اغنية تحمل تفاصيل حقيقية عن شرب الخمور و تعاطى الحشيش و اكل القراقيش كل هذا فى قالب غنائى راقص فى فيلم ترقص طفلة على الاغنية مع ممثل معروف مع انتشار الاغنية فى الميكروباصات و التكاتك و الافراح ماذا ننتظر من اطفالنا نقول لهم اسمعوا فيروز او ام كلثوم دى ساليناز بتقعد تسمع معى فيروز و حافظة بعض اغنياتها مستوى الذوق و القبح نزل الى هذه الدرجة


نعود مرة اخرى الى ساليناز حاولت اعرف هى بتسمع ايه وحاولت اطبق نظريات التربية الحديثة و الفت نظرها الى  اغانى الاطفال العادية بطريقة غير مباشرة و ان ابعد اذنها عن هذه الاغانى لتسمع الاغانى المعروفة اللى تربينا عليها محمد فوزى ليلى نظمى او حتى الست نانسى عجرم و اغنية شاطر شاطر فقلت لها بصى يا ساليناز الاطفال الحلوة متسمعش الاغانى دى تسمع الاغانى اللى بتتكلم عن الحيوانات و الطيور و الاطفال معلومات مفيدة عن الاكل و الشرب

قاعد فى الشقة و اذ فجاة احسست بتوك توك فى الصالة تملكنى الذهول توك توك فى الشقة خرجت مفزوعا توك توك فى شقتى و كمان مشغل  شربت حجرين ع الشيشة فعلا توك توك الصوت يأتى من الصالة خرجت مفزوعا وجدت ساليناز تسمع الاغنية تقمصت مرة اخرى المرة دى زكى رستم فى فيلم انا و بناتى و قلت و صرخت قلبى قلبى ساليناز بنتى بتسمع شربت حجرين ع الشيشة و انا ماسك قلبى وجدت ساليناز تتكلم بعصبية مش انت يا بابى قلتلى اسمع اغانى فيها طيور و حيوانات و الاكل و الشرب و فى نفس اللحظة سمعت
شفت تعلب كان بينط
كان بيلعب و يا البط
شوفت ديك كان شايل فيل
شوفت نملة ديلها طويل

تذكرت انى السبب قلتلها تسمع اغانى عن الطيور و الحيوانات 
كمان سى هوبا مكفهوش شربت حجرين ع الشيشة
بيدى الاطفال معلومات غلط و بيقول شفت تعلب بيلعب مع البط
و الديك بيشيل فيل و النملة ليها ديل

امسكت بقلبى و احسست بالخطر  فكرت هى الاطفال فى الزمن ده مفروض تسمع ايه  و احسست انى السبب وضعت يدى على راسى و انا اقول  اه يانى يانى يانى مش هاعمل كده تانى
بلد مجانين صحيح


   
   




الأربعاء، 15 يونيو 2011

مبروك المدام حامل

مشاهد كثيرة فى الدراما المصرية تتكرر كثيرا و نشاهدها كثيرا دون ان نتوقف امامها مع انها قمة فى السذاجة و مع ذلك تتكرر و نشاهدها هل التعود ام التعود او التعود و ربما التعود
جميع اللصوص فى الافلام يجب ان يلبسوا تشيرتات مقلمة تقريبا يونفورم موحد كما ان جميع اللصوص يجب ان يقيموا بمكان ملىء ببراميل الطرشى و كاوتش السيارات ما علاقة اللصوص بالبراميل و الكاوتش و لماذا يلبسون تيشرتات مقلمة
تنزل البطلة لتجرى و راء البطل لتراقبه و بمجرد ان تنزل يسير بسيارته تنظر و تقول تاكسى ليقف التاكسى فى التو و اللحظة لتقول له وراء هذه العربية يا اسطى ليسير سائق التاكسى دون ان يستغرب او ينطق بكلمة
لو الفيلم بوليسى نجد ان ظابط وحيد طوال الفيلم يحقق فى الموضوع كل البلاغات فى كل الاقسام لا يوجد الا هذا الظابط
كل الممثلين يجلسون فى المنزل بكامل ملابسهم و طالما شاهدنا ماجدة و فاتن حمامة و شادية و هند رستم يجلسون فى المنزل بالفساتين السواريه كما ان الممثلات يصحون من النوم ميك اب كامل
فى كل الافلام تشعر البطلة بالدوار ثم تنقل الى غرفة النوم و يستدعى الطبيب الذى يخرج من الغرفة مخاطبا الزوج مبروك المدام حامل دون تحاليل او سونار اقطع دراعى لو اعرف هما بيعرفوا المدام حامل ازاى
بلد مجانين صحيح 

انا و الفول

بمناسبة قيام  محل فول شهير بتوقيع عقد رعاية للموقع الرسمى لنادى الزمالك الحبيب  لا اعرف تاريخيا كيف بدء الحوار بين المصريين و الفول فالفول مرتبط تاريخيا بالمصريين لدرجة من الصعب ان يمر اسبوع على اى مصرى دون ان يفطر فول مهما كان مستواه
محسوبكم بيحب الفول وباروح ورا الفول اى حتة لكن مش اى فول لازم وش القدرة طبعا اغلبكم لم يأكل وش القدرة لانه مرتبط بتوقيت معين و هو بعد الفجر عادة ارتبطت بها انا و اصدقائى من ايام الدراسة نسهر نصلى الفجر بالمسجد ثم نديها الفول التمام
طبعا كل مطاعم الفول الشهيرة تشرفت بركوبها اقصد بزيارتها بدء من البغل بالمحلة الكبرى و انتهاء بالجحش بالسيدة زينب طبعا لا ننسى محمد احمد بمحطة الرمل بالاسكندرية و جاد الاصلى بتاع اسكندرية مش التايوانى بتاع القاهرة اذكر ايضا اخر ساعة و نجف و التابعى بمناسبة التابعى اذكر هذه القصة
صديق لى من الاقاليم وعدته بعزومة كبيرة حضر نفسه للعزومة و قعد يومين ميأكلش ذهبت الى التابعى اللى راحو رئيس الوزراء جلس على الترابيزة وجد الاجانب يملئون المحل حضر المتر و اعطانا المنيه امسك بالمنيه فول بالزيت فول بالسمنة فول بالزبدة فول باللحم المفرومة صرخ صائحا اخيرا لقيت لحمة استغربت و قلتله فيه ايه قال اخيرا لقيت لحمة كله فول فول استغربت من كلامه مرة اخرى وقلت ما احنا فى مطعم فول تملكه الزهول وقال طب لما ده مطعم فول و طعمية طب الكباب و الكفتة يتباع فين

قد حالفكم الحظ بالذهاب الى هذه المطاعم لكن المتعة الحقيقية للفول هو الوقوف على عربة الفول طبق الفول المعتبر بالطحينة و الزيت الحار مع شوية سلطة طماطم و عودين جرجير و خس حاجة ممتعة كلكم محرومين منها
من اشهر العربات الشهيرة عربية حمدان و عربية عم عبدة دولار
و عم عبدة دولار لمن لا يعرفه تقف عربيته بشارع سليم الاول بالزيتون امام مدرسة ابن خلدون الثانوية امام سوبر ماركت اولاد رجب دعاية مجانية اهو يفتخر عم عبدة دولا بزبائنه و انهم من جميع الطبقات و لا يجرء اى زبون أن يسأله لماذا طبق الفول و السلطة بعشرة جنيه يسحب طبق الفول من امامه و يقوله متجيش تأكل عندى تانى شوف ليك محل كباب على قدك
التقيت صباحا ببعض اصدقائى و قلنا نديها فول قالوا نديها فول ركبنا سيارة احدهم و ذهبنا الى حمدان قام معانا بالواجب العيش المحمص و الفول و البيض و وقفنا نأكل بكل استمتاع كان من ضمن المجموعة صديق يعمل مديرا للعمليات بشركة طيران اوربية شهيرة  بمحطة القاهرة و اذ فجاة تظهر زوجته المدرسة كانت فى طريقها الى مدرستها مع زملائها صدمت زوجى اللى لف العالم يقف على عربية فول اقول ايه لزمايلى المدرسات او التلاميذ بتوعى و تأزم الموقف و صارت مشكلة عائلية كبيرة هى تتمسك بعدم وقوفه مرة اخرى و هو يتمسك بعربة الفول الى ان وصلوا الى حل وسط بوقوفه على عربة الفول فى الاجازات المدرسية او فى غير اوقات المدرسة
بلد مجانين صحيح   

الثلاثاء، 14 يونيو 2011

عينهم زايغة

اعترف لكم ان 99% من الرجال عينهم زايغة الا عدد يعد على اصابع اليد من ضمنهم محسوبكم طبعا هم حججهم كثيرة ان الله جميل يحب الجمال و كن جميلا ترى الوجود جميلا لكنه فعلا طبع ذكورى العيون الزايغة
كنا  نجلس على ترابيزة فى حفلة مرت بجوارنا صاروخ امريكى يضع برفن فرنسى سنيه و يرتدى فستان من ارقى بيوت الازياء العالمية و الشعر الاشقر الذهبى  وجدنا السيدات تتلوح اعينهم لها قبل الرجال لكن بما انى عيونى مش زايغة نظرت لما ينظرون اليه بدافع حب الاستطلاع فقط بعد ان مر الصاروخ الامريكى ترك المكان معبأ برائحة دخانه اقصد برفنه جلس فى ترابيزة بجوارنا لنسمع هذا الحديث
مراة 1: شوف رفيعة ازاى دى تلاقيها مش بتأكل خلاص
رجل 1 : مظبوط
مراة 2 : دى لو شالت المكياج هتقرف تبصلها
رجل 2 : مظبوط
مراة 3 : دى لابسة باروكة
رجل 3 : مظبوط
مراة 4 : لا دى عاملة عملية توصيل شعر
رجل 4: مظبوط
مراة 5: واضح ان شعر التوصيل هندى مش صينى
رجل 5: مظبوط

مراة 6: بس لون الشعر مش لايق
رجل 6: مظبوط
مراة 7: البوتكس هيفرتك و جهها
رجل 7: مظبوط
مراة 8: شفتى الشفايف منفوخة ازاى
رجل 8: مظبوط
مراة 9: مناخيرها معمول بها خمس عمليات تجميل
رجل 9: مظبوط
مراة10: شفتو الفستان مفتوح ازاى عايزة تبان و خلاص
رجل10: مظبوط

همت الصاروخ الامريكى بالخروج من القاعة 
رجل 1 و 2 و 3 و4 و 5 و6  و 7 و 8 و 9 و 10 قاموا من على الترابيزة و خرجوا وراها
مراة 1 و 2 و 3  و 4 و 5 و 6 و 7 و 8 و 9 و 10 قالوا فى نفس واحد رجالة عينهم زايغة
رجل وحيد جالس على الترابيزة اللى هو انا قلت مظبوط
بلد مجانين صحيح
 

الاثنين، 13 يونيو 2011

معروف من محموله

كان ياما كان كان زمان لا يوجد تليفونات لا ارضى و لا محمول و كان تركيب التليفون الارضى يستغرق سنوات عديدة يكون اولادك كبروا و دخلوا الجامعة كما ان التليفون الارضى كانت الحرارة مقطوعة دائما و يعانى من التداخل تيجى تكلم امك فى التليفون تلاقى حماتك اللى بتكلمك
طبعا بعد الاعلان عن قرب دخول خدمة التليفون المحمول مصر ارسلت مسرعا الى صديق لى موجود بلندن ليشترى لى ما يسمى بالتليفون المحمول عدة ايام مرت فوجئت بصديقى يتصل بى و يقول لى ان المحمول جاهز بمكتب شركة الطيران التى يعمل بها بمطار القاهرة اصطحبت معى سيارة نصف نقل و اوصيت السائق ان يكون معه سلبة لكى يربط التليفون فى السيارة خوفا من الوقوع طبعا ذهبت الى المطار قابلت الوسيط فوجئت بعدة تليفون فى حجم حذاء زياد ماركة باناسونيك صدمت هو ده المحمول اللى بيقولوا عليه 
فى اليوم التالى مباشرة ذهبت الى السنترال لكى اقدم على التليفون
المحمول بعدها بعدة ايام تلقيت مكالمة ذات صوت ناعم بأن الخدمة سوف تبدء من يوم كذا و على التوجه الى مبنى التجارة العالمى و معى مبلغ الف و ستمائة جنيها
من الصباح الباكر ذهبت الى المكان المحدد فوجئت بمجموعة بنات على سنجة عشرة فى استقبالك ثم تجلس معك على مكتب تتلقى بياناتك ثم طلبت منى ان اتوجه الى الخزينة لكى اسدد الالف و ستمائة لحلوح حار و نار فى جتتهم ثم ذهبت اليها اخذت الوصل ثم اجلستنى مع بنت اخرى قلت و ماله معندكوش بنات تانية ثم اخذت منى عدة التليفون و اخرجت الشريحة من العلبة و وضعتها فى التليفون و قالت لى مبروك و من يومها اصبحت من اصحاب المحاميل و من يومها لم تتغير الشريحة
طبعا شهور و سنوات بسيطة و انتشر المحمول و انتشرت الموديلات من المحمول ابو كاميرا الى المحمول ابو تليفزيون الى المحمول الفول اتوماتيك الذى يستطيع غسيل ملابسك و انت فى الخارج
كما انتشرت سياسة المحمول فى المجتمع فانتشرت زجاجة المياه الغازية المحمول و السرير المحمول و الساونا المحمول و العروسة الصينى المحمول و غيرهم كثيرين
طبعا محسوبكم لا يغير تليفونه الا اذا اشتكى لطوب الارض و قال غيرنى لا اهتم باى اوبشن فى التليفون و لا استخدمه كل ما يهمنى فى التليفون ثلاث خواص ارسال و استقبال و ذاكرة معقولة لارقام التليفونات
اصبح تصنيف الناس يختلف طبقا لما يحمله من تليفون فيقال فلان راجل غنى ده ماسك تليفون بلاك برى او اى فون او نوكيا 0000
و اصبحت الناس تغير تليفوناتها كما تغير ملابسها و اصبح مالوفا ان تشاهد من يمشى و هو يحمل خمس تليفونات اولا خوفا من الحسد ثانيا تليفون لكل شبكة ثم تليفون للبيت و تليفون للخلبصة
كما انتشرت التليفونات بين الاطفال فى الحضانة اقسم بالله ان ساليناز بنتى طلبت منى تليفون حقيقى مش لعبة لكى تكلم اصدقائها
انتشرت ايضا الشرائح لدرجة انى كنت اشترى باكو شيكولاتة و بسبب عدم وجود الفكة قال البائع تاخذ بالباقى شريحة
انخفضت خدمة معظم الشركات و اصبح الاتصال بصعوبة و اصبحت عبارة عفوا الشبكات مشغولة هى الغالبة كما استنفدت التليفونات المحمولة ميزانية لا تقل عن عشرين فى المائة من ميزانية اى بيت وبعدين الرجل ميعبوش غير ايه ايوه صح محموله بلد مجانين صحيح 
   
 
 

السبت، 11 يونيو 2011

فينك يا عم عبده

من اكثر الاشياء التى اكرهها اسرائيل و صوت تامر حسنى و ورق النتيجة طبعا ورق النتيجة عارفين باكرهه ليه اما اسرائيل و تامر حسنى طبعا لا تعرفوا  نتكلم جد شوية طبعا اثناء خروجى من المنزل اسمع صوت طيب حنون من ام زياد ابقى خد ورقة النتيجة اللى على الترابيزه دى معاك و انت خارج طبعا ورقة النتيجة دى بيبقى فيها طلبات حسبة ثلاثون جنيه لبن و عيش و زبادى و لانشون او فوق المائة جنيه اذا كانت  تتضمن مسحوق الغسيل بتاعع  الحضرى طبعا انتو فاهمين
زمان و انا صغير كنت باحلم ابقى كبير تعب القلب و اتغير ايه ده انا هاغنى و لا ايه زمان كنت اذهب الى عم عبده البقال ازيك يا عم عبده عامل ايه ادينى ربع كيلو جبنة براميلى على ربع جبنة رومى و شوية زيتون و زجاجة زيت حسابك كام يا عم عبده خد الحساب تمام التمام
حاليا نذهب انا و العائلة الكريمة الى فرع من الفروع المنتشرة لسلسلة السوبر ماركت الشهيرة محسوبكم بخبث امسك بالسبت الحديدى الصغير لكن نظرة رقيقة من ام زياد جعلتنى اترك السبت الحديدى بسرعة  و امسك بالعربة الضخمة طبعا تكفل زياد و ساليناز بجر العربة و تنسيق المشتريات بينما امسكت زوجتى بورقة العرض الخاص دخلنا الى قسم الادوات المنزلية امسكت ام زياد بثلاث دست مشابك ليه يا ستى قالتلى دول ميكفوش اسبوعين عيالك بيلعبوا بهم او بيرموهم من البلكونة ماشى امسكت بطقم كوبايات هو انتى عايزاه يا ستى قالت عليه عرض مش هيخسر
طبعا ملئت العربة ببعض الاشياء ذهبنا الى قسم اخر امسكت ام زياد بكيس مسحوق الغسيل ميلت عليها قليلا و قلت لها احنا جبنا مسحوق امس قالت ده عليه عرض صابونتين لوكس استسلمت امسكت بزجاجة الشامبو و قالت و الله كويس ده الزجاجة دى عليها عرض معجون حلاقة ينفعك و ايه ده شاور كمان عليه عرض ليفة مش هيخسر
انتقلنا الى قسم البقالة امسكت ام زياد بزجاجة سوداء ايه ده يا ام زياد ده صويا صوص لتتبيل الفراخ و الشيش طاووك و امسكت بزجاجة اخرى ايه دى ده ويسترن صوص بتاع ايه ده للحوم ثم امسكت بزجاجة ثالثة ايه ده ده دمجلاس ليه يا ام زياد ده عشان البيكاتا ثم زجاجة الكاتشاب و المايونيز و الفلفل الاحمر و   و   و
طبعا لم اذكر الكورن فيلكس عرض 1 +1 و الجيلى و البسبوسة و الايس كريم و الكاستر و الكيك كله عليه عروض 
مشينا قليلا وجدنا فرصة هائلة عشر كوبيات زبادى عليها كوباية و خمسة زبادو عليه واحد و العرض الشهير تخفيض عشرة جنيهات على الجبن الركفورد يا ستى انا مش بحب الجبن الركفورد ده جبنة معفنة الاجابة جاهزة مش ممكن عيالك يحبوها حاضر يا هانم  و ايه ده يا ام زياد دى جبنة مودزريلا ليه يا ام زياد دى عشان البيتزا طب ما نمشيها شوية جبنة رومى مبشورة مينفعش هكذا قالت و هكذا استسلمت
طبعا تكرر كل ذلك فى اقسام اللحوم و الاسماك طبعا لا تنسو عروض العصائر و المياه الغازية و الشيكولاتة و البسكويت التى تكفل زياد و ساليناز بمتابعتها و اخبار امهم بها اول باول
طبعا الشىء المستفز هو وضع الحلويات و الشيكولاتة و المصاصة المستوردة امام الكاشير طبعا زياد و ساليناز امسك كل منهم بمصاصة اكتشفنا عند العودة الى المنزل ان سعر الواحدة خمسة جنيهات  مالها العسلية
طبعا خرجت الفاتورة حوالى متر و نصف وسط ضحكات زياد و ساليناز و دموعى على جيوبى التى اصبحت خاوية
جلست على الرصيف المقابل وسط كم كبير من الشنط و قد امسك زياد و ساليناز بالمصاصة بينما امسكت بمعجون الحلاقة الذى فى العرض و اقول احلق دقنى لو جيت هنا تانى و مع ذلك بحلق دقنى و باجى صحيح بلد عروض عروض  فينك يا عم عبده يا بقال  بلد مجانين صحيح
 


 

الخميس، 9 يونيو 2011

ظلبطة

يشتكى الجميع من المعاكسات و المعاكسات ليست ظاهرة  حديثة لكنها قديمة قدم الحضارة الفرعونية و تشهد بذلك البرديات و الصور المنحوتة بل تم تأليف كتب فى حوارات المعاكسات و من اشهر المؤلفين فزلوك عنخ و مسبسب اوتون كما كانت المعاكسة موجودة ايام الجاهلية و كيف كان عنتر العبسى يقف على ناصية القبيلة يعاكس فى عبلة حتى وقعت فى غرامه
و فى الاربعينات و الخمسينات و بقية الحقب كانت المعاكسة موجودة و لكن بطريقة خفيفة مثل ايه العسل الابيض ده متكونش امك نحلة او الله ما صلى على كامل الدسم و يا ارض اتهدى ما عليكى قدى يا صباح الورد و التفاح ابو خمسون قرش
طبعا لم يحدث تطور فى اساليب المعاكسة حتى جيلى طبعا انا لا ادعى انى كنت ملاك لكن كانت هناك اسس تربينا عليها و تعلمناها تقريبا كل جيلى ان من تسير فى الشارع مثل اختك و يجب ان تحافظ عليها
شىء اخر افتقدناه بشدة مفهوم كان منتشر و هو بنت الحتة و بنت الحتة مثل اختك لا يجوز ان تعاكسها بل يجب عليك حمايتها حتى بروحك و يا سواد ليله لو حد عاكسها من منطقة اخرى هذا يعتبر اعتداء على الحتة و تقوم معركة و مشكلة لا تنتهى الا باعتذار مقدم ممن عاكس و انه لا يقصد
طبعا المعاكسة كانت ايامنا من نوعية اجمل واحدة اللى فى النص متبصلوش قوى هما بيكونوا اتنين ماشين 
ايه يا عم الحلاوة دى ميكونش باباكى حلوانى
و هكذا
اذكر من تجاربى القليلة جدا فى المعاكسة انى كنت فى الاقصر و شاهدت فتاة سمراء تجلس على حمار و تسير به اردت فقط ان انكشها فقلت لها يا انسة يا انسة باب الحمار اللى ورا مفتوح فنظرت لى شزرا و قالت لى حتى انت يا مسبسب و همت فى النزول فتحركت خلفا و قلت يا فكيك
اثناء ثانوى كانت مدرسة حلمية الزيتون الثانوية بنات و مدرسة الارومان الثانوية بنات على بعد خطوات من مدرستى طبعا صديق لى كان من المسبسبين دفع عشرة قروش لعم على الفراش عشان ينط من على سور المدرسة فى الحصة الثالثة طبعا روميو رجع لنا فى الحصة السادسة ظلبطة لقد تم ظبطه امام مدرسة البنات من قبل الشرطة كل ما فعلوه معه حلقوا له شعره على الزيرو طبعا ايامها لم يكن حلق الشعر على الزيرو موضة و اتفضح صاحبنا و اطلقنا عليه اسم بلاطة ومن يومها اصبح مقترن به حتى الان مع انه اصبح مهندس و تزوج و خلف طبعا زوجته لا تعرف السر نحن فقط نعرفه و نبتزه طبعا
اختصارا للموضوع ان المعاكسات زادت و انتشرت بطريقة فجة طبعا الحل يجب ان يبدء من البيت من طريقة التربية الصحيحة و التوعية طبعا انا لا احب اتكلم كلام انشاء لكن هذا هو الواقع الذى نعيشه
يجب فرض عقوبات واقعية تطابق العصر لان الحلاقة ظلبطة الان ستجعلهم يقفون امام مدارس البنات من اجل الحلاقة المجانية يجب تدريج العقوبات  مثل الحرمان من الدخول على الفيس بوك شهر او اجباره على رفع بنطلونه الساقط عن طريق حمالات الكترونية او حلق سالف من السوالف و يسير بالشارع بسالف واحد و فى حالة تكرار المعاكسة تشدد العقوبة و تصعد الى حرمانه من وضع الترتر على التيشرت ثم نضطر الى العقوبة المشددة الكبرى الحرمان من الاستماع لمطرب الجيل و الاجيال القادمة تامر شعر الصدر الشهير بتامر حسنى بلد مجانين صحيح
   

الأربعاء، 8 يونيو 2011

محسوبكم مش انتيخ

محسوبكم حقانى كما تمتاز الزوجة المصرية بالبوز يمتاز غالبية الرجال المصريين بالانتخة لم يهرب من هذا الفخ سوى عدد قليل من الرجال من ضمنهم محسوبكم و ذلك بفضل التربية الصحيحة من والدتى الغالية ربنا يخليها لى
فلقد عودتنى امى منذ نعومة اظافرى حتى انتهائى من دراستى على الاعتماد على نفسى فملابس المدرسة تكويها بنفسها الحذاء
تلمعه لى يوميا اما جدول المدرسة فتحفظه صما طبعا عند قيامى من النوم اجد السندوتشات معدة للمدرسة و موضوعة فى الشنطة اما فى ايام الاجازات فغالبا طبق الفول التمام مع البيض و الجبنة و الزيتون عند عودتى من المدرسة اجد وجبة الغذاء قد اعدت و فى الغالب لا يعجبنى فتقوم باعداد غيره
اما فى مرحلة الشباب فالملابس تغسل اول باول و تذهب الى المكوجى بطريقة اتوماتكية الحمام يعد و لا شهريار اثناء الدراسة السندوتشات و العصائر و المشروبات الساخنة اول باول طبعا هى فاكرانى باذاكر و انا عمالة اقرا مجلات و جرائد و كتب الشياطين التلاتاشر و اشغل افلام فيديو لكن طبعا ممكن ضميرى ينقح عليا ابطل كل ده وبسرعة اقوم انام
بما انى مش انتيخ اتذكر انى فى رحلة الاقصر و اسوان استهلكت حوالى ثلاثون شراب طبعا الشراب استعمال مرة واحدة دماغكم متروحش بعيد كنت بجيب الشراب ابو اتنين جنية و نصف
طبعا فى المصايف الواحد لا يستعمل الشرابات الا نادرا
بمثل هذه الشخصية غير المئنتخة تزوجت طبعا بعد الزواج تاتى الى اسئلة غريبة لا تخطر على بال احد الا الازواج غير المئنتخين
لماذا عندما ارغب فى الشرب بكل ادب و تواضع انده على زوجتى من اخر الشقة لكى تحضر لى ماء مع ان الثلاجة على بعد خطوات
لماذا عندما اغير ملابسى اضعها فى مكانها و لا اضعها على الشماعة او فى الغسالة
لماذا عندما ارغب فى كوب من العصير لان محسوبكم دماغه مش متكلفة اى لا اشرب شاى او قهوة اطلب من زوجتى ان تصب لى العصير و انتظرها لو مشغولة اكثر من ساعة
طبعا لى تجارب ناجحة جدا فى التعامل مع المطبخ و المنزل
يوم اسود و مهبب بالنسبة لزوجتى لو احضرت اى ملابس من الدولاب بنفسى لانها ستجلس لمدة ساعة فى اعادة ترتيب الملابس من جديد
محسوبكم اول من اخترع البيض المشوى طبعا كلكم تعرفون المسلوق او المقلى اما المشوى فوصفته سهلة تضع البيض فى الماء ثم تضعه على البوتجاز ثم تذهب لتشاهد مباراة و تنساه الى ان يتفحم
اول من اخترع البيض الطائر و هو تضع كمية كبيرة من البيض على كمية كبيرة من الماء ثم تنزل من المنزل لقضاء بعض الاعمال  و عند العودة ستجد البيض فى سقف المطبخ
اول من عمل من الشاى مهلبية طبعا كان التيار الكهربائى مقطوع و حضر ضيف فى عدم وجود زوجتى  و بما انى اكره الانتخة قلتله تشرب شاى قهوة عصير حاجة ساقعة فطلب الرجل شاى بحثت عن الشاى قليلا فلم اجده لان الكهرباء مقطوعة فاحضرت باكو الشاى و وضعت الشاى فى الكوب ثم صبيت الماء طبعا عادانى العيب بكل شياكة وضعت الكوب على الصينية و قلت للضيف اتفضل هى شفطة و لم يكررها ثم اعتذر سريعا و غادر الشقة و بعدها عاد التيار الكهربائى فوجئت ان الكوب ملىء بالشاى حتى نهايته مقابل 2 سم ماء اى عبارة عن مهلبية شاى  اصل محسوبكم افرغ باكو  الشاى تقريبا داخل الكوب
اما فى غلى اللبن فمحسوبكم صاحب الرقم القياسى فى عدد فوران اللبن و مسجل باسمى فى موسوعة جينس للارقام القياسية و حاصل على الميدالية الزبادية فى فوران و تقطيع اللبن
نتيجة مجهودى الجبار مع زوجتى و تفانى فى التعاون معها اصدرت مرسوما ملكيا زوجيا بعدم دخولى المطبخ نهائيا
تحديث بعد قراءة البوست من جانب زوجتى اصدرت مرسوما ملكيا بأن اعترف ان الضيف الذى حضر و عملت له الشاى مهلبية هو شقيقها و بصراحة اتكسفت اقولكوا و لكن امام اصرارها و التهديد باستخدام الب..... اعترف امامكم
بلد مجانين صحيح
 
 

الثلاثاء، 7 يونيو 2011

البوز المصرى

   تتميز مصر بجو و طقس جميل كما تعلمنا فى الجغرافيا حار جاف صيفا دفىء ممطر شتاء و تتميز ايضا بانتاج القطن طويل التيلة و تتميز بوجود الاهرامات و ابو الهول و المتاحف الخ الخ الخ لكن لم يذكر فى اى من الكتب اختراع تتميز به الزوجة المصرية عن بقية زوجات العالم و هو البوز المصرى و هو عبارة عن ضرب بوز فى وش الزوج بدون اى مقدمات و يتميز البوز المصرى بعديد من الامتيازات تختلف عن البوز الخارجى بصفات عديدة اهمها
البوز المصرى سريع الخروج و بالذات فى الاوقات الاستراتجية قبل الخروج الى العمل او عند العودة مباشرة
سريع التاثير يمكنك قراءة تأثيره بسهولة مثلا على مديرك فى العمل او موظف فى جهة حكومية تتعامل معه او مدرس او استاذ فى الجامعة او حتى قائد سيارة يسير بجوارك تستطيع ان تجزم ان البيه المحترم واخد بوز قبل الخروج
سريع التاثير و الاستجابة لانه فى الغالب لا يستطيع رجل تحمله اكثر من خمس ساعات لكن يقال ان رجلا استطاع تحمله خمس ساعات و اربعون دقيقة و قد سجل هذا فى موسوعة جينس للارقام القياسية
اشهر استخداماته فى الخروج للمصايف و شراء ملابس جديدة و زيادة مصروف البيت و الخروج للتنزه
يورث من ام الى ام كما انه موجود فى الجينات الوراثية لزوجات  المصرين القدماء  و ان اول من اكتشفه منهم هو العالم الفرعونى بوز رع و قد سمى بذلك نسبة له و قد وجد مرسوما على المعابد القديمة و على ورق البردى
اختفت اشياء كثيرة من المجتمع المصرى حتى ان القطن طويل التيلة يكاد ان يختفى لكن يمتاز المصريين بالحفاظ على هذا البوز جيل بعد جيل متخصصين
لاتستنى طبقة من الطبقات من هذا البوز من الغفيرة للوزيرة مدرسات صحفيات طبيبات مهندسات كلهم لهم نفس هذا البوز
حاولت دول خارجية و استعمار اجنبى الاستيلاء على جينات هذا البوز لكن تمسك الزوجات المصريات به لم يمكنهم منه
بلد مجانين صحيح
 ملحوظة كبيرة يستثنى من هذا البوز زوجتى و ذلك لعدة اسباب بعضها امنى لى و الثانى خوفا من ان تعاقبنى ببوز