الخميس، 13 نوفمبر، 2014

ابعت رسالة و خلاص

هو انا بس اللى بتجينى رسائل الموبايل المستفزة دى تبقى قاعد فى حالك و تبص تلاقى الرسالة دى انت من المحظوظين لقد اخترتك موبنيل للدخول على السحب للفوز بكيلو دهب سعر الرسالة 5 جنية يا ولاد النصابة ده انتو لو بعتوا الرسالة دى لاتنين مليون شخص و ربعهم بس بعت رسالة لميتوا اتنين مليون و نصف لحلوح لميتو محل صايغ بحالهم ده لو فى كيلو دهب اصلا


لكن بقى اللى يستفز مجموعة الرسايل دى شوفوا عينة منها
لو نافخة شفايفك و بتصحى من النوم شفايفك مهوية شوية او فردة شفايف منها مهوية ابعتى رسالة الى خبيرة نفخ الشفايف عزيزة تيوبلس سعر الرسالة 30 قرش و تصلك يوميا اخر نصائح النفخ .
لو مزنوق و عايز تدخل التواليت و الشطاف بيحدف منك شمال و بينزل مية ساقعة ابعت رسالة لخبير الشطافات العالمى مصيلحى المظبوط و هو هيرسل لك احدث نصائح ظبط الشطاف و مش بس كده الاستاذ مصيلحى هيبعتلك رسالة كل ما تدخل التواليت يقولك شفيتم سعر الرسالة 30 قرش
لو ابنك مطلع عينك و عين ابوه و كل اللى يعرفوه و بيصحى بليل يعيط و مش حافظ اغنية تغنيهاله عشان ينام ابعت رسالة تصلك الاغانى اللى هتنوموا من اول نام يا حبيبى نام و ادبحلك جوزين حمام الى اغنية يا سارق من عينى النوم انتهاء بروح منك لله سعر الرسالة 30 قرش
لو قاعد فى البيت مضايق و مش لاقى حاجة تعملها و عايز تتسلى ابعت رسالة الى خبيرة التسالى عنايات جنايات و هى هتسليك باخر الاخبار و بكل انواع النميمة نميمة على الممثلين على جيرانك على قرايبك و مش بس كده هتبعتلك كل يوم لب سوبر و سودانى سعر الرسالة 30 قرش
تهت بين الابراج و مش عارف برج المنوفية من برج السرطان اتصل بخبير الابراج الدكتور دلو الحوت و هو هيدلك على كل الابراج سعر الرسالة 30 قرش
جالك ضيوف رخمين و كابس عليك النوم احسن النصائح لتطفيش الضيوف  سعر الرسالة 30 قرش
مضايقاك الرسايل اللى بتجيلك على الموبايل اتصل بدكتور مستشفى الامراض العقلية سعر الرسالة 30 قرش

بلد مجانين صحيح 
  

الاثنين، 27 أكتوبر، 2014

فاتيما حلمنا كلنا


لو حكينا يا حبيبى نبتدى منين الحكاية طبعا اليوم فوق مستوى الحكى عشان كده مش هكتب اسماء اشخاص الا لو فى سياق البوست هحكى قبليها بيوم و انا مش عارف هلبس ايه اية قالتلى فى ايه يا ابراهيم انت رايح فرح و لا ايه قلتلها اكتر من فرح تعرفى انا نفسى البس بدلة و اسكارف او ببيون لكن خايف يبقى شكلى ملفت للنظر انا عايز البس بدلة كاملة و كرافت لكن انا عارف انى راشق من اول القعدة الى اخرها و انا مش بطيق الكرافت المهم خدت اية و ساليناز و روحنا محل الحلويات نحجز اغلى تورتة اشتريتها فى حياتى قلت للمسئول فى المحل انا عايز اكتب كلمة على التورتة كتبت له الكلمة قالى انت متاكد ان دى كلمة ده جواب مش هينفع يتكتب كل ده انت عايز جواب مش كلمة صممت اكتب و بعد حوارات و كلمات و اللى انتوا عارفينه كتبت كلمة معلش سموها كلمة
يوسف و فاتيما
قصة حب
احلى 
من حسن و نعيمة
تقريبا منمتش فى اليوم ده و انا فى الطريق اتصل بيا ارق قلب رامى فايز قلتله انا فى الطريق اتقابلنا فى رمسيس روحنا نشترى البلالين انا كنت عايز اشترى العاب نارية و صواريخ بس وجودنا فى دار الاوبرا كانت هتعملنا مشكلة لكن البلالين و هى بتفرقع قامت بالواجب و انا على باب الاوبرا اتصلت بيا كارول نبيل و قالتلى انا وصلت استنناها على باب الاوبرا انا و رامى طبعا كانت جاية مجهدة من السفر لكن على وشها ابتسامة جميلة ابتسامة لقاء يوسف و فاتيما و بعدين قابلنا مارو و دودو حسيت فعلا انى على باب قاعة افراح لقائى بيوسف مش هقدر احكيلكم عليه لان مجموعة مشاعر مختلطة كلها عكس بعض انا بحضن واحد حضن عميق جدا هو ميعرفنيش لكن انا عارفه كويس جدا و عارف كل شعرة و كل نقطة دم فيه بجد مش عارف احكى لكن اليوم ده كان اجمل حلم فى حياتى و انا مع انى مش بفتكر احلامى لكن ده الحلم الوحيد اللى فاكره و ربنا خلاه حقيقة 

الخميس، 23 أكتوبر، 2014

يا فاتيما ما يهدك ريح





من المرات القليلة التى تعجز الكلمات عن التعبير لانه ببساطة لا توجد كلمات تعبر عن فاتيما .. فاتيما تشبه المغناطيس يجذب الجميع حوله اذا جلست على الرصيف اصبح هذا الرصيف صالونا ثقافى و سياسى و ادبى و فنى فاتيما هى قبلة الجميع الذى يحج اليها ليلمسها و يحضنها و يكتسب عن طريق اللمس كل المشاعر الايجابية الانسانية التى خلقها لنا الله الحب العطف العطاء الحنان اليقين بالله و الصبر و اه و اه من الصبر
كثيرا ما كنت اراها تتحدث عن يقينها بعودة يوسف اقول من هذه الهائمة الطائرة بعيدا عن ارض الواقع اريد ان اصرخ فيها و اقول لها افيقى و انزلى الى ارض الواقع المليئة بكل خصال البشر و لكنها كعادتها ظلت كالملائكة تحلق فى السماء تنزل الى الارض تعلمنا من اغوار لالئها الانسانية ثم تحلق بعيدا و لكن طيفها يظل يعانقنا و يطبطب علينا
لا اعرف هل تتذكر اخر حديث بيننا يومها قلت لها انا على استعداد ان ارتكب جريمة و اخطف لكى يوسف فلقد رايت دمعة فى عينيها حائرة لا تريد ان تنزل على جبينها  بكل كبرياء كنت اريد ان اقول لتلك الدمعة انزلى الى جبينها فقد تستطعين ان تمسحى من على وجهها بعض الاحزان و لكن تلك الدمعة ابت ان تنزل على وجهها الذى ظل يحمل تلك الابتسامة ... تلك الابتسامة التى يعجز كل علماء النفس عن تفسيرها فلكل فعل رد فعل فلم يقابل بشر مقاسى و انكسارات مثلما قابل فاتيما و كان من الطبيعى ان تتحول تلك الانكسارات الى غضب و حنق و امراض نفسية تصيب كل من يتعامل معها و لكنها فاتيما المعجزة ليست كالبشر ملاكا هائما متماسكة محبة معطاءة تحمل ابتسامتها و حبها الذى يفيض على الجميع يخرج من نبعا صافى عذب لا ينبض ابدا صامدة صمود الجبال الشامخة
فاتيما حضن الام الذى حضن الجميع و انا اولهم
حان له الان أن ياخذ جائزة السماء
حضن يوسف
روح قلب ماما 
يا فاتيما ما يهدك ريح

الأربعاء، 15 أكتوبر، 2014

ابراهيم اللى مش رومانسى




جميع الاخطاء يمكن اصلاحها الا السقوط فى الهوى

لما لا  تجيبى رسائل قلبى فلقد كتبتها باقلام من حنين و مدادا من الشوق على اوراق الشجن و وضعتها فى اظرف من الصبر

تعجب الاطباء من قلبى فرغم مرضه و انينه الا ان صراخ صوته بالعشق عاليا

من كان منكم بلا حبا فليرمى قلبه بحجرا

انا فارس العشق الباحث عن اميرته الذى امتطى جواد قلبه حاملا سيفا من الهوى فهوى على الارض  و رغم سقوطه المدوى يا للعجب مازال فى ثبات نومه حالما بالوصول اليها

لماذا تجبرينى على الكفر و انا المتصوف الذى عاش يصلى ليلا و نهارا فى محراب حبك








الثلاثاء، 2 سبتمبر، 2014

فتاوى فيسبوكية 2





احيان تتحول السخرية الى واقع فى نفس الاسبوع الذى انزلت به فتاوى فيسبوكية خرجت فتاوى الشات
فارجوكم لا تستغربوا
فلقد سبقنا الواقع فى السخرية

اهداء 
اهدى هذا البوست الى من يتهمونى بالكفر و الالحاد و شرب الخمر و انى اكتب و انا مسطول 

ركبت اتوبيس الواى فاى و لم استخدمه هل يحق لى التزويغ من التذكرة

توفى زوجى و هو مديون لجاره فى المزرعة السعيدة ب خمسون بقرة كيف اسدد ديونه علما بان رصيده فى المزرعة لا يكفى

ما هو اكثر عدد يجوز معه الشات فى المرة الواحدة

ما حكم استخدام الاسماء المستعارة فى الشات و هل تدخل فى نطاق الكذب

هل يجوز لزوجى ان يرسل لى اد فى نهار رمضان و هل اقبله

جارى مشترك فى الانترنت هل يجوز لى الدخول الى شبكته عن طريق الويرليس علما بأنه بيبلطج و لم يدفع اجرة البواب او صيانة الاسانسير

زوجى يضع صورة المدعوقة  غادة عبد الرازق  بالتاتو بتاعها بخلفية اللاب عنده و قد نصحته اكثر من مرة و لم يستجب هل يجوز لى ان اترك له البيت

هل يجوز لى الشات فى التواليت 

قلت لها على الشات زوجينى نفسك و قبل ان تقول قبلت زواجك انقطع الانترنت فارسلت رسالة  S M S تقول قبلت زواجك هل يصح عقد الزواج

بلد مجانين صحيخ

الثلاثاء، 26 أغسطس، 2014

فتاوى فيسبوكية



1 هل يجوز التصدق بالفلورز الزائد على الحد و ما هى مقدار الزكاة عنهم

2 قلت لزوجى طلقنى ع الفيس و عندما وصلته الرسالة داس لايك هل يقع الطلاق



3 ما هو انسب دعاء لدخول الفيس
 

4 هل استبدال السلام عليكم بكلمة هاااااااااااااااااااااااااااااى فى الانبوكس حرام

5 زوجى ارسل لى اد و لم استجب له هل تقع على حرمانية و هل الشيطان يبات يلعنى

6 ما مقدار الذكاة التى يجب اخراجها عن ارباحى من المزرعة السعيدة


7 كل ما اشقط بنت من على الشات ابويا يشقطها منى هل يجوز انى اعمل بلوك لابويا اللى قرفنى فى عيشتى و هل فى هذا عقوق للوالدين و قطع صلة الرحم

8 توفى ابى و ترك لنا نت سرعته 2 جيجا و نحن ولد و ثلاث  بنات كيف يقسم علينا مع العلم ان امى عايزة حقها فى النت ناشف

9 هل يجوز الشات مع النصارى

10  زوجى احضر لى نت سرعته 500 ميجا و لا استطيع تحميل اغانى تامر حسنى  بينما النت بتاعه سرعته 2 جيجا مما يضطرنى ان ادخل و هو نائم على النت بتاعه و احمل اغانى تمورا هل هذا حرام و هل اخبره بما يحدث علما بانه بخيل جدا و يستخدم كل سرعته فى تحميل اغانى نانسى و هيفاء و المدعوقة اللى طلعت لينا فى المقدر جديد صافيناز  

 
بلد مجانين صحيح

الجمعة، 22 أغسطس، 2014

نازك و فيروز و بينهم سكن الليل

قصيدة سكن الليل لجبران خليل جبران غنتها فيروز بلحن لمحمد عبد الوهاب و غنتها نازك من تلحين فريد غصن و رغم احترامنا لفريد غصن و الجانب الطربى لنازك الا ان سكن الليل لعبد الوهاب و فيروز صورة شعرية و موسيقية و حالة من الابداع ليس لها مثيل 
القصيدتين لعبد الوهاب و فيروز و نازك و فريد غصن و الاختيار لكم لكن انا منحاز جدا لفيروزتى فيروز

سكن الليل و في ثوب السكون تختبي الأحلام
وسع البدر و للبدر عيون ترصد الأيام
فتعالي يا إبنة الحقل نزور كرمة العشاق
علنا نطفي بذياك العصير حرقة الأشواق
سمع البلبل ما بين الحقول يسكب الألحان
في فضاء نفخت فيه التلول نسمة الريحان
لا تخافي يا فتاتي فالنجوم تكتم الأخبار
و ضباب الليل في تلك الكروم يحجب الأسرار
لا تخافي فعروس الجن في كهفها المسحور
هجعت سكرى و كادت تختفي عن عيون الحور
و مليك الجن إن مر يروح و الهوى يثنيه
فهو مثلي عاشق كيف يبوح بالذي يضنيه
سكن الليل
تلحين محمد عبد الوهاب
فيروز

سكن الليل
الحان فريد غصن
غناء نازك

الثلاثاء، 5 أغسطس، 2014

غواص فى ترعة النغم

مطرب البلد
محمد نوح

اليوم تحل ذكرى وفاة واحد من الفنانين الذين اثروا فى تاريخ الموسيقى و اذا كان صلاح جاهين قد احدث نقلة فى الكلمة فأن محمد نوح رحمة الله عليه قد احدث نقلة موسيقية بموسيقة شرقية صميمة بنكهة غربيةسبق و ان غطست غطسة سابقة فى هذا اللينك هنا

و اليوم نحاول ان نتعرف على جانب اخر من الفنان محمد نوح

محمد نوح يغنى با اللهجة البدوية الشور شورك

جانب الوفاء من محمد نوح  لبليغ حمدى فى يوم الوفاء لبليغ يغنى سلم سلم من الحان بليغ جانب يوضح مدى عظمة محمد نوح و انسانيته و هو يغنى لبليغ و يظهر فى الفيديو شقيق بليغ حمدى الدكتور مرسى سعد الدين و شقيقته صفية
 و انت ايضا يا نوح ماتزال حى بيننا بموسيقاك و فنك و انسأنيتك




رحم الله مطرب البلد محمد نوح

 


الجمعة، 11 يوليو، 2014

التطور العصرى للباس المصرى

هل يتذكر احد المعلق الرياضى الشهير المرحوم على زيور كان له لازمة شهيرة عندما يقول النادى الاهلى بلباسه الاحمر و نادى الزمالك بلباسه الابيض و عندما قالوا له لا يصح ان تقوب لباس يا كابتن قال انها اللغة العربية اذا اتفقنا ان كلمة لباس هى اللغة العربية و اى كلمة دخيلة باى لغة اخرى هى مجرد تهذيب لا محل له من الاعراب و بصفتى مدعى انى مهتم بالسينما لا اجد حرجا فى ظهور اى ممثل باللباس طالما يوجد غرض درامى و كلنا نتذكر المشهد الشهير الكوميدى للفنان الراحل عبد المنعم ابراهيم مع زينات صدقى فى فيلم اسماعيل ياسين فى مستشفى المجانين و مشهد الفنان عبد السلام النابلسى فى فيلم الفانوس السحرى و ايضا فريد الاطرش و اسماعيل ياسين فى فيلم عفريتة هانم وهناك ايضا نهاية فيلم ولاد الايه للراحل احمد زكى عندما جرى فى الشارع بالملابس الداخلية و سابالغ فى التحرر عندما اقول انى لا امانع حتى من ظهور ممثلة بالملابس الداخلية اذا كان هناك غرض درامى و اعرف ان هذه الجملة قد لا تعجب الكثيرين و لكن هذا ما تعلمته من السينما طبعا هذا ليس استعراضا للفنانين الذين ظهروا باللباس ولكنها مقدمة لابد منها . فى رمضان خرج لنا ممثل كوميدى شهير باعلان و هو يرتدى لباس و يروج له و يستخدم تلميحات و ايماءت غريبة بما لا يليق به و ما استغرب له اذا كان الهدف مادى فهناك الكثير من الشركات و المنتجات التى اعتقد انها ترحب به ماذا اصابك ايها الهانى الرمزى و ما هو المبرر لقد سبق و خرجت فى مشهد فى فيلم ابو العربى وجريت فى الشارع بملابسك الداخلية فهذا على عينى و راسى لكن ان تتراقص مع مجموعة من الراقصين باللباس فهذا لا يليق بك ابدا و ما زاد الطين بلة استخدامك و تشويهك لاغنية الراحل فؤاد المهندس انا واد خطير التى كتب كلماتها حسين السيد و لحنها محمد عبد الوهاب  من المرات القليلة التى اشعر بثقل ظل هانى رمزى و هو يمسك اللباس و يقول ان زوجته بتغير منه ماذا تقول و ماذا تفعل لا تستغربوا اذا خرج عليكم هذا الهانى فى اعلانه القادم بجملة راحة الجسم تبدء من اللباس او البوكسر التطور العصرى للباس المصرى
بلد مجانين صحيح
 
 عندما يكتب صلاح جاهين كلمات اعلان
و عندما يلحنه سيد مكاوى
اكيد هيكون شىء راقى
و اكيد هيعيش الاعلان لعشرات السنين
اعلان ريرى

         

الجمعة، 20 يونيو، 2014

الصلاة على النبى مكسبى



زمان و انا صغير شوية ايوة انا كنت صغير كنت رايح افصل جلابية عند الحاج فتحى احسن واحد بيفصل جلاليب فيكى يا مطرية دخلت المحل وجدت خناقة بينه و بين احد الزبائن اللى اعرفه اسمه محمد الليوى و ده كان طالب فى كلية الهندسة و كمان لاعب كرة شهير جدا فى نادى المياه و السكة الحديد فى ايه يا حاج فتحى قالى الاخ عايزنى افصل جلابية قصيرة و انا مش ممكن افصل حاجة قصيرة نظرت لمحمد الليوى وجدته يرتدى جلابية قصيرة تكشف عن سيقان ملونة بحنة سوداء سالت محمد انت عايز تفصلها قصيرة ليه قالى خوفا من ان تتعلق بها النجاسة طب و الحنة دى ليه اللى على ساقك قال لى خوفا من الفتنة . فتنة ايه يا عم محمد عودين القصب المسوس اللى انت بتحسبهم سيقان دول هيفتنوا حد انت بتحسبهم سيقان مارلين مونرو ولا ايه. 
مرة وجدت سيدة منتقبة تجرجر بجلبابها كل ما فى الشارع من مخلفات اقتربت منها و قلت لها لو سمحتى جلابابك بيزحف على الارض و ملىء بالمخلفات نظرت لى نظرة الامام ابو حنيفة للجاهل الجهول الملحد و لم ترد
كثيرا ما تذهب للفكهانى و تساله بكم الكيلو يقولك بالصلاة على النبى حاجة ايه ميت فل و عشرة و عندما تذهب للبيت تجد الفاكهة اغلبها فاسد وكذلك الجزار و غيرهم من البائعين و كثيرا ما تركب مع سائق تاكسى تجده مشغل قران بالكاسيت ثم تفاجىء به لاعب فى العداد و كذلك غالبية سائقى الميكروباص الايات القرانية و المصاحف تزين سيارتهم لكن الفاظهم البذيئة تسبقهم 
امى كانت زمان و انا رايح الامتحان تقولى اقراء قبل الامتحان سورة الكرسى و اول حاجة اكتبها بسم الله الرحمن الرحيم لكن بعد كده لو جتلى فرصة للغش ضميرى يأنبنى و اقول الله ما اجزيك يا شيطان و بعدين بغش عادى اه ما انا كنت بغش
  كنت قاعد مع صديق لى فى سوبر ماركت و دخلت سيدة منتقبة و بتقوله لو سمحت و من قبل ما تنطق وجدت صديقى يعطيها فلوس و احرجت السيدة و قالتله انا مش شحاتة انا كنت هسألك عن عنوان احرج صديقى و اعتذر لها و قالها اصل النقاب حاليا اصبح الزى الرسمى للمتسولات النقاب اللى مفروض انه تزيد و تقرب اكثر لله من وجهة نظر المجتمع اصبح زى المتسولات
ممكن حد يقولى الاسلام عرف فى الهند و الصين ازاى ... عرف عن طريق التجار اللى كانوا بيسافروا طبعا التاجر مكنش بيقول فى الهند بالصلاة على النبى الحاجة تمنها كذا و لكن التاجر كان صادق و امين كسيدنا محمد صلى الله عليه و سلم الناس فاهمة الموضوع غلط الناس بتحط المصحف فى البيت و السيارة و العمل كبركة و هو بالشكل ده مش بركة خالص البركة لما نفتح المصحف و نقراه و نتعلم و نعمل بما انزله الله من اوامر . الصلاة على النبى مش كلمة عليه الصلاة و السلام . الصلاة على النبى بأتخاذ النبى قدوة لنا من حيث الصدق و الامانة و النظافة و الاجتهاد فى العمل الدين مش صلاة و صوم و ذكاة و قراءة قرأن و اوردة صباحية فقط الدين عمل و نظام و نظافة و امانة و صدق و فى النهاية عبادة لها اركانها و مظاهرها اللى اولها الصلاة .  مظاهر الدين الاسلامى مش لحية و جلباب و مساجد ممتلئة بالمصلين لا مظاهر الدين الاسلامى نظافة و صدق و احترام و مصانع مليئة بالعمال المجتهدين و حقول مليئة بالمزارعين الدين مش مصحف فى السيارة او اية قرأنية على باب البيت الدين باختصار جدا المعاملة
اقول قولى هذا و استغفر الله لى و لكم
و اشهد ان لا اله الا الله
و ان محمد رسول الله
صلى الله عليه و سلم

بلد مجانين صحيح 

الخميس، 19 يونيو، 2014

ابراهيم الرومانسى و اللى مش رومانسى

كسينمات الترسو ثلاثة عروض فى بوست واحد ابراهيم اللى مش رومانسى و ابراهيم الرومانسى و حكم ابراهيمية اتمنى ان تستمعوا بها احجز تذكرتك من الان


 
ابراهيم اللى مش رومانسى

لا تلوموا الثياب فانياب الذئاب تاكل لحم الجيفا فى التراب

لا تنزعج من اثار اقدام البشر على قلبى فانت الذى القيته على الارض

لا تحاولى ان تطيلى التنورة فمجنونا من يحاول تغطية اشجار الابنوس

اتمنى ان اكون بذاكرة السمك و جسد الجمل لكى انسى قسوتك و احتفظ بعشقك

نعم احضانك دافئة لكنها مثل حرارة المدفاة خالية من المشاعر نعم قبلاتك ساخنة و لكنها كسخونة الصيف نتخلص منها بالماء المثلج 
 
نعم انا صامت و لكن عيناى بهم فصاحة كل شعراء الغزل

ابراهيم الرومانسى

مع هبوط طائرته الى ارض الوطن ازدات خطوات سرعته نعم هو مشتاق رغم انه سافر الى اغلب بلاد العالم الا انه لم يستطع ان ينساها طلب من السائق ان يقف امام احد الفنادق الكبرى دخل الفندق و لكن سرعان ما خرج من الفندق و هو يحمل علامات الحسرة لم يجدها داخل الفندق طلب من السائق ان يسرع به الى منزله نزل من السيارة مسرعا يسبقه شوقه رن جرس شقته فتحت له الباب زوجته و هى فى احلى زينة تضع عطرا فرنسيا يشع عبيره داخل الشقة لكنه دفعها دفعة كادت ان تلقى بها على الارض و اسرع الى دورة المياه و اغلق الباب خلفه اخيرا وجدها الشطافة اخيرا ستعرف الراحة طريقه

 حكم ابراهيمية

الفرق بين القبلة اثناء الخطوبة و القبلة بعد الزواج كالفرق بين شوربة الضان و شوربة الفول النابت فكلاهما يتفقان فقط فى الاسم و لكن يختلفان فى الدسم

الجمعة، 13 يونيو، 2014

شعب متدين جدا جداااااااااااااااااااااااااا





نحن شعب متدين بطبعه هذا ما نعتقده و هذا ما كنا نظنه و لكن ما هى مظاهر التدين فى مجتمعنا المتأمل للموضوع يجد ان مظاهر التدين واضحة لكل ذو عينين نسبة كبيرة جدا من النساء محجبة نعم و الله العظيم حوالى 90% من نساء مصر محجبات حتى الاطفال من سن خمس سنوات بعضهم يرتدى الحجاب و تزايد عدد المنتقبات من النادر الا تلمح عينك منتقبة تسير فى الشارع و من مظاهر التدين ايضا لا يخلو منزل من عدد كبير من المصاحف كما ان الايات القرانية تزين الحوائط فى المنازل و المحلات و الشركات و السيارات 
ايضا من اكبر مظاهر التدين التى لا تخطئها عين هى تلك الملصقات  الدينية التى تطالعك فى جميع الاماكن الشوارع السيارات الخاصة الاتوبيسات العامة الميكروباصات مترو الانفاق المصالح الحكومية الشركات الخاصة مدخل العمارة مصاعد العمارة اذا تعطل المصعد و استخدمت السلالم تجد تلك الملصقات امامك و خلفك يمينك و يسارك صعدت الى الشقة على باب شقتك فتحت الثلاجة لتشرب تجدها على باب الثلاجة على فرن البوتوجاز تجد ملصقات ( الحجاب قبل الحساب) ( الحجاب عفة ) ( حجاب يصون او تنهش العيون ) ( الحجاب يا اختاه ) و غيرها الكثير
لكن هل يدلنى احد على عدد الايات فى القران الكريم التى تحث على الحجاب طالما كل الملصقات التى تطالعنا تحث عليه  انا لا اتكلم عن شرعية الحجاب فلست برجل دين و هم اقدر على التحدث عن شرعيته
اذا من يرى كم الملصقات الموجودة عن الحجاب يظن و يتأكد ان الطريق الى الجنة يبدء من الحجاب لكن ماذا قال عز و جل عن اول الطرق الى الجنة يقول - تعالى إِنَّ الَّذِينَ قَالُوا رَبُّنَا اللَّهُ ثُمَّ اسْتَقَامُوا تَتَنَزَّلُ عَلَيْهِمُ الْمَلَائِكَةُ أَلَّا تَخَافُوا وَلَا تَحْزَنُوا وَأَبْشِرُوا بِالْجَنَّةِ الَّتِي كُنْتُمْ تُوعَدُونَ (30) نَحْنُ أَوْلِيَاؤُكُمْ فِي الْحَيَاةِ الدُّنْيَا وَفِي الْآَخِرَةِ وَلَكُمْ فِيهَا مَا تَشْتَهِي أَنْفُسُكُمْ وَلَكُمْ فِيهَا مَا تَدَّعُونَ-) سورة فصلت .صدق الله العظيم
 الاستقامة نعم الاستقامة و هى كما نعرف الامانة و النظافة و الصدق و حسن الظن و الرحمة و التصدق والعمل فعشرات الايات القرانية تكلمت عن الامانة فعلى سبيل المثال و ليس الحصر (وَالَّذِينَ هُمْ ﴿لأَمَانَاتِهِمْ وَعَهْدِهِمْ راعُونَ) صدق الله العظيم و كذلك عشرات الايات التى تدعو للنظافة و الصدق و حسن الظن و الرحمة و التصدق و العمل اما تلك الملصقات التى تطاردنا يظن من يقرأها ان مركز شر الكون هو سفور المراة و ان غضب الله علينا بسبب سفورها و ايضا ضيق الرزق  كما ان هناك ابحاث تنشر ان حجاب المراة يمنعها من الاصابة بالسرطان و امام تلك الملصقات هل لمح احدا ملصقا مكتوب فيه  (تأدب اخاه) (غض نظرك اخى) (الاداب قبل الحساب)
و عليه تكرس و تأكد اذا خرجت المراة بدون حجاب هى المخطئة و عليها تحمل عواقب خطئها هى لحم رخيص مشاع للتحرش و الاغتصاب و الاعتداء عليه بالقول طالما لم تلتزم و بناء على تلك المعطيات خلقنا جيلا مشوها من البنات ظنوا ان وسيلة حمايتهن من نظرة المجتمع و نظرة الشباب هى تلك القطعة من القماش حتى لو ارتدتها على ملابس لا تليق و خلقنا جيلا من الفتيان يظن ان المراة مستباحة طالما ارتدت ما لا يليق من وجهة نظره و زادت حالات التحرش و الاغتصاب و لما لا تزيد و معظم شيوخنا لا يفكرون الا فى النصف الاسفل من الجسم و لا نسمع فتاوى الا حكم لبس البنطلون حكم امتناع المراة عن زوجها حكم الزواج باربعة و هكذا كل فتاوينا اصبحت مركزة على النصف الاسفل و ان خرجت من النصف الاسفل دارت حول المظهر حكم اللحية و غيرها اما فتاوى حكم تارك العمل حكم الكذب حكم النفاق فلا نسمع عنها 
ارجوكم اتركوا المراة فى حالها حتى لو مشت فى الشارع و هى ترتدى المايوه و اعملوا انتم ما عليكم بما فى قرأننا من غض البصر و العمل و الصدق و الامانة فالدين ليس مظهرا الدين المعاملة و بعد ذلك تحدثواعن حجاب المراة ان وجدتم وقت لديكم
بلد مجانين صحيح   

الأحد، 4 مايو، 2014

ابراهيم اللى مش رومانسى




تعسا للشعور بالمتعة  اثناء وضع النطفة فى الرحم و السعادة اثناء تكون الجنين مع اليقين التام ان الجنين مشوها

 على عكس الاشياء تماما التى تظهر حقيقتها فى النور لم اتبين حقيقتك الا فى الظلام الحالك فلقد فقد الطاووس بريقه و تحول الى فأر

مع تساقط الجليد خلعت ملابسى و اطفأت المدفاه و لم اشعر بالبرد القارس  و انت تحاصرينى بدفء انفاسك

عندما تغلبنى الدموع لا املك الا ان افتح صنبورها حتى لو اغرقت ملابسى و ملابس المحيطين بى فهى نوع من التطهير الذاتى للنفس 

عندما عشقتك كنت لى اخر طريق العشق و عندما ارتميت بين احضانك تبين لى انى فى اول خطواتى   

نعم تذوقت شفتاى كل انواع القبل لكنى لم اعرف الارتواء الا عندما مست شفتاك
  
كنت لك حلما فلماذا تبذل قصارى جهدك فى التحليق خلف الكوابيس
  
نعم انا ابادلك الحب و لكنى لا ابادلك حياتى لان الحقيقة المرة التى نتغافلها انى لا امتلك حياتى

اخيرا
لا تحزنوا على الفارس الذى يسقط من على الحصان و لكن احزنوا على الحصان الذى فقد الفارس


 

الجمعة، 14 فبراير، 2014

نصائح ابراهيم الرومانسى فى الفلانطين


كل سنة و انتوا طيبين
اليوم عيد الحب كل سنة و انتم حمر ربنا يجعل لياليكم كلها احمر من بعض و يجعل الحمار بتاعكم يبرطع فى حياتكم طبعا الحمار ده مشتق من الحمار اللى هو يعنى اللون الاحمر اه محدش يفهمنى صح و فى هذا اليوم اقدم لكم بعض النصائح هى خلاصة تجارب كثيرة
  1. اذا كانت زوجتك تعشق المفاجأت 
  • اطفىء انوار الشقة كلها و عندما تدخل الشقة تمشى على اطراف اصابعك بكل هدوء و حنية و رومانسية و تاتى من خلفها و باعلى صوت و تقول لها بخ
  •  من الممكن اذا كانت تنتظر ان تحتفل معك بعيد الحب ان تفاجئها بمفاجاة غير متوقعة و تنزل تقعد على القهوة مع صحابك و ساعة الحظ متتعوضش يا برنس 
  1.  اذا كانت زوجتك تحب الورد
  • اذا كنت تريد ان تهديها اربع وردات فعليك ان تعلم ان اسعار الورد فى الفلانطين تكون مرتفعة و ان سعرهم حوالى تلاتين جنيه اى سعر ساندوتش جامبو سى فود من كوك دور و عليك ان تقارن بين طعم السندوتش و بين نظرة زوجتك الى الاربع وردات نظرة ايش جاب الغراب لامه طبعا المقارنة فى صالح الساندوتش الجامبو
  • لو كنت ناوى على بوكيه كبير اعلم ان سعره سيتعدى ال 100 جنيه فعليك ان تكون عمليا و ان تنظر الى الغسالة بدون مسحوق فمن الافضل ان تقدم لها كيس اريال 6 كيلو ب 122.5 جنيه من عند اولاد رجب و لمزيدا من الرومانسية اختار المسحوق برائحة زهور الربيع او الزهور الاستوائية
  1.  اذا كانت زوجتك تحب الشموع
  • اصبحت الشموع موضة قديمة كما ان بعض الانواع منها تسبب حساسية و عليك استبدالها بكشاف صينى من اى بياع فى المترو و اهو ينفع لما النور يتقطع
  1. اذا كانت زوجتك تعشق الهدايا
  • لا توجد هدية تعلو على الهدايا الهاند ميد و بالذات لو كانت مش من اى هاند هاندك انت و افضل طريقة ان تذهب الى اقرب عطار و تشترى منه بجنيه صبغة حمراء و تضعها فى 4 لتر ماء ثم على النار لتغلى ثم تتسلل بهدوء الى غرفة اولادك و هم نائمين و تستولى على اكبر دبدوب بها حاجة كده تكون طخينة و مبألظة ثم على طريقة سلق الفراخ تضع الدبدوب فى السائل  و من الممكن ان تضع معه بعض التوابل لزوم النكهات و بعد ربع ساعة ستحصل على اجمل دبدوب احمر و قدمه لزوجتك بالهنا و الشفا
بلد مجانين صحيح

ملاحظة اخيرة
بلوجر ما احلى الرجوع اليه

الأحد، 19 يناير، 2014

قرب قرب قرب






قرب قرب قرب
الحاضر يقول للغايب
و الغايب لازم يعرف 
و يقول للى معرفش
بصوا بقى
انت يا استاذ يا اللى عامل مش واخد بالك و ماسك الجرنان
و انت يا اخ اللى ماسك سندوتش الفول
و انتى يا مدام يا اللى شايلة عيل على كتفك
و انت يا انسة يا اللى ماسكة الموبايل مش عارف بتكلمى مين
ايوة انتى هو فى حد ماسك الموبايل غيرك
الكل يبصلى
اعلنت شرين بنت سامى
عن موعد حفل توقيعها لرواياتها
 قيد الفراشة
و التفاصيل

قيد الفراشة دى يا جدعان ليها فوايد كتيرة جدا
لكن هاختصرهم فى خمس نقاط
اولا 
دى رواية جامدة جدا لان اللى كتباها
شرين بنت سامى
و دى كاتبة جامدة قوى
يعنى رومانسية اثارة  اكشن
ثانيا
قاعد فى البيت و زهقان و شايف مراتك جاية تكلمك
و اكيد هتقولك جهزت قسط المدرسة او الغسالة عطلت 
هى يعنى هتقولك ايه غير كده
امسك الرواية و اقراها اكيد هتستمتع بيها جدا
ثالثا
العيال زهقوكى و اسكت يا واد اسكتى يابنت غيروا مودك 
او زوجك سابك لوحدك و نزل يقعد على القهوة
امسكى الرواية و اقريها اكيد هتستمتعى بيها جدا
رابعا
زهقان او زهقانة من المذاكرة و الكتب و الامتحانات والدراسة
و مش شايف نتيجة لكل ده
يعنى اللى ذاكروا قبلك خدوا ايه
 امسك او امسكى الرواية و اقروها اكيد هتستمتعوا  بيها جدا
خامسا
قرفان من العيش والعيشة  و اللى عايشنها
مش لاقى قدامك غير برامج التوك شو و لميس و اديب و خيرى و عيسى
 امسك او امسكى الرواية و اقروها اكيد هتستمتعى بيها جدا

كل ده بكام
سعر الرواية 
مفاجاة ؟؟؟؟؟؟؟
اتصل على رقم
اتصل ايه
 انت لازم تيجى حفل التوقيع بمعرض الكتاب
و اللى مش هيجى اكيد هيفوتوا كتيير
 

الاثنين، 6 يناير، 2014

فارس الصعيد المغوار


من زمان و انا كان نفسى امسك ريشة و ارسم لكن للاسف لا اجيد الرسم ساحاول ان ارسم بورتريه لبعض الشخصيات بالكلمات فاحيانا يرسم القلم ما تعجز ان تكتبه الريشة و احيانا تكتب الريشة ما يعجز ان يرسمه القلم


 

تعودت ان اتعامل مع البشر بأنسانيأتهم بغض النظر عن انهم نجوم او مبدعون و هناك الكثير من النجوم فى الادب و الفن فقدوا الكثير من بريقهم بمجرد ان اقتربت منهم انسانيا 
مصطفى سيف الدين
 مصرى من تراب هذه الارض التصق بها و التصقت به فارس لا يحمل سيفا و انما قلما  بمجرد ان تراه ترتاح له يحمل ابتسامة بها كل خصائص هذا الشعب ابتسامة حب و تسامح و جلد و صبر و ذكاء لا تمل من حديثه ابدا جلست معه فى الاوبرا اكثر من خمس ساعات مروا كأنهم خمس دقائق . مازال ملتصقا بأرضه و مجمتعه فى احدى المرات اتصلت به قال انه فى واجب و لمن لا يعرف معنى واجب ؟ واجب تعنى عزاء اى انه فى عزاء فقلت بسيطة اتصل به بعد نصف ساعة و لكنى تذكرت ان واجب فى الصعيد تعنى طوال اليوم و رايت صورته واقفا يشد بأزر اهل المتوفى مرتديا جلبابه الصعيدى الجميل . مثقف الى اقصى درجة غير مصاب باكبر فيروسات الصعيد و هى العصبية و التعصب و لكن اه من لكن اتقى شر الحليم اذا غضب غضبه قليل و لكنه صعب المراس عند الغضب . رغم موهبته التى لا يختلف عليها احد الا انه به مسحة جميلة من الخجل و مسحة كبيرة من التواضع كتوم فى احزانه لكن حتى احزانه لها بريق من الشجن دائما ما يعلو على احزانه و هذا سر من اسرار فروسيته
على مستوى الكتابة اشهد له انه اديب من العيار الثقيل لا تملك الا ان تتوقف و تفكر عند كل سطر من الاسطر التى يكتبها كتابه الاول ضوء اسود تحفة ادبية يجب التوقف عندها . يحب الكتابة الرمزية لكنه لو كتب عن الصعيد اه لو كتب عن الصعيد لتفوق على اغلب ادباء الصعيد ففى المرات القليلة جدا التى كتب فيها بروح الصعيد شممت رائحة الخبز الشمسى و استمتعت بالويكة و السخينة و مصصت القصب على الترعة و التصقت و عانقت تلك الوجوه السمر .
 نحن فى انتظار ما تسطر انامل ابداعه 
نحن فى انتظار اوبرا طاولة البلياردو روايته القادمة 
نحن فى انتظار خواطره 
نحن نتشرف ان بيننا مصطفى سيف