الأربعاء، 22 مايو، 2013

بؤجة حبنا



يعنى ايه كلمة بؤجة يعنى ؟ يعنى أرض حدود مكان ؟ و لا حالة م الشجن ؟ و لا إيه ؟ و لا إيه ؟ و لا إيه ؟ ايه ده انا دخلت على محمد فؤاد يعنى ايه كلمة بؤجة واحد من المتفلسفين زى مصطفى سيف و لا ازهرى هيقولى بؤجة دى مأخوذه من الكلمة الإنجليزية Bag بمعنى شنطة.و لا دى برضه . 
بؤجة دى مشتقة من ايام الفراعنة يقال ان الملك باج حسنى خبطته زوجته الملكة سو زن مبك على راسه بايد الهون لانها ظبطته و يشاهد المطربة هيف وهب وهى تغنى له باج حسن حوش سو زن عنى فاحدثت فى راسه انتفاخ اطلق عليه الشعب بؤجة و تطورت البؤجة من العصر الفرعونى الى العصر الرومانى و تحولت الى وعاء يضع فيه المرء اشياءه ثم تطورت فى عصر المماليك بعد ان علمت شجرة الدر بزواج عز الدين ايبك طلبت من احدى جواريها ان تحضر ملاءة سرير و تضع فيها اغراض عز الدين ايبك و قالت له على ام على يا ايبك على الله تنفعك  بره و جوه فرشتـلك وانت مايــل وايـه يعدلك ثم تطورت البؤجة حتى شاهدنا شرين فى مسرحية المتزوجون و هى تسأل سمير غانم ايه دى يا مسعودى فيقول لها دى بؤجة يا لينا فترد عليه يعنى ايه بؤجة فيقول لها لما تقعد ترتب فى الدولاب بالساعات و هو مليان حاجات عبيطة الملابس اللى داقت  عليك او على ولادك الاحذية اللى مش بتلبسها الملابس اللى زوجتك بتشتريها و بعدين تقول ايه مش لايق عليا بمعنى عملية تطهير للدولاب بالذات الشرابات اللى بتمتاز بها الست المصرية عن كل ستات العالم بانها تلبسه فى المنزل تعطيك احساس بان الشتاء عندنا يشبه شتاء الاسكيمو بنطلون زوجك و تشيرته و بلوفره اللى معجب بهم و لابسهم على طول و انتى زهقتى من شكلهم و كل ما تشاهديه لابسهم تقولى له هو انت معندكش غير دول تلبسهم  ابتسمت لينا لمسعودى و قالت له بؤجة حبنا شرفونا تجدوا ما يسركم شاى قهوة سحلب حلبة حصى تمر خروب عناب زبادى والايفنت اهو برعاية داليا قوس قزح

هناك 3 تعليقات:

شمس النهار يقول...

صباح الفل :)
كنت هحضر بس الظروف شكلها مش هتسمح
وكمان بلوجر بقا يانوم يانوم
والناس مشيت وراحت الفيس
وماحدش بيزور حد
بلوجر بقا مهجور
بجد حزينة علي بلوجر

re7ab.sale7 يقول...

ههههههههههههههه
حلوة دي
ةفعلا يا شموسة البلوجر الايام دي ناااااااااااايم جدااااااا

شيرين سامي يقول...

:)
حتى البؤجه لازم تكتبها بشكل مختلف
إن شاء الله يكون يوم جميل و ربنا يجازيك كل خير عن تنويهك.

تحياتي الدائمه لك