الأحد، 19 يناير 2014

قرب قرب قرب






قرب قرب قرب
الحاضر يقول للغايب
و الغايب لازم يعرف 
و يقول للى معرفش
بصوا بقى
انت يا استاذ يا اللى عامل مش واخد بالك و ماسك الجرنان
و انت يا اخ اللى ماسك سندوتش الفول
و انتى يا مدام يا اللى شايلة عيل على كتفك
و انت يا انسة يا اللى ماسكة الموبايل مش عارف بتكلمى مين
ايوة انتى هو فى حد ماسك الموبايل غيرك
الكل يبصلى
اعلنت شرين بنت سامى
عن موعد حفل توقيعها لرواياتها
 قيد الفراشة
و التفاصيل

قيد الفراشة دى يا جدعان ليها فوايد كتيرة جدا
لكن هاختصرهم فى خمس نقاط
اولا 
دى رواية جامدة جدا لان اللى كتباها
شرين بنت سامى
و دى كاتبة جامدة قوى
يعنى رومانسية اثارة  اكشن
ثانيا
قاعد فى البيت و زهقان و شايف مراتك جاية تكلمك
و اكيد هتقولك جهزت قسط المدرسة او الغسالة عطلت 
هى يعنى هتقولك ايه غير كده
امسك الرواية و اقراها اكيد هتستمتع بيها جدا
ثالثا
العيال زهقوكى و اسكت يا واد اسكتى يابنت غيروا مودك 
او زوجك سابك لوحدك و نزل يقعد على القهوة
امسكى الرواية و اقريها اكيد هتستمتعى بيها جدا
رابعا
زهقان او زهقانة من المذاكرة و الكتب و الامتحانات والدراسة
و مش شايف نتيجة لكل ده
يعنى اللى ذاكروا قبلك خدوا ايه
 امسك او امسكى الرواية و اقروها اكيد هتستمتعوا  بيها جدا
خامسا
قرفان من العيش والعيشة  و اللى عايشنها
مش لاقى قدامك غير برامج التوك شو و لميس و اديب و خيرى و عيسى
 امسك او امسكى الرواية و اقروها اكيد هتستمتعى بيها جدا

كل ده بكام
سعر الرواية 
مفاجاة ؟؟؟؟؟؟؟
اتصل على رقم
اتصل ايه
 انت لازم تيجى حفل التوقيع بمعرض الكتاب
و اللى مش هيجى اكيد هيفوتوا كتيير
 

هناك 4 تعليقات:

فاتيما يقول...

اللينك مش شغال يا أبو العيال
تنفع مطلع غنوة دى
:))

عموما انا هعرف التفاصيل كلها من عند شيرين
اكيد هتقول ف بوست أين تحديدا ف المعرض ومتى والساعة كام وكدا ...


بس شكرا ع التصييتى
دايما فيك الخير


ان شاء الله أرتب أمورى
وأحاول آجى
وهأكد عليك قبلها إن شاء الله
جيت او مجتش

وربنا يسهل


ألف مليون مبروك لشوشو
ولو انها عارفة من غير كلام
انى داميا بتمنالها الخير كله
ويارب دايما ناجحة وحلوة ومتميزة
يارب


ودايما سباق ف الخير
وعقبال عندك

:))

ابراهيم رزق يقول...

فاتيما
روح القلب الملائكية

و كمان معطف من القيود عشان خاطرك فى نفس اليوم

يعنى 2 فى واحد

صلحنا اللينك يا افندم

Bent Men ElZman Da !! يقول...

ايووووة بقي ^_^ أنا سعيدة جدًا الحقيقة
يعني معطف من قيود هيكون في نفس اليوم؟
الساعة كام بقي؟

نيللي علي يقول...

ألف مبروك ومن نجاح لنجاح :)