الجمعة، 14 فبراير 2014

نصائح ابراهيم الرومانسى فى الفلانطين


كل سنة و انتوا طيبين
اليوم عيد الحب كل سنة و انتم حمر ربنا يجعل لياليكم كلها احمر من بعض و يجعل الحمار بتاعكم يبرطع فى حياتكم طبعا الحمار ده مشتق من الحمار اللى هو يعنى اللون الاحمر اه محدش يفهمنى صح و فى هذا اليوم اقدم لكم بعض النصائح هى خلاصة تجارب كثيرة
  1. اذا كانت زوجتك تعشق المفاجأت 
  • اطفىء انوار الشقة كلها و عندما تدخل الشقة تمشى على اطراف اصابعك بكل هدوء و حنية و رومانسية و تاتى من خلفها و باعلى صوت و تقول لها بخ
  •  من الممكن اذا كانت تنتظر ان تحتفل معك بعيد الحب ان تفاجئها بمفاجاة غير متوقعة و تنزل تقعد على القهوة مع صحابك و ساعة الحظ متتعوضش يا برنس 
  1.  اذا كانت زوجتك تحب الورد
  • اذا كنت تريد ان تهديها اربع وردات فعليك ان تعلم ان اسعار الورد فى الفلانطين تكون مرتفعة و ان سعرهم حوالى تلاتين جنيه اى سعر ساندوتش جامبو سى فود من كوك دور و عليك ان تقارن بين طعم السندوتش و بين نظرة زوجتك الى الاربع وردات نظرة ايش جاب الغراب لامه طبعا المقارنة فى صالح الساندوتش الجامبو
  • لو كنت ناوى على بوكيه كبير اعلم ان سعره سيتعدى ال 100 جنيه فعليك ان تكون عمليا و ان تنظر الى الغسالة بدون مسحوق فمن الافضل ان تقدم لها كيس اريال 6 كيلو ب 122.5 جنيه من عند اولاد رجب و لمزيدا من الرومانسية اختار المسحوق برائحة زهور الربيع او الزهور الاستوائية
  1.  اذا كانت زوجتك تحب الشموع
  • اصبحت الشموع موضة قديمة كما ان بعض الانواع منها تسبب حساسية و عليك استبدالها بكشاف صينى من اى بياع فى المترو و اهو ينفع لما النور يتقطع
  1. اذا كانت زوجتك تعشق الهدايا
  • لا توجد هدية تعلو على الهدايا الهاند ميد و بالذات لو كانت مش من اى هاند هاندك انت و افضل طريقة ان تذهب الى اقرب عطار و تشترى منه بجنيه صبغة حمراء و تضعها فى 4 لتر ماء ثم على النار لتغلى ثم تتسلل بهدوء الى غرفة اولادك و هم نائمين و تستولى على اكبر دبدوب بها حاجة كده تكون طخينة و مبألظة ثم على طريقة سلق الفراخ تضع الدبدوب فى السائل  و من الممكن ان تضع معه بعض التوابل لزوم النكهات و بعد ربع ساعة ستحصل على اجمل دبدوب احمر و قدمه لزوجتك بالهنا و الشفا
بلد مجانين صحيح

ملاحظة اخيرة
بلوجر ما احلى الرجوع اليه

هناك 16 تعليقًا:

نيسآان يقول...

انا شفت عجايب فالنتانيه على التايملاين في الفيسبوك عندي بس بصراحه عجايبك انت لا يعلى عليها ... ربنا يديم عليك قلبك الابيض و روحك حلوه يا مفرحنا يا مهنينا ههههههههههههههه

فعلا ما احلى الرجوع اليه ... من فات البلوجر تاه وبطلنا عارفين نكتب زي الاول بسبب توهاننا في المسخوط الفيسبوك :)

أسماء فتحي يقول...

ههههههههههههه ايه النصايح اللى تودى في دهيه دي الستات هتدعي عليك والرجاله
وهم في المستشفى كرد فعل طبيعي للعمل بنصايحك الذهبية

faroukfahmy يقول...

اولا يا ابراهيم انا هنا اسجل اعتذارى وساشرح لك الظروف التى لم تمكننى من مصاحبة اعز حبيب
ثانيا كل عيد وانت طيب ياروح الروح

هبة فاروق يقول...

هههههههههههه ده اللى يسمع كلامك يروح وراء الشمس نصايحك دى لو عمل بيها اى راجل لازم يكون معاه جميع وسائل للدفاع عن نفسه خوزه مثلا .. درع حديدى دى حتبقى معركة للجو والنهايه اكيد مش هتبقى لصالحه وهينتهى الحال به يا عينى فى احد المستشفيات الحكومية نداء عاجل لا تسمعوا كلام ابراهيم هذا البوست فيه سم قاتل
كل سنة وحضرتك طيب واسرتك الكريمة بخير وما احلى الرجوع للمدونات

gogo!sf يقول...

ايه النصايح اللى تودى فى داهيه دى يا هيما
يعنى فى الظلام ويقول بخ . دى ممكن تقطع النفس فى ثانيه
بصراحه نصايحه ممكن تخرب الدنيا خليك انت فى المسحوق وسبنا احنا للورود واشموع قديمه قديمه
نصيحه خليك فى حالك ههههههههههههههههههه

كل عيد حب وانت والمدام والاولاد فى سعاده وسرور
سلامى للمدام كتير جدا

نسرين شرباتي "أم سما" يقول...

نصائح عقلانية جدا.. ومفيدة جدا
هو الورد بيتاكل يعني?????
ولا الشموع بتعشي عيلة????
بس أحلى شي مفاجئة إنه ينزل ع القهوة... جد مش متوقعة.. ورح تدهش الزوجات!!
ما في نصائح للزوجات???

r يقول...

هههههههههه

حلوه اوى انا ضحكت كتير
بس أية رأى المدام فى الكلام دا ؟؟

aya mohamed يقول...

هههههههههههه لا حلوة النصايح دى
ربنا يقدرك على فعل الخير ^___^
كل فلانتين وانت مظبطنا :))

شمس النهار يقول...

التدوينة دي مش عايزة تعليق دي عايزة تليفون للمدام
تليفون تحذيري :)

Do3aa El_attar يقول...

هههههعهههههه
رومانسية رومانسية يعني .. فكرتني بيسرية في فيلم أحلى الأوقات : D

!!! عارفة ... مش عارف ليه يقول...

الفالنتين حلو مفيش كلام

غير معرف يقول...

هههههههههههه
ده ايه الافكار الرومانسيه دى
بجد عجبتنى مدونتك وانت مرح جدا
تحياتى لك
اتمنى التواصل

نوال الشهرى يقول...

هههههههههههههه هيك الرومانسية والا فلا

amiraali يقول...

ههههههههههههههههه
انا قريت البوست متاخر ,,بس فطستني من الضحك ..انا بالنسبالي جوزي ميجبش حاجه انا اصلا مبعترفش بالكلام الفارغ بتاع المراهقين ده :) بس لو عملي مفاجاه من دول ..هخنقه :)

♥نبع الغرام♥♪≈ يقول...

كل سنه وحضرتك طيب يارب تكون بخير

احمد يقول...

حلوه اوى انا ضحكت كتير
بس أية رأى المدام فى الكلام دا ؟؟