الخميس، 9 فبراير 2012

محدش واخد باله

محدش واخد باله ان الشيخ المسن عضو البرلمان الذى شاهد فى البلتوث فيديو يوزع على الشباب فى التحرير 200 جنيه و شريط ترامدول واضح ان سيادته خبير فى الترامدول بمثل خبرتك فى البلتوث لانك ميزت شريط الترامدول فى البلتوث بينما يعجز خبراء الصيدلة ان يتبينوا اسم شريط من خلال فيديو اسف بلوتوث اقول له قول امل دنقل ارايت حين افقأعينيك ثم اثبت جوهرتين مكانهما هل ترى ؟ هى اشياء لا تشترى هل يضحى شاب بعينيه و حياته من اجل مال ام من اجل مبدء  و اقول له قول الله تعالى 
( ان جاءكم فاسق بنبأ فتبينوا ان تصيبوا قوما بجهالة  فتصبحوا على ما فعلتم نادمين )
هل نائب بمثل هذا التخلف يصلح ليقود الاجيال القادمة

محدش واخد باله عندما يقتل اكثر من خمسة و سبعين زهرة من شبابنا ان يذهب الوزير المسئول و رئيس حكومته الى البرلمان و فى جيبهم الاستقالة كخطوة اولى قبل المحاسبة لا ان تسعى الغالبية من النواب لتبرير الموقف لدرجة ان يتحدث رئيس الحكومة لدقيقة و نصف فقط ليخبرنا انه لم يغير بدلته بالامس بينما اهالى القتلى سيرتدون السواد طوال عمرهم و ان الوزير المسئول عن الكارثة ذهب للبرلمان و غادره دون ان يقول له نائب من النواب بتوع ربنا حتى اتقى الله فى شبابنا

محدش واخد باله ان دموع سعد الكتاتنى عند سماع كلمة اكرم الشاعر عن ابنه المصاب لدرجة اغراق المنصة بالدموع و سالت و بللت النواب و خرجت خارج القاعة تبدلت فى جلسة قتل الالترس و جلسة قتل المتظاهرين الى ضحكات و قفشات فهل دماء من سالت ارخص  من اصابة الاخوانى ابن الاخوانى و هل حاسب مجلس الشعب شركة هولز على الاعلان عن منتجهم على الهواء و هل بانبونى الكتاتنى الذى يقدمه للنواب يختلف عن بانبونى شفيق الذى قدمه للمتظاهرين

محدش واخد باله ان المؤمن كيس فطن و ان تصريحات كل من خالد قرنى عبدالله و الشحات تخلو من الكياسة و تتسم بالجليطة ماذا لو ام ضحية يبرد قلبها قليلا ان ابنها شهيد ما فائدة هذه التصريحات الان و هل اعتقدتكم انكم امسكتم مفاتيح الجنة مثلما امسكتم مفاتيح مصر


محدش واخد باله بظهور الشيخ محمد حسان الفجائى و فتواه بأنه لا يجوز العصيان المدنى هل هى مكملة لفتواه عدم جواز الخروج عن الحاكم ام تشابه فتاوى
 

هناك 20 تعليقًا:

faroukfahmy يقول...

البرلما ن ياابراهيم ما بقاش برلمان بقى مسرح دخوله بدون تذاكر
مسرح كتر فيه الممثلين ادواتهم النعرة الكدابة اللى تسمع آخر مكان فى ميدان التحرير
الله يرحم برلمانات زمان قوى ايام ماكان النواب كل همهم هم الشعب واللى بيعانيه
البركة فى التليفيون المصرى اللى فاتح شاشته لنعرتهم الكذابه والشاطر اللى يعلى صوته ويبص للكاميرا كويس عشان تظهر جمال عينيه امام ناسه

فاتيما يقول...

دى مش فتاوى يا ابراهيم
دى فتة بالخل والتوم
وروايحها فايحة

عادى
كل ما الاقى هجمات شرسة كدا
احس ان الحكاية ناجحة
من قبل ما تبدأ أصلا ...

خير

كله خير

صباح الورد
:)

هبة فاروق يقول...

وبما انى مليش فى السياسه اقدر اقولك ان العمليه بقت تيكلم تيكيلم ومحدش واخد منها حاجه لكن الثوره مستمره رغم انف الجميع
والسلام عليكم ورحمه الله

مصطفى سيف الدين يقول...

انا احتج
انا صيدلي و اعرف الترمادول من وسط 1000 برشامة :)
بصراحة مجلس الشعب شكله هيعوضنا الفترة الجاية عن نايل كوميدي واهوه الحمد لله دلوقت عندنا توفيق عكاشة بدل موجة كوميدي و مجلس الشعب بدل نايل كوميدي اما البلد فبقت بانوراما دراما على ام بي سي اكشن
وحسبي الله في كل اللي عاملين مش واخدين بالهم

غير معرف يقول...

لماذا انت دائم الهجوم على كل ما يمثل الدين الاسلامي
اتق الله يا اخي
اتق الله

richardCatheart يقول...

محدشواخد باله ؟؟!!!

لاء وخدين وعملين مش وخدين

نوع من انواع الاستهبال ياعنى بس مركز شويتين تلاته

على فكره انا مابحبش بوستات السياسة مهما كانت حلوة اصلى زهقت اخر 4576 حاجه كل الكلام بالنسبة ليا بقى زى اللى بيأذن فى ملطه


الناس شايفه وعارفة من ساعة استفتاء الخراب والفرقة لحد دلوقتى بس الخوف بيعمل لكتر من كدا الناس كل اللى بتفكر فيه خلى الدنيا تمشى عايزين ناكل ونشرب ونشتغل والعيال تروح المدرسة وننام بالليل فى العشة علشان نقوم الصبح

خليهم مش اخدين بالهم وخاليهم مستهبلين

وانا بردو قريت بوست سياسة وكمان علقت عليه واضح ان مافيش فايدة :)))

تحياتى

افكار مبعثرة يقول...

كلنا واخدين بالنا و تعبانين و مكتئبين بس مش في ايدين حاجة نقولها غير حسبي الله ونعم الوكيل نعم المولى و نعم النصير
تحياتي

لــــ زهــــــراء ــــولا يقول...

محدش واخد باله ان المؤمن كيس فطن و ان تصريحات كل من خالد قرنى عبدالله و الشحات تخلو من الكياسة و تتسم بالجليطة ماذا لو ام ضحية يبرد قلبها قليلا ان ابنها شهيد ما فائدة هذه التصريحات الان و هل اعتقدتكم انكم امسكتم مفاتيح الجنة مثلما امسكتم مفاتيح مصر
.....................
لا احد يمتلك ان يقول هذا شهيد وهذا قتيل
فالشخص يسقط في الحرب ولا ينال منزلة الشهداء واخر على فراش الموت ويفوز بالشهادة
فليدع كلاً منا لسانه وفتاواه داخل فمه
فهم لا يقسمون رحمة الله ولندع منزلتهم عند ربهم
فمن مات دون دمه فهو شهيد ومع ذلك اترك النية لعالم النيه سبحانه وتعالى



محدش واخد باله بظهور الشيخ محمد حسان الفجائى و فتواه بأنه لا يجوز العصيان المدنى هل هى مكملة لفتواه عدم جواز الخروج عن الحاكم ام تشابه فتاوى
........................
لربما !!!

لولا

ريهام المرشدي يقول...

السلام عليكم
اللى حضرتك كتبته فى البوست أكبر من انه يتكتب بعده "محدش واخد باله" و لكن الأصح "الكل واخد باله بس مطنشين"

ستيتة يقول...

مؤكد مش ها تتصدم إن محدش واخد باله
ليه
لأن الحب الأفلاطوني مرايته عامية بنورتها مش أوي
ثم إن عدم أخد البال نعمة واللي يكرهها يعمى
ثم أنا وإخواني على أي حد تاني
أكمل ولا نستكفى؟ :)
الديمقراطية الفجائية طريق صعب
لازم نتحمل توابعه
بس المصري ها يبقى حلو
وها يزنق المتطرف لأهله وناسه في جيتو مع الوقت
وها يجيب اللي بيحب كل الناس
واللي شايف ان بنت مصر الغير اخوانية مش بنت من الشارع

تحياتي لفطنتك

AHMED SAMIR يقول...

افرازات ثورة يناير.....عرض جانبي لحدث عظيم

reemaas يقول...

انا اكمان اعرف اطلع التيمو من وسط 100:)

معلش يا ابو زياد تاتا على ماياخدوا على السياسة ماتنساش ان نوابنا الحاليين كان اخرهم برامج التوك شو والسجون

دعاء العطار يقول...

امممممممممم طب هو انا بجد نفسى اعرف مااخدش بالى

نفسى اعرف اغمض عينى واقول الدنيا ربيع

نفسى اعمل عبيطه ومش فاهمه حاجه

نفسى القهر اللى جوايا ع الشباب يخف

السؤال : هما ازاى بيعرفوا يعملوا كده بجد ؟؟!!

الاحلام يقول...

اخى ابراهيم
تحيه وتقدير لك اخى على ما تكتب وما يخط قلمك وفعلا اخى كما قلت محدش واخد باله
والامور بتعدى وخلاص
تحياتى اخى من ابواود

rona ali يقول...

طيب ليه بس يا استاذنا تفوقنى ليه
وانا عامله نفسي مغمن عليا

والله واخدة بالي بس ليس بيدى حيله الا الدعاء ربتا قادر ومنتقم من كل ظالم وفاسد يارب

وصف الاحساس يقول...

الحسنه الوحيده ال كان عاملها امن الدوله انه كان ﻻمم اﻻخوان دول في السجون
او الجحور المكان الطبيعي لهم
كل واحد في مصر جنبه واحد اخواني يا في البيت يا في الشغل يا في اي حته عارف انهم كدابين ومش بتوع شغل واول ناس تهرب من المسوءليه ووﻻءهم لنفسهم وبس
بعد الثور للاسف الجحور اتفتحت وطلعو يزحفو فاتحين ايديهم علي اﻻخر وال يقدر يطول حاجه هيهبش ومش هيكتفي
النظام السابق دمر جزء كبير من مصر
ربنا يستر والطوفان ما يقضيش علي الباقي
المساله مش ان محدش واخد باله
المساله انهم منظمين ومجتمعين وماشيين ورا هدف واحد انما باقي الشعب احزاب وائتلافات ولو اتفت اتنين الباقي هيختلف
ربنا يستر

عمرو فكرى يقول...

ازيك يا عم ابراهيم؟
واحشنى جدا
انا مفحوت شغل

غير معرف يقول...

استاذ ابراهيم
فاتيما
خيخة

ربنا معاكم

انا مش عارف اعلق عند فاتيما لانها رفعت التعليقات للمجهول

وانا مش مدون انا مجرد قارئ متابع ليكم ويصعب عليا ان حد فيكم يتمس بسوء

ربنا يعزكم

وياريت خيخة ترجع تفتح مدونتها من تاني

انا مش عارف اقولكم ايه
انا والله حزين جدا
لكن عارف ان الشجرة الطيبة هي اللي بتحدف بالحجارة

حفيدة عرابى يقول...

السلام عليكم
ازى حضرتك ياأستاذ ابراهيم
والمدام وساليناز وزياد
يارب تكونوا كلكم دايما بخير

أنا اسفة مش هاعلق على البوست لكن على الموضوع البايخ التانى
الحمد لله أنا ماشوفتش التعليقات المريضة
لكن حبيت أقول لحضرتك ولا يهمك
أنا شفت حضرتك وكلمتك والبنى ادم المحترم بيبان قوى من حاجات كتير
المؤمن مصاب معلش

Räumung wien يقول...

انت ياريت تأخد بالك
فين الضحكات والقفشات دى الل ىبتتكلم عنها
انت بتصطاد فى الماء العكر وخلاص