الأحد، 11 مارس 2012

غواص فى ترعة النغم

                                                              يا اما يا هوايا




 الاغنية من تاليف حسين السيد و تلحين محمد سلطان


يمه ياهوايا يمه يمه يا هوايا الهوى بعتر ضفايرى ايه قصده معايا
ايه قصده معايا يا امه ايه قصده معايا
ماشية وسط الغيطانى ماشيه و الهوى ماشى
الهوى خدنى ورمانى و سابنى و قام ماشى ماشى
خايفة يا هل ترى و لا متحيرى و لا ايه الحكاية
الهوى بعتر ضفايرى ايه قصده معايه يا امه
 البنية مامتها اسبور ماشيه وسط الغيطان خبطها الهوى بعتر ضفايرها جريت على مامتها تسالها الهوى بيعمل فيها ايه


ماشية وسط الغيطانى ماشيه و القمر ويايا ماشى ماشيه
عدى زى الاغانى عدى قلبه و راح و ماشى
قلبه انزرع بستانه و اتملى ورد و الوانه
تيجى تقولك على الحكاية
الواد باين عليه مألفط زى تامر حسنى و مبين شعر صدره و الواد رمى قلبه طعم و ساب البنية 

ماشية و عاقدة الضفاير ماشيه ماشيه
خاليه البال و الضمايرماشيه ماشيه
عدى  و فك العقده و هدا  مودة و قام طاير
اجرى و اجرى و لم حصلته ولا كلمنى و لا انا سالته
تفتكرى ايه الحكايه
يا امه يا هوايا الهوى بعتر ضفايرى ايه قصده معايا 
بقالها ساعة تعبانة و عمالة تضفر شعرها راح الواد ابن الذين فك الضفاير و شغل قلبها و جرى
رجعت يا عينى لمامتها مش عارفة الحكاية

طبعا الاغنية من اجمل الالحان اللى لحنها محمد سلطان و اللى كتبها عمنا حسين السيد

ملحوظة هذه اول مرة فى مدونتى استخدم فيديو او صورة طبعا انا مكنتش عايز استخدمهم لكن شعرت ان الموضوع سينقصه الكثير لو لم استخدمه اتمنى لكم ان تغوصى معى فى الترعة و تستمتعوا بالاغنية 
  


 
 

هناك 15 تعليقًا:

فاتيما يقول...

ازيك يا ابو سولى
وسالينازة
وزياد

:)

بص بقى
انا احييك
على اى حاجة هتحطها لفايزة
أنا من الناس القلائل ف مصر والعالم العربى اللى كنت بعشقها وبسمعها وانا ف سن المراهقة وكان كل زميلاتى بيبصولى شزرااااا ويعتبرونى معتوهة ..

بس انا بحبلها حاجات تانية غير الغنوة دى أكتر ...
بعشق ليه يا قلبى ليه
وبالمصادفة محمد فوزى الملحن:)

وبعشققققق غنوة احبه كثيرا

وبحب قوى قوى قوى
بكرة تعرف

وحبيبى يا متغرب
و حمال الآسية
و... يالهوى حاجات كتيرررر
الست دى كانت حنينة قوى ف غناها
و بابا الله يرحمها كان يعرفها عن قرب
وكان بيحبها وبيقول انها كانت شوال طيبة بيشر طيبة ...
بس كان عيبها انها عصبية
وكل ما تكبر تحلى على رأى كاظم ...
كانت بتحلو كل ما تكبر ف السن
ودا عند بابا كان من علامات الأنوثة بجد
مش العكس ..
شوفت يا سيدى الرجالة ؟؟!!

موشكرين ع الغوصة دى
وان شاء الله نشوفك يوم الجمعة الجاى
تعالى وهات البيبى معاك واحنا نشيلهالك طول اليوم ونغيرلها وناكلها وخدمة سبع نجوم ..وملكش دعوة

وطبعااااااااا
سالينازة قبل منك
ماشى ؟؟؟

سلااام مؤقتا

شمس النهار يقول...

ياريس ياريت تغير اسم المدونة وتبقا

سالزيادسو

اوقع علي الودن

من سوسالزياد

اما فايزة هو في زي فايزة
واغانيها الرررررررهيب
بموت فيها اصلا اكتر من وردة فايزة ماتت في سبتمر اعتقد يا6 يا 11 سبتمبر 83 وقعدت اعيط عليها اسبووووووع

مصطفى سيف الدين يقول...

هي ليه مشيت ده كله؟
طول الاغنية ماشية ماشية
مش كانت تاخد توكتوك بدل ما تتعب كده
الاغنية جميلة
تسلم يا ابراهيم

عمرو يسرى يقول...

اغنبه جميله

استاذ ابراهيم عايزين ناخد كورسات نتعلم فيها كيفيه نطق اسم هذه المدونه
تحياتى

هبة فاروق يقول...

حلوه الاغنيه بحب فايزه واللى حببنى فيها بابا حبيبى كان دايما يشغلها واحنا صغييرين ايام الكاسيت بقى
انت غوصت فى ترعه النغم وغرقتنا معاك هههههههههه ربنا يفرح قلبك ويخليلك ساليزيادسو
تحياتى

زينة زيدان يقول...

أغنية جميلة

بس انا مليش في الغوص..

عجبني تعلق سيف.. هي بجد ماشية كل المسافة دي ليه..

تحيتي أخي ابراهيم

faroukfahmy يقول...

ابو سولى
كما احب ان اناديك فى مناسبتك السعيدة
عجبنى قوى تعليق حبيبى مصطفى
مع حبى الشديد لفايزة احمد ولى معهاالله يرحمها فصلين ظريفين فكنت مع جيهان مرة فى التليفزيون عند خروج فايزه احمد التى فوجئت بصدمة عربتها من مجهول خارج المبنى ورأيت انسانه اخرى غير فايزة شتايم لا تتصورها فهى كانت نرفوزه قوى قوى قوى
ومرة اخرى كانت تغنى والميكرفون بعيد عن فمها فساعدها احد العمال فى ضبط الميكرفون وكانت وقعته سوده منها

faroukfahmy يقول...

ابو سولى
كما احب ان اناديك فى مناسبتك السعيدة
عجبنى قوى تعليق حبيبى مصطفى
مع حبى الشديد لفايزة احمد ولى معهاالله يرحمها فصلين ظريفين فكنت مع جيهان مرة فى التليفزيون عند خروج فايزه احمد التى فوجئت بصدمة عربتها من مجهول خارج المبنى ورأيت انسانه اخرى غير فايزة شتايم لا تتصورها فهى كانت نرفوزه قوى قوى قوى
ومرة اخرى كانت تغنى والميكرفون بعيد عن فمها فساعدها احد العمال فى ضبط الميكرفون وكانت وقعته سوده منها

حنين محمد يقول...

مساء الغاردينيا
:)
هو انا لازم كل ماجيت هنا اضحك عاجبني تعليقك على الكلمات ههههههه وضحكني استاذ مصطفى قال ليه هي ماشيه كل الاغنية بس بجد انا ماكنتش مع مشيتها انا بقى شغلتني ظفايرها بس عارف انا شفتها من نظرة تانيه مش لما البنت بتحب وتسرح تفضل تلعب بشعرها وخاصة بقى لو كانت في الجامعة مثلاً <<< مش بتلمح على نفسها :) تبقى ماسكه القلم ومدخلاه في شعرها وساعات بقى تقعد جنب الشباك ولما النسمة تطير شعرها يبقى دا الهوا بس هواء تاني طبعاً :) بس بجد الاغاني القديمة يبقى ليها احساس تاني ومختلفة مع انه ساعات بتبقى الكلمات بسيطة جداً لكن سبحان الله بتلمسنا وتمسك معانا مهما كبرنا
وغرقتنا ياأستاذ ابراهيم بـ أحلى نغم وأحلى صوت وربنا يخليلك ولادك يارب "
؛؛
؛
لروحك عبق الغاردينيا
كانت هنا
reemaas

افكار مبعثرة يقول...

حلو الغطس اللي اخدنها ده
بس كله كوم و تعليقاتك تحت كل كوبليه دي كوم تاني خااالص هههههههه
ابن اللذين اللي فك الضفاير و جري ده يعني كل المشوار ده كله علشان يفك الضفاير تلاقيه كان اقرع و غيرا منها ههههههههههههه
تحياتي ليك :)

;كارولين فاروق يقول...

دي ترعه رائعه النغم
يا سلام
انت اخترت يا ابراهيم احلي ماغنته
فايزه علي الاطلاق
بحب لها كمان قاعد معاي
نشكر اختيارك الراقي
وانا اعتبره بحر وليست ترعه

لــــ زهــــــراء ــــولا يقول...

بحب فايزة احمد :)
لولا

reemaas يقول...

الاغنية دى من اقرب الاغانى ليا يا ابو زياد والله
طالعه منك بصورها وكليبتها وكلامك جميله

شمس النهار يقول...

احنا شاكرين مهللين
تعاونك معانا ياابراهيم

ومن قدم شئ بيداه التقاه

ابراهيم رزق يقول...

اخوتى و احبتى الاعزاء

اشكركم لان الغوص اعجبكم و اعدكم ان اغوص معكم كل كم يوم
طبعا ليس لى رد او تعليق و لكن الشكر لحسين السيد و فايزة احمد رحمهم الله و محمد سلطان
اما بقى شمس النهار شمس الشموس فاقول لها طلبات سيادتك اوامر يا افندم
تحياتى لكم جميعا و قبل ان اترككم
قولى ورايا
سالزيادسو
سالزيادسو
سالزيادسو
بصوا سهلة قوى
شرفتونى و نورتونى