الأربعاء، 25 أبريل، 2012

نيش على مفيش



يحكى تاريخيا ان اول ظهورللنيش كان فى عهد الفراعنة الاسرة الثالثة وان اول من استخدمه كان الفرعون نيش رع وذلك سمى باسمه وكان يحفظ فيه الاوانى الفخارية والزجاجية و القوارير و قد تم توارث هذا النيش جيلا بعد جيل حتى وصلنا لما وصلنا له الان

يحتوى النيش فى العصرالحديث على عدد كبير من الكاسات باحجام واشكال مختلفة تتنوع بين التركى والايطالى و الفرنسى سينيه مختوم كما يضم عدد كبير جدا من اكواب الشاى بجميع الاحجام من حجم الكوستبان الى حجم كوب اللتر بحجم كوب عصير المانجو الموجود فى الكربة و تضم ايضا اطقم مختلفة من اطباق الصينى والاروكبال والبيركس و الميلامين الجامد ومتين
ويضم شنط ملاعق و شوك و سكاكين المانى وتركى و يابانى وماليزى

نعود الى وظائف النيش فانا من موقعى هذا اهيب بالانسات والسيدات ان تعطينى وظيفة محددة لفائدة النيش فالنيش منطقة محظورة ممنوع الاقتراب او التجول فيها خاصة الاطفال فمن الممكن ان تكسر فازة مقبول مراية التسريحة مقبولة جدا بعد ان اصبحت من الكماليات اما ان تقترب من السيد المبجل المحترم النيش فهذا غير مسموح ابدا ولعل ما يثير العجب ان النيش يتحول تدريجيا الى متحف مغلق فمن منكم لم يسمع هذا الحوار داخل المحلات


  • ايه رايك يا ابراهيم فى طقم كوبيات العصير ده
  • شيك و جميل لكن انتى بتسألى ليه
  • عشان هشتريه
  • وتشتريه ليه ما النيش مليان
  • ايه ده انتى عايزنى اطلع من كوبيات النيش عشان تتكسر 
  • و فيها ايه يا ستى لما تتكسر ما اهو طبيعى
و تسمع الجدل و الحوارات و المعارك التى تنتهى غالبا بخروج ابراهيم منتصرا و هو يحمل فى يده دليل انتصاره طقم الكوبيات طبعا ابراهيم اللى فى الحوار ده واحد غيرى تماما وانما هذا تشابه اسماء
و لو حصرنا اعداد النيش الموجودة فى المنازل و قيمة ما بها من اموال لتحولت الى مليارات عبارة عن متاحف لا يزورها احد الا السيدات وذلك لتنظيفه و ترتيبه طبقا لجدول محدد لا يحيد ابدا
وانا من هنا اتسائل و ادعو السيدات من منكم تتبرع بمحتويات نيشها الذى لا يستخدم لمبادرة الشيخ محمد حسان  
  
                                                    بلد مجانين صحيح

هناك 35 تعليقًا:

YA♥SA يقول...

تعرف ياأستاذ إبراهيم انا بقول بلاش نيش ف جهازي ايه لزمته يعني ..الجميع يقول بطلي خيابة يابت ..!!لاني بصراحة شايفة انه فلوس ع الفاضي لكن نعمل ايه بئا..!!؟!!
بس ممكن مممنوع الاقتراب لانه مكتوب ف القائمة والرجالة مفروض تكون حريصة أكثر ع الموضوع!!

ستيتة يقول...

هههههههههههههههههه
انا كلمتي لا يمكن تنزل الأرض ابدا
ابراهيم
لف الكاسات يا عم

بوست زي العسل
تحياتي

ياره عبدالله يقول...

السلام عليكم ورحمه الله وبركاته
موضوع مميز وانا معاك جدا وبسال برضه ايه لازمه النيش ده فى حياتنا
انا شايفه انه ملوش اى لازمه
بس طبعا انا كـ بنت لو اتجوزت من غير نيش
مش هسلم من كلام حماتى وعيله العريس هههه
بس انا لو خت رأى هقول قلته احسن
ولا ليه اى لازمه غير ان فلوس متجمده وملهاش اى فايده انا رأى نوفر فلوسه ونحطهم فى البنك هههههه

ليلى الصباحى.. lolocat يقول...

لو ان مشكلة الديون هتتحل بالتبرع بمحتويات النيش انا اول واحدة اتبرع ههههه

اعتقد الحوار ( النيشى ) بيحصل كتير بين كل اتنين
وكمان فيه جوازات كتير بتفشل علشانه ههههه

مفيش اجمل من التيسير فى الزواج وان الانسان يقتنى ما يمكن الاستفاده منه فقط

والله استاذ ابراهيم موضوع مهم جدا

تحياتى لك ولنيش المدام :)

دمت بخير

Manamino يقول...

طيب والله العظيم ياعم ضحكتني غصب عني
روح ياشيخ الهي....
نسيت كنت عاوز ادعيلك بايه
هههههههههههههههه
مسائك عسل

دعاء العطار يقول...

برااااااااااااااافو يااستاذ ابراهيم بجد بجد تسلم ايدك اصل انا بيجيلى الضغط من موضوع النيش ده وبصراحه مش النيش بس ف حاجات كتيييييييييييييره لو قعدنا نتكلم فيها للصبح عن الجواز وعاداته مش هنخلص

المهم انى مقرره انى اصلا مش هعمل النيش ده ولووو حصل فهستعمله وهكسره وعادى جداااااا ده غير انى اصلا مش ناويه اجيب اى حاجه غير اللى هستخدمها فقط لا غيير

موضوعك ده فكرنى بجروب كنت عاملاه زمان ع الفيس اسمه " عروسه من غير شبكه "

كانت فكرته التخللى عن كل العادات والتقاليد والتكاليف المبالغ فيها ف الجواز

بجد تسلم ايدك ودماغك :) :)

بسمة الورد يقول...

ههههههههههه اضحك الله سنك استاذ ابراهيم

بس تصدق صح كلنا كده وبعد ما قريت

موضوعك هنا فكرت كتير هو ليه صحيح

كلنا عندنا النيش واكنه معرض او متحف

فعلا هو متحف وبعد ما كررت انى استعمل اللى فيه بناء عن طلبك قبل ما حد ياخده منى

رجعت فى كلامى لالالا ابدا موش ممكن اتنازل عن نيشى هههههه بس ليه بجد معرفش

اكتر طباع المصريين اختلفت جدا وبقيت فعلا حاله صعبه ربنا يهدينا

راقت لى كلمات ملاحظتك الرشيقه خفيفه الظل

تقبل كلماتى التى طالت غصب عنى

مودتى واحترامى

faroukfahmy58 يقول...

تعرف يا ابراهيم ان موازنة الاسرة هى صورة مصغرة من موازنة الدولة فلو احسن استخدام مواردها سيعود الخير على الدولة الام ونوفر فلوس كتيرة للشيخ
شيئان يهدران ميزانية الاسرة الدروس الخصوصية والموبيللات وساتناولها بصفة سريعة لانها تحتاج الى دراسة وتبادل الآراء
وهنا تجد مبالغ كبيرة تنفق على الدروس الخصوصية التى يمكن الاستغتاء عنها بفصول التقوية الجماعية تنشأ فى كل حى كما هو الحال فى مسالة النفل الجماعى الذى يعوض كثيرا على استخدام التاكسيات بصفة فردية
اما عن الموبيللات فاننا نجد غند الاسرة الواحدة اكثر من اربعة موبيللات الزوج والزوجة وكل الاولاد الذين لا يقل عددهم عن اثنين لمادا لا يشارك الجميع فى موبايل جماعى واحد وبلاش نعرة الخصوصية الكدابة وتخترع لينا الصين موبايل واحد يستقبل كل المكالمات وبحتفظ به الاب زيحول المكالمات على موبيلالات استقبال فقط باسعار زهيدة هذا الامر سوف يوفر مليارات نسلمها للشيخ صحيح الامر ده هنكشف فيه خيانات وعلاقات واضطرابات ومنازعات اسرية للصبح وتبقى انت السبب يا ابراهيم فى النكش ده .. متخلليك يا ابراهيم فى الترعة اللى حفرتها للنغم مش احسن من النيش والنكش اللى لا هيودى ولا يجيش منه فايده هههه ... فى النهاية دمك خغيف يا هيمه

شمس النهار يقول...

:)))

انت ليه ضد الجمال والشيكة
:))
شوف النيش ده معمول لحفظ الاشياء الثمينة
ولكنننننننننننن
انا بحب استعملها انا
انا الضيوف ياابراهيم
وفعلا بعيب علي الستات اللي بيستخدموا ادوات غريبة مريبة وفي بيتها اشياء جميلة ركناها من غير استعمال لزوم استقبال الضيوف
انصح كل ست ان تتعامل علي انها هي الضيوف
النيش مش هناخدها الاخرة معانا

مصطفى سيف الدين يقول...

بصراحة النيش من اكبر اكاذيب الجواز
و هو مالوش اي لزمة اساسا
بس تصدق مش النيش لوحده ده الجواز نفسه مالوش لزمة

ظلالي البيضاء يقول...

أخي إبراهيم ..
عندنا في سوريا كانت هذه العادة على زمن أمهاتنا وآبائنا .. أما زماني وما تلاه فلم تعد هذه العادة موجودة لأن المنازل أصلاً أصبحت صغيرة ولا تكاد تتسع بساكنيها ..
أرجو أن تبطل هذه العادة في مصر كذلك ..
جزاك الله خيراً أستاذ إبراهيم ..
مع التحية الطيبة ..

Bent Men ElZman Da !! يقول...

والله النيش ده مأساه
حتى لينا احنا بردو
يعنى ايه اشترى حاجه وافضل حطاها قدامى كده منظر ومش متهنيه بيها
والفكره ان الناس بس تيجى تتفرج عليهم كده !!
فعلا عالم مجانين :D

هبة فاروق يقول...

عارف بقى أنى لغييت النيش خالص زحمه ومالوش أى لازمه
بس مفيش مانع اننا نشترى كوبايات وأطباق مش عارفه ليه الستات غيتها شراء الاطباق والكوبايات هههههههههه
مساءك ورد

محمد الجرايحى يقول...

هو فعلاً نيش على مفيش ومظاهر كدابة

rona ali يقول...

هههههههههههههههههه النيش منطقه مقدسه هههههههههههههههه

انا بكره النيش لانى مازالت طفله وبيتقلي بتكسري وايدك سايبه اياكى تقربي من النيش بقي

بس علي مين اول ما شابيت قعد اقول لماما اطلع دة علشان خاطرى استخدم دة ولا تقلقي هههههههه
الى ان وصل النيش بقي فيه كتب والقرآن والاوراق وبعض الكوبايات اللى انتهت موضتها وشكرا ههههههههههههههههههههههههه

nellyaly يقول...

بجد بجد هلكتني من الضحك:D

أنا والحمد الله لما جيت أتجوزرفضت رفضاً تاما أن أشتري مايسمي بالنيش قولتلهم مش فهمه أيه لازمته..قولتلهم ده أنا ناقص أحطه عليه التسعيره وقرب قرب قرب بي جنية ونص وتعال بس..

بصراحة النيش ده بعزقه علي الفاضي..

تحياتي

نيسان يقول...

لا يا ابراهيم...كلو الا النيش !!!!
الاشياء اللي في النيش مش لنا ولا للضيوف...دي عشان التوريث للبنات والحفيدات بس:)
تصدق انا عندي طقم كبايات عصير اخذته من المرحومه ستي لما تجوزت...وممنوع حد في البيت يلمسه ولا يستعمله ...ناويه اورثه لبنتي ههههههههه بعد ما ربنا يقصف عمري.

ابراهيم رزق يقول...

YA SH

هههههههههههه
انتى واخدة بالك من موضوع القايمة

نورتينى
تحياتى

ابراهيم رزق يقول...

د ستيتة

هههههههههههههههههه
لا بقى احنا جامدين قوى وكلمتنا عمرهاما تنزل

خلاص هتنزل عشان خاطرك يا دكترة

نورتينى
تحياتى

ابراهيم رزق يقول...

يارة عبدالله

اولا سعيد بزيارتك

ثانيا يجبان نبدء و طالما انا مقتنعة بذلك فيجب الا يهمنى راى حد
حتى لوحماتك
هههههههههههههه

نورتينى
تحياتى

ابراهيم رزق يقول...

ليلى الصباحى
اختى العزيزة

سيبك من ديون مصر
ههههههههههه

فعلا والله العظيم فى ناس بتستدين من اجل النيش
فعلا مفيشس اجمل من التيسير

نورتينى
تحياتى

ابراهيم رزق يقول...

مينا

مينا عندنا يا مرحبا يا مرحبا
هههههههههههههههه

ازيك يا شيخ مينا
عامل ايه يا هندسة
بجد سعيد بزيارتك
و متغبش عنا
ده حتى كان عيش وتحرير
ههههههههههههه

نورتنى
تحياتى

ابراهيم رزق يقول...

دعاء العطار

هههههههههههههههههه
يا سلام على التفكير العملى
يعجبنى قوى اللى انتى قلتيه

عجبنى جروب الشبكة

يا ريت تعملى جروب نيش على مفيش

نورتينى
تحياتى

ابراهيم رزق يقول...

فاروق فهمى
استاذى العزيز
ابن بطوطةالمدونين
وملك الزهرات

و الله العظيم افكارك اقتصادية لكل بيت
بس فين الراجل الحمش اللى من باب الشعرية اللى يقدر ينفذ الكلام ده
ههههههههههههههههه

دايما يا فاروقنا تسعدنى بتعليقاتك
و يارب ترجع لنا سالما غانما

نورتنى
تحياتى

ابراهيم رزق يقول...

شمس النهار
شمس الشموس

انا مش ضد الشياكة
انا ضد التكنيزوعدم الاستعمال
هههههههههههههههه

جميل ان تكونى انت الضيوف
يعجبنى هذا المنطق

نورتينى
تحياتى

ابراهيم رزق يقول...

مصطفى سيف

النيش اكذوبة
و الزواج اكذوبة

انت لازم تقلب علينا المواجع
ههههههههههههه

نورتنى
تحياتى

ابراهيم رزق يقول...

بسمة الورد

اولا اسف جدااااااااااااااااااا على الخطأ فى ترتيب الردود
معلش دايما بقع فى الخطأ ده اعذرينى

انت دائما بسمة التعليقات
ههههههههههههههههههههههههههه

ضحكنى ترددك فى استخدام النيش الا صحيح هو ليه التردد

نورتينى بجد
واسف مرة اخرى
تحياتى

ابراهيم رزق يقول...

ظلالى البيضاء
اخى العزيز محمد

اولا حفظ الله سوريا و حفظ شعبها الشقيق
ووفقهم لما فيه الخير

اتمنى ان تنتهى هذه العادة من مصر كما انتهت من سوريا

نورتنى بجد
تحياتى

ابراهيم رزق يقول...

بنت من الزمن ده

ههههههههههههههه
خدعوكى فقالوا الناس بتتفرج
الناس زهقانة من اللى عندها
و بعدين هو الكوبيات للعرض ولا الاستخدام

ههههههههههههه

نورتينى
تحياتى

ابراهيم رزق يقول...

هبة الفاروق

هههههههههههههههههههه
يعجبنى التفكير العملى

بس يا ريت نخف شوية من شراء الكوبيات والاطباق

ههههههههههههه

نورتينى
تحياتى

ابراهيم رزق يقول...

محمد الجارحى

استاذى العزيز
باسعد دائما بمجرد مرورك

فعلا استاذى نيش على مفيش

نورتنى
تحياتى

ابراهيم رزق يقول...

رونا على

هو انتى على طول تقعدى تكسرى
كده خلصتى على المتحف بتاع ماما
ههههههههههههههههههه
طب ماما تعمل ايه بقى
خليتى المتحف دار الكتب المصرية
يلا

طبعا جيتى على البوست الاخير ومشفتيش الاهداء اللى فى البوست اللى فات
هههههههههه

نورتينى
تحياتى

ابراهيم رزق يقول...

نيلى على

الجميل هو حضورك الطيب

كده تعجبينى
بس الحاجات اللى جوه النيش مش بجنبه ونص

بيقولوا تعالى بص باتنين ونص
وديتى فين الجنيه الفرق

نورتينى
تحياتى

ابراهيم رزق يقول...

نيسان

هههههههههههههههههههههه
يعجبنى صراحتك
كله الا النيش
متحف قومى

طقم كوبيات من ستك وعايزة بنتك تاخده
ههههههههههههه

طب يا ريت تصوريه وتنزليه فى بوست
بس قبل ما تنزليه ارقيه عشان عيونا
هههههههههههههه
نورتينا

تحياتى

فافى يقول...

طبعا انا عارفه ان ابراهيم اللى فى الحوار ده غيرك انت خااااااالص
انت لا يمكن كلمتك تنزل الارض ابدأ
هههههههههههههههههههههههههه