الأربعاء، 20 يونيو، 2012

عيد ميلاد سعيد جدا جدا جدا جداااااااااااااااااا



لا اتذكر من زواجى ان زوجتى قامت فى يوم من ايام  زواجى بايقاظى من النوم فانا نومى قليل جدا لا يتجاوز اربع او خمس ساعات لذا فانا اتحرمت من مقولة قوم يا سبعى قوم يا جملى قوم يا ابو عيالى الصبح طلع او قوم افطر و غيرها من الكلمات الا فى هذا اليوم صحيت على صوت فيروز و كلمة صباح الخير و شنطة شيك بها بنطلون جينز و تيشرت جميل ذوق حريمى طبعا و بتقولى كل سنة و انت طيب فى ايه قالتلى انهاردة عيد ميلادك صحيح انهاردة 18 / 11 طبعا انا فى مواضيع تواريخ الميلاد ذاكرتى تفوق ذاكرة السمك البكلاه و الرنجة الهولندى لم تكتفى بهذا بل احلى فطار و احلى غدا ممبار و طالما الغدا فيه ممبار يبقى الرضا كله  و لم تكتفى بهذا بل تورتاية جميلة على العشاء طبعا حطيت يدى على قلبى ان انسى موعد عيد ميلادها و لكن من ينسى اى حد ممكن ينسى يوم عيد ميلادها الا ابراهيم رزق مش ممكن مش ممكن مش مممكن ابراهيم رزق ينسى طول ما فى موبايل بيفكرنى قبلها بيوم لا يمكن انسى و مرت الايام و فاتت الايام و فى يوم و انا داخل الشقة وجدت هذا الشكل نعم وجدت البوز الذى سبق ان حدثتكم عنه نعم وجدت والله العظيم وجدته انه البوز المصرى حبيبى وحشتنى بقالك كثير جدا لم اراك خير الله اجعله خير مرة واحدة البوز دون اى مقدمات راجعت نفسى بسرعة ماذا فعلت ماذا فعلت اسرعت الى ورق النتيجة على الترابيزة يمكن كتبت ورقة بالطلبات المنزلية ونسيت لم اجد يمكن تركت ملابسى كالعادة عندما غيرتها ملقاة فى ارض الحجرة رجعت الى الحجرة وجدت انها من المرات القليلة جدا التى وضعت ملابسى على الشماعة عملت ايه يا ابراهيم يمكن عينك زاغت كده ولا كده زى اغلب الرجالة و حد قالها راجعت يومى اغلب من التقيت بهم انا بى انوثة عنهم يمكن اتصلت بى وقالت لى المسحوق خلص وانا نسيت او قالت لى اشحنلى التليفون وانا طنشت كالعادة لم يحدث فى ايه ما سر هذا البوز الاصلى الذى لا يخرج الا للشديد القوى و عندما احتار لا اجد غير ساليناز لان زياد مشغول بعالمه الخاص به فى ايه يا ساليناز ماما ضاربة البوز ده ليه ردت عليا ساليناز اصلك نسيت عيد ميلادها كان امبارح عيد ميلادها انننننننننننننننننننننننننننننننن نزل عليا الخبر كالصاعقة ربى لا اسالك رد القضاء و لكن أسالك اللطف بى لكن الموبايل لم يذكرنى بعيد الميلاد . انت معاك موبايل ماما موبايلك فى الصيانة من ثلاث ايام هكذا قالت لى ساليناز و ذكرتنى 
ماذا تفعل يا ابراهيم اللى اكلته وز وز فى عيد ميلادك هيطلع عليك بوز بوز فى عيد ميلادها بسرعة ارتديت ملابسى و نزلت اشترى هدية و تورتاية لكن ابدا ان شفرة البوز تتفك ابدا لقد وصل البوز الى مرحلة كبيرة يصعب فكها
و هكذا استمر البوز يومين كاملين تعذبت منه عذابا شديدا و ذهبت الى الاطباء النفسيين للعلاج منه فمن يستطيع ان يتحمل بوزا من النوع المصرى الاصلى و ليس الصينى لمدة يومين
خلاصة الامر انا من نوعية البشر الذى اتعجب من الاحتفال بعيد الميلاد كيف احتفل بسقوط ورقة من شجرة عمرى لا استطيع ان اعوضها كيف احتفل بسقوط اوراق عمرى ثم فى النهاية اعاقب عقابا شديد بالبوز بجد ظلم جدا فعلا الستات دول ظلمة و مفتريين
                                                   بلد مجانين صحيح 
                      

هناك 49 تعليقًا:

ابراهيم رزق يقول...

هذا هو البوست الاول من حملة التدوين اليومى
ساحاول ان اكتب
وساحاول ان ابتعد عن السياسة و قرفها يا ريت اقدر

تحياتى لكم

مصطفى سيف الدين يقول...

ظلمة و مفتريين و هقولها صغيرة ليه تدور على يوم في السنة تحتفل بيه لما كفاية عليها انها مش بتضرب بوز باقي السنة و على كلامك ان البوز المصري كان واحشك :)
واضح كده انك باقي السنة نظرك بيبقى شيش بيش علشان مش معقول في زوج مصري يوحشه البوز و لو مكنش كده متقولش علشان متتحسدش

rona ali يقول...

ههههههههههههههههههه نهارك فل يا خال ابراهيم

لاء لاء خدت بالك معظم اللى بيجيوا هنا ستات وكده البوز هيكبر ههههههههههههههههههه

معلش بقي كلنا لها بتحصل :)))

انا مبسوطه ان حضرتك معانا في الحمله كلنا بنحاول نبعد عن السياسه قدر امكانا وبنحاول قدر امكانا اننا ننزل بوست كل يوم :)))

سندس يقول...

يعني معلش انا في صف المدام ..ليه حق تضرب البوز التمام ...بس ع فكرة لازم حضرتك تحمد ربنا انه جيه ع اد البوز اصل الستات لما بيحطوا حد في دماغهم يبقي نهار فل
ربنا يسعدكم يارب دائما

haneen nidal يقول...

صباح الخير منور وسعيد من غير بوز كرمال ما يكونوش الستات ظلمةو مفترية ( يا حرامك شو ظالمنا )

:

يعني هي كان الموبايل فكرها بعيد ميلادك .. مشتكي من البوز ؟؟
دا انت محظوظ جدا ^_^


:

سعيدة ان حضرتك معنا في الحملة التدوينيه و اللقاءات مستمره .. كن دوما بخير

نسرين شرباتي "أم سما" يقول...

ههههههههههههههه
أسعدك الله مثلما أسعدتني هذا الصباح يا ابراهيم
،،،،،،،،،،،،،،،،،
عندي فكرة لتلافي حصول مثل هذا الأمر:
أن تطبع ورقة وتعلّقها على الحائط أمام عينك،، ليل نهار،، أو أن تعلّق الورقة على شاشة الكمبيوتر أو اللاب توب،، هكذا ستحفظ التاريخ كاسمك ولن تنساه :)

richardCatheart يقول...

هههههههههههههه صبااااااااااحو عثثثثثثثثثثثثثثثل

كل سنه وانت طيب وبخير وشربات زى مانت وكل سنه وهى بخير وشربات بردو

ياعنى بعد كل التعب والبهدله دى طووووووووووووول السنه معاكم ومع عيالكم تفتكرو اعياد ميلادنا بالموبايل اه يا رجاله هند فررررررررررى :)


انا كمان على فكرة مابحبش اعياد الميلاد وبيجيلى اكتئاب مش علشان انى كبرت والكلام الهجايص كدا لالالالالالالالالالا ابسلوتلى انما علشان كبرت والكلام الهجايص دا هههههههههه


المهم انك طلعت اكبر منى ب 8 ايام ياعنى اقولك يا جدو :)


بوسلى سالى وزياد وسوسو وامهم وربنا يقويها عليك يا اخى :)

richardCatheart يقول...

انا كتبت تعلقين شوف انهى هيوصل وانشر بس اوعى حد يسرق الغسيل يا ابراهيم

سواح في ملك اللــــــــــــــــــه- يقول...

من منا يحتفل بذهاب عام من عمره

اعجبني اسلوب تفكيرك في هذه النقطة

تحيتي

dodo, the honey يقول...

ههههههههه

ضحكت كثيرًا هنآا !
كثيرًا كثيرًا بصراحة :)

يعني عملتك معها رد سيء للجميل !
أنتَ ناكر للجميل !
هههه
لازم تعترف بدي الحاجة !

هههههه

على فكرة قصة البوز أعجبتني كثيرًا ،
أوحت لي بفكرة جميلة :)
هههههه

تحيآاتي لكْ ..

;كارولين فاروق يقول...

ههههههههههه
احنا كده بنحب النكد
طب ما انت بردوا يا ابراهيم غلطان
الحق يتقال بردوا
عموما بوست جميل
وكل سنه وانت طيب وزوجتك الحبيبه طيبه
تحياتي

نيسان يقول...

اطمنك ....البوز المصري هذا في منه على اردني وفلسطيني وسوري و حتى اسكندنافي يا اخينا :)
البوز هذا سلاح دولي فعّال في داخل البيت وبس ههههههههههه
بالاضافه الى الاسلحه التانيه من صريخ وعياط وفي الآخر الدموع .

مع اني مختلفه شويه عن بقية الستات في نقطة الاحتفال بعيد الميلاد وما بحب احتفل فيه لكن بنبسط لما حد بيتذكرني فيه و بيعايد علي ...
لكن هذا لا يمنع ابدا اني اضرب البوز شبرين في مناسبات اخرى هههههههههه

كل سنه والمدام طيبه ...

كريمة سندي يقول...

والله فكرة جميلة وحلووووووة يارب تكون كل سنوتكم يوم ميلاد سعيد تحياتي

هبة فاروق يقول...

كل سنه وانت طيب وام العيال طيبه بس اوعى تعملها تانى وتنسى ابقى اكتب تاريخ الميلاد على الثلاجه علشان كل لما تشرب تفتكر ههههههههه

شمس النهار يقول...

:))
تصدق تستاهل
:))
وان شاء الله شهر تدويني موفق

Bent Men ElZman Da !! يقول...

هههههههههههههههههههه الحمدالله ان فى الاخر الشفره اتفكت
موضوع النسيان فى المواقف المهمه اللى زى دى بيكون تاثيره صعب اوووووووى على فكره
يلا حصل خير :)

zeze يقول...

يا سلااام يا استاذ ابراهيم
يعني مزعلتش من الاحتفال بعيد الميلاد
يوم عيد ميلادك وقلت ملهوش لازمة لما جه الدور عليك
لا وكمان زعلان من البووز
اه منكم يارجالة ههههههه
تحياتي

Miss Mystery يقول...

ههههههههه لأنك نسيت عيد ميلادها أصبحَ الاحتفال
بأعياد الميلاد ضرباً من الجنون !
حقيقة فكرة الاحتفال بقضاء سنة من عمري ربما محزنة قليلاً
تحتاجُ لحفلة حتى نمحي هذا الحزن ألا تؤيدني ^^"
..
السيد : إبراهيم رزق ~
سعيدة حقاً بتواجدي هنا رسمتَ على ثغري بسمة شكراً لك
دمتَ بسعادة لا تنتهي و كل سنة و زوجتك بألف خير :)
طبت و متابعة

شيرين سامي يقول...

أحلى حاجه إنها ضربت البوز تاني يوم..يعني إدتك فرصتك كامله عشان تفتكر و مفيش فايده :)
بص هي حاجه تزعل لكن...
عن نفسي مبستناش..قبلها بأسبوع بسأله..هتعزمني فين يوم عيد ميلادي ؟ :)
فبجنبه و بجنب نفسي النكد في اليوم ده

و ساليناز الأروبه كان لازم تفتن و تيجي تفكرك يومها لكن واضح إن كل أعوانك خانوووك :))

و بعدين ماله البوز المصري ده حتى أصيل و أصلي و الأصلي للأصلي :)

أهلاً بعودتك أ.إبراهيم
في إنتظار تدوناتك اليوميه

تحياتي و تقديري لك

موناليزا يقول...

الفكرة مش فى عيد الميلاد نفسه
الفكرة فى انك تلاقى شريك حياتك فاكرك وبيستنى يوم مخصوص علشان يحتفل بوجودك معاه فى حياته

أيوة بنات حواء كلهن بيفكروا كده :)

--------------

سؤال معلش
هى البنوتة الصغيرة اسمها إيه؟
لما شوفتك غيرت اسم المدونة معرفتش استنتجه خالص على فكرة :)

لـــولا وزهـــراء يقول...

استاذ ابراهيم

اجمل ما فى البوست انه بعيد عن السياسه وكذلك ان اسلوب حضرتك جذاب جدا
يارب كل لحظه وانتم اسره سعيده رائعه ربنا يحفظكم
فكرتنى بجمله بمناسبة البوست
بيقولك الرجل المصرى كل لما يشوف بنت حلوه يسالها ماما لبنانيه او سوريهوكان الست المصريه مش حلوه *_0
تحياتى لزوجتك ولكل زوجه وام مصريه

زهــــراء

Carmen يقول...

^_^ ربنا يخليهوملك ويباركلك فيهم يارب

زينة زيدان يقول...

مسا الخير أستاذ ابراهيم

يعني ناسي عيد ميلادها وليك عين تتكلم

على فكرة معها حق ...

ظلمة ومفترين..؟؟!!

حرام عليك يا شيخة

ليلى الصباحى.. lolocat يقول...

معلش بقى اخى ابراهيم ماتزعلش من كلامى ههههههه يعنى عيد الميلاد كان جميل اوى لما كان يخصك ولما بقى من حق ام ساليناز بقت بلد مجانين لالالالالالالالالالا انا المرة دى مع الزوجة المصرية الاصيلة ام بوز

تعرف هقولك حاجة صغننة اوى الحكاية مش فى الهدية ولا فى الاحتفال لكن لما تحس المدام انك فاكرها وحتى لو كانت الهدية وردة جميلة شىء جميل اننا نكون رومانسيين فى يوم زى ده واكيد هى كمان محتاجة تخرج شوية من احساس المطبخ والبيت اللى ملتزمة بيهم غصب عنها علشان خاطرك انت والاولاد

يمكن الاحتفال باعياد الميلاد بيفهمها البعض ان يوم وعدى من حياتنا لكن احيانا الزوجة تراها بمفهوم انه اضافة جديدة فى حياتها مع زوجها واولادها خاصة لو ام اصيلة زى ام ساليناز :)


رااااااااااااااائع البوست جدا جدا اوى حالص ربى يسعدكم اخى العزيز وكل عام وانت والمدام بخير وسعادة
وبلغها تأييدى الشديد للبوز المصرى :)

تحياتى وتقديرى

ابراهيم رزق يقول...

مصطفى سيف

انت اللى بتقول ظلمة و مفتريين
انا مليش دعوة
ههههههههههههههههههه

قابل ياعم
نورتنى

تحياتى

ابراهيم رزق يقول...

رونا

ربنا يستر على خالو
هههههههههههههههه

انا اللى سعيد جدا

نورتينى
تحياتى

ابراهيم رزق يقول...

سندس

حتى انتى يا سندس عليا
يالله ربنا كبير
ههههههههههههههههههه

نورتينى
تحياتى

ابراهيم رزق يقول...

حنين نضال

صباح الفل و القشطة من غير بوز
ههههههههههههههههه
انا اللى سعيد بوجودك

نورتينى

تحياتى

ابراهيم رزق يقول...

نسرين شرباتى

ههههههههههههه
على التلاجة
انتى فاكرانى بفتخ التلاجة
الحاجة بتجينى لحد عندى
ههههههههههههههه

عاملين ايه زهراتك
يارب يكونوا بخير

نورتينى
تحياتى

ابراهيم رزق يقول...

مارو

صباحه رز بلبن من عند المالكى بالقشطة والايس كريم

احنا دماغنا دفتر
هنفتكر مواعيد الماتشات و لا اعياد الميلاد
ههههههههههههههههههه

اهلا ببرج العقرب
ماشى جدو جدو بس نعيش
سلامك وصل
و سعيد بتعليقك

نورتينى
تحياتى

ابراهيم رزق يقول...

سواح
متشكر و سعيد بتعليقك

نورتنى
تحياتى

ابراهيم رزق يقول...

dodo the honey

هههههههههههههههه
مش ناكر للجميل
انا نسيت
و جل من لا يسهو

مستنى وحى البوز بتاعك

نورتينى

تحياتى

ابراهيم رزق يقول...

كارولين فاروق
كلارينم الفاروق

انا ليه غلطان
انا نسيت بس

هههههههههههههههه

نورتينى

تحياتى

ابراهيم رزق يقول...

نيسان

هههههههههههههههه
البوز فى منه انواع تانية
لكن البوز المصرى نوعية محترمة
مش عارف البوز الاردنى جودته عاملة ايه
ههههههههههههههههههه

نورتينى
تحياتى

ابراهيم رزق يقول...

كريمة سندى

الاجمل و الامتع هو مرورك و تعليقك

نورتينى

تحياتى

ابراهيم رزق يقول...

هبة فاروق

كل سنة و انتى طيبة

انسى ازاى
البوز موجود

نورتينى
تحياتى

ابراهيم رزق يقول...

شمس النهار

كده برده يا شموسة اهون عليكى

باذن الله شهر جميل
والبداية موفقة

نورتينى

تحياتى

ابراهيم رزق يقول...

بنت من الزمن ده

الحمد لله الشفرة اتفكت
طبعا النسيان اخرته وحشة
اخرته بوز

نورتينى

تحياتى

reemaas يقول...

هههههههههههههههههه
احسن تستاهل

تتعجب بقى ماتتعجبش مؤمن باعياد الميلاد او لاء طالما يا استاذنا هى تفضلت عليك وافتكرته مرة انت مطالب تفتكره 10 سنين خدها نصيحة من اختك الصغنونة :)

ابراهيم رزق يقول...

zeze

ههههههههههههه
طب انا عمل هو النسيان جريمة
و الله الرجالة مظاليم

نورتينى
تحياتى

ابراهيم رزق يقول...

Mess Mestery

هههههههههههه
و الله ممكن تكون فكرة
هافكر فيها

سعيد بزيارتك
و ارجو ان تداومى على الزيارة

نورتينى
تحياتى

ابراهيم رزق يقول...

شرين سامى

شفتى مش بقولك ان احنا غلابة
هههههههههههههههههه

يمكن انتى طيبة
فى ستات تحب قال يعنى لازم تفتكر بنفسك

فعلا كل اعوانى خانونى

انتى هتقوليلى على البوز المصرى
هههههههههههههههههه

نورتينى
و متشكر على دعوتك التى احيت بلوجر

تحياتى

ابراهيم رزق يقول...

مونا ليزا

ههههههههههههه
فعلا تفكير الستات بيختلف عن تفكير الرجال

البنوتة اسمها سولينا
و معناه المناضلة الثائرة
قبل ما تسألى
يارب الاسم يعجبك

نورتينى
تحياتى

ابراهيم رزق يقول...

لولا وزهراء
زهراء

هحاول اكتببعيد عن السياسة

الجذاب هو حضورك و تعليقك

متشكر على دعوتك الجميلة
هو فى حد يقدر يقول على الست المصرية مش حلوة ده يبقى فدائى
هههههههههههههههههههههههههه

نورتينى
تحياتى

ابراهيم رزق يقول...

كارمن

متشكر دايما رقيقة فى تعليقك

نورتينى

تحياتى

ابراهيم رزق يقول...

زينة زيدان
اخت الشهيد

طب الواحد يعمل ايه للنسيان
هو بايدى
ههههههههههههههه

نورتينى
تحياتى

ابراهيم رزق يقول...

ليلى الصباحى
اختى العزيزة


ههههههههههههههههه
طب اعمل ايه نسيت
هى ادتنى فرصة
كان ممكن نحتفل بيه تانى يوم
لكن نعمل ايه البوز خرج
ههههههههههههههههههههه

متشكر جدا على دعواتك

نورتينى

تحياتى

ابراهيم رزق يقول...

reemaas

ههههههههههههههههه
كده برضه يعنى عشان نسيت
يبقى اتعاقب ببوز
صحيح ستات زى بعض

نورتينى
تحياتى

Noha Saleh يقول...

طيب و الله معاها حق تزعل
انا بهدي النفوس :)
ربنا يسعدكم و مايجيبش زعل بينكم أبدا