الخميس، 9 أغسطس، 2012

غواص فى ترعة النغم 13

محمد نوح
 مدد الموسيقى العربية

  • مواليد 8 يناير 1937
  • خريج كلية التجارة و درس الموسيقى بجامعة ستانفورد
  • من اعظم من وضع الموسيقى التصويرية للافلام و المسرحيات
  • له قائمة طويلة من الافلام اهمها اسكندرية كمان و كمان و المهاجر ليوسف شاهين ومرسيدس اول افلام يسرى نصر الله كما انه لحن اغانى كريستال للمبدعة شريهان 
  • مثل و لحن مسرحية سحلب كما انه التقى مع العظيم صلاح جاهين فى مسرحية لم تأخذ حقها ابدا فى العرض والانتشار واتمنى ان تعاد و هى مسرحية انقلاب بالاضافة الى عدد من المسرحيات اهمها سالومى لمحمد سلماوى وبطولة رغدة 
  • مثل عدد من الافلام و لكنه بالتمثيل  لم يكن بعظمة موسيقاه و اغانيه و ان كنت احب له الفيلم الكوميدى الموسيقى المزيكا فى خطر
  • اهم اغانيه مدد مدد و الشور شورك و الله حى و ياعصفورين و حبيبتى يا حبيبتى
  • لحن لعدد من المطربين عفاف راضى و نجاح سلام و محمد ثروت و محمد الحلو و على الحجار
  • اشتهر بغناء سيد درويش واول ادواره التمثيلية دور سيد درويش و شبه البعض موسيقاه بانها امتداد لموسيقى سيد درويس
   رحم الله محمد نوح بحجم ابداعه و تميزه

من صغر السن
كلمات المبدع سيد حجاب
لحن و توزيع محمد نوح    
كانت حبيبته مخلصة
لون اخر من موسيقى الراحل
محمد نوح
و معه فرقته  رباعى نوح ابنائه
سحر و مريم و معهم ادهم

هناك 15 تعليقًا:

faroukfahmy58 يقول...

ماهذا الوفاءوالولاء للفن والفناين لم يكن غريبا منك ان يمتد قلمك وينغمس فى وفائه ويسطر للجميع يا ابراهيم للحى والراحل للقريب والغريب انا شخصيا يا ابراهيم فوجئت وفوجعت لرحيل هذه الشخصية الفنيه الفذه فكنت احس فيهوانتعش منه فى قدرته على امتداده للزمن الجميل امتداده لسيد الغناء العربى سيد درويش والحمولى والشيخ زكريااحمد والسنباطى شانه شان سيد مكاوى مع اختلاف اللون والروح والمذاق الفنى وغيرهم من ابطال قمم النغم الشرقى الاصيل
نوح هو فعلا نوح احد من قاد سفينةالفن الشعبى الاصيل قى موج النهر الخالدالهادئ الرخيم دون ان يشعر به الا القليل من رعاة الفن ومن عاشوا فى سماه
رحم الله الفقيد الكريم وعوضنا الله عنه خيرا

Ramy يقول...

طب اعلق اقول ايه

مش عارف

أصل انا بقالى فترة مبعلقش بس من انبارح فى مود كويس فقلت لنفسى افوت و اتفائل شوية (:

يمكن بالصدفة البحته بسمع انا هويت لسيد درويش و انا بكتب التعليق بس بيغنيها فريق مسار اجبارى

محمد نوح يمكن مسمعتش ليه كتير بس من الناس اللى اقدر اقول انى بأستسيغ اغانية

الله يرحمة

ربنا يخليلك الترعة و تغوص و تجيب لنا منها نغم جميل غرقان فى ترعة النسيان

(:

شمس النهار يقول...

ايه ده محمد نوح مات
ده الواحد منفصل خالص عن الدنيا بقا

الله يرحمه كان لون جديد
في وقت صعب

;كارولين فاروق يقول...

الله يرحمه كان فنان حقيقي
لافته رقيقه رائعه منك يا ابراهيم
اعتبر ان محمد نوح الفنان العظيم صاحب
الموسيقي التصوريه لفيلم المهاجر
من الفنانين الذين ظلموا من قبل الاعلام
الفني ولم يأخذ حظه الكافي الذي يستحقه
الله يرحمه
تحياتي

بـت خـيـخـة وأي كـلام يقول...

إزيك يا إبراهيم
كل سنة وانت طيب


الله يرحم محمد نوح


انا سمعت الاغنية التانية
حلوة بس مفهمتهش ايه المقصود من جملة " ابدا مالهوش ذنب الزمان "

يعني هو طول الاغنية عمال يشكر في حبيبته وأد إيه هى كانت مخلصة وحنينة و و و .. الخ
بس فى كل مرة الكورال يقول
بس الزمان هو اللى خان

يقوم هو ينفي ده
ويقول ابدا مالهوش ذنب الزمان

عايز يقول يعنى ان حبيبته هى اللى خانت فى الأخر ؟؟؟

لو هو ده قصده يبقى الاغنية مش حلوة
ساعتها هحس انه افترى عليها



اول اغنية مسمعتهاش كلها


هو انا ممكن اسالك سؤال يا ابراهيم ؟
هو انت ليه بتسمي البوستات اللي من النوع ده غواص في ترعة النغم ؟

ليه بتستخدم لفظة " ترعة "

مش لايقة خالص على المختارات اللي انت بتجيبهالنا

لفظة " ترعة" توحي بالقرف والحاجة القذرة

وانت دايما اختياراتك بتكون حاجات حلوة

فينفع تغير اللفظ ده ؟

كان ممكن اقتنع بيه لو كنت مثلا قاصد تجيب الاغاني الهابطة وتعملها نقد او ما شابه

لكن فعلا لفظة "ترعة" مش لايقة خااااالص على محتوى البوستات دي




بس خلاص

سلام
اختك خيخة

ابراهيم رزق يقول...

الفاروق ملكا
ملك الزهرات
و ابن بطوطة المدونين

دائما تعطينى اكثر من حقى
يا ريت يا فاروقنا تغوص فى النغم لتاتى لنا بالالىء

تحياتى

ابراهيم رزق يقول...

رامى

القلب الطيب

لن اعلق غير بكلمة واحدة
سعيد جدا بتعليقك

تحياتى

ابراهيم رزق يقول...

شمس النهار
شمس الشموس

رحم الله محمد نوح

تحياتى

ابراهيم رزق يقول...

كارولين فاروق
كلارينت الفاروق

رحم الله محمد نوح
فعلا هو لم ياخذ حقه اعلاميا بما يستحق

تحياتى

ابراهيم رزق يقول...

بت خيخة و اى كلام

كل سنة و انتى طيبة
بجد سعيد جدا بتعليقك

الجزء الاول من السؤال
الاغنية دى من اجمل الاغانى اللى وصفت المراة
الموضوع ببساطة انه بيحمل نفسه هو مسئولية فقد حبيبته و ليس الزمان

ـــــــــــــــــــــــــــــ

الجزء الثانى
الترعة باللغة العربية هى الغدير و الغدير هو النهر الصغير
و لعلنا نتذكر قصيدة ايليا ابو ماضى الشهيرة الغدير الطموح

قال الغدير لنفسه .. يا ليتنى نهر كبير
مثل الفرات العذب .. او كالنيل ذو الفيض الغزير
تجرى السفائن موقرات .. فيه بالرزق الوفير
هيهات يرضى بالحقير .. من المنى الا الحقير
وانساب نحو النهر .. لايلوى على المرج النضير
حتى اذا ما جاءه .. غلب الهدير على الخرير
وهكذا غلب الهدير والاصوات العاصفة على خرير الماء ذو الصوت الجميل و ضاع داخل النهر

فالترع ليست راكدة بل المروج او الحقول لا تخضر الا من خلال الترع و ليست الانهار
خدعوكى فقالوا ان الترع راكدة فكل هذا بفعل الانسان
زمان كان الجلوس على شاطىء الترعة متعة
لذا انا ابحث عن جنود مجهولون فى عالم الغناء و لكنهم يخضرون ارض الغناء
لو لفظ الترعة لا يعجبك
ما رايك فى معناه باللغة العربية غدير
ليصبح غواص فى غدير النغم
الراى الاول و الاخير لكى و اثق فى اختيارك

تحياتى و سعيد بتعليقك

بـت خـيـخـة وأي كـلام يقول...

لأ .. العفو يا إبراهيم
مش لدرجة ان الرأي يكون رأيي


أولا بس أحب اشكرك انك نبهتني ان محمد نوح فى الاغنية كان بيلوم نفسه على فقد حبيبته
إذا كان كدة ماشي
والاغنية جميلة فعلا



ثانيا
أول مرة أعرف معنى كلمة ترعة
فبشكرك على المعلومة دي


وبصراحة القصيدة بتاعة إليا ابو ماضي أنا اول مرة أقراها



بخصوص الإختيار بين كلمة غدير أو ترعة

ممممممممممممممم

هي كلمة غدير أرقى طبعاً
لكن اعتقد انك لو غيرت لفظة ترعة للفظة غدير ده هيثير تساؤلات القراء عن سبب تغييرك للكلمة
وهتضطر انك تقعد تزيد وتعيد وتشرح الفكرة


و كلمة ترعة _ وخصوصا بعد ما فهمت معناها و وجهة نظرك فيها _ فدلوقتي وجهة نظري اتغيرت فيها ومبقتش شايفاها زي الاول
دلوقتي أنا شايفاها حاجة حلوة

فممكن تخليها زى ما هي

والرأي طبعا يرجعلك إنت


شكرا ليك
وأسفة على الإزعاج



سلام

اختك خيخة

sahar nouh يقول...

مهما شكرت ومهما قلت مش حاقدر أعبر عن شكري وإمتناني
سحر نوح

ابراهيم رزق يقول...

اختى العزيزة سحر نوح

لا شكر على واجب

بابا يستحق الكثير ولم يأخذ ما يستحق قدره
بأذن الله هناك غطسة اخرى لمحمد نوح الفنان العظيم
سعيد بتشريفك لمدونتى

تحياتى

faroukfahmy58 يقول...

اوعدك يا ابراهيم بعد رمضان ان شاء الله سالتقى مع الدكتورة ابنتى جيهان لكى تملى على من اسرار الفن ما خفى عنا وسنغوص معا ولن اتركك لوحدك
اعذرنى لاننى الآن مع تجليات شهر رمضان اغوص فى مشاهد فصص الانبياء عللى اخرج منها بما يفيد ويضيف الى كفة حسناتنا من قراءة وكتابه

ريبال بيهس يقول...

مساء الورد ابراهيم

رحم الله محمد نوح فللأسف لا نعرفه بشكل

كامل ولكن أتذكر أغاني كريستال

لشريهان لأنها كانت إبداع لحد كبير

وأشكرك لتسليطك الضوء على شخصية

كهذه لتعريف البقية به ...

تحياتي وإحترامي