فالنتين يا بيه

ضحكت كثيرا من بعض السلفيين الذين حرموا الفالنتين و تذكرت انه فى يوم من الايام اردت الاحتفال بالفالنتين و قلت نجرب الفالنتين وفيها ايه . اثناء عودتى دخلت على محل الهدايا المكسو باللون الاحمر دباديب فى كل مكان جاءت لى البائعة وقالت لى اى خدمه قلتلها عايز هديه فى الفالنتين اسرعت باحضار دبدوب احمر كبير و قالتلى فى دبدوب بيقول I Love you و فى بيغنى اغانى اليسا و كاظم الساهر . قلتلها معندكيش دبدوب بيغنى اغنية شكوكو الحب بهدلة خلانى قندلة ضيعلى صحتى و لا حول و لا . وقلت فى عقل بالى ايه ده يا ولاد ابراهيم رزق على اخر الزمن هيعمل زى العيال الفرافير ويشيل دبدوب احمر قلتلها لا مش عايز فى حاجه تانيه غير الدباديب . اسرعت باحضار قلب احمر كبير بردو احمر قلتلها فى قلوب تانيه غير اللون الاحمر ؟! استغربت جدا وقالتلى هو فى قلوب مش حمرا . قلت فى عقل بالى يعنى هو فى دباديب حمرا ده حتى فى روسيا بلد الدباديب مفيش غير ابيض واسود جت الصين خلتها حمرا المهم اخترت قلب قالتلى اى خدمة تانيه عندنا كاندلس و كروت معايده قلت ومالوا ناخد شمعه اخترت شمعه و بحاسب على تمنها قالتلى عشرون جنيها ! ليه يا بنتى دى فى درب البرابرة بجنيه و نصف وتعالى بص . قالتلى  دى هاند ميد و بعدين دى فواحه بعطور فرنسيه . هاندميد ايه وفواحه فى الاخر هنولع فيها المهم قلتلها هاتى كمان شمعدان طبعا الشىء لزوم الشىء ثم وضعتهم فى شنطة حمرا . قلتلها مفيش الوان شنط غير الاحمر ده انا لو مشيت بشنطه حمرا يزفونى العيال فى الشارع . قالتلى للاسف مفيش شنط غير الحمرا
 المهم خرجت ابحث عن الفكهانى والنبى كيلو تفاح و كيلو موز وزنهملى وحاسبنى لقيت التفاح زياده خمسه جنيه عن سعره سالت الفكهانى التفاح غالى ليه ؟ رد عشان الفالنتين يا بيه طب ملقيش عندك شنطة سوده فاضيه من عينى يا بيه واعطانى الشنطة السوده وضعت فيها الشنطه الحمرا وداريت الجريمه النكراء
ذهبت الى بائع الورد وجدت الورد غالى ايضا سالته ليه ؟!  يا باشا الفالنتين يا بيه 
ذهبت للكبابجى نصف كيلو كباب و نصف كفته كان مزدحم ايضا فى ايه يا ابو احمد انت زحمة ليه ؟ الفالنتين يا بيه قلتله ماشى يا عم فالنتين
رحت المقلة ربع كيلو لب ابيض و ربع اسمر  على ربع سودانى
روحت البيت استقبلتنى زوجتى بذهول و تحسستنى انت عيان يا ابراهيم ؟ انت سخن و لا حاجه ؟ ورد و قلب و كمان شمع و شمعدان !!!! طب اشتريت شمعدان ليه ؟ ما انا عندى شمعدان من يوم زواجى استغربت جدا انتى عندك شمعدان من يوم زواجنا يعنى فى بيتنا شمعدان ومكتوب فى القايمه وانا مضيت عليه و معرفش وتقمصت يوسف وهبى وقلت يا للهول
المهم كلنا الكباب و الكفته مع زياد وساليناز و جاء وقت الشمع انا بقى عايز اشوف الشمع اللى بالروائح الفرنسية لكن زياد خد اللب وقعد فى الصاله يتفرج على العيال كبرت و ساليناز اخذت السودانى و دخلت حجرة النوم تتفرج على الكارتون و انا فى الصالة مستنى يناموا اذ فجاة اصحى الاقى الصبح شقشق و مر  يوم الفالنتين وانا نايم فى الصاله ونسيته حتى فوجئت ذات يوما بساليناز وزياد بيلعبوا كوره بالقلب الاحمر نظرت لهم نظرة حسرة و قلت قلبى !! قلبى انا بقى يلعبوا بيه الكورة كده مش مهم على العموم لسه الشمع بالروائح الفرنسيه موجود و مسيرى اشم الروائح الفرنسيه ذات يوم حتى انقطع النور مره وفوجئت بزياد بيقولى ثوانى يا بابا انا عارف طريق شمعة وذهب الى النيش و اشعل الشمعة التى انبعثت منها روائح تشبه كولنيا خمس خمسات و نطلع من كل اللى فات بايه ان كل اللى الواحد خده من الفالنتين هو كيلو الكباب والكفته 

بلد مجانين صحيح