الخميس، 24 أكتوبر 2013

جاكوزى جاكوزى


رن هاتفى امسكت الموبايل انه صديقى رجل الاعمال والذى اتجه للانتاج الفنى فى تجربة فاشلة ايه يا عم اخبار دبى ايه ؟ . طبعا انت فى دنيا تانية فاجابنى لا انا فى القاهرة وصلت امس انت فين انا موجود فى الاوبرا بجيب الجدول الشهرى للعروض . فقال لى  طيب انا موجود فى الفور سيزون تعاللى الفور سيزون جاردن سيتى مش الجيزة انا مستنيك فى اللوبى
ذهبت اليه وجدته جالسا مع سيدة اعمال لبنانية تمسك بين اصابعها سيجارة و فنجان القهوة امامها فى الاربعينات ترتدى ملابس انيقة جدا و محتشمة و تضع ميكب عن طريق محترفين و هتقوليلى عرفت منين يا ابراهيم انه ميكب محترفين اقولكم من عاشر القوم و انا عاشرت الفنانات سنين طوال المهم بادرنى تشرب ايه قلت حلبة حصى ابتسم وعاد وقالى تشرب ايه كانه لم يسمع قلت عصير المهم استمتعت بحديثهم فى البزنس اه والله حديثهم نيتكم مترحش بعيد و انا اتناول بعض المكسرات الموجودة على المائدة وانتهى الحديث ثم رسمت السيدة ابتسامة على وجهها  ثم استأذنت و انصرفت   
بعد ان انصرفت قالى ايه رايك انا عازمك على ال Health Club فقلت له لا يا عم انا تجاربى السابقة مع الساونا غير مبشرة ابدا و قررت الا اعيدها فقال لى الوضع هنا مختلف و هتشوف المهم اقنعنى و ذهبت معه و بمجرد دخولى وجدت الوضع مختلف جدا بنات زى القمر يرتدون يونفرم يبدو انهم من اوربا الشرقية  ايه يا عم عادل ايه دول هو احنا فى تايلند و لا حاجة قالى متفرحش كده دول المسئولين عن الجيم بس المهم دخلت الجيم و استعملت بعض الاجهزة تحت اشراف استغفر الله استغفر الله البنات اللى قلتلكم عليها ثم اعطونا بشكير و بعض زجاجات الشامبو والشاور بتاعة الفنادق  عينات يعنى المهم اخذت حمامى و جاء وقت الجاكوزى لا اخفيكم الامر انى استمتعت جدا بالجاكوزى ثم جاءك الموت يا تارك الصلاه جاء موعد الساونا  دخلت غرفة الساونا و انا بداخلها شعرت كالارنب المسلوخ و عدت على الدقائق ساعات و بعد ان انتهينا من رحلة الجاكوزى و الساونا    اصطحبونى الى مكان مجهول وجدت رجلا من شرق اسيا قام بتدليك جسمى بمجموعة من الزيوت ذات الروائح المختلفة ميلت على صديقى و قلتله الراجل اللى بيكيس فى حمام الملاطيلى او القاضى او قلاون  او التلات او الاربع برقبته و جاء ال  receipt ايه ايه بتقولوا ايه 480 دولار ليه ياعم ده كل الشغل ده لو عملته فى حمام التلات ميجبش اربعين جنيه و ستين قرش وان كان على البنات اللى زى القمر و عيون ملونة نجيب كم بنت من بولاق او باب الشعرية و يلبسوا باروكة و لنسيز و بعدين هما بيحاسبوك بالدولار ليه ده انت مصرى و صعيدى كمان اجابنى اصلى حاجز فى الاوتيل بجواز سفرى الفرنسى 480 دولار يا مفترين فى حمومة يعنى 10 كيلو كباب و كفتة من عند ابو رامى يعنى عشر قدر فول من عند عم عبده دولار تأكل حى يعنى قسط من اقساط المدرسة و فى وسط انشغالى اذ فجاة اشاهد المطربة احلام فى برنامج قصر الكلام و هى تتحدث عن تصيفيها فى لندن و باريس و كان بتكلفة 3 مليون دولار و فساتينها السنيه وجدت نفسى اعقد مقارنة بين احلام بفساتينها السنيه والسيدة اللبنانية بملابسها الشيك البسيطة لاجد المقارنة ليست فى صالح احلام نهائى بل ازيد الطين بله انا ابراهيم رزق بكل لحوستى و قبل ال    Health Club فيا انوثة عن احلام ثم افاجىء بالطامة الكبرى اذ تخبرها ان ثمن العقد الذى ارتدته فى نهائى مسابقة ارب ايدول 39 مليون دولار نعم يا اختى 39 مليون دولار تضعينها على صدرك ليه هو صدرك ده بيحمل اثقال و لا ايه اوعى يكون صدرك ده اوناش كتربلر وبتقولها عشان خاطر المعجبين ليه يا ست احلام هو كل معجب هيطلع على صدرك يقعد شوية  ويشوف العقد اللى على صدرك كم قيراط 39 مليون دولار يعنى تجوز 3 مليون شاب مش قادرين يتجوزوا يعنى تحل مشكلة انقطاع الكهرباء فى غزة يعنى 80 الف مرة اروح ال  Health Club واتمتع با الجاكوزى
بلد مجانين صحيح
بل
وطن عربى مجانين صحيح 

هناك 4 تعليقات:

ستيتة يقول...

ههههههههههههههههه
نعيما يا عم ابو ساليناز
الشويش عطية الله يرحمه فيه انوثة اكتر من احلام

reemaas يقول...

ماهى دى مصييبتنا

جه وقت الغدا بتاعنا يوم الجمعة اللى فاتت كالعادة وامال فهمى شغالة وكانت مستضيفة شاب بتقوله تخيله فى موظف بيقبض اخر كل شهر 36000 ج الواد ياعينى ماردش عليها ولما كررت الكلام الواد ضحك :)

مصطفى سيف الدين يقول...

يا عم ليه الثورة دي كلها انت كنت معزوم يا حاج استمتع بوقتك
و متبقاش تتفرج على برامج فاشلة و مطربين افشل تاني

ياسمين خليفة يقول...

طبيعي انك تدفع الرقم ده لأنك كنت في الفور سيزون وده اكبر فندق في مصر هو عموما في أسعار كتيرة مبالغ فيها والمطربين دول استثناء اصلا عايشين غير بقية الشعب بس التفاخر غلط