الخميس، 10 أكتوبر 2013

انتوا مال اهلكم


كنت عريس و نازل السوبر ماركت اشترى بجنية جبنة رومى و نصف جنية زيتون و بربع جنيه لانشون الا و اسمع من خلفى صوت ياتى من اعماق السوبر ماركت واد يا ابراهيم التفت لاجد ان الصوت لوالدة صديق لى و جارتنا نعم يا تانت و ذهبت لها فقالت لى بص بقى انت تقول لمراتك تانت **** بتقولك انتى خلاص اتجوزتى ماشية بشعرك ليه اتحجبى بقى طب دى ارد عليها اقولها ايه هى يعنى مراتى كانت بتمشى بشعرها عشان تصطادنى و اهو وقع الفار فى المصيدة المهم جزيت على سنانى و قلتلها حاضر يا تانت عاوزة حاجة تانى قالتلى لا بس المهم اوعى تنسى تقولها.
تكون لابس قميص و تلاقى واحد يسالك القميص ده جميل قوى ترد تقول متشكر لحد كده مفيش حاجة هو انت شاريه منين يخصك ايه شاريه منين افرض يا اخى جاى هدية المهم تجز على سنانك و تقول من المكان الفلانى فيتبعك بالسؤال الذى ليس له محل من الاعراب جايبه بكم ليه بتسأل سيادتك هو انت هتدفعلى تمنه
تكون البنت من دى قاعدة فى فرح و تلاقى واحدة جت من حيث لا تدرى عقبالك يا **** مش تشدى حيلك بقى عشان نشوفك فى الكوشة نعم يا اختى تشد حيلها ازاى يعنى تذاكر طول الليل فى كتب كيف تصطادين عريسا و لا تزود مجهودها و تلعب فى الجيم عشان تربى عضلات و تعرف تشد حيلها و تشيل العريس
البنت من دول شدت حيلها و اتزوجت لسه يا دوب نازلة من شقتها و تقابلها قدام الاسانسير ايه يا حبيبتى مفيش حاجة جاية فى السكة جاية منين يعنى ايه مش فاهمة حمل يعنى عايزين نفرح بيكم بنونو فترد لا فياتى الصوت ملاحقا شدوا حيلكم بقى ده ان لم تسالها هو انتوا رحتوا لدكتور و العيب عندك و لا عندوا
البنت تشد حيلها و تخلف نونو قاعدين فى اى مكان النونو يبكى فيطلع نفس الصوت قومى يلا رضعيه لحد هنا و الكلام شبه عادى لكن يظهر السؤال التقليدى انت بترضعيه طبيعى و لا صناعى لا بترضعه عبر الانترنت فتضطر لتجاوبها و يا ويلها يا سواد ليلها لو قالت صناعى تلاحقها الاسئلة و الاستفسارات من نوعية حرام عليكى و حاولى و مينفعش وبقية الاسئلة و الملاحظات
يقابلك فى الشارع يلاقيك مطول شعرك و لابس سلسلة ايه يا عم مطول شعرك ليه كده ده انت قربت تبقى زى البنات و عندما تقول له ان طول الشعر ليس له علاقة بالرجولة و ان الرسول صلى الله عليه و سلم كان شعره طويلا و يقول لك طب و السلسلة دى ايه و كانه مسك عليك غلطة فتقول له ان القواد المنتصرين قديما كانوا يفتخرون بالقلادات التى يلبسونها اللى هى السلسلة يعنى اى انها ليس لها علاقة بالرجولة
يشوف صورتك على الفيس فتاتى لك تعليقات لا يعجبها لبسك او مظهرك او شكلك  طب انا مش عاجبك مطلوب منى ايه اعمل لسيادتك ايه ده ذوقى و دى خلقة ربنا اعمل فيهم ايه
تكتب بوست فتجد التعليقات و التلميحات الغريبة و اشياء و اسئلة خاصة ببيتك و تعليقات ليس لها علاقة بالبوست يا عم خليك فى حالك و فى  اللى انا كتبه فى البوست ايه علاقتك بيا
الى كل هؤلاء
و هؤلاء و هؤلاء
  وهؤلاء  هولاء هؤلاء
و هولاء هؤلاء  هولاء هؤلاء
 و هؤلاء  هولاء هؤلاء  هولاء هؤلاء
 و هولاء هؤلاء هؤلاء  هولاء هؤلاء  هولاء هؤلاء
و هولاء هؤلاء هؤلاء  هولاء هولاء هؤلاء هؤلاء  هولاء هؤلاء
 زى ما قالت اية حماد
انتوا مال اهلكم
و البيضة بجنيه و اللى مش عاجبه يبيض هو
بلد مجانين صحيح
 

هناك 12 تعليقًا:

aya mohamed يقول...

الى كل المستفزين على هذا الكوكب
بوست تحفة تحفة بجد
وصلت وانتوا مال اهلكم الى كل هؤلاء اللى كان نفسى اوصلهم المعنى
ميرسى يا خالو ^_^

L.G. يقول...

أولا المشكلة في مصر 1- العشم الزايد
2- قلة حياء
3- الفراغ الدنيوى لو حد مشغول مش حيلاقي وقت يسال ولا حيهتم الا بمشاكله ونفسه
4- المقارنة عايز يعرف انت فين وهو فين مع ان كل واحد له رزقه ونصيبه
5- أحيانا بيكون نفسه يعمل زيك بس مش قادر فيكرهك في نفسك وخلاص
6- الحالة الوحيدة الكويسة بيكون قلبه عليك وعايز ينبهك لحاجة

في جميع الاحوال أعتقد كلنا بنقع في التفاهات ديه بس بنسب متفاوتة
تحياتي

reemaas يقول...

ههههههههههههههههههههههههههههه
طبعا انتم عارف انى من رافعى شعار انتم مال اهلكم وخصوصا فى حكاية شدى حيلك دى

مصطفى سيف الدين يقول...

ايه ده ؟
هو انت تقصدني ؟
على العموم انا مكنش قصدي اضايقك
انا آسف

رحاب صالح يقول...

علي فكرة انت مغرور
مش مؤدب كممان
يعني ازاي تقول وانتوا مال اهلكم
الله الله يا ابراهيم كدة عيب
بصراحة البوست فيه كتير من الي بيحصل وعايزين اكتر كمان ...قول كمان يا عندليب ....

النسر المهاجر يقول...

فعلا الناس الحشرية كتير وبيتدخل فى حياة غيره وهو عايش عيشه أى كلام أساسا بس دى بقت سمه فى الناس
بس الى زى دول الأفضل متردش عليهم وهو هيفهم علطول أنه قال حاجه غلط

تحياتى لحضرتك

faroukfahmy يقول...

هيما الاصيل صباح القيل والقال وقالو وقولنا وقال لى وقولتلو ياحبايب فلفلو
اولا ابشر نفسى وآل الفاروق وكل المدونين انك لازلت توزع علينا محبتك بكتاباتك التى تزيل كل هم وغم فى نفوسنا ياهيما الاصيل( فاكر ياهيما تمثيلية عوف الاصيل بتاعة زمان )
اما عن تدوينتك ياعريس ياللى فكرتنى بالتعريفه اللى يجيب ربع كيلو حلاوة طحينيه .. اضيف الى كتابتك انه من كتر الجز على الاسنان وقعت والواحد خايف يجيب طقم راخر يقع
وفر الجز للحمة العيد وكل عام واسرتك بخير
تحيات من كل اسرة آل الفاروق ولا تبخل بالرد على تعليقاتنا حتى تكون معنا ونكون معك اطول وقت ممكن
الفاروق

نسرين شرباتي "أم سما" يقول...

على فكرة.. بعض الأحاديث عادية جدا بين الناس.. بنحكيها كتير.. وما بنضايق منها لنا ننسئلها.. وعلى موقف السلسة والشعر... الغالب في عصرنا الصايعة بهيك أمر.. زي الكحل بالزبك.. كان متاح بزمن الرسول.. تعال اتخيل شب حاطط كحلللللة.. منظر مقرف جدا

الميكروباص يقول...

طيب تعمل ايه لو صديق لك سألك عن صديق آخر قائلا: هو مراته حامل ولا لأ؟

احتمال يكون الفراغ هو السبب الاساسي في التركيز الشديد في أحوال الناس الشخصيه
ولا توجد تسليه أفضل من سيرة الناس وأحوالهم

فافى يقول...

خصوصا الفقره التالته دى والنبى عشان انا استويت :)

ستيتة يقول...

هههههههههههههههههه
مفيش داعي حد يجز على سنانه
ومحدش مضطر يبقى شخص حبيب حبوب
الحشرية ارادة شعب
انا وكل اللي معايا في البيت عجبنا البوست وقعدنا نتناقش فيه

Unknown يقول...

كلام جميل جداجداجدا وعند حضرتك حق الحاجات دى فعلا بقت تخنق وكل واحد بيدخل فى ما لا يخصه وما لا يعنيه
وتقريبا بقت عادة عند البشر

لكم كل التقدير