الجمعة، 1 أبريل، 2011

ستو زنزان ( بسنت و دياسطى سابقا )


                                                            مفشخونيا
                               الجزء الثالث                            
                ستو زنزان (بسنت و دياسطى سابقا)

احست زوجة الحاكم معارك بانها ملهاش دور فى البلد فاستدعت زوجها ليحضر لها فى التو و اللحظة و نظرت له بقسوة فاحس بأن شيئا حدث فبادرها هو فى ايه يا زنزان يا حبيبتى بلدى كفر فريحى مش باروحها خالص و اهلى الفلاحين محدش بيجى يزورنى و الست اللى اتجرات و لبست طقم زى طقمك فى الحفلة نفتها ايه اللى مزعلك بقى قالتلوا انا مبقاش لى لازمة فى البلد دى انت ازاى تفكر تعمل تعديل وزارى  من غير ما تقول ليا قالها ده مجرد تفكير يا زنزونتى وانا اهو باخد رائيك قالتله ايه الوزارات اللى فيها تغيير قالها وزارة التدريس و وزارة الفهلوة والكلام  لان ذفوت الخنيف وزيرها هيمسك مجلس الشوربة عندك حد يمسكهم قالتله موجود فاكر الواد سمج ال لما جاله اسهال  و هو صغير قالها اه فاكر و قالتله فاكر الواد بلاء لما جاله امساك و هو صغير برضه قالها اه فاكر قالتله فاكر الدكتور اللى عالجهم اسمه حتتين رياء قالها بس يا حبيبتى ده مالوش علاقة بوزارة التدريس قالتله ازاى هو مش دكتور بتاع عيال و اغلب اللى بيدرسوا فى المدارس عيال يبقى الرجل المناسب فى المكان المناسب قالها عندك حق يا زنزونتى مش عارف من غيرك كنت اعمل ايه

طب الفهلوة و الكلام عندك حد يا حبيبتى قالتله اه عارف الراجل بتاع المطبعة اللى معايا فى مشروع القمامة للجميع قالها اه هو مش اسمه ادنس الفزلكى قالتله اهو ده فى الفهلوة مالوش مثيل و مبيبطلش كلام فى الفاضى و المليان واد روش و كان بيشتغل رقاص زمان يعنى اكتر واحد يقعد يرقصلك و يطبلك  يعنى عز الطلب  و قال فى عقل باله  صحيح رقاص يخلف ؟؟؟ يعنى خير خلف لخير سلف باس ايدها مش عارف من غيرك يا زنزونتى كنت هاعمل ايه

حاجة تانية الواد اللى اسمه طلبت مسطبة ده امه كانت قاعدة معايا فى اسندريلا  و زعلانة خالص ابنها مش عارف يشتغل خالص مجموعته محتاجة حتة ارض صغيرة تمن تلاف فدان بس يبنى عليهم مدينة سكنية جديدة مسميها عزبتى  قالها من العين دى قبل العين دى ده انا حتى ماجملتوش يوم ما اتجوز و يوم ابنه ما طاهر اديته ارض مدينة السحاب بس اوعى تكونى زعلانة منى

بص كمان انت عارف اخويا مغير انت عارف انه كان شغال سواق على طيارة و يادوبك عايش على مرتبه خليه يمسك كل شركات المطار شحن و تصدير و خدمات جوية كل الشركات اللى فى المطار تبقى تبعه كمان انت عارف انه بيعرف يركب حمار كويس خليه رئيس الاتحاد المفشخونى للحميرية و يمسك  رئيس اللجنة اللمبية المفشخونية ده حمار قديم يعنى بيركب حمير متفهمش غلط    

فاضل حاجة يا معروكتى انا كنت ماشية راكبة الهليكوبتر بتاعتى و شفت مدرسة فى الصعيد مش مكتوب عليها مدرسة زنزان معارك مينفعش كده انت لازم تحاسب المسئول كل حاجة لازم يتكتب عليها اسمى مدرسة  زنزان معارك مكتبة  زنزان معارك مستشفى زنزان معارك كمان سجن المشاطر الخيرية هو مش سجن المشاطر الخيرية ده فيه مراة مسجونة يبقى ليه علاقة بالمراة يبقى لازم نسميه سجن زنزان معارك الخيرية كمان كل الجمعيات لازم اسمى يتكتب عليها جمعية زنزان معارك للقمامة للجميع و جمعية زنزان معارك للصياعة المتكاملة و جمعية زنزان معارك اسرة المستهبل كمان مكتبة اسندريلا دى بيجيها اعانات بالعملة الصعبة  و احنا اولى  كمان  ابعتلى الراجل بتاع الاثار ده باهى محتاس انا ليا معاه شغل و عاوزة كده يعملولى كام اغنية كده زيك عايزة اسمى يلعلع كده عايزة الشعب المفشخونى كله يقول ماما زنزان زمانها جاية جاية بعد شوية


طبعا كل صحابى الخناشير قصدى الامامير هيكونوا كلهم معايا فى المركز النومى للهمومة و الكهولة الغفيرة مثيرة هباب اوعى تنساها دى اشترت شوية نظارات كارتيه و لاكوست و ريبان كلهم سنيه عشان تتصور بيهم  هتعمل بيهم شغل يجنن و متنساش الشطورة فرندة خشن هتقعد تتكلم و منفهمش منها حاجة هو ده المطلوب اه نسيت عارف البت عيشة رد و قالها مين عيشة دى يا زنزونتى قالتله البت اللى بتيجى تبوس ايدى كل يوم دى عايزاها تبقى وزيرة معاها اعدادية قديمة قالها غالى و الطلب رخيص من عنيا الاتنين هى مملكة ابونا


و استلمت زنزان شئون المراة و التعليم و الطفولة فى مفشخونيا و حققت تقدم كبير بها لدرجة ان نسبة الامية فى مفشخونيا زادت زيادة كبيرة و انتشرت الامية المستترة بين الطلاب المفشخونين  لدرجة ان بعض طلاب المرحلة الاعدادية فى مفشخونيا لا يجيدوا القراءة و الكتابة و مشروع القمامة للجميع تحول كل كتبه الى قمامة بفضل اللجنة العبقرية التى كانت تختار الكتب لطباعتها اما احوال المراة فحدث و لا حرج زادت نسبة التحرش و لم يستطيعوا القضاء عليه و تراجع دور المراة و لم تظهر على الساحة امراة من خارج شلة الخناشير قصدى الامامير و راحت تقضى بكل نجاح على اى بارقة امل لامراة ناجحة بخلافها اما مجال الطفولة و الامومة فزادت نسبة التشرد و اطفال الشوارع و اصبحنا نسمع عن حوادث قتل لاطفال الشوارع  و انتشرت اسماء مثل المجرى و الديزل اما الختان فقد نجحت و تقدمت تقدم كبير و لكن فى ختان الافكار و العقول

كما ان ماما زنزان لم تعترف بطول الفترة الزمنية التى قضتها فى حكم مفشخونيا و انها اصبحت ستو زنزان و مازلت مصرة على انها ماما زنزان ؟؟؟؟؟

 

   
                                 

هناك 23 تعليقًا:

شيرين سامي يقول...

ههههههههههههه مش ممكن يا أستاذ ابراهيم سلسله عبقريه
الحمد لله ربنا تاب علينا من ستو سوزان و شلتها الظريفه
تحياتي ليك و أحيك مر تانيه على الموضوع الرائع :)

مصطفى سيف يقول...

هههههههههههههه
بصراحة اسلوبك رهيب يا استاذ ابراهيم
عجبني جدا
وطبعا مش هتقولك انا باحكم مصر تلاتين سنة الا اذا كل اللي حواليها اقنعوها انها بدات حكم مصر وهي في اللفة
هههههههههه

تحياتي لقلمك الرائع

emymony يقول...

هههههههههههه رائع بجد
مامته لقته مش لاقى شغل قامت عملت له مجموعه على كام فدان يعمل عزبتى
ههههههههههههههههه بلد العذب قصدى المصالح
اسلوبك رائع بجد
تقبل مرورى
تحياتى

دعاء العطار يقول...

كللللله كوووووم وماما زنزان كوم تانى

انا فى انتظار باقى السلسه

تحياتى لافكارك


(:

غير معرف يقول...

فان كنت فعلا كنت معاشر الناس دول وكنت متخصص في الاقتصاد وعالم بكل الامور واتمني ذلك ممكن نقول ليك حق لكن لو مكنتش معاشر الناس دول ومكنتش متخصص فية حل واحد تقول علي قد فهمي انا رائ هو 0000000 والا ياابراهيم نكون فعلا في زمن الرويبضة

ابراهيم رزق يقول...

الغير معرف

انا منشرتش التعليق الاول لانى لا احب ادخال الدين فيما اكتب وانا لا امنع اى تعليق و مبحبش
رغم ان سوالك الثانى من الاسئلة التى لا احبها لانى اتعامل مع من امامى على انه انسان فقط و لو مالوش عنوان الا انى ساجيبك انا مسلم
اما حكاية العشرة و الاقتصاد فمش هاخش معاك فى مجادلة و اقولك انا تخصصى ايه لانى لا اكتب اقتصاد و لا ادعى انى خبير فى الاقتصاد و لم اكتب حرف واحد اقتصاد ويشهد القراء
انا اكتب قصة باسماء من تاليفى كون ان سيادتك تلاقى شخصيات زى دى موجودة فى حياتنا يبقى الشخصيات دى لمست معاك
واضح انك مهتم بالقصة بدليل متابعتك لها دائما وانا لو شفت حد بيكتب و هو من زمن الرويبضة اسهل حاجة مش هاتبعه
انت بتقول انك مش حزب وطنى و انا لم اقل انك حزب وطنى فلماذا تدخل غير معرف احنا مش بنتكلم فى اسرار غسكرية
معلش ردى جاء طويل شوية بس للتوضيح
خالص تحياتى

اغانى الشتاء يقول...

هاهاهاهاهاهاه عجبتنى جدددااااا :)

Tears يقول...

ياريت الرئيس اللى جاى يكون أرمل او مطلق عشان اتعقدت

;كارولين فاروق يقول...

هههههههههههه
روعه يا ابراهيم
ضحكت كتير
اما عن ستو سوزان فاقول
ربنا يسامحك
دومت بخير اخي

قهوة بالفانيليا - شيماء علي يقول...

سعيدة للغاية بالتعرف إلى مدونتك :)
حلوة اوي السلسلة دي ...
مرحبا بي عندك :)

ابراهيم رزق يقول...

شرين سامى

اختى العزيزة

متشكر على مجاملتك الرقيقة
ايام اتمنى الا تعود
حضرى نفسك يا شرين للجزء التاسع
منورانى دايما

خالص تحياتى

ابراهيم رزق يقول...

مصطفى سيف

اخى العزيز
متشكر لمجاملتك و معك حق فى كل كلمة كتبتها
سعيد جدا بتعليقك
دايما منورنى
خالص تحياتى

ابراهيم رزق يقول...

emymony

فعلا بلد عزب

متشكر لمجاملتك الغالية

اتمنى ان تداومى دائما بالزيارة

ابراهيم رزق يقول...

دعاء العطار

سعيد انها عجبتك

ربنا يسهل و باقى السلسلة تعجبك

منورانى دائما
خالص تحياتى

ابراهيم رزق يقول...

اغانى الشتاء

سعيد جدا انها عجبتك
دائما منورنى

خالص تحياتى

ابراهيم رزق يقول...

Tears

لا و يكون مبيخلفش كمان

سعيد جدا بمتابعتك
دايما منورانى
خالص تحياتى

ابراهيم رزق يقول...

كارولين فاروق

اختى الغالية

سعيد انها ضحكتك

ستو زنزان لو سمحتى ههههه
دايما منورانى
خالص تحياتى

ابراهيم رزق يقول...

قهوة بالفانليا

سعيد جدا بتشريفك المدونة و الف الف مرحب

وسعيد انها اعجبتك
ارجو ان تداومى على المدونة و هاحضر لكى شاى و قهوة بالفانليا

منورانى
خالص تحياتى

سواح في ملك الله- يقول...

شجرة الدر
هما قالولنا في فييلم وااسلاماه
ان شجرة الدر كانت شبه الوليه دي
تعين ايبك وترفد بيبرس وتقتل اقطاي
بس احنا مستنيين اهو نهاية
شجرة الدر بتاعة القرن العشرين

Carmen يقول...

:‏)‏)) جامدة جدا تسلم ايدك استاذ ابراهيم اسفة ع التأخير جداااا

ابراهيم رزق يقول...

سواح فى ملك الله

اولا سعيد بتشريفك المدونة و ارجو ان تداوم

ثانيا انا كمان فى انتظار نهايتها

نورتنى
خالص تحياتى

ابراهيم رزق يقول...

كارمن

اختى المبدعة الرقيقة

دائما تسعدينى بمجاملتك الجميلة

دائما منورانى

خالص تحياتى

salwa يقول...

السلام عليكم
اول مرة اتشرف بالزيارة و شكرا لتصفحك مدونتي امس
دام التواصل
سلام