الأربعاء، 30 مارس، 2011

فرسكى حبى انا

                             مفشخونيا
                             الجزء الثانى
                             فرسكى فرسكى

جمع الحاكم معارك مساعديه الياوراذية رسمى و رئيس بيت الطاعة و التفصيل قمعى شرور و وزير الفهلوة  و الكلام ذفوت الخنيف و شيخ مشايخ المنصر هافف هبيد  و وزير النفاق ضلال الازلى و زعق فيهم و قال  لهم بانه حزين لانه يشعر بالضالة فالحاكم الاول لولاية مفشخونيا قاد الثورة واقام السد الغالى وخلد اسمه  اما الحاكم الثانى فخاض حرب انتصر فيها و خلد اسمه فانتو بقى مش هتضحكوا عليا كل سنة تجيبو المطربين و يقعدو يغنولى حبناه و بيعناه و اول طلعة مرورية قفلت شارع السبتية الكلام ده احنا بنضحك بيه على الشعب المفشخونى انتو تشوفوا لينا سبوبة كده نخلد نفسنا بيها يعنى فيد و استفيد دبرونى يا وزرا فجلس كل منهم يفكر بطريقته فذهب الياور اذية رسمى الى الحمام حتى يفكر براحته بينما امسك رئيس بيت الطاعة و التفصيل قمعى شرور المقص و ذهب الى محله اما وزير الفهلوة و الكلام  ذفوت الخنيف فظل يبحث عن شنبه كثيرا حتى وجده فبرمه و سرح فى تفكير عميق اما شيخ مشايخ المنصرهافف هبيد فخلع بدلته لانه لا يرتاح الا بالتيشرت المقلم  اما وزير النفاق ضلال الازلى فجلس فى موقعه المفضل طوال عمره و هو تحت ارجل الحاكم

فكر كل واحد بطريقته فقال الياور اذية رسمى احنا نعمل ديوان جنب الديوان بتاعى و نجيب كل شعراء المدح و يقعدوا يمدحوا فيه اربعة و عشرون ساعة اما رئيس بيت الطاعة قمعى شرور فقال انا اقدر افصله قانون يقدر يحكم به مفشخونيا حتى و هو فى قبره اما وزير الفهلوة و الكلام ذفوت الخنيف فقال انا و كل الاجهزة اللى تبعى هنقعد نسبح به و بانجازاته و نجيب المطرب الشعبى شعبوته و يقول بحب معارك وبكره عزرائيل و ايه اما شيخ المناصر هافف هبيد فقال انا على استعداد لهف فلوس لو وقف عليها يشوف خط الاستواء اما ضلال الازلى وزير النفاق فقال اما انا فمطوتى فى جيبى و ساقف فى وجه اى معارض واشرحه لو تنفس فقاموا بعرض مقترحاتهم عليه فقبلها جميعا و لكنها لم ترضى طموحاته يريد ان يضيف عليها فجاة دخل عليه فاسدهام والى و قاله طلباتك اوامر واخرج له خريطة و شاور له على منطقة اسمها فرسكى و قاله هى دى المجد اللى تخلد به اسمك و منها نستفيد بقرشين حلوين  قاله اشرح يا فاسدهام قاله احنا نعمل ترعة تنقل بيها الميه الى فرسكى منها نعملك عمل تخلد به و منه مستخلصات رايحة و جاية و فلوس تتصرف نصرف شوية و ناخد شوية و اراضى نفرقها على حبايبنا طب يا فاسدهام المشروع  ده مش جديد و تم دراسته فى عهد الحاكم الاول و اثبت فشله قاله مش مهم ينجح او يفشل المهم نعمل مشروع يخلد اسمك يا ابو بلاء هرش معارك فى مخه وقاله طب يتكلف كام رد فاسدهام باللى احنا هناخده و اللى اجمالى المشروع  قالوا يا فاسدهام كله على بعضه قاله حوالى ستة مليار جنيه قالوا بسيطة نبتدى الشغل طبعا كل واحد فيكم عارف هيعمل ايه متفقين يا عصابة قصدى يا جماعة قالوا متفقين


بدء ذفوت الخنيف عمله و اصدر اوامره الى اجهزته لا صوت يعلو على صوت فرسكى جميع البرامج و الصحف لا تتحدث الا عن فرسكى و جمال فرسكى و خدود فرسكى برامج الاطفال بدات تذيع اغانى الفنانة هانسى شاطر شاطر اللى بيسمع كلام فرسكى شو بنقله شاطر شاطر  و اغنية بابا فين بابا اه نقوله مين قوله فرسكى تكلمه واغنية بابا راح  يقول لماما ايه فرسكى اما برامج المراة فافاضت هذا فستان من الستان موديل فرسكى و هذه قصة شعر بديل فرسكى و هذا طبق اليوم فرسكاتا بالشامبنيون و طبق الحلو تورتة فرسكى بالشكولاتة اما البرامج الصحية فتحدثت عن احدث طرق علاج فيروس الالتهاب الكبدى عن طريق نبات فرسكى و اللبوس الجديد فرسكى احدث علاج للمرض الذى اصاب اغلب المصريين و هو البواسير اما المسلسلات التلفزيونية فاصبحت الطريق الى فرسكى و عائلة الحاج فرسكى و ذئاب فرسكى و ليالى فرسكى  و اللى جابوا فرسكى

اما قمعى شرور فقمع كل من عارضه بمساعدة وزير النفاق ضلال الازلى بتكمير طلبات الاستحاطة و طلبات التعبير و سرعة الانتقال الى جدول الحصص بمساعدة اعضاء من الحزب المطنطن

نأتى الى شيخ المناصر هافف هبيد الذى هف اغلب ممتلكات ولاية مفشخونيا وباعها ولهف تمنها و خد عمولته 

اما الشعب المفشخونى الطيب فقد صدق الحكاية و منى نفسه بالتقدم والخير القادم عن طريق فرسكى بل انتشرت اسماء محلات بيض طازج فرسكى و البان فرسكى و كشك فرسكى لبيع السجائر و المثلجات كما ان كل المواليد تم تغيير اسمائهم فتحولت ست ابوهم الى فرسكى ابوهم و تحولت نرمين الى فرسكين و نوران الى فرسكان اما محمود فتحول الى فرسكود و زياد الى فرسكاد

وانتهى العمل فى المشروع و ذهب معارك فى وفد كبير ليفتتحه و اخذ معه عدد كبير من الفنانين و افتتح المشروع و تم تصويره فى لوكيشن قمح تم عمله بليلة باللبن اكلها كل الشعب المفشخونى بعد التصوير و تم توزيع الصور و اللقطات فى كل وسائل الاعلام المفشخونى و على الرغم من مرور خمسة عشر عام على فرسكى الا انه لم يتم زراعة سوى حوالى ستة فى المائة فقط من مساحة فرسكى


و لكن تحقق هدف معارك من تخليد اسمه و اصبحت فرسكى عجيبة تضاف الى عجائب الدنيا السبع كاكبر اثر موجود بالعالم
كما ان فرسكى دخلت موسوعة جينس للارقام القياسية كاكبر خازوق يأخذه شعب من حاكمه
 






 
 
   

هناك 25 تعليقًا:

آخر أيام الخريف يقول...

لوووووووووووووووووووووووووووووووووووول ..حلوة كالعادة :)

فكر فى موضوع تويتر يا استاذنا :)

محمد الجرايحى يقول...

تفتكر الشعب ممكن يسكت ..؟؟؟؟

شيرين سامي يقول...

ههههههههههه
جامده جداً
الملخص المفيد لحال البلد بأسلوب مفيش أجمل من كده بس كنا عايزين قاموس عشان منقعدش نفكر كتير هههه
مبتكر يا أستاذي العزيز
تحياتي ليك

غير معرف يقول...

مفيش فايدة جهل وقلة ادب مش بقولك نحن في زمن الرويبضة

ابراهيم رزق يقول...

الغير معرف

كل اناء ينضح بما فيه
متشكر لزوقك الرفيع و ادبك البليغ
و سعيد بانك اصبحت تكتب كلمة الرويبضة بطريقة صحيحة

تحياتى لك

مصطفى سيف يقول...

جميلة اوي يا استاذ ابراهيم
بس نسيت ان الوليد بن طلال لهف 100 الف فدان فريسكاوي ببلاش
فرسكى كانت نهبة كبيرة وخدعة كبيرة للشعب
ده حتى السجاير في منها اللي اسمه فريسكى
حسبي الله ونعم الوكيل
تحياتي لقلمك الرائع ودمت لنا مبدعا
تحياتي

;كارولين فاروق يقول...

اسلوب جديد يشرح مايدور
في البلد بس في حاجات عايزه
تعريف قدامها علشان اطلغبط
في الاول
تحياتي
دومت بخير

Engineer A يقول...

:))

تقبل مروري الأول ..

دمت بخير

Casper يقول...

اسلوبك حلو في الكتابة يا ابراهيم
اتفق مع شيرين ان احنا كنا محتاجين قاموس
^_^

_________

خالص تحياتي

emymony يقول...

اولا اسلوبك يشد القارىء
ثانيا انت لخصت حالى البلد ف حدوته
بجد ربنا يعينا على الى راح والى جاى
دومت بخير
تحياتى

Carmen يقول...

:‏)‏)) بجد ماعرفش ازاي بتجيب الافكار دي عقل مميز لابعد الحدود
خالص احترامي لك

ابراهيم رزق يقول...

اخر ايام الخريف
اختى المبدعة نوران

متشكر على مجاملتك الرقيقة

حاضر هافكر بس لما انتى تفكرى الاول هههههههههه
خالص تحياتى

ابراهيم رزق يقول...

محمد الجرايحى
اخى الفاضل

اذا الشعب يوما اراد الحياة
فلابد ان يستجيب القدر

سعيد بتعليقك
شرفتنى و نورتنى
خالص تحياتى

ابراهيم رزق يقول...

شرين سامى

اختى الفاضلة

هههههههه قاموس ايه يا شرين دول عاشوا معانا اكتر ما احنا عشنا مع اهلنا

تعرفى يا شرين انا قاصد موضوع التفكير ده
متشكر لمجاملتك

و حضرى نفسك للجزء التاسع من معطف بلا قيود
خالص تحياتى

ابراهيم رزق يقول...

مصطفى سيف

اخى المبدع

لم انسى الوليد بن طلال و اشرت له من بعيد بس ده عاوز جزء لوحده

فعلا كانت فرسكى نهبة كبيرة
متشكر لمجاملتك الجميلة

خالص تحياتى

ابراهيم رزق يقول...

كارولين فارق
اختى المبدعة

انا اسف على اللخبطة بس دى شخصيات عشنا معاها عمرنا كله
متشكر لمجاملتك الجميلة
نورتينى بتعليقك
خالص تحياتى

ابراهيم رزق يقول...

Engineer A

سعيد بمرورك و ارجو ان يتكرر

خالص تحياتى

ابراهيم رزق يقول...

Casper

اخى الفاضل

متشكر لمجاملتك و القاموس جاهز هههههه
سعيد بتعليقك
خالص تحياتى

ابراهيم رزق يقول...

emymony

سعيد بتشريفك و ارجو ان تتكرر الزيارة

يارب امين

شرفتينى و نورتينى
خالص تحياتى

ابراهيم رزق يقول...

كارمن
اختى المبدعة الرقيقة

دائما تاسرينى بمجاملتك الرقيقة
مشرفانى دائما
خالص تحياتى

norahaty يقول...

للأسف كل كلمة
كتبتها صعبة لكن
صح وياعالم كل السابقين
دول سايبن (ذيول أد ايه)لهم
فى كل حتة:اخطبوط بعيد عنك:(

ابراهيم رزق يقول...

NORAHATY

متفق معكى فيما قلتيه
سعيد بمشاركتك و اتمنى المداومة

نورتينى بمشاركتك

دعاء العطار يقول...

ههههههههه

فعلا توشكى اقصد فرسكى كانت اكبر مقلللللب

لاء والاعلام كل مايتكلم فرسكى فرسكى

بجد بحيك ع اختيارك للاسماء

واسلوب سردك

تحياتى

ابراهيم رزق يقول...

دعاء العطار

متشكر على مجاملتك الرقيقة
فعلا كنا فى عصر اعلام مزيف

نورتينى بتعليقك و سعيد لمشاركتك

خالص تحياتى

reemaas يقول...

جمييييييييييييييييييييله
والتعبيرات فظيعه بجد حلوة

اهو ده حالنا