الأحد، 24 يوليو 2011

كافيه نصب

الواحد يقعد على القهوة يطلب الحاجة الساقعة او العصير محتاج سندوتش يبعت يجيب من المطعم اللى جنب القهوة او محل السندوتشات قبل ما ياكل يلاقى المية الساقعة المشبرة على الترابيزة كل ده بحاجة ببلاش كده
زمان كان الواحد لو خرج خروجة  فيها الجنس الناعم ده  ايام الكلية ( ملحوظة امنية) كانت الاماكن دى محدودة امفتريون و ماجيك فى مصر الجديدة و جروبى و الامريكين فى وسط البلد و كم مكان معروفين بالاسم فى الدقى و المهندسين و الزمالك مثل لاكتوش و اكسبرينو طبعا كان الواحد بيقعد يحوش بقى عشان يبان انه ابو على و بعد ما نقعد نتشتعبط فى الاتوبيس او ناخدها مشى 
حاليا انتشر ما يسمى كافيه و سالت المتخصصين فى اللغة الانجليزية عن معنى كافيه فتحوا مراجعهم و بعد مدة قالوا ممكن نمشيها قهوة طبعا لا اجلس على ما يسمى كافيه الا مضطرا موعد او مقابلة او خروجة مضطرة مع زوجتى بمجرد جلوسك فى الكافيه دقيقة واحدة و قبل ان تطلب تجد طبقين طبق ملىء بالفول السودانى و اللب و طبق به ترمس و زجاجتين مياه معدنية يأتى اليك شخص محفلط و يضع المنيه ثم ينصرف
تمسك المنيه فتجد اشياء لا انزل الله بها من سلطان
طبعا الشاى معروف و يوم ما ندلعه يبقى شاى بالنعناع او شاى بحليب لكن شاى flavor بنكهات متعددة الموز و التفاح و الخوخ و كل الفواكه و قريبا بطعم الجبنة و الكباب و الكاتشب و هذا هو العجب العجاب
تمسك القهوة تلاقى حوالى عشر قهوات بدء من البرازيل و المكسيك ثم  امريكا مرورا بتركيا ثم الصين عبورا الى الهند ثم ايران الى ان تصل الى السعودية و اليمن لتعبر مضيق باب المندب لتصل الى افريقيا لتجد اثيوبيا و بوركينا فاسو
اردت ان اريح نفسى و اطلب عصير طبعا لم اسلم الرحلة السابقة و لكنها اختلفت من عصير هاواى الى عصير لاس فيجاس مرور بكالفورنيا نهاية بتكساس
طبعا ساليناز و زياد يجب ان يطلبوا ايس كريم نفس الرحلة المتعبة المنهكة
السندوتشات و البيتزا مقدور عليها لاننا لا نطلبها من الاصل فالمطاعم الامريكية قايمة بالواجب
طبعا يحيط بك شاشات البلازما و قنوات الاغانى مزيكا و روتانا و خليجية لو موسم الصيف و السائحين العرب
الشيشة تحيط بك من كل جانب رجال و سيدات طبعا دليل التحرر و المساواة و المراة مثل الرجل
طبعا حضر العصير طبعا مجموعة من الفواكه و فوق كوب العصير شمسية ورقية دليل على ان الفواكه دى من مزارع هاواى طبعا الكوكتيل ابو اثنين جنيه من اى محل عصير افضل منه
طبعا الايس كريم كاس حوالى نصف كيلو ايس كريم موضوع عليه صوص كراميل اللى هو سكر محروق و بعض المكسرات 
طبعا الانسة ساليناز وقعت بولة من الايس كريم على فستانها فاصطحبتها امها الى دورة المياه لكى تصلح بعض ما حدث اثناء خروج ساليناز من دورة المياه جريت الى المكان الذى يجهز به المشروبات فتبعها لاحضرها اقسم بالله انه اقل من النصبة الخاصة بقهوة دبوس التى كنت اجلس عليها زمان و انطبق المثل الشهير عليهم من برة هالله هالله و من  جوه يعلم الله طلبت الحساب و نظرت الى الشيك الخاص بالحساب و انا اقول بلد مجانين صحيح   
 

هناك 48 تعليقًا:

الذوق الرفيع يقول...

ياسلام عليك
طرح رائع
بموت ضحك كنت وأنا اقرأ
الله يعينكم على هذه البلد
بصراحة كلنا بالهوا سوا ههههه
يمن ومصر طبق بعض
تحياتي لروحك المرحة :)

ياسمين يقول...

هههههههه
يانهار أبيض ..بتفكرني لما كنا انا واصحابي ف مدينة غير مدينتنا قائمة بئا والحاجات دي واحنا محتريين من كثر الأسماء الغربية وبعد مشورات كثيرة وعديدة اخترنا حبيب الشعب المصري الفول والطعمية ههههههههههه ونريح دماغنا وبعدين الكوكتيل ع فكرة بجنية ونص معلش الا النص دا هههه
دلوقتي ياأستاذ إبراهيم الدنيا مظاهر يعني الناس تتكسف مثلا تروح محل عادي مع ان ممكن المحل العادي يكون أحسن من اللي متزين داا بس الفرق ان التاني الديكور أكثر...كله عشان الفلوس...

أم هريرة.. lolocat يقول...

السلام عليكم

ههههه صبحك ربى بكل خير اخى العزيز
ما اجمل ان نستيقظ على جملتك الخفيفة الظل ( بلد مجانين صحيح )
زمان واحنا صغيرين كنت كل يوم اصحى على صوت بابا وهو بيضحك من كلام فؤاد المهندس
فى برنامج ( مش كده ولا ايه ) كلمتين وبس

انت دايما بتفكرنى بكلاملك بالبرنامج ده :)

للاسف انا لى رأى فى المطاعم كلها حتى لو كان شكلها رائع وراقية ووووو ...الا انى افضل اكل البيت و المعلبات افضل من اللى بيقدموه فى الاماكن دى لا اثق ابدا فى ما يقدم فى المطاعم مهما كان حتى لو عصير ( يمكن تعتبره وسواس ) ههههه بس دى انا ومش عارفة اغير منها
انا كمان احب الايس كريم زى ساليناز لكن مايقدم فى بعض المطاعم والكافيهات لايمت للايس كريم بصلة ابدا خاصة فى المصايف بيكون الامر فعلا ( بلد مجانين صحيح )
لكن بالنهاية كله يهون مادامت الرحلة والفسحة بتكون مع الحبايب :)
ربنا يبارك لك فيهم وتسعدهم دايما اخى الكريم
وكل سنة وانت بكل خير وسعادة انت والاسرة الجميلة بمناسبة شهر الخير والبركة

تحياتى وتقديرى لك

مصطفى سيف يقول...

يا ترى الكافيه ده بيقدم شاي بالياسمين؟
ماهي بقت حياتنا كلها جنان
وحاجات كتير اوي دخلت في حياتنا مالهاش لازمة
ولو دورنا هنلاقي الاصل اللي اتربينا عليه احسن مليون مرة
تحياتي

NISREENA يقول...

كافيه نصب رسمي
وده من منطلق الرقي والتطور
حفظ الله لك أولادك
واسمها جميل ساليناز
ربي يخليها ليك
،،،،،،،،،،،،،،،
الحل برأيي للتغلب على بلد المجانين
أن تشتري عصير أبو 2 جنيه
وتذهب به والعائلة الكريمة إلى البحر
وتمضي هناك أجمل ساعات من غير ما تحرق دمك من اللي بتشوفه في الكافيه

reemaas يقول...

هههههههههههههههه
طلعت كام الفاتورة بجد؟

لفت نظرى حاجة هو ليه مافيش شاى ولا قهوة مصرى؟
لى كلهم جنسيات مختلفه

faroukfahmy58 يقول...

احجز مكان ياابرهيم لان مسألة الكافيه ليه فيها حكاية عاوزه توضيب حالا ساحضر التعليق مع الشاى الاستكوفى

εïз Semsema εïз يقول...

هههههههههههههه

ربنا يستر والله من الاكل برا

الواحد بياكل برا ولا هو عارف دا بيتجهز ازاي ولا اي حاجة

بس مازلنا بناكل بردو

بنسمع مهازل وتاني يوم نطلع ناكل برا بردو

ربنا يستر بقا .. نوت لذيذة يا فندم ^_^

Tarkieb يقول...

ههههههههههه فكرتني ببوفية محطة مصر لو طلبت اي حاجة تجيلك حتتة جاتوة اجباري وبتلف على اي زبون ما حدش بياكلها بس لازم تدفع ...شغل نصب...العيب مش عليهم العيب ع الدولة اللي ليس لها وجود ...لو الناس وراها دولة قوية ماكنش شغل الابتزاز ده حصل

شمس النهار يقول...

بالنسبة للبوست السابق بتاع الجزمة معلش ماانت عارفني ساعات بعلق بالجملة
:)

بجد ضحكني ولسه كنت طالعه من عند حلم لسه مااستسلمش ضحكني وبكاني

اهو بوستك ده ضحكني تاني

اما البوست ده فضحكني اكتر ورجعني سنين ورا لما كنت بخرج مع بناتي وهمه صغيرين ومغماراتنا في الخروج لما اول مانركب العربية
ماما عايزة التويلت والتانية ماما عايزة اشرب والتالته تعيط ماهي اصغر منهم مابتعرفش تتكلم بس لازم تجامل

ده غير مغامرتنا في النادي والملاهي ولا لو سولت لي نفسي ورحت بيهم ورلد ان ايس
ااااايااااااااام
يوم السبت نمرة اتنين هيتكتب كتابها اللي اتأجل بسبب الثورة
بسرعة بيكبروا وتبقاذكريات

عقبال ماتفرح بيهم ان شاء الله ومصر اجمل واحسن

ريــــمــــاس يقول...

مساء الغاردينيا استاذ ابراهيم
المهم انه ساليناز كانت مبسوطة وماتوقع على فستانها آيس كريم
وماله ربنا يخليلها باباها دنا كنت فاكرة هتقول خرجتو بعدها للتسوق << عشان يخسر ههههههههه
بس بجد حكاية النصب موجودة حتى عندنا في السعودية فيه كافيهات ومطاعم بتبقى من برا الله الله ومن جوا يعلم الله يمكن دي ضريبة التطور الي بنتخدع فيه :)
ربنا يخليلك أسرتك وكل عام وأنتم بخير بمناسبة الشهر الفضيل "
؛؛
؛
لروحك عبق الغاردينيا
reemaas

faroukfahmy58 يقول...

اظرف ظرفائنا
انا كنت على موعد مع صديق لى فى احد الكافيهات بالمعادى .. وبعد ان شربنا اللازم ظهر اننى نسيت محفظة نقودى ورحب صديقى بدفع الحساب وهم باخراج محفظته التى فوجئ بانتشالها واتفقنا ان اترك دبلة زواجى رهنا لهذا المبلغ واستدعيت الشخص الواقف واودعته الدبلة وعندرجوعى اكتشفت ان هذا الشخص لم يكن نادلا ولكن محتالا انتحل شخصية النادل وهرب بالدبلة وبعدها اشتريت دبلة صينى لا زالت حتى الان فى صباعى من وراء ام العيال

وجع البنفسج يقول...

والله رحلة موفقة مع العيال وأمهم .. بس بجد الحياة زمان كانت أحلى بكثير .. بسيطة وهادئة ..

:::

أعجبني تعليق الاستاذ فاروق فهمي .. والذي يمتعنا بكل جديد ومفيد ومضحك .

منيرة سوار يقول...

كلنا بالهوا سوا أخي ابراهيم..
بوست ظريف جدا..
تقبل مروري أخي الكريم..

شمس النهار يقول...

ماتضايقش من الغير معرف اللي عندي ده عاااااادي خالص
يامادخل مدونتي ناس كده ولا عبرتهم وبيزهقوا ويمشوا لوحدهم
مش بحب اقفل التعليقات بحب الناس تقرا تعليقات بعض ويردوا علي بعض شوفت المناقشة الراقية الجميلة بين مصطفي وفاتيما
ليه نحرم نفسنا من ده تصدق انا مش بقرا تعليقه اصلا ولا اعرف فيه ايه
وبدعيله ربنا يهديه
اغلب المصرين مابيعرفوش يختلفوا ولا يتحاوروا بأدب ولاتوجد عندنا ثقافة الاختلاف اصلا لازم كلنا نبقا زي بعض معيا معايا مش معايا تبقا ضدي
ربنا يهدي

Ramy يقول...

بلد المجانين

باين عليها عاوزة فترة كبيرة علشان تعقل (:

الاحلام يقول...

الكتابه اخى الكريم تدل على صفاء شخصيتك ونقاءها فانت انسان فاضل جميل المشاعر والاحاسيس فكلماتك تدل حقا على شخصيتك الرائعه فانا اعتز جدا بمعرفتك الغاليه واتشرف بها دائما
تحياتى لكى اخى الكريم ابوداود

افكار مبعثرة يقول...

حصلت فيا من فترة دخلت كافيه من الكافيها الحلوة دي و قعدت و طلبت عصير مانجا عادي يعني زي اي عصير ف الدنيا من فرغلي و لا من ابو حيدر و اختي اخدت ايس كريم عادي برده بس على مش عارفة ايه صوص شوكولاته و كيك ايه و حاجات خزعبلية و اجي اخد الشيك الاقي هدفع 55 جنيه ليه مانجاو ايس كريم ب 55 جنيه ليييييييييييييييه
هههههههههههه و الله العظيم فعلا نصب علني
رائعة كالعادة :)

ريبال بيهس يقول...

مساء الورد اباهيم

للأسف عملية النصب موجودة في كل

مكان والملاحظ أنها طغت على كل شيء

وليس فقط الكافيهات ...

كل عام وأنت بخير

محمد الجرايحى يقول...

أخى الفاضل: ابراهيم
كان الله فى العون ....
وأحييك على قلمك الذى صور لنا بكلماتك الساخرة المحببة هذا المشهد .
تقبل تقديرى واحترامى

د/دودى يقول...

احيانا بحس انى بدفع تمن الهوا اللى بتنفسه فى الاماكن دى...و بالصدفه كنت هناك النهارده بحتفل بنهايه الامتحانات"اخيرااااا" اظن ان حتى الاجانب مش عبط لدرجه دفع المبالغ دى فى الخدمات دى و قطعا المصريين كذلك " اذا تم اسثناء الحراميه و ولاد الحراميه " لان نظرتى فى الموضوع ان المال اللى يتصرف بالهبل ده عاده هيكون غير متعوب فيه...

و انا فى سيتى ستارز لاقيت جزمه حريمى كتب عليها 879 جنيه مشابهه للى كنت لابساه و طبعا مش هاقول بتاعتى كانت بكام لكنك ستقوم بالكثير من الطرح و القسمه قبل الوصول الى سعرها ...

اسفه لعدم متابعتى الايام السابقه نظرا لانى كنت بمتحن "كالعاده اخر ناس فى مصر" و يادوبك لسه مخلصه النهارده

Ms Venus يقول...

كل حاجة بقت نصب فى نصب

وكأن النصب والنصابين بقوا مقررين على الناس :)

ابراهيم رزق يقول...

الذوق الرفيع

متشكر لمجاملتك الرقيقة
ربنا يحمى اليمن و يجعلها امنة

نورتينى
تحياتى

ابراهيم رزق يقول...

ياسمين

ههههههههههه
ده الفول صديقى
و الكوكتيل

فعلا البعض يشترى الديكور

نورتينى
تحياتى

ابراهيم رزق يقول...

ام هريرة

اولا سعيد بتعليقك جدا جدا

يا سلام على كلمتين و بس ده كان ناليف العظيم احمد بهجت

متفق معكى بس انا بحب اكل المطاعم الشعبية

نورتينى
خالص تحياتى

ابراهيم رزق يقول...

مصطفى سيف

ههههههههههه
فى شاى بالياسمين يا مصطفى
فعلا على الاصل دور

نورتنى
تحياتى

ابراهيم رزق يقول...

NISREENA

فعلا نصب رسمى

فعلا و الله البساطة و الحاجات البسيطة اجمل

نورتينى
تحياتى

ابراهيم رزق يقول...

reemaas

ههههههههه
بصى من الاول كدة من قبل ما تقعدى بيجيلك ترمس و لب و سودانى و مياه معدنية بحوالى خمسة و ثلاثون جنيها الفاتورة كانت مائة و اربعون جنيها يعنى مائة و خمسون بالتبس

مش عارف ليه مفيش يمكن نوع من الوجاهة اللكنات و الاسماء الغربية

نورتينى
تحياتى

ابراهيم رزق يقول...

فاروق فهمى
استاذى العزيز

هههههههههه
انتى و صاحبك معكمش فلوس
فكرتنى بحكاية حدثت معى ساقصها بعدين

موضوع الدبلة ده انا دبلتى و قعت منى فى اسكندرية فى ثانية اختفت فى الرملة
هههههههههه
تحيا الصينى

نورتينى
خالص تحياتى

ابراهيم رزق يقول...

Semsema

ههههههههههههه

فعلا و مع ذلك الواحد لا يتوب من الاكل برة

هى ارزاق

نورتينى
تحياتى

ابراهيم رزق يقول...

Tarkieb

ههههههههه
كل كوم و بوفيه المحطة كوم
يا ريت جاتوه دى حتة بانيه
ههههههههههههه

نورتنى
تحياتى

ابراهيم رزق يقول...

شمس النهار

ابتسامة كبيرة لتعليقك

ربنا يخليهم ليكى
مبروك لرقم اثنين نفهم من كده ان فرحها على العيد
هههههههه
ربنا يتمم لها بخير

نورتينى
خالص تحياتى

ابراهيم رزق يقول...

ريماس

ريمسو المبدعة

ههههههههههه
ما القعدة على الكافيه بعد الشوبنج

كلنا فى النصب سواء فى مصر السعودية
و ده اللى بيسموه تطور

نورتينى
تحيات معطرة برائحة القهوة
ههههههه

ابراهيم رزق يقول...

شجن البنفسج
اختى العزيزة

فعلا زمان كان احلى بكثير

الاستاذ فاروق دائما ما يمتعنا

نورتينى
خالص تحياتى

ابراهيم رزق يقول...

منيرة سوار

فعلا كلنا فى الهواء سواء
متشكر لمجاملتك الجميلة
نورتينى
تحياتى

ابراهيم رزق يقول...

شمس النهار

ان اومن بحرية الحوار و الحوار الجاد المفيد لكن ما اراه هو وقاحة بعينها

تحياتى

ابراهيم رزق يقول...

رامى
القلب الطيب

يارب تعقل
ههههههه

نورتنى
تحياتى

ابراهيم رزق يقول...

الاحلام
اخى العزيز

متشكر اخى العزيز على تعليقك الغالى

انا الذى اتشرف و اعتز بك

نورتنى
تحياتى

ابراهيم رزق يقول...

افكار مبعثرة


55 جنيها
مانجو هندى و ايس كريم من هاواى
هههههههه
شوهات فى كل شىء

فعلا نصب نصب

متشكر
نورتينى
خالص تحياتى

ابراهيم رزق يقول...

ريبال بيهس

فعلا النصب على عينك يا تاجر فى كل مكان

نورتنى
خالص تحياتى

ابراهيم رزق يقول...

محمد الجرايحى
استاذى العزيز

شرفتنى و اسعدتنى بتعليقك
متشكر

نورتنى
خالص تحياتى

ابراهيم رزق يقول...

د دودى

حمد الله على السلامة و يارب تنجحى

متفق معكى تماما
تلاقى الجزمة كانت سينيه
هههههههههه

موضوع الفلوس ده لو اتناقشت معاه فى الفاتورة ينظر لك كانك متخلف او بيئة

نورتينى
خالص تتحياتى

ابراهيم رزق يقول...

Ms Venus

فعلا كل الدنيا اصبحت نصب

نورتينى
خالص تحياتى

zizi يقول...

هيمة العزيز ..
وحشتني ومازلت في الأجازة بس قلت اشوفك كاتب ايه واروح تاني ..اسلوبك تلقائي ورائع ودايماً محسسنا ان احنا معاك ومع ام زياد وهي داخلة تلحق اللي حصل ..وفكرتني في يوم كده حابقى احكيلكم عن طرائف ولادي وهم صغيرين ...أما النصب فحدث حرج ..وهم فعلاً زي ما بتقول بيبقوا معتمدين على ان الإتيكيت والوضع الإجتماعي لن يسمح بمجرد المناقشة في محتويات الفاتورة ..ويا عيني بقى لو الزبون كان لسة خاطب والا _ولامؤاخذة_معاه الجو ..دي بقى تبقى الزنقة اللي في خانة اليكّ..
امتعتنا يا ابراهيم ومن هنا من بلد الكفاح المسلح اقصد من قهوة النصب المأصل بابعت تحياتي للأستاذ فاروق عشان فعلاً قصته مع الألمانية دي قصة رائعة ومليانة بالمفاجئات..تحياتي له ..وشكري لك ولكل من سأل عني انا بخير ..واشكركم جميعاً ..

zizi يقول...

ابراهيم ..
صحيح عشان انا جيت متأخر ..هو فيه حد غتت كان هنا وانت شلته والا ايه ؟؟هو فيه ناس رخمة فعلاً ودول مش فاهمين يعني ايه تدوين ..ربنا يهدي ..

Bent Men ElZaman Da !! يقول...

ههههههههههههههههههههه
طب يا بخت الرجاله والله
بيقدروا يقعدوا على القهوه والكافيهات فى نفس الوقت ويقدروا يعرفوا قيمه الفرق الفظيع بيت الاتنين
انما البنات بس الكافيهات

ابراهيم رزق يقول...

zizi العزيزة الذيزة

اجازة سعيدة و يا بختك انا ماسك الخشب اهو

طبعا متفق معكى عن النصب على الكافيهات و مستنى ذكرياتك مع اولادك

لو حد غتت انااقدر ارد عليه هم من الهيافة ان الواحد بسهولة يفعصهم
هما غتتوا عند شمس النهار

نورتينى و شرفتينى
تحياتى و تقديرى و حبى

ابراهيم رزق يقول...

Bent Men ALZaman Da

ههههههههههههه

انتو فتحتوا على التالت بتقعدوا فى كل حتة
شوفى قهاوى وسط البلد و عماد الدين و الالفى و البورصة ده فى التكعيبة البنات اكتر

نورتينى
تحياتى