الاثنين، 11 يوليو، 2011

ابو النمرس عبر التلفزيون

هل سمع احد منكم عن قرية من قرى الجيزة اسمها ابو النمرس ابو النمرس هذه قرية صغيرة تشتهر بالباعة الجائلين للادوات المنزلية يطرقون الابواب مثلما يفعل الصينيون تماما  يغطون مصر بطولها و عرضها زمان كان هؤلاء يحملون سجاد او طقم صينى للعروسة يطرق باب الشقة و يعرض بضاعته و بين الشارى و البائع يفتح الله ثم تطوروا و سافروا الصين و استوردوا و اصبحو يبيعون مكانس و خلاطات و مرواح و مكاوى و ادوات مطبخ لو سالت اى بائع من هؤلاء ماهى بلدك حتى لو كان هذا البائع فى اسوان سيقول لك ابو النمرس

الان فى قنوات التلفزيون انتشرت اعلانات يقف رجل مثل شجيع السيما يرتدى بدلة و بشنب بريمة يقف يعلن عن منتجه يمسك حلة و طاسة و يقول طقم الحلل ده مش زى اى طقم حلل دى الحلة لما بتحطها على النار بتسخن لكن بتسخن بنظام الكاتشينبوفلين بتوزيع حرارى يضمن ان الاكل من فوق يبقى زى تحت و محدش يسالنى يعنى ايه الكاتشينبوفلين لانى معرفش و مش بس كده ده الحله لها يدين من الخشب الهندى عشان تمسك منها الحلة لما تسخن و كمان بيخلى ريحة الطبيخ حلوة عشان الخشب ده مطعم بالبخور و بكده محدش يحسد الاكل و يتحرق و بعدين الحلة ليها غطا عشان تحفظ البخار داخل الحلة و بعدين يد الغطا على شكل خرزة زرقة عشان الاكل بعد ما يتعمل محدش يحسدوا و يدلق اه ولاد الحرام مخلوش لولاد الحلال حاجة مش بس كده الحلة مزودة بجهاز انذار و حماية ضد زوجك او ابنك لو حب يدخل المطبخ و ياكل من وراكى بثلاث نغمات نغمة تقومك من قدام المسلسل التركى لو مشغولة بيه ثم نغمة اعلى تصحيكى من النوم لو كنتى فى سابع نومة ثم نغمة ثالثة اعلى تفضحه و تصوت و تلم عليه الجيران لو كان فى الحلة لحمة 
نسيت اقولكوا كمان الحلة دى بعد الطبخ ممكن تغسليها باى نوع من المياه هى مش بتقول حاجة لا تشترط مياه معدنية  او غازية
نسيت اقولكوا طقم الحلل ده مصنوع من معدن لا يتفاعل مع الميكروبات و يقضى عليها و بذلك نضمن ان الاكل لا يحمض حتى لو تركناه اسبوع
طقم الحلل ده بيتباع فى الزمالك بالف و خمسمائة جنيه و بيتباع فى المهندسين بالف و مئتان جنيه و بيتباع فى العتبة بالف جنيه احنا مش هنقول الف او تسعمائة او حتى ثمانمائة جنيه اتصل الان و احصل على طقم الحلل ده ب 799 جنيه + مصاريف الشحن مش بس كده اللى هيتصل دلوقتى هيحصل على هدية الطاسة الجميلة دى اللى انا ماسكها فى ايدى دى ممكن تعملوا فيها البيض و ممكن تلبسوا الطاسة فى دماغكم
بلد مجانيين صحيح
الى اللقاء مع باقى اعلانات تلفزيون ابو النمرس
 

هناك 46 تعليقًا:

موناليزا يقول...

اعلانات مستفزة
وخد عندك كمان اعلان الكيس البلاستيك اللى ممكن يتعان فيه الهدوم اللى فيه فتحة من النص علشان المكنسة تعرف تشفط الهوا منه اللى هو تقريبا ب80جنيه ده
اللى مابيتأثرش لا بالميه ولا بالتراب والحاجة اللى جواه بتفضل نضيفة

(ده على اعتبار ان اى اى كيس بلاستيك تانى مش هيقضى الغرض)

ولا الاعلان بتاع قوالب الكيك السليكون اللى بجد الميزة الحلوة اوى انه ممكن يتعان فى اى مكان


ولا الاعلان بتاع كيس المكرونة اللى هيكفى مية

(ده على اعتبار ان كل واحد هياخد حباية مكرونة)

Tears يقول...

صراحة عجبتنى الحلة اوى بس مستغلياها هههههه

أم هريرة.. lolocat يقول...

السلام عليكم

والله استاذ ابراهيم انت دايما بتتكلم بلسان حالنا وكما قالت موناليزا عن اعلان الاكياس البلاستيك للملابس و اطباق السيلكون شىء مستفز جدا وغريب
وعايزين يكسبوا من اى شىء كفاية اسم الاطباق سيلكون يعنى الواحد يعمل فيه الاكل ويتخيل غرفة العمليات شىء مقزز جدا

تعرف استاذ ابراهيم مرة كنت فى الريف عند جدى وفى (( الغيط )) اصطادنا سمك مالقينا شىء نعمل عليه السمك هناك تعرف عملنا ايه

جبنا صينية المونيوم شوينا عليها السمك على قوالب طوب واستخدمنا الخشب فى الطهى كان اجمل سمك اكلته فى حياتى بعد ما كنت معترضة فى اول الامر
اد ايه الفطرة والبساطة شىء جميل

الشىء اللى مش كويس ايضا شكل الشباب اللى بيعرضوا الاعلانات ياسلام لابسين بدل وشكلهم رائع وتسمع كلامهم تقول يارتهم ما اتكلموا

حقيقى بلد مجانين صحيح :)

تحياتى لك اخى الكريم
دمت بخير دائما

Bent Men ElZaman Da !! يقول...

غير طبيعيه الاعلانات دى
مستفزه بطريقه مش ممكنه
اعلانات المنتجات دى بقت مسلسل مش اعلان
يفضل الاعلان شغال يجى نص ساعه بيتكلموا فى نفس الحاجه
واللى بيشلنى بقى الاعلان بتاع الكومبيوتر
هارد 20 جيجاعشان يشيل كل حاجه
الواحد بيبقى قاعد قدامهم مزبهل صراحه من كتر ما هما عاملين ينفخوا فى الحاجات اللى بيعلنوا عنها دى

ياسمين يقول...

طيب مفيش بئا حلة بتعمل الأكل لوحدها هههه مرة الأستاذ بيحكي انه اشتري حلة من التليفزيون وف التليفزيون معلنيين ان الحلة بتشيل لحد خروف ..لما جبها الفرخة حتي مش دخلت هههههههه
هما عايزين يبيعوا وخلاص مفيش مصداقية

ريــــمــــاس يقول...

صباح الغاردينيا أستاذي ابراهيم
الحمدالله الي ماتأخرتش اصلي بجد مكسوفة انما اعمل ايه غصب عني ..
نيجي بقى لموضوعك انا عندي سؤال هو انت قاعد قدام التلفزيون دايماً هههههههه اصله نادر ماتلاقي راجل بيبص على الاعلانات دي بس الظاهر انت بتابع مسلسلات تركية مع ام زياد هههههههههه
بالنسبة للإعلانات دي بتبقى حاجة خيال وانا بجد بعترف طلبت حاجات زي كدا والي حصل انه الي تشوفه حاجة والي تجربه حاجة تانيه يعني بيبقى إستخفاف لعقول الناس بمعنى اصح للستات لانها بتصدق اي حاجة <<< زي بعض الناس :) "
؛؛
؛
لروحك عبق الغاردينيا
كانت هنا
reemaas

Casper يقول...

من زمان نفسي اعمل بوست على الاعلانات دي
وبالذات اعلان الكمبيوتر الامريكي ابو رامة 256 وهارد اربعين جيجا ^_^

__________

اسلوبك جميل يا ابراهيم
بالتوفيق

faroukfahmy58 يقول...

ايه الحكاية يا اظرف الظرفاء
وصلت كمان لابو النمرس انت مش شيخ حاره بقى انت شيخ البلد كلها آسف ياابرهيم قصدى شيخ منصر ههههههه
ولجل عيونك انا هشترى الطقم ده مهما كان تمنه مش عشان ام العيال تطبخ فيه لأن الحاجة غاليه ...عشان احطه فى النيش ويعرف الناس انى أكيل
اكلك منين ياابرهيم على رأى صباح
حقا يا ابراهيم انت مرطبنا فى هذا الجو الساخن الطقص والغاطس فى بحور الكشف عن حقيقة اصل قادتنا الغامض الصامت فى اللامنتهى ، ربنا يسلم

zizi يقول...

لا لا لا ..يا ابراهيم ..بجد بجد انت جيت على الوتر الحساس وفيه دلوقتي طريقة احدث للمطاردة مش بس عبر شاشات التليفزيون لكن بقى عبر سماعات التليفون ..ويا ويلك يا بياض ليلك لو انت بمنتهى حسن النية اتصلت مرة باحد المعلنين تسأل عن سعر حاجة اولاً بياخدوا اسمك وعنوانك وانت ازاي وصلت للمنتج ده عن طريق التليفزيون والآ اخبار الجمعة والا الوسيط ..وبعد كده بقى تبتدي المناوشات على شخص سيادتك الضعيف ..حضرتك الأستاذ فلان ؟؟؟؟ايوه ...الف الف الف مبروك حضرتك كسبت معانا في السحب بتاع يوم الأربع وقدامك تلات خيارات ياتكسب طقم حلل ..ياتكسب دستة اطباق ..ياتكسب طاسة من بتاعة الأستاذ ابراهيم عشان تدفي راسك في الشتا ...وياسلام على مواعيد الإتصال يا إما الصبح الساعة تسعة وانت لسة بتقول يا فتاح ياعليم يا رزاق يا كريم ..يا إما الساعة تلاتة الضهر وانت بتحضر الغدا وتصر على انها تقول الوصايا العشر من الأول ..وفعلاً بتوع ابو النمرس مشهورين بكده ومعظمهم ما بيكملش تعليمه وبيكتفي بالثانوي التجاري عشان كده وان جيت للحق هي افضل من انتظار الشغل يخبط على الباب ويا ريت بتوع الثورة يعملوا حاجات زي كدة تعينهم على مكافحة البطالة ..وموضوع من مواضيعك المثيرة للجدل ..سلمت وسلم قلمك المبدع ..تحياتي

زينة زيدان يقول...

مستفزة هاي الاعلانات إلي بتستمر نصف ساعة للاعلان الواحد
ولسا لما يكون راجل أرحم من وحدة ست

وقتها ما بنعرف هو الاعلان عن الحلل ولا عن
اللبس إلي لبساه ولا عن المكياج ولا عن...

صحيح أنا معك عالم مجانين + مخابيل + مهابيل = عالم الموضة والاتيكيت

افكار مبعثرة يقول...

اه والله اخر استفزاز و اللي يجي يقوللك يانهار ابيض يانهار الوان اتصل و خد البطانية الحلوة دي و عليها 10 بطاطين هدية ههههههههههههه
ياساتر على الاستفزاز و تلاقي الاعلان من دول يقعد 10 ساعات يوصف ف جمال الحاجة و حلاوة الحاجة ياعيني ع الحاجة :)))
صحيح والله مجانين
تسلم ايديك و تحياتي ليك :)

مصطفى سيف يقول...

احلى حاجة في الجماعة دول كلمة مش بس كده
تحسسك انك قدام طقم اسطوري ولا الطقم اللي كان بينزل لشهريار
في الاظرف من دول اللي بيتصلوا بالتليفون مبروك انت رقمك كسب معانا
على الاقل بتوع التلفزيون مش هيزعجوك ويخلوك تجري تشوف مين اللي بيتصل
تحياتي

الاحلام يقول...

انا دورت كتير لم اعثر على رقم التليفون هو كام علشان اتصل بيهم فورا واقولهم شكرا مش عاوز المنتج بتاعهم
والله يا اخى ابراهيم القنوات كلها اصبحت هكذا ممله ومستفذه هذا بخلاف اعلانات المسابقات التى تعتبر ضحك على الناس وللاسف يوجد من يساعدهم على ذلك
عفانا الله من كل هذا دمت بخير ابوداود

آخر أيام الخريف يقول...

لووووووووووووووووووووووووووول ولحاف الثورة ... أرجوك يا أستاذى ما تنساش لحاف الثورة ...هم يبكى وهم يضحك والله العظيم :(

غير معرف يقول...

هههههههههههههههههههههههههههههههههههه
هههههههههههههههههههههههههههههههه
هههههههههههههههههههههههههههههههههههه

حلو الموضوع ده

وعاجبتنى حتة الحلة لو فيها لحمة تصدر نغمة تلم على الزوج خلق ربنا

ههههههههههههههههههههههههههههههه

تحياتى ليك

ابراهيم رزق يقول...

اعزائى

انا كنت ناوى اكتب سلسلة عن تلك الاعلانات المستفزة
لكن واضح انكم فى تعليقاتكم حرقتوا لى تلك السلسلة بالاعلانات التى تستفزكم

تحياتى

ابراهيم رزق يقول...

موناليزا

فعلا اعلانات مستفزة جدا

اما الكيس و قوالب الكيك فانا كنت جايلها

اما المكرونة ده حتى لو ميت نملة مش هيكفيهم

نورتينى
خالص تحياتى

ابراهيم رزق يقول...

Tears

مفيش حاجة تغلى عليكى نعملك تخفيض
هههههههه

نورتينى
خالص تحياتى

ابراهيم رزق يقول...

ام هريرة

متشكر على تعليقك و اسعدنى

فعلا الاشياء البسيطة تجلب السعادة و طبيعية

فعلا اجمل حاجة اكل الكانون و شاى الغيط فى الكوز الحياة بساطة

فعلا يا ريتهم ما تكلموا

نورتينى
خالص تحياتى

ابراهيم رزق يقول...

Bent Men ALZaman DA

يا طولة بالك بتقدرى تستحملى الاعلان النصف ساعة و لا بتاخدى حباية ضغط

الكومبيوتر ده قصة تانية

لا تزبهلى و لكن ابتسمى

نورتينى
خالص تحياتى

ابراهيم رزق يقول...

ياسمين

هو انتو اشتريتو الحلة من غير طاسة او سلطانية
ههههههههههههههههه

نورتينى
خالص تحياتى

ابراهيم رزق يقول...

ريماس

هههههههههههههه
هو انتى مش بتسيبى حاجة
ما اهو يا بنتى اصبحت كل القنوات دريم و المحور و الحياة و بانوراما بكل انواعها كل القنوات تقريبا يعنى هيجبوك هيجبوك

احكى لنا متكسفيش عن الطاسة او السلطانية اللى انتى لبستيها فى الاعلانات دى
ههههههههههههههه

نورتينى
باح معطر بالمسك و العنبر

ابراهيم رزق يقول...

Casper

ياريت تعمل البوست ده نحن فى انتظاره

متشكر لمجاملتك الجميلة و سعيد بها

نورتنى
خالص تحياتى

ابراهيم رزق يقول...

فاروق فهمى
استاذى العزيز

تحت امر سيادتك الحلة ببلاش هدية بس هاستأذن سيادتك فى الطاسة هلبسها انا عشان التحرير بيبقى شمس
ههههههههههههه

سعيد بتعليقك و القابك يا اطيب القلوب و ملك الذهرات

نورتنى و شرفتنى
خالص تحياتى

ابراهيم رزق يقول...

zizi العزيزة الذيذة

سعيد بأن تعليقك جاء و راء تعليق الاستاذ فاروق لاطلب منكما انتما الاثنان الا تبخلوا علينا بصناديق الذكريات و ليكن الصندوق الصغير اللى تحت السرير طلعيه و لمعيه و لا اقولك ياريت من غير ما يتلمع

موضوع التليفونات ده عايز بوست تانى اوعدك لو انتى مكتبتهوش اكتبه انا

نورتينى و اسعدتينى
تحياتى و تقديرى و حبى

تحياتى

ابراهيم رزق يقول...

زينة زيدان
اختى البطلة العزيزة

ممكن لو ست نستحملها احنا الرجالة لو مكناش احنا نستحملها مين هيستحملها هو مش الرجالة بتستحمل
ههههههههههههه
طبعا انا بهزر

فعلا عالم مجانين + مخابيل + مهابيل = كوكتيل هههههههه

نورتينى
تحياتى

ابراهيم رزق يقول...

افكار مبعثرة

دى البطاطين و المفارش و الملايات كان ليها بوست لوحده بس انتوا بقى حرقتوهم
ههههههههههه


فعلا منتهى الاستفزاز

نورتينى
خالص تحياتى

ابراهيم رزق يقول...

مصطفى سيف

فعلا و الله اخى العزيز يحسسك ان الحاجة دى جاية من المريخ

موضوع التليفون ده بوست لوحده

نورتنى
خالص تحياتى

ابراهيم رزق يقول...

الاحلام
اخى العزيز

رقم التليفون 0000000000
لو اتصلت بيهم مش هيسبوك فى حالك

فعلا اصبحت مستفزة

دمت لى بكل خير

نورتنى
تحياتى

ابراهيم رزق يقول...

اخر ايام الخريف
اختى المبدعة

و الله العظيم دائما تسعدينى بتعليقاتك القليلة رغم انى لم انجح حتى الان فى الانتقال الى مدونتك فى عجبنى و نقلته
هههههه

لحاف الثورة ده حدوتة تانية
فعلا هم يبكى و هم يضحك

نورتينى و اسعدتينى
خالص تحياتى

ابراهيم رزق يقول...

الغير معرف

طبعا انت لست غير معرف لى لانى اعرفك من ضحكتك

سعيد بضحكتك و بابتسامتك رغم ابتعادك الاخير و اهديك

نسمة ربيع لكن بتكوى الوشوش
طيور جميلة لكن من غير عشوش
قلوب بتخفق انما وحدها
هى الحياة كده كلها فى الفاشوش
عجبى ؟؟؟

اتمنى ان تطل علينا بمنظور جديد غير المنظور ؟؟؟
و ان تجد عشك و يخفق قلبك و تتمتع بالنسيم
سلامى الى اللى بالى بالك و يا رب يكون بخير

نورتنى و اسعدتنى
تحياتى

NISREENA يقول...

السلام عليكم
ضحكتني على الصبح
وكنت محتاجة ده فعلاً
فشكراً أوي
قرأت الموضوع والردود :)
وكلها كانت جميلة
لأن الإعلانات بقت حاجة مستفزة فعلاً
تتفرج ع الفيلم أكثر من نصه إعلانات
والله مرة طبخت طبخة كاملة وانا فاتحة على فيلم في قناة "كايرو سينما"
والله العظيم الطبخة خلصت وكلت ولسا الفيلم مش خالص،، كنت كل إعلان أقوم أعمل حاجة من الأكل،، قطعت الملوخية،،، وعملت الدجاج والأرز،، وكلت ع الفيلم
مهزلة ع فكرة
،،،،،،،،،،،،،،،،،،،،،،،،،
أما بالنسبة لأكثر إعلان كان بيستفزني
الإعلان اللي كان بيجي فيه راجل بيروح للدكتور يشتكي من عدم الحمل،، وفيه علبتين وكده وكده.... وبآخر الإعلان بيقلك:
وبعد واحد وعشرين يوم ....... باركلي يا دكتور
ههههههههههههههههه
بيستخفوا عقل الناس لدرجة مش طبيعية
في انتظار السلسلة أ. ابراهيم

reemaas يقول...

هههههههههههههههههههههههه
اتصلوا يا جماعه على 0900


عجبانى الحله اللى بتتحسد دى يا استاذ ابراهيم بجد

واشجع جدا انك تناقش كل الاعلانات ليك طريقه متفردة

اغانى الشتاء يقول...

المساحة اللهلوبة و الملايات الرائعة اللى تقدر انك تفرش بيها السرير و ينفع تتغسل
و اللحاف الرائع اللى بيدفى جدا فى الشتا و فى نفس ذات الوقت مش بيحرر فى الصيف
و الزمزمية الشقية , و الكولمان الاحمر الشيك .
بس للاسف مش هشترى الحلل لان عندنا حلل زبتر الحلة ب3000 جنية :)))
تحياتى

tarek momen يقول...

طب دي مبلوعة شوية اتفرج علي اعلانات علاج الصلع و كريمات التخسيس و ما شابه
حاجة تجيب الغثيان ياريت تعلق عليها باسلوبك الجميل
تحياتي

الاحلام يقول...

كثير ينتابنى القلق فى ان يبعد عنى من احبهم فكم كنت اتمنى ان يكون بجوارى اناس بحجم اخى ابراهيم رزق واخى فاروق واختى زيزى وغيرهم من عظماء الكلمه فى التدوين اخاف ان اذكر اسماء فانسى اسم يكون قريب الى قلبى فيغضب منى
لكن عندما ترى من تحب لا يحب ان يتقرب اليك فهذا قمة المأساه الحقيقيه بالرغم انك فعلت كل شىء للتودد اليه فتكون متواجد فى كل مناسبه وفى كل لقاء له ولكن عندما يتجاهلك وانت تحبه فتكن غاية الحزن القلبى الشديد
تمنياتى لك بالسعاده
اخوك ابوداود

ندا منير يقول...

اااااااااه انا فعلا سمعت عن الموضوع دا
من كذا شهر
بس مش اعلان فى تليفزيون
دا كان مجموعة ستات عاملي نندوة وفيها عرض للحلل دى وعاملين فيه ا اصناف اكل
هههههههههههه

دا يوم تحفة وتاريخى

عادى دا العادى

ابراهيم رزق يقول...

NISREENA

الاكلة خلصت و اكلتى و لسة الفيلم شغال كويس ان الفيلم لم يلحق العشاء

فعلا ذلك الاعلان من اكثر الاعلانات استفزازا و نصب و غباء و استغلال لحاجة الناس

تورتينى
سعيد بتعليقك

ابراهيم رزق يقول...

NISREENA

الاكلة خلصت و اكلتى و لسة الفيلم شغال كويس ان الفيلم لم يلحق العشاء

فعلا ذلك الاعلان من اكثر الاعلانات استفزازا و نصب و غباء و استغلال لحاجة الناس

تورتينى
سعيد بتعليقك

ابراهيم رزق يقول...

reemaas

عجباكى الحلة متغلاش عليكى فقط اتصلى هههههههههه

حاضر ساحاول

نورتينى
خالص تحياتى

ابراهيم رزق يقول...

اغانى الشتاء

كل ما ذكرته مستفز

عندك حلة ملناش نصيب معاك الرزق على الله
هههههههههههههههه

نورتنى
تحياتى

ابراهيم رزق يقول...

tarek momen

علاج الصلع و التخسيس نصب فى نصب

حاضر ساحاول

نورتنى و سعيد بتعليقك
تحياتى

ابراهيم رزق يقول...

الاحلام

انت فى قلوب الجميع و قد حدثنى عنك الاستاذ فاروق كثيرا جدا و كيف يحبك و كيف تعود على مهاتفتك

انت يا اخى فى قلوب الجميع بطيبتك و اخلاقك و ذوقك

تحياتى و تقديرى
خالص تحياتى

ابراهيم رزق يقول...

ندا منير

لو عندك فيديو للعرض ده ياريت تجبيه
ههههههههههههههه

نورتينى
خالص تحياتى

عمرو فكرى يقول...

عجبنى البوست ده

ابراهيم رزق يقول...

عمرو فكرى

متشكر جدا و سعيد برايك

نورتنى
تحياتى