الاثنين، 26 مارس 2012

غواص فى ترعة النغم 2

                                                               فلاح





فلاح كان فايت بيغنى من جنب السور 
شافنى و انا بجمع كم وردة فى طبق بنور
قطع الموال و ضحكلى وقال 
يا صباح الخير يا صباح الخير
يا اهل البندر يا صباح النور
الست لا بيها و لا عليها ماسكة طبق البنور بتاعها بتجمع الورد شافت الفلاح بيغنى

على بال ما عنيا التفتوا له 
كان عدى و فات
بصيت و لقيت ايدى رايحة له 
بتلات وردات
كان بدى اكمل مواله
على نغمة حلوة ابعتهاله
و لا منه استنى ياخد كلمة
و لا منه ساب قلبى فى حاله
البنية لسه ملحقتش تديله الورد و لا تبعت له النغمة على البلاتوث و مشى بعد ما شغل قلبها

يا اهل الله
ايه
حدش شاف جدع اسمر دمه خفيف
له خطوة جريئة و يمشى ف شهامة اهل الريف
فلاح فلاح
ايه يا ست شريفة شكلك تقصدينى انا و لا ايه و لا يمكن مصطفى سيف خلاص يا عم مصطفى انا و انت واحد قابل بقى يا عم مصطفى


كان اجمل صبح نهار قلبى عينى ما شافوه
فى براءة قلبه مفيش زيه و لا شفتش اخوه
له سحر بياخدك فى جناحه
و عينيك يشوفوه كده يرتاحوا
الفجر يقوم وياه يدعى و عينيك تستبشر بصباحه
اجمل صبح شفته الراجل كان ساحر قوى ترتاح له و لا عينيه دوخوها الفجر بيدعى معاه و عنيه زى الفل

يا اهل الله امانة لو سلمتوا عليه
تقولوا له واحدة من البندر وحشتها عنيه 
و انا ندر عليا لو جانى 
لا هاقوله كانى و لا مانى
انا بس هاقوله عايزة اسمع
يا صباح الخير منك تانى
يا اهل الله لو قابلته اخينا قولوا له واحدة من البندر انت وحشتها و ندرا عليها لو جيت لا هتقولك لا شبكة و لا مهر و لا اى حاجة عايزاك بموالك بس و صباح الخير


الكلمات للشاعر الكبير حسين السيد
اللحن الرائع للملحن المتميز منير مراد
الحفلة كانت فى لبنان و لعلكم تلاحظون اى احتفاء كان بالفن المصرى ايامها
 
  

  


هناك 28 تعليقًا:

غير معرف يقول...

مساء الورد ابراهيم

بشكل عام الأغاني القديمة كان لها نكهه

وطعم أكثر بكثير من وقتنا الحالي

برغم بساطتها إلا أنها تصل لقلوبنا

ونحتفظ بها في سجل الذاكرة ...

تحياتي وإحترامي

;كارولين فاروق يقول...

انا اول مره اسمع الاغنيه دي بصراحه
بس كلماتها اكيد جميله
ولحنها اجمل
تحياتي

faroukfahmy يقول...

با ابراهيم يا رزق دمك زى الشربات ..... شربات ايه زى العسل الابيض بشمعه المشبك
سوف احكى لك حكاية اثرية وعاطفية عن شريفة فاضل ومنير مراد
كان صاحب فندق التونسى يرحمه الله الحاج زكريا عبد الباقى عزمته شريفة فاضل فى افتتاح ملهاها الليلى بشارع الهرم بجوار ملهى الاهرام وكان هذا الرجل يحبنى كولد من اولاده
وصحبنى معه انا وام جيهان والاولاد ماهى حاجه ببلاش كده وعلى حساب خضرة صاحب المخل
وكانت وصلة شريفه فاضل الاغنية التى اشرت اليها ولفت نظرى اتجاه نظر شريفه طول الوقت الى البنوار الذى كان منير مراد موجودا به وهل تعلم انها كانت تهيم حبا بهذا الفنان الملهم الشقى القدير الضاحك الشاجى بكل الاشجان اللحنية دائما خاصة مع الشادية شادية و الذى لا يعوض بدأ حياته مساعد مخرج لانور وجدى وانهى حياته على فيض الكريم شأنه شأن معظم فنانينا العظام
وبرضه يا ابراهيم مستنيك فى مخازن تروميات العباسية عشان مش لاقى اتوبيسات
وتصبح على سنجة عشرة

لــــ زهــــــراء ــــولا يقول...

استاذ ابراهيم

وحضرتك اكيد عارف ان فى احتفاء غير عادى بالفن المصرى على طووووووووووول والدليل على كده المدعو تموره وربنا يستر ومش الاقى له معجبين هنا واتبهدل بسببه لانك عارف انه حبيب الملايين

على فكره الاغنيه ظريفه واول مره اسمعها تحيه لذوقك وتحيه لايام الفن بجد لان اللى بيحصل الايام دى فى الفن المصرى حاجه تيييييييت

تحياتى وتقديرى

زهـــــراء

زينة زيدان يقول...

رائعة منك يا ابراهيم مع التصريف الخاص بمصطفى سيف..

بحب الفن المصري بكل أشكاله
أنا تخيلت نفسي ماشية بالغيط
وشايفة الشاب الأسمر والبنية وردتها

بجد فكرتني بغيطان مصر وجمالها

مشتاقة لمصر و أهلها على طول

مصطفى سيف الدين يقول...

هي بتنادي على عيل تايه و لا ايه؟
هو اللي بيروح بيرجع تاني؟

هبة فاروق يقول...

حلوه الاغنيه يا استاذ ابراهيم
وصباح الروقان مش حسد ربنا يروق حالك
والاغنيه جميله ورايقه
اختيار موفق
بس مين دى اللى حترضى بالموال وتنسى الشبكه والمهر
تحياتى وسلامى لكتاكيتك الصغيره

شمس النهار يقول...

:))
بقا بزمتك دي ترعة النغم
اومال شعبولا يبق ايه
شريفة فاضل غنت اجمل اغاني من تلحين منير مراد
كان بيلحن بخفة دم ماحصلتش

:)ياصباح النور

نيسآان يقول...

طيب ليه ظالمين بنات الجيل الجديد و بتقولوا عليهم خفاف والحب عندهم "تيك اواي"
؟؟؟
اهو الست فايزه احمد الله يرحمها قلبها مال من اول موال وصباح الخير ومش حتقوله لا كاني ولا ماني ولا تلت التلاته كام!

عجبتني الاغنيه ...حلوه
والتعليق والتحليل احلى واحلى...

يا مساء الخير يا اهل البندر يا مساء الخير

افكار مبعثرة يقول...

انا اول مرة اسمعها الصراحة بس حلوة اوي بجد
والله الفن بتاعنا ده كان رائع و يرحم ايام زمان بجد :)
تحياتي للغطس اللي بناخده في ترعة النغم الرائعة دي :)

دعاء العطار يقول...

اول مره اسمعها يااستاذ ابراهيم بس ضحكتنى اووووى

ربنا يديم عليك خفة الدم يارب

سولى القمر عامله ايه ؟

reemaas يقول...

اول مرة اسمعها يا ابو زياد الصراحة يعنى

بس عجبنى اوى اسم ترعه النغم ده

rona ali يقول...

الله اول مرة اسمعها برضوا

مع ان ليا في القديم
بس بقالي فترة بطلت من كتر ما صدعت رجعت لتواشيح الحاجات الدينيه
^_^

افكار مبعثرة يقول...

ما شاء الله الصورة تحفةةةةةةةةةةةةةةة دي ساليناز ؟
ربنا يحميها و يبارك فيها يا رب
بس و النبي صحيح هو ده بسكوت سادة ولا بالشوكولاتة :))))))))))))))))
تحياتي

Umzug Wien يقول...

مش بحبها خااااااااااااالص شريفة فاضل

ابراهيم رزق يقول...

ريبال
اخى العزيز

فعل القديم له جماله و شجنه

نورتنى
تحياتى

ابراهيم رزق يقول...

كارولين فاروق

كلارينيت الفاروق
ده شرف ليا انى اسمعك اغنية لم تسمعيها من قبل و انتى الفنانة الجميلة

نورتينى
تحياتى

ابراهيم رزق يقول...

فاروق فهمى

هههههههههههههه
ايوة كده يا استاذى قول كل اللى عندك
كنت فى كازينو الليل بتعمل ايه
اهو فى واحد نصب عليها و خد الكازينو منها
يالله
نتقابل قدان كازينو الليل
هههههههههههههههه

نورتنى يافاروقنا

ابراهيم رزق يقول...

لولا و زهراء
زهراء

ههههههههههههههههه
متجبيش سيرة تمورة لتطلع علينا عفاريته
انا بحاول اغسل اللى بيعملوا فينا امثاله

الفن المصرى طول عمره سفيرنا و لو شاهدتى الحفلة دى كاملة كنتى شفتى قد ايه الحب و الانبهار

نورتينى
تحياتى

ابراهيم رزق يقول...

زينة زيدان
اخت الشهيد
اختى الغالية

و مصر بتحبك
لا تتخيلى
تعالى انتى بس و امشى فى الغيطان
و الشاب المصرى الاسمر دى علينا
هههههههههههههههه

نورتينى بجد

ابراهيم رزق يقول...

مصطفى سيف

ايه يا عم انت هو ده اللى همك
مش همك انها ممكن تكون بتقصدك انت
يا عم اتلحح بقى بلاش المخ الصعيدى ده
ههههههههههههههه

نورتنى يا درش

ابراهيم رزق يقول...

هبة فاروق

هبة الفاروق

هههههههههههههه
صباح الفل و القشطة

انا مالى هى بتقول كده
الحب لا يكيل بالبتنجان
ناس كانت رايقة مش مادية
جتنا نيلة فى حظنا الهباب
تحياتى

ابراهيم رزق يقول...

شمس النهار

شمس الشموس

ان جيتى للحق هى بحر و بحر كبير
بس انا سمتها ترعة لان الاغانى دى تعانى من الركود فى ترعة بحاول اغطس فى الترعة و طلع يمكن تنزل البحر تانى اهو بحاول
هههههههههههه

نورتينى
تحياتى

ابراهيم رزق يقول...

نيسان

هما بتوع الجيل الجديد خفاف اه و تيك اوى اه بس لما بيجوا للجواز بيطلعو العين

ههههههههههههههههه

ايه العيال مأثرين عليكى و لا ايه الاغنية لشريفة فاضل مش فايزة احمد

نورتينى

ابراهيم رزق يقول...

افكار مبعثرة
دعاء العطار
reemass


لفت نظرى ان تعليقكم متتالى و يبدء بكلمة اول مرة اسمعها و كأنك متفقين عليه او كنتى قاعدين مع بعض
هههههههههههههههههه
عشان كده رديت عليكم مع بعض

تصدقوا ان ده هيشجعنى اكتب و اغوص فى الموضوع ده انا كنت فاكر الاغانى مش هتعجبكم

نورتونى

بجد نورتو

ابراهيم رزق يقول...

افكار مبعثرة

اه الصورة لساليناز
و التصوير بعدسة زياد ابراهيم رزق

و البسكويت للاسف كان بملح لانها بتحبه
ههههههههههههههههه

متشكر على مجاملتك

ابراهيم رزق يقول...

Umzagug Wien

وارد طبعا ان فى حد بيحب و فى حد مش بيحب
ربنا يسهل و اغطس النوبة الجاية بحاجة تعجب الكل
هههههههههههه

نورتنى
تحياتى

نيسآان يقول...

ههههههههههه
العتب مش على العيال
العتب على السمع والنظر ...
الكبر عبر بقى يا ابو زياد :))

انا عاوزه بسكوت مالح من ايد القمر اللي نايم فوق ....عشان اصحصح شويه...