الخميس، 21 يونيو 2012

الانوثة فستان و جزمة


ايه يا جدعان حصل ايه لبنات مصر راحت فين الانوثة اختفت ليه و مش عايز حد يرد عليا و يقول الانوثة موجودة فين الانوثة بتاعة زمان فين ايام راقية ابراهيم و مديحة يسرى و صباح و شادية و فاتن حمامة و امال فريد و محمد فريد مين محمد فريد ده مش مهم امشى خلاص يا محمد خلينا فى امال
وطبعا انا مش بظلمكم والدليل العملى هعمله دلوقتى عليكم
  1. يالله يابنات كل واحدة تفتح الدولاب بتاعها ايوة شاطرين
  2. كل واحدة تبص على الدولاب و ملابسها مش بقلكم شاطرين
  3. تتفحص ملابسها ماذا ستجد
ايوة كدة هتلاقى ايه
  1. 80% من ملابسها بنطلونات جينز كحلى
  2. 10% بنطوانات جينز اسود
  3. الباقى بقى بناطيل جينز و عادية الوان مختلفة
بس كده خلص الدولاب لا مخلصش
الباقى بقى قمصان كاروهات و جينز بيدلعوها ويسموها بلوزات

نيجى بقى للجزمة
دورى على الجزم بتاعتك ماذا ستجدى
  1. 80%كوتشيهات لا تختلف عن الكوتشى بتاعى
  2. 10%كوتشيهات بيضحكوا علينا و يقولوا حريمى
  3.   الباقى جزم عاملة زى جزم الرجال
مرة كنت مع زوجتى بنشترى جزمة ليها مسكتنى جزمة و قالتلى ايه رايك فى الجزمة دى قلتلها كويسة بس الموديل ده مش بيعجبنى و بعدين انا بشترى جزمة ليكى مش ليا قالتلى ماهى الجزمة دى ليا طبعا استغربت وقلت لها انتى هتلبسى جزمة رجالى قالتلى لا دى حريمى بتتلبس مع الجينز حريمى ازاى ياجدعان فين الفيونكة والكعب و الحاجات دى طبعا مصدقتش ميلت على الست اللى جنبى لو سمحتى الجزمة دى حريمى ابتسمت دماغكومتروحش بعيد تقدروا تقولوا ضحكت عليا وقالت اه حريمى وشكلها شيك قوى هو فى ايه يا جدعان
انا اعرف شكل الجزمة الحريمى كويس حاجة كده انسيابية و كعب محترم كده لما الواحد يتخبط بيه على دماغه ميجبش منطق و مش بس كده تروح للجزماتى تركب دبلة نحاس فى الكعب تلاقى الست و هى ماشية تسمع كده تن تن تن نغمات كده على راى الاغنية انغامهم كلها حنية مش انا وهى نلبس جزم واحدة
طبعا حزب الستات هيقولى اللبس ده عملى و مش عملى و الافلام الحمضانة دى انا عايز كده زى زمان كده الست تروح للخياطة عايزكده الستات يشتروا قماش و يفصلوا ده حتى زمان  كان اسماء القماش جميلة صباع الست ودلع الهوانم  والنبى دلعنى والست المستحية و كانت الست بالياشمك و الخلخال يرن حاجة كده انوثة

خلاصة القول عايز ارجع للعصرالقديم الفساتين الجميلة و الجزم الانسيابية و على راى فؤاد المهندس اختيارك يا هانم لجزمتك يدل على انوثة طاغية مش البنت و اخوها يلبسوا مع بعض
                                                   بلد مجانين صحيح 

 

هناك 23 تعليقًا:

ابراهيم رزق يقول...

دى التدوينة التانية
سعيد جدا جدا جدا باليوم الاول و نجاحه
و اسف لاى حد لو قصرت و متابتعتش اصل الوليمة دسمة جدا
هحاول اتابع الجميع
و هحاول اتابع

تحياتى

candy يقول...

يااااااااااااااااااااااااااااااه

موضوع الدولاب دا صح 100 %

وأنا عن نفسى وباسم بنات كتير هانمووووووووت ونشوف نفسنا مرة بفساتين فاتن حمامة والكعوب والذى منه

بس إيه ؟؟

ياريت حضؤتك تسأل نفسك بأمانة ليه البنات مش بيعملوا كدة دلوقتى ؟؟

كلمة لبس "عملى" دى كلمة مش دقيقة
لأنه الواحدة فى سبيل راحتها النفسية واحساسها بالانطلاقق والجمال ممكن تعمل أى حاجة وكدة كدة الكعب مش صعب على فكرة دا صحى أكتر من "الفلات" ..

بس تخيل كدة لو واحدة نزلت من بيتها -لسة ماركبتش مواصلة ولا راحت الشغل ولا أى حاجة- بلبس بالمواصفات دى

تفتكر ممكن توصل لأخر الشارع سليمة ؟؟

ليه البنات بتلبس بلوزات أو قمصان واسعة ومهبلة ؟؟ على فكرة التى شيرتات عملية أكتر .. بس علشان الكلام البزئ وماهو أكتر من الكلام كمان ..

بجد حاجة تقرف الـــ ... ، الناس فى الشارع بقيت على درجات مستحيلة من عدم الاحترام.

:((((

وفى الأخر مش عاجبين

ظلم إيه دا ياربى

مصطفى سيف الدين يقول...

الانوثة ماتت في 73 :)
فين ايامك يا هند رستم

فاتيما يقول...

بتفق مع كاندى ف كلامها
وبزود عليه
ان الذوق العام ف اللبس فارض علينا دا زائد ان المشاوير نفسها مينفعش تتعمل بفستان ..
هنزل التحرير ازاى بفستان
وهروح اخلص مصلحة ازاى بفستان
وهتشترى الطلبات بتاعت البيت وتشيل شنط ازاى بفستان
وكعب كماااان يا ظلمة ؟؟!!!


زمان كانوا بيلبسوا كدا
عشان اللى كان بيعمل المشاوير دى الرجالة وهما خروجاتهم كانت ف أضيق الحدود او للفسح والأنبساط والزيارات العائلية ...

رجعولنا الأيام دى
نرجعلكم الفساتين والكعوب
واحنا الأتنين هننبسط ..

فيه سبب تانى على فكرة
هامشى بس مهم ...
انا شخصيا نفسى من مدة اشترى فستان
وانشالله البسه لروحى ف البيت
بس باللف ف المحلات اكتشفت
ان ميزانيتى لا تسمح لأن الفساتين مش موضة ونادرة و بالتالى اغلى ...
فبأجل الفكرة
لأنى بقول اشترى طقم ينفع ف الشغل أفيد
بعدين ربنا يسهل

يعنى اسباب خارجية خارج عن نطاق اختيارنا يا ابراهيم
محناش قاصدين والله
عاااااااااااا


:)

تسلم ايدك

Emtiaz Zourob يقول...

تصدق اني بافكر اقوم اشوف دولابي انا كمان ههههههه

كلامك فيه منه كثير في واقعنا ..

الله يرحمها للأنوثة !!

كريمة سندي يقول...

فقد اختلط الحابل بالنابل .. والله المستعان!!!!

موناليزا يقول...

أنا مع فاطيما جداً
البنطلون شئ أساسى جداً فى لبس المرأة دلؤتى
ومش مهم يكون جينز على فكرة نخليه قماش مش مشكلة :)

بالنسبة للكوتشيات فيه منهم بكعب :)

حنين محمد يقول...

مساء الغاردينيا استاذ ابراهيم
امممم بصراحة عني بلبس كعب رغم انه طولي حلو بس بلاقي في الكعب بجد انوثة وأناقة بس دا بيبقى في السهرات والزيارات وطبعا كعب عن كعب يفرق لان كل مناسبة بيبقى ليها لبس وكعب معين اما الخروجات العادية فطبيعي البس حاجة مريحة بس كمان أنيقة ههههه بس عارف بجد زمان في افلام الاسودوالابيض كانت الفساتين عامله زي المظلات هههههه يعني واقفة كدا ومشدودة على الخصر زي فساتين فاتن حمامة وشادية اصلي بموت في الاتنين دول وطبعا الكعب العالي كنت تحس بأنوثة ونعومة بس زي ماقالت كندي وروح ماما العسولة إيقاع الحياة السريع النهردة بيجبر الست تخرج بحاجة عملية لكن حتى الحاجات دي لازم تكون انثوية وبجد مش بحب الست تنسى نفسها وتفقد انوثتها مهما كانت الحياة صعبة "
؛؛
؛
لروحك عبق الغاردينيا
كانت هنا
Reemaas

رحاب صالح يقول...

الحمد لله الحمد لله الحمد لله ومن قبل ما اقرا اي تعليق
انا بنوتة وهفضل كدة علي طول وبكرة اصلا لبس البنطلونات جداا وتقريبا خليت 80 % نمن صحباتي في الجامعة يرجعوا تاني يلبسوا فساتين ولبس بناتي ويسيبوا البنطلونات الجينز اللي بتخليني احس اني ماشية مع راجل
والحمد لله اني امنت من زمااان ان البنت لبسها البدي والجيبة او الفستان مش البنطلون خااااااالص حتي البدل مش بحبها ومش حكاية عملية ومش عملية بالعكس بقي خالص علي الاقل بالنسبة لي
انت حتي لو لاحظت اني تقريبا كنت الوحيدة انا و حفيدة عرابي اللي كنا لابسين فساتين مش جينز وقميص
هههههه
تقريبا كدة انا بقيت نشرة فضايح ههههه

رحاب صالح يقول...

اه نسييييييييييت
لا مممكن ابدا البس جزمة من غير كعب لا مممكن ابدا تكون كبيرة
لالالاممكن ابدا يقل كعبها عن سبعة سنتي
مستحيل البس جزمة من غير ما يكون شكلها انثوي
ومش حكاية فيونكات وكدة لاء
حاجة كدة كيوت وصغنتوتة ورقيقة
هي دي الجزمة البناتي
ولتسقط المساواة وتروح في داهية كمان

زينة زيدان يقول...

الحمد لله الكلام مش موجه لينا ده لبنات مصر....هههه

يا سيدس بص الوقت والزمن والمسئوليات بقت عاملة ازاي وبعدين انتقد وقول الي انت عايزه ...

و متناساش انه الرجال كمان مبقوش شكياكة
فين أنور وجدي وعمر الشريف ,,,وووو

خليك ساكت ومتفتحش على روحك انتقادات الستات
احنا لو نوينا على انتقادتكم يبقى عايزين سنة تدوين يومي مش شهر بس

بوست رايق جدا أستاز ابراهيم
متابعين على طوووووول

ياسمين يقول...

موضوع الدولاب دا مش صح بالمرة هدومي مفيهاش ولا بنطلون ....يعني بتخلف من بنت لبنت
ودلوقتي الشياكة في العبايات ...هو دا الاتجاه اللي انا رايحة له اليومين دول..
أم موضوع الجزم ..ع فكرة الكعب مش صحي خالص ..وبيعمل مشاكل في الكعب والظهر..
مش عارفة شايفة ان الجزم الزحافي اشيك بكثير جداا وجميلة اووي وبناتي كمان ...!!

Bent Men ElZman Da !! يقول...

احم احم ايه الاحراج ده
ومين اللى فتح دولابى بالمنظر ده :D

لا نتكلم بجد بقى
هى الفكره مش ان ده بس لبس عملى
هو كمان لبس بيحسس بالامان اكتر
اه بجد بالامان
انا بحس بالامان لما ابقى ماشيه بالبنطلون الجينز اكتر من الجيبه
بعيدا بقى عن المعاكسات اللى مش بتفرق اصلا البنت لابسه بدله رجالى حته عااادى خالص

بس كمان لو انا رايحه مشوار ومحتاجه حاجه سريعه ماينفعش البس فستان
والاهم ان الفستان مش بينجز خاااالص
لو انا رايحه شغل مثلا مش هاقدر البسه او هاركب مواصلات واتوبيسات وميكروباصات بقى استحاله والا انا اللى هتبهدل قبل ما الفستان ذات نفسه يتبهدل

زمان كانوا بيلبسوا كده عشان ماكنش فى ميكروباصات وتكاتك بيتبهدلوا فيها وهما خارجين
وماكنش الطرق متربه وزحمه بالمنظر ده
ولا حتى كانوا بينزلوا زى المشاوير اللى بتنزلها اى ست دلوقتى

ولذلك
كان الحل المنطقى هو البنطلون الجينز :D

richardCatheart يقول...

هههههههههههههههههههه انت مشكله

شوف ان معاك انا عن نفسى بحب الست الكلاسيكيه بس دى انوثه ظاهريه البنطلون عمرة مامنع شكل الانوثه بالعكس احنا كتير بنشوف انوثه فى الشوارع حد البلاوى السودة وكلها بنطلونات تقريبا ايه الفايدة تسمع رنه كعب ترن ولما تفتح معها حديث تلاقيها واحد صاحبك لابس كعب طبعا الناس فيما يعشقون مذاهب يا سيدى بس حقيقى الله ياعينك يام العيال

مسائك ورد :)

جميله تدونتك يا ابراهيم اوى وكالعادة شربات :)

شمس النهار يقول...

:))
انا بقا معاك في الكلام ده كله
واللي هتلاقيها لابسه لبس بنات تلاقيها بتشتم وتتصرف ولا الصبيان
:))

ليلى الصباحى.. lolocat يقول...

معاااااااااااااااك الف فى المية
المرة دى معاك بحق والله اخى ابراهيم

واللى اكتر من كده لما اخرج ابص فى البنات والناس كلها تلاقى ازواقها بقت غريبة تحس ان اللون الى غالب عليها لون التراب الرمادى ههههههه اه والله بحس ان كل اللى حولى مستنسخين كلهم شبه بعض ولبسهم ذوقه واحد
يمكن فيه ناس كتير بتعتب على لما اقولهم انى بعشق لبس فاتن حمامة وماجدة و هند رستم
حاجة كده رومانسية ورقيقة

المرة دى انت عندك حق جدا جدا ههههه

بس مش ملاحظ انك الايام دى بتضرب المثل دايما بأم ساليناز مش خايف على نفسك اخى ابراهيم من العقاب والبوز المصرى هههههه

اسعد الله ايامك كلها يارب ولا حرمك الله من خفة الظل وملأ قلبك فرح يارب

تحياتى لك

الاحلام يقول...

طبعا خفة الدم والروح الجميله صفه من صفات ابراهيم رزق الى مش موجوده عند حد
على شان كده بنستمتع دوما هنا
تحياتى اخى الكريم ابوداود

rona ali يقول...

هههههههههههه
هههههههههههههههههه
احنا اتفضحنا يا ال البنات هههههه
لاء وعجبنى كومنت دكتور مصطفي الانوثه ماتت من 73 نفس اللى بيقولوا علي الرجاله نياهاهاهاها

لاء بص يا خال ابراهيم انا ممكن استحمل كل كلامك ال موضوع جزمه بكعب ده انا بكرهه الكعب اساسا جدا ههههههههههه
بيوجعلى رجلى ولما بتزنق انى لازم البسه بتبقي ليله جنان هههههههه

ومعاك الوجبه دسمه جدا ومافيش حاجه نهضم بيها الا بوستات حضرتك ^_^ بستمتع جدا بيها بجد :)

رؤى عليوة يقول...

هههههههه والله عندك حق
بس اشمعنى احنا اللى هنفضل زى ما احنا ما كل حاجة فى بلدنا بقيت غريبه ومش معقولة ولا منطقيه
كتير بيمشى قدامى بنت وافتكر انها ولد هههههه والعكس كمان بيحصل كتير

يالله
يمكن بقى لما مرسى يجى نعرف نفرق :)
اهو الجلابية احسن من البناطيل


دمت بخيييييير

Carmen يقول...

اه والله فعلا محلات الملابس بقت منفدة على بعضها :D

غُفرَانْ يقول...

( لكل مقال مقام )
الموضوع يعتمد على طبيعة المكان الذي ستذهب إليه
تخيل أنك تدخل مستشفى تجدُ الممرضة أو الطبيبة بكعب و فستان !
الإفراط في لبس ذلك سيء طبعاً و تشويه للأنوثة
لكنها مفيدة في أماكن عدة و عملية :)

reemaas يقول...

ههههههههههههههه

فيونكة

هى موجودة يا ابو زياد بس مش اوى يعنى

فكرتنى ده انا قلبت الدنيا امبارح على قميص كروهات ومالقتش هههههههههههههههههههههههههه

تفتكر جيناتنا اتغيرت؟

آخر أيام الخريف يقول...

يا سيد أنا ألبس قميص الأكتاف بتاع المورستان ولا ألبسش فستان .. حتى السواريهات بدأت أتجه للبدل بدل الفساتين .البنطلون عملى ومريح إنما الفستان أو الجوب محنة بصراحة .. انت بس عشان مش بنت :)