الثلاثاء، 5 يوليو 2011

لصوص خمس كازوز

بمناسبة الحديث عن اللصوص الخمس نجوم و السبع نجوم احكى لكم عن اللصوص الخمس كازوز 
فى بداية عملى كنت بمامورية بالمقطم و تم انهائها بسرعة واردت ان اعود بسرعة و لا انتظر السائق فوجدت  اتوبيس نقل عام فركبته كان الاتوبيس كامل العدد مع قليل جدا من الركاب واقفين فجاة ركب الاتوبيس ثلاثة افراد وزعا انفسهم بسرعة على الاتوبيس احدهم فى الامام يحمل خرطوشا و الخرطوش لمن لا يعرفه هى طبنجة مصنوعة محليا فى الورش طلقة واحدة و الاخر فى الخلف و يحمل سيفا و الثالث يحمل مطوة  و بدء فى تفتيش الركاب كل راكب يخرج ما معه السيدات يخلعن الذهب و الرجال الساعات و الاموال رجل تقريبا فى الخامسة و الخمسين اخرج محفظته و اخرج منها خمسة جنيهات ليعطيها للص و لكن ماسورة الفاظ نابية و اتفتحت فى الرجل انت فاكر ايه يا ابن التيت انت فاكرنى باشحت منك بتيت التيت انا باسرقك يا تيت التيت و اخذ من الرجل المحفظة كاملة طبعا غلى الدم فى عروقى و استفزيت  و وضعت يدى فى جيوبى لاخرج المحفظة لاعطيها الى اللص عندما يأتى لى و كفا الله المؤمنين شر القتال لكن لحسن حظى باشارة من احدهم قفز الثلاثة من الاتوبيس بسرعة دون ان يصلوا لى

زمان ايام ما كنا طلبة كنا نسير فى احد الشوارع المليئة بالفيلات و لكنها شبه مقطوع لان السائرين به عددهم قليل فجاة ظهر ثلاث اشخاص اخرين غير الثلاث بتوع الاتوبيس احدهم يحمل كرباج سودانى طوله متران و الاخران يحملان سنج طبعا احنا كنا محفلطين لابسين لبس محفلط لكن جيوبنا فاضية اكبر واحد فينا فى جيبه 290 قرش عدا احدنا كان والديه متوفيان و بيقبض معاش كان هو الغنى فينا طبعا اللى ماسك كرباج بادرنا قائلا
انتو بتمشوا من هنا و بتعاكسو البنات ليه طبعا ردينا و قلنا بنات ايه يا كابتن احنا تقريبا فى صحراء بنات ايه اللى هانعكاسها و بعدين احنا من المنطقة هو سمع كلمة المنطقة و بادر بسرعة انتو منين فى المنطقة  فكرت بسرعة كنت اسمع عن اسم شخص مشهور بالبلطجة اسمه الدكتور فقلت له تعرف الدكتور فقال اه طبعا اعرفه قلت له انا ابن اخته لكى اخلص من هذا المازق لكنه بادرنى بسؤال اصعب انت بقى ابن مين فى اخواته البنات طبعا تجهمت و لكنه لحقنى و قال بدرية و لا نجاة و لا فوزية طبعا نزل السؤال على كالصاعقة ده عارف العيلة و عيلة العيلة ايه اليوم اللى مش هيعدى ده قلت اخبط اول اسم و تيجى زى ما تيجى قلت له بدرية ابتسم و قالى و الله كبرت يا اشرف هو مش انت اشرف برده  قلت له ايوة انا اشرف
بادرنا بابتسامة و قال عارفين سيد الشرنوبى تذكرت الاسم  مسجل خطر شهير كان بطل عملية اختطاف و كتبت عنه الجرائد
قلت له طبعا ده لسه الجرائد كاتبه عنه
ابتسم ابتسامة فخر و قال اهو انا بقى سيد الشرنوبى
طبعا صاحبنا الغنى ابو معاش اخرج علبة السجاير المارلبورو من جيب احدنا اللى بيتمنظر بها و اعطى كل واحد منهم سيجارة
بعدها قال لنا اصل فى شباب بيمشى يعاكسوا من هنا تانى مرة متمشوش من الشارع ده مع السلامة 
طبعا ما صدقنا و بدانا فى المشى اذ فجاة سمعت صوت اشرف اشرف فقلت لهم اللى اسمه اشرف يرد و لكنى تذكرت انى اصبحت اشرف فقلت ايوة يا عم سيد قالى ابقى سلملى على امك و ابوك ابتسمت له و قلت له يوصل
بلد مجانين صحيح




هناك 24 تعليقًا:

Emtiaz Zourob يقول...

حلوة كثير قصة اشرف بقى انت ابن بدرية وخالك الدكتور ، يا محاسن الصدف !! .. بس كويس انها عدت على خير .. يا أستاذ اشرف قصدي يا استاذ ابراهيم ..

مصطفى سيف الدين يقول...

والله كبرت يا اشرف وبقيت بتنزل تعاكس البنات :)
هههههههههههه
الحمد لله انك عديت من الازمة دي على خير
البلطجة بلاء ربنا يزيحها عنا
تحياتي

افكار مبعثرة يقول...

جامده جدا بتاعت اشرف و بدرية دي :)))
طيب افرض بقى طلع بيختبرك و هو نفسه اللي اسمه اشرف كان بقى ايه الموقف
هههههههه
ربنا يخلصنا من الحرامية و البلطجية دول بقى
تحياتي ليك

الازهرى يقول...

كنت زمان بأحب رقم تلاتة
بدون سبب
بس واضح إنى هأبدأ أكرهه

بس اعمل إيه دلوقتى لو حد بلغ سالى إنك كنت هناك بتعاكس البنات

يعنى أى فاعل خير

فتح دماغك معايا بقى بدل الخبر ما يوصل لها

غير معرف يقول...

هههههههههههههههه
حيرتني معاك هو انت مضبوط ولا ابراهيم ولا اشرف
مساء الغاردينيا أستاذ ابراهيم
بجد بجد عماله اضحك وعامل فيها ابو العريف اشرف وبدرية ايه طب معاها حق افكار مبعثرة ولو كان هو اشرف كنت عملت ايه هههههههههههه
بلاش الكذب حتى لو حينجيك وكمان بتقولهم الي اسمه اشرف يرد ههههههههههه
والله وكبرت يااشرف وبقيت بلطجي ههههههههههه
؛؛
؛
لروحك عبق الغاردينيا
كانت هنا
reemaas

لــــ زهــــــراء ــــولا يقول...

هههههههههههههههه
انت ضحكتني ضحك
جزاك الله خيراً... وربنا بيسارها مع الواحد وربنا قال بيسألك وبيجلاوبلك في النفس اللي بعده هاهاهاهاااااااااااا
لولا

Unknown يقول...

أنا لو مكانك كنت مت من الرعب أنا في الحاجات دي مش جدعه خالص :(
بس ضحكتني أوي على حسن تصرفك بجد برافو عليك أحسن شئ في الوقت ده الحيله.
مبسوطه انك بتكمل مجموعة بلد مجانين صحيح
متبعاك دائماً
لك مني كل التحية و الاحترام

الاحلام يقول...

كل ده ولسه عايش الحمد لله شوف يا اشرف قصدى يا اخى ابراهيم
ما قصصته حقا مرعب وهذا موجود حاليا ولكن على اشرس ولا تفاهم لمن يتكلم
سلمت اخى من كل سوؤ تقبل تحياتى الاحـــــــــــلام

reemaas يقول...

كده بقم 6
هههههههههه

بس اشرف ابن بدريه افرض كان بيوقعك فى الكلام يبقى ازى الحال بقىىىىىىىىى

ليلى الصباحى.. lolocat يقول...

السلام عليكم
هههههههه نفسى اعرف انت بتجيب القصص دى كلها منين يا أشرف


نحمد الله انك رجعت بيتكم بالسلامة والا الحاجة ام اشرف كانت تقلق عليك كتير :)



ـــــــــــ
شكرا لك اخى على سؤالك واطمئنانك على اثناء غيابى انا بفضل الله احسن كتير الان

جزاك الله خيرا

تحياتى لك

Bent Men ElZman Da !! يقول...

ههههههههههههههههههههه
جااااامد الموقف التانى ده
بجد حسن تصرف خرجكم من موقف زى ده
بس انا كده خوفت من الاتوبيسات صراحه :(
الواحد كان بيقول بيبقى فيها ناس كتير ونتطمن اكتر
لكن طلع اللى بيسرقوا دول لا يهمهم ناس كتير ولا بتاع

faroukfahmy يقول...

والله يا ابراهيم انا ما لقيت ظرفك شويه مع السواقين ونوادرهم وشية مع البلطجيه ومحاورهم والاخر مع الحرامية ومداورهم
انا صحيح من باب الشعرية وشقى زيك بس مش فى شقاوتك وظرفك يا ابراهيم ولفّيت كتير فى الداخل والخارج بس ولا حاجة جنب لفّك
اسمح لى ياابراهيم ان اطلق عليك من اليوم لقب ( اظرف ظرفاء المدونين ) ولا شكر على واجب يا هيما

ابراهيم رزق يقول...

شجن النفسج

اولا حمد الله ع السلامة متبقيش تغيبى عننا كده و فى انتظار جديدك
شفتى بقى ازاى بقيت اشرف ههههههه

نورتينى
خالص تحياتى

ابراهيم رزق يقول...

مصطفى سيف

الحمد لله عدت على خير هههههه

نورتنى
خالص تحياتى

ابراهيم رزق يقول...

افكار مبعثرة

اولا ربنا ستر هههههههه
ثانيا فى الغالب هذه النوعية تفتقد الذكاء

نورتينى
تحياتى

ابراهيم رزق يقول...

الازهرى

اولا سعيد بزيارتك يا مرحبا يا مرحبا

مظلوم و الله العظيم مظلوم
ده شارع كان مهجور به من ناحية مجموعة فيللل و من الناحية الاخرى دير بطول الشارع يعنى محدش بيمشى فيه
دماغى مفتوحة اهى ههههههه

نورتنى
تحياتى

ابراهيم رزق يقول...

ريماس
صباح الورد و الفل

انا كل يوم بوجه مختلف ههههه

يا بنتى ده كان ماسك كرباج سودانى طوله مترين و بعدين ده مش كذب ده حيلة و الحرب خدعة و ربنا سترها معانا

معكى اشرف ابن بدرية ههههههههههه

نورتينى
تحيات معطرة بالمسك

ابراهيم رزق يقول...

لولا و زهراء

فعلا ربنا بيساويها تخيلى لو مكنش جاوب كنت هاعمل ايه بسيطة قوى كنت هاجاوب بسؤال مثل
تفتكر انت انا ابقى مين من اخواته
هههههههههههه

نورتينى
خالص تحياتى

ابراهيم رزق يقول...

شرين سامى

فعلا و الله العظيم لحظات رعب لان الناس دى كل شىء متوقع منها

سعيد بسعادتك ببلد مجانين صحيح و اهو باحاول

نورتينى و سعيد جدا بمتابعتك
خالص تحياتى

ابراهيم رزق يقول...

الاحلام
اخى الفاضل

فعلا البلطجة اصبحت الان اشد و اشرس

سعيد بمرورك
خالص تحياتى

ابراهيم رزق يقول...

reemass

هما اللصوص كثير لو عايزين احطهم فى سلسلة انا مستعد هههههههه
ربنا سترها معايا

نورتينى
خالص تحياتى

ابراهيم رزق يقول...

ام هريرة

اولا حمد على السلامة شرفتينى

هذه القصص من الحياة كان فى برنامج اذاعى اسمه كده من الحياه هههههههه

لا شكر على واجب و حمد الله على السلامة مرة اخرى

سعيد بوجودك
تحياتى

ابراهيم رزق يقول...

Bent Men ALZaman Da

هههههههه الحمد لله ربنا سترها

والله الخطر موجود و الامان موجود فى كل حاجة

نورتينى
خالص تحياتى

ابراهيم رزق يقول...

فاروق فهمى
استاذى العزيز

اجدع سلام لباب الشعرية يعنى جامع الشعرانى و محلات الكباب ابو محمد و وادى النيل و مسمط الشعرانى
وكل كفتة و لحمة ضانى و اقرا الفاتحة للشعرانى
سيادتك ابو الظرف و الشقاوة يعنى حلاوة باب الشعرية
والله اللقب ده كبير عليا و بالذات من استاذ كبير مثل سيادتك و الله العظيم اعتز به و افتخر به
تحياتى و تقديرى يا ملك الزهرات
نورتنى و شرفتنى