ابو النمرس عبر التلفزيون

هل سمع احد منكم عن قرية من قرى الجيزة اسمها ابو النمرس ابو النمرس هذه قرية صغيرة تشتهر بالباعة الجائلين للادوات المنزلية يطرقون الابواب مثلما يفعل الصينيون تماما  يغطون مصر بطولها و عرضها زمان كان هؤلاء يحملون سجاد او طقم صينى للعروسة يطرق باب الشقة و يعرض بضاعته و بين الشارى و البائع يفتح الله ثم تطوروا و سافروا الصين و استوردوا و اصبحو يبيعون مكانس و خلاطات و مرواح و مكاوى و ادوات مطبخ لو سالت اى بائع من هؤلاء ماهى بلدك حتى لو كان هذا البائع فى اسوان سيقول لك ابو النمرس

الان فى قنوات التلفزيون انتشرت اعلانات يقف رجل مثل شجيع السيما يرتدى بدلة و بشنب بريمة يقف يعلن عن منتجه يمسك حلة و طاسة و يقول طقم الحلل ده مش زى اى طقم حلل دى الحلة لما بتحطها على النار بتسخن لكن بتسخن بنظام الكاتشينبوفلين بتوزيع حرارى يضمن ان الاكل من فوق يبقى زى تحت و محدش يسالنى يعنى ايه الكاتشينبوفلين لانى معرفش و مش بس كده ده الحله لها يدين من الخشب الهندى عشان تمسك منها الحلة لما تسخن و كمان بيخلى ريحة الطبيخ حلوة عشان الخشب ده مطعم بالبخور و بكده محدش يحسد الاكل و يتحرق و بعدين الحلة ليها غطا عشان تحفظ البخار داخل الحلة و بعدين يد الغطا على شكل خرزة زرقة عشان الاكل بعد ما يتعمل محدش يحسدوا و يدلق اه ولاد الحرام مخلوش لولاد الحلال حاجة مش بس كده الحلة مزودة بجهاز انذار و حماية ضد زوجك او ابنك لو حب يدخل المطبخ و ياكل من وراكى بثلاث نغمات نغمة تقومك من قدام المسلسل التركى لو مشغولة بيه ثم نغمة اعلى تصحيكى من النوم لو كنتى فى سابع نومة ثم نغمة ثالثة اعلى تفضحه و تصوت و تلم عليه الجيران لو كان فى الحلة لحمة 
نسيت اقولكوا كمان الحلة دى بعد الطبخ ممكن تغسليها باى نوع من المياه هى مش بتقول حاجة لا تشترط مياه معدنية  او غازية
نسيت اقولكوا طقم الحلل ده مصنوع من معدن لا يتفاعل مع الميكروبات و يقضى عليها و بذلك نضمن ان الاكل لا يحمض حتى لو تركناه اسبوع
طقم الحلل ده بيتباع فى الزمالك بالف و خمسمائة جنيه و بيتباع فى المهندسين بالف و مئتان جنيه و بيتباع فى العتبة بالف جنيه احنا مش هنقول الف او تسعمائة او حتى ثمانمائة جنيه اتصل الان و احصل على طقم الحلل ده ب 799 جنيه + مصاريف الشحن مش بس كده اللى هيتصل دلوقتى هيحصل على هدية الطاسة الجميلة دى اللى انا ماسكها فى ايدى دى ممكن تعملوا فيها البيض و ممكن تلبسوا الطاسة فى دماغكم
بلد مجانيين صحيح
الى اللقاء مع باقى اعلانات تلفزيون ابو النمرس