السبت، 16 يوليو 2011

انا نازل اللى ما تتسماش

الرجل المصرى رجل غلبان جدا و مظلوم جدا و شقيان جدا بعد يوم عمل شاق محتاج يرفه عن نفسه شوية و لا يوجد ترفيه الا النزول و الجلوس على القهوة  اللى هى باللغة العربية المقهى عكس السيدات اللى وسائل الترفيه عندهم متعددة فبخلاف المسلسلا ت التركية و العربية و الافلام الاجنبية و العربية طبعا السيدة يمكن ان تقتل الوقت فى غسيل كم طبق فى المطبخ بصابون فرى الذى يحافظ على نعومة اليدين او يقوموا بالمذاكرة للاولاد لانهم يتمتعون بطولة البال عكس الرجال او التسلية بكى عدد من الملابس او عمل وصفة لكيكة شاهدوها فى التلفزيون لا تخرج فى العادة على ما يرام لعدة اسباب بالطبع ليس لهم دخل بها مثل فرن البوتجاز سيئة او البيكنج بودر مغشوش او البيض غير طازج او الدقيق ردىء 
طبعا انا باتكلم على الذهاب للقهوة اللى واحد الشاى فيها بجنيه و نصف و الشيشة بجنية و نصف و السحلب باربعة جنية القهوة اللى كلها رجالة
ما ان تراك زوجتك ترتدى ملابسك الا و تسألك السؤال المعتاد اللى هى عارفة اجابته 
نازل فين
نازل اقعد على القهوة
ليه
هاقعد مع صحابى
ما ان تسمع الزوجة هذه الكلمة الا و تأخذ واحد بوز من البوز القديم اللى اتكلمت عنه فى بوست سابق طبعا من كثر التدريب على هذا البوز اصبح الزوج يستطيع التعامل معه و التخفيف منه بقليل من التمرينات العلاجية
لكنى اتسأل عن سر عداء الزوجة المصرية للجلوس على القهوة مع ان للجلوس على القهوة سبع فوائد مثل السفر تماما

1  التحدث عن معاناة الازواج المقهورين فضفضة نفسية مما يقلل من المعاناة و يخفف منها طبقا لتوجيهات الطب النفسى

2 النميمة فى حق الزوجات مما يكسبهم سيئات و يكسب الزوجات حسنات مما يجعلهم موجودون فى الجنة وحدهم مما يحقق استقلالية المراة فى الاخرة قبل ان يطلبوها

3 عملية اعادة توازن نفسى لاغلب الرجال و احساسهم بذاتهم من خلال تحدثهم فى السياسة و انهم العالمون ببواطن الامور و يقلك كلام فى سرك طبعا سرك ده بيكون القهوة كلها طبعا اذا لم يكن جالسا مع الوزير فسيكون من يجلس صديقه الانتيم الذى يخبره بادق اسرار الدولة

4 الشيشة و ما ادراك ما الشيشة للسادة مدمنى الشيشة طبعا بجلوسه على القهوة يوفر للشقة جو صحى خالى من الدخان و يحافظ على السجاجيد من الحرق

5 لعب الطاولة و طبقا للقاعدة الشهيرة تعيس فى اللعب سعيد فى الحب يخسر اغلب المتزوجون طبقا لمقولة اللعب عايز بال رايق و طبعا روقان البال لا تجتمع مع الزواج  لذا من يكسب فى الغالب هو من لم يتزوج


6 فرصة للزوجة للفضفضة فى التليفونات مع امها او اصدقائها و النحل فى وبر الزوج مما يريحها نفسيا و يخلصها من الضغوط

7 الجلوس فى جو غير صحى معبأ برائحة الدخان مما يسرع فى انتقاله الى الرفيق الاعلى فيريح و يستريح

لذا نصيحتى الى كل الازواج اياك و ان تقول انك نازل تجلس على القهوة انما قول انا نازل اللى بالى بالك او اللى ما تتسماش
تحزير طبعا تستثنى زوجتى من هؤلاء الزوجات و ذلك لاسباب امنية
بلد مجانين صحيح

الى اللقاء مع الكوفى شوب


هناك 38 تعليقًا:

حفيدة عرابى يقول...

غلبان فعلا ومظلوم الرجل المصرى
ده أنا هاعيط وانا بقرأ الجملة دى من التأثر والتعاطف معاه
على أساس انه مش على الاقل بابا واخويا وقرايبى وزمايلى فى الشغل
غلابة ومظلومين فعلا :)
ده الرجالة المصريين عندهم جين رائع بالنسبة لهم ومرهق للزوجات الا وهو الدماغ الكبيرة والروقااااان

وبعدين كى الملابس والكيكة وغسيل الاطباق ترفيه وقتل للوقت ؟؟؟؟
هو قتل بس مش للوقت :)

هو ليه بجد الراجل المصرى محاولش يسأل نفسه عن الاسباب الحقيقة والجوهرية للبوز اياه

متهيألى بجد ان الحياة هتبقى أجمل كتير لو اتفقوا ولو ضمنيا انهم يسمحوا لبعض يمارسوا حاجات شخصية مفيدة وممتعة بعيدة شوية صغننين عن الطرف التانى بس بترحيبه وموافقته
بس فين ده ؟ :)

بوست لذيذ

Unknown يقول...

الحمد لله لست من هواة المقاهى لى أساليب أخرى ...... سامحنى أسرار

منيرة سوار يقول...

كل الزوجات-ليس المصريات فحسب- يمقتن عدوتهن الأولى المسمى (بالقهوة) بل واصحاب الزوج الذين يجالسونه ويشجعونه على قضاء وقته فيها. لسببين:
1- لان الكثير من النساء لا يفهمن حاجة الرجل للإختلاء بنفسه بعيدا عن جو مسؤوليات البيت والشعور بأنه حر.. وإن كان متزوجاً.
2- لانهن يعانين فعلاً من ضغط حقيقي جراء تحملهن القسط الاكبر من المسؤوليات الأسرية. ويعتبرن خروج الرجل للترفيه عن نفسه تنصلاً من القيام بالتزاماته وواجباته.
الطرفين في الواقع على صواب وعلى خطأ في ذات الوقت.
المسألة تحتاج لمزيد من الوعي بطبائع النساء والرجال.. والقليل من التنازل والتضحية.. والكثير من الحوار والتواصل بين الطرفين..
كي لا تصبح (القهوة) عبئاً على الطرفين!

Unknown يقول...

هههههههه
أولاً بقى شغل البيت ده يععع و مش حاجه مسليه أبداً و ثانياً الزوجه بتزعل لما بيخرج جوزها عشان هيه بتحبه و بتحس بالسعاده و الأمان في وجوده و الأطفال كمان بيحبوه و بينشغلوا بيه و ميطالعوش عنيها:)

شوفت بقى انك ظالم الزوجات
أرجو انك نتتحولش لأنيس منصور عشان بجد أنا بتخنق منه أوي و بتغاظ لما جوزي يقعد يقرى العمود بتاعه بصوت عالي:)
تحياتي لحضرتك رائع كالعاده

reemaas يقول...

هههههههههه
ياسلام
بقى انتم لما بتنزلةا القهوة ياعينى مش بترفهوا واللى قاعده فى البيت تغسل وتطبغ وتذاكر بترفه

اه يابلد مجانييييييييييين

القهوة عداء والاصحاب عداء علشان بيسرقوكوا من البيت وبتسبوها تعمل الحاجات دى

زينة زيدان يقول...

أكيد وشو دخل زوجتك بالموضوع..
....

طالما قعدة القهوة فيها هيك فوائد

شو رأيك تعملوا لينا قهوة للسيدات

واحنا متنازلين عن السبع فوائد للرجال

وتصير بلد مجنونات صحيح

مصطفى سيف الدين يقول...

ايه يا عم ابراهيم شغل النصب اللي عندكم القهاوي عندنا كوباية الشاي فيها بخمسة وسبعين قرش وحجر الشيشة بخمسة وسبعين قرش
بلاش يا عم تكتب الاسعار بتاعتكم في البوست ييجي حد قهوجي عندنا يقراه ويغلي الحاجة
في فايدة كمان ماقلتهاش بيلعب دومينو الليل كله على القهوة وبيفرغ شحنة الغضب اللي جواه في اللي بيلعب معاهم يقوم لما يروح بقى يبقى هادي ومستكين وطيب
تحياتي :)

Bent Men ElZman Da !! يقول...

هههههههههههههههه
اول مره اعرف ان للقهوه فوايد كده
على فكره بقى مفيش اى حاجه من دول بنعملها وهى مسليه
لا غسيل الاطباق ولا عمايل الكيك ولا التليفون ولا حتى المسلسلات
الانثى اصلا دايما مظلومه والله هههههههه

faroukfahmy يقول...

اظرف ظرفائنا
كده برضه ياابرهيم كشفت حكاية القهوة على حكوماتنا اللى بنتدارىوراها ونعمل اللى احنا عاوزينه وعمال تذكر فى فوائدها مفيش فايده انكشفنا انكشفنا لازم نشوف سبب آخر
الافضل تقول للحكومة انت رايح تزور حماتها وتطلب منها مرافقتك فى الحالة اللى زى دى مش هنلاقى بوز هتلاقى ابتسامة ودعاء تروح لواحدك وترجع لنا ياحبيبى بالف سلامة وسلملى عليها وسلم كمان على الترمواى ابوسنجه اللى رايح فيه

آرثـر رامبـو يقول...

7 الجلوس فى جو غير صحى معبأ برائحة الدخان مما يسرع فى انتقاله الى الرفيق الاعلى فيريح و يستريح


خخخخخخ الله يسعدك مع الصبح .

zizi يقول...

الحمد لله ان فيه قهاوي عشان برضه من ضمن فوايدها ان الست تقدر تروق شوية من الطلبات وتخلي الطلبات تحت على القهوة ...ولعلمك لو عملوا قهاوي للستات حاتلاقي المدام سابقاك عليها وتسيبك انت تقعد مع الولاد...هههههههههههههه..تحياتي

غير معرف يقول...

باحك غاردينيا عم مضبوط
انا بقى هسيب البوست كله واقف عند دي
مثل فرن البوتجاز سيئة او البيكنج بودر مغشوش او البيض غير طازج او الدقيق ردىء
انا بصراحة عاوزة افهم حاجة انت متأكد انه الي بتعمل الكيك ام زياد
<<<< بتشك انه هو الي عملها هههههههههههه
نيجي بقى لموضوعك عارف مش بس للزوجة المصرية انا عندي اختي الكبيرة بتسمي القهوة ضرتها يعني بتبقى القهوة دي عدو لدود للستات اممم يمكن لانها قهوة مؤنث مش لوسموها شاي كان احسن هههههههههههه
ربنا يخليك على الابتسامة الحلوة مع الصبح على فكرة غير الميوزك يارب يعجبك احنا كم ابراهيم رزق عندنا :) "
؛؛
؛
لروحك عبق الغاردينيا
كانت هنا
reemaas

افكار مبعثرة يقول...

انا بجد مستغربة الستات دول يا ساتر عليهم ما القهوة زي الفل اهي و ليها فوايد كتير ما علينا من انها بتسحب فلوس الراجل و بتاخد وقته كله و مبتخليهوش يقعد في البيت و لو قعد بيبقى عاصر على نفسه لمونة
لا لا كل دي حاجات فرعية انما القهوة هو في زي القهوة و جمال القهوة هههههههههههه
تحياتي ليك و لابداعك :))

كريمة سندي يقول...

والله أنا من هواة الكافيهات .. ونجلس نشتغل انترنت أو نلعب كوتشينه .. المهم نضيع الوقت ونتسلى ونبسط

ما هو الفاضي يعمل قاضي!!!

فاتيما يقول...

يا كرابنتس

اكن بقى القهوة طلعت بتعمل
كل العمايل دى
واحنا مش دارينين
وظالمينكو يا عينى
لأ
وكماااااااان
بنديكو البوز التمام
لأ
اخص علينا
ميت الف اخص
دنا منقهرة دلوقتى جدا
وحاسة اننا مفتريات
ومبنتقيش ربنا فيكو يا ازواج
ازاى نطلع بالوحاشة دى
وانتوا قايدين صوابعكو العشرين شمع
مذاكرة للعيال وبتذاكروا
مساعدة ف البيت وبتساعدوا
وفضفضة معانا وكلام وبتونسوا
و عدم الشكوى منا قصاد اصحابكم
و على بريستجنا وبتحافظوا
و أى فراغ عاطفى وانسانى وبتسدوا
لأ بجد
انا زعلانلكو جدااااا
وحاسة اننا لازم نعيد صياغة المسألة
ونعمل مليونية قهاويكى يا مصر
لازم تفضل وتزيد وتتحسن احوالها
عشان تعرفوا تنزلوا تقعدوا عليها
وتهنونا كمان وكمان ...
:)

وعلى ذكر اللى متتسماش
كنت ناوية اسحب كرسى واقعد اطلب فنجان قهوة
بس لقيت ملوش لازمة
اضبط دماغى
بعد البوست المتين دا

تسلم الأيادى
والله يكون ف عون المودام
وسلامى لسالى القمر

ستيتة يقول...

ياحلاوة المولد!!!
ايه اللي انت كاتبه ده عن وسائل ترفيه الإناث
ده دبح الإناث أهون
بقى لما تحب ترفه عن نفسها
تغسل وتكوي وتذاكر وتكلم ماما وبابا والأهل بطنطا؟
لأ يا سيدي
يفتح الله
هن كمان ليهم قهاوي
واصحاب
وتقعد وتنجعص سعادتها
ولا عزاء للعيال
ده أنا الراجل اللي يصاحب راجل غيري أخلعه:)

شمس النهار يقول...

مش عارفة ليه انت دايما تحب تقف قصاد القطااااااااار

كنت داخلة اشمر وارد لاقيت الاخوات قايمين بالواجب
قال الرجل المصري رجل غلبان وكمان جدا
ومظلوم وكمان جدا
وشقيان وكمان جدا
يعني تلاته جدا
عجبت لك يازمن

كنتي فين يا نو لما قلت انا يييييييس
:))))))
قال مظلوم قال

الاحلام يقول...

اجمل شىء فى الجلوس على القهوى انك فى وسط اصدقائك لكن بعد ذلك انا شخصيا لا احب الجلوس على المقاهى فالمقاهى يكون بها كل شىء سىء اعرف جيدا ان هناك الجميل والسىء لكن الاكثر عليها هو السىء
دمت بخير تقبل تحياتى ابوداود

ابراهيم رزق يقول...

حفيدة عرابى

براحة عليا شوية ده انا غلبان جدا ههههههه

احنا عايزين نعمل فوت و نشوف الحاجات دى مسلية و لا لا

متفق معكى فى وجهة نظرك الاخيرة بس فين ده

نورتينى
خالص تحياتى

ابراهيم رزق يقول...

محمد الجرايحى
استاذى العزيز

قول لصاحبك على بعض الاسرار
هههههه
تحياتى

ابراهيم رزق يقول...

منيرة سوار

انا كنت فاكرها مشكلة محلية طلعت عربية
هههههههههه

متفق جدا فى وجهة نظرك

نورتينى
خالص تحياتى

ابراهيم رزق يقول...

شرين سامى
اختى العزيزة

ليه كده ده شغل البيت حاجة مفيدة و رياضة و فرصة للممارسة الهويات المفيدة
تخيلى غسيل كم طبق يحافظ على نعومة اليدين
كى بعض الملابس و ترتيب الدولاب
عمل كيكة و التغزل بجمالها منتهى اثبات الذات فى عمل مفيد
هههههههه

سلامتك من الخنقة و انا لا احب انيس منصور انا بهزر بس هههههههه

تحياتى لزوجك و امن

ابراهيم رزق يقول...

reemaas

شفتى بقى ان احنا مظلومون و معندناش ترفيه غير القهوة
ههههههه

عكسكم عندكم حاجات كتير

نورتينى
خالص تحياتى

ابراهيم رزق يقول...

زينة زيدان
اختى العزيزة

متفق معكى تماما عشان نريح دماغنا
هههههههههه

بلد مجنونات صحيح

نورتينى
خالص تحياتى

ابراهيم رزق يقول...

مصطفى سيف
اخى العزيز

ايه يا عم مصطفى ايه الاسعار الرخيصة اللى عندكوا دى قولى على اسم القهوة عشان اقعد عليها
هههههههههه

طبعا هذه فايدة من الفوائد

نورتينى
خالص تحياتى

ابراهيم رزق يقول...

Bent Men ALZaman Da

ههههههههههههه

ده مش من قلبكوا انتو بتحبوا الحاجات دى

مش مصدقانى شوفى كم مسلسل تشاهديه
كم فاتورة تليفونكم
كم كيكة بوظطيها قصدى عملتيها
هههههههه

نورتينى
خالص تحياتى

ابراهيم رزق يقول...

فاروق فهمى
استاذى العزيز


انا بس حبيت ابين لهم فوائد القهاوى و كم هى مفيدة

اقتراح الحما دى اقتراح كويس جدير بالدراسة

سلامى لك و لزهراتك يا ملك الزهرات

نورتنى و شرفتنى

خالص تحياتى

ابراهيم رزق يقول...

ارثر رامبو

سعيد جدا بسعادتك اسعدك الله دائما

دايما منورنى
خالص تحياتى

ابراهيم رزق يقول...

zizi العزيزة الذيذة

يا فاهمانا انتى

على فكرة فى قهاوى للسيدات و اعرف قهوة منهم فى مدينة نصر

الواحد لما بيكون لوحده بيحس انه عصفورة
ههههههه

نورتينى و شرفتينى
تحياتى و تقديرى و حبى

ابراهيم رزق يقول...

ريماس
صباح الفل و القشطة

ارضى زمتك ياريماس يا اختى انتى لو عملتى كيكة و الكيكة طلعت مش و لا بد بتعترفى بخطئك و تقولى انا معرفتش اعملها و لا لازم تتطلعى حجة اصل الدقيق مالوش عرق اصل البوتجاز كانت ناره عالية او ناره هادية انتو مبتغلبوش يا بنتى
ههههههههههه

انا كنت فاكر الموضوع ده مقتصر على مصر طلع الموضوع مسمع قوى و النبى خلى اختك تقرا الموضوع عشان تخف عن جوزها الغلبان شوية هههههههههه

نورتينا
تحيات معطرة بالمسك و العنبر

ابراهيم رزق يقول...

افكار مبعثرة

يا سلام يا عاقلة و النبى قولى لهم كمان و كمان و كمان و كمان عن فوائد القهوة
ههههههههههه

نورتينى
خالص تحياتى

ابراهيم رزق يقول...

كريمة سندى

يا سلام عليكى فينك من زمان شوفوا العقل

نورتينى
خالص تحياتى

ابراهيم رزق يقول...

فاتيما
روح القلب الملائكية

فاتيما عندنا يا مرحبا يا مرحبا

حلوة قوى مليونية القهاوى دى
و نرفع الطاولة و الشيش بدلا من الاعلام

ايه يا بنتى هو كلكو عليا و لا ايه

هو مش احنا بلد ديموكرطى و الديموكراطية ان كل واحد يقول اللى هو عايزه

احلى كرسى و احلى كابتشينو لماماة جو

نورتينى و شرفتينى

سلامى لكى و سلامى الى جو يا ام يوسف

ابراهيم رزق يقول...

ستيتة حسب الله الحمش

براحة عليا شوية
كله ضرب ضرب مفيش شتيمة
ههههههههه
و بعدين الاخوات قاموا بالواجب و زيادة

هو ده اللى انا كنت فاكره نعمل فوتينج و نشوف هههههههه
اقعدوا على قهاوى طالما هتريحوا دماغنا

خلع يا ساتر يارب للدرجة دى
هههههههه

نورتينى
خالص تحياتى

ابراهيم رزق يقول...

شمس النهار

اصل انا فدائى و صاحب قضية
هههههههههه

قاموا بالواجب و زيادة

اما المدام فانتى خدى بالك من التحزير اللى فى اخر البوست ده تحزير لاعتبارات امنية

نورتينى
خالص تحياتى

ابراهيم رزق يقول...

الاحلام
اخى العزيز

اعرف انه يوجد بالقهاوى الجميل و السىء لكن منشمتهمش فينا خلينا فى الجميل
ههههههههههه

نورتنى و شرفتنى
خالص تحياتى

زهرة الضحا يقول...

ههههههههههههه
أول مره أعرف إن القهوه ليها كل الفوايد دي
عو بالنسبالي مبحبش الزوج يقعد في البيت
بس لما يكون في أولاد بيكون روح المشاركه بيمثل دفء جميل

تحياتي للي متتسماش :)

نسرين شرباتي "أم سما" يقول...

هوا يعني حضرته "الراجل" بيتجوز ليه؟
علشان يسيبها ويقعد ع القهوة
طيب ما يتسلى هوا التاني بغسل الأطباق أو عمل كيكة أو حتى يساعدها بكي الهدوم
أو ع الأقل يزاكر لولد معاها
أهو يحل مشكلة القوة من الاصل
وبرضه ربنا يطيل في عمره
:)