الثلاثاء، 9 أغسطس 2011

قلة ساليناز

من منكم يتذكر القلل القناوى و هى قلل الشرب القلة من التراث الشعبى و استخدمها المصريون استخدمات كثيرة طبعا القلل كانت حتى الخمسينات و الستينات من اساسيات اى بيت و كانت من معالم نظافة ست البيت نظافة القلل و كانت كل ربة منزل تتباهى بنظافتها لقللها و صينية القلل اما غطاء القلة فكان يدل على الحالة المادية للاسرة  فمنهم من يشترى الغطاء من النحاس و الاقل ثراء كان يشتريه من الالمنيوم اما صينية القلل فكانت مثل الغطاء بنقوش و روسومات طبعا لا تنسى كل سيدة من وضع ليمونة او عود نعناع او ريحان على القلة حتى تكتسب المياه طعم جميل و منهم من كان يضع ماء زهر او ورد 
و فى المناطق الشعبية كانت القلل توضع على الشبابيك لكى يتمكن اى عابر سبيل اصابه العطش  ان يشرب من القلة ثم يضعها على الشباك
و لعل اشهر القلل تلك القلة التى احبها نجيب محفوظ و كانت موضوعة على مشربية امام المقهى الذى كان يجلس عليه و ظل مدة كبيرة يفكر بها و يظنها فتاة حتى اكتشف بعد فترة انها قلة
اما فى الاغانى فاتذكر اغنية القلل القناوى من تاليف بديع خيرى و تلحين سيد درويش و تقول كلماتها
مليحة قوى القلل القناوى
رخيصة قوى القلل القناوى
قرب حدانا و خدلك قلتين
خسارة قرشك و حياة ولادك
على ماهواش من طين بلادك
ده ابن بلدك مايبلفكشى
ماتعدموشى و لا يعدمكشى
طبعا بديع خيرى كتبها قبل غزو المنتجات الصينى هو ليه صحيح مفيش قلل صينى و من الاغانى ايضا اغنية نجاة اما براوة كلمات مرسى جميل عزيز و الحان محمد الموجى و تقول  كلماتها
  اما براوة براوة اما براوة
دوار حبيبى طراوة اخر طراوة
قلة حبيبى ملانة و عطشانة يانا
اروح و لا اروح اشرب حدانا
اروح و لا اروح و بلاش شقاوة
لا بلاش شقاوة يا نجاة عشان احنا فى رمضان روحى احسن طبعا تدخل القلل فى الامثال الشعبية مثل المثل الشهير
نحدف وراه قلة
طبعا تقال على الشخص الغتت عندما يرحل و هذا المثل ايضا
اللى تروح بيه للفخرانى تجيب به قلل
تلك مقدمة لكى احكى لكم عن الانسة ساليناز لقد دخلت على هى و امها منذ فترة و معها قلة صغيرة  لا اعلم من اين اشترتها طبعا القلة كانت صغيرة و بغطاء جميل ارتبطت بها ساليناز و اهتمت بنظافتها و وضعت عليها شريط و اهتمت ايضا بجمالها امس اثناء لعبها الكرة مع زياد فى الشقة كالعادة طبعا بعد كل مبارة توجد  خسائر و خسائر هذه المباراة كانت قلة ساليناز التى بكت عليها كثيرا و نامت حزينة و من ساعتها و انا ابحث عن بائع القلل التى اختفت مع انها صحية و جميلة و تنقى المياه و تبردها تبريد طبيعى متعرفوش حد بيبيع قلل
بلد مجانين صحيح        

هناك 34 تعليقًا:

مصطفى سيف الدين يقول...

ستبحث عن البائع طويلا ولن تجده
فهناك اشياء اندثرت وانقرضت بداعي التقدم والرقي
انا على فكرة من هواة الشرب من الزير وبيتنا فيه بدل الزير اتنين وبدل التلاجة اتنين لكن مية الزير والقلة لا يعلى عليها مية لها مذاق تاني مذاق مرتبط بمعدن اهالي مصر
تحياتي

شمس النهار يقول...

يانهار مش فايت
كده تكسروا قلة البنت
لو سألت البواب هيدلك علي مكان قريب لبيع القلل
او عارف الناس اللي بتبيع البرامات وقصاري الزرع الكبيرة هتلاقيهم جنب اي مشتل قريب
بجد لازم تشتروا للبنت قلة تانية
وهتابع ده بنفسي
وكل شوية هسأل
البنات ماحدش يزعلهم ابداااااااااا

zizi يقول...

ابراهيم الغالي ..

على فكرة انت نسيت الثلاثي المرح وهم بيغنوا مع فرقة رضا :

قلالنا القناوي مافيش زيها رخيصة وتساوي ذهب تقلها

تعالوا هنا شوفوا مجدنا

واشربوا الهنا من قلة قنا

وياريت نلاقي قلل دلوقتيبس ممكن مامتها تلاقيلها عند الناس بتوع ادوات السبوعفي العتبة وفداكي ياساليناز ميت قلة ..تحياتي

Tarkieb يقول...

شارع السد في السيدة هاتلك دستة مش واحدة ....

Mona Hekal يقول...

مساء الخيرات استاذ ابراهيم
حلو اوي موضوع القلل ده و طبعا كانت في معظم البيوت زمان انا فاكرة كويس انها كانت شئ اساسي في بيت جدتي و عارف فاكرة كمان الزير اللي كان بيتحط في الشوارع زمان علشان الناس تشرب منه

اما عن قلة ساليناز في اماكن في شبرا فيها قلل و الله و من عينيه اجيب لها واحدة و بجد مش عزومة مراكبيه ربنا يخليهالك هي و زياد يا رب

فاتيما يقول...

وقلة آبى ..دى من أدبيات البلوجر
آبى هانم بتنجانى صاحبة مدونة كوكب آبى الشهيرة واللى مكنش يعجبها تحدفه بالقلة ف نافوخه علطول ...
الله يمسيها بالخير ..
:)

وكله الا قلة ساليناز
اخص ع الكورة
أدى اللى بيجيلنا منها

معلش

على فكرة انا كمان بدور على حد بيبيع قلل مبلاقيش خالص حوالينا
والموضوع عاوزاله مشوار لمصر القديمة وانا ذكرياتى هناك متسرش
ومبحبش اروح ...

مستنية صدفة
والاقى بياع قلل
وساعتها هجيبلى
وأوعدك انى أجيب لساليناز واحدة
ان شاء الله
عندى انا الطلعة دى
بس زياد يمضلنا تعهد بعدم كسرها
الا ازعل
وانا زعلى ويحيش بقى


نسيت تجيب سيرة قلة الشيخ امام
ام عسل مسموم دى ..
و اللى بيقول لها

يا قلة الذل انا ناوى
ما اشرب
ولو ف المية عسل

:)

بلد مجانين صحيح
بس متنكرش
ان اجمل ما ف البلد دى جنانها

:)))

سلامى لساليناز وزياد .. وماماتهم
وسيادتك قبلهم أكيد

عمرو فكرى يقول...

انا بحب مية القلل جداااااااااا اصلا

Carmen يقول...

انا عندى قلة لحد دلوقتى ^_^ اجيب واحدة ؟؟

faroukfahmy يقول...

تعرف يا ابراهيم القلل قلت فى الاسواق شأنها شأن لمبات الغاز نادر ان نجدهما لا لكى نشرب منها كقلة او تنور لنا المكان كلمبة غاز وانما نضعها كديكور من الزمن الجميل يا جميل

لــــ زهــــــراء ــــولا يقول...

لازالت هنا تباع القلل واحنا عندنا اتنين وفى ناس كتير اعرفهم عندهم قلل هى لسه مش بقت تراث شعبى

اقولك على حاجه كان عندى بلاص كمان ^_^ هو صغيور اوى وكان شكله تحفه بس للاسف اتكسر

لو عاوز قله ابعت لك واحده شحن وانت عليك المصاريف هههههههههه

زهـراء

ريهام المرشدي يقول...

مازالت "القلل" موجودةتباع و تشترى ، و هناك من لا يقتنعون إلا بها .

دعاء العطار يقول...

ياعينى حرام عليكم كده تكسروا قلة ساليناز ؟

اعتقد ان صعب تلاقى قوله دلوقتى بس بيتهيالى لو دورت بضمير هتلاقى

دور بضمير بقى عشان ماتكسرش بخاطر البنوته

وابقى عرفنا وصلت لايه .. كله الا سالى (:

Heba Salem Youssef يقول...

السلام عليكم :)

الصراحة الصراحة لا
معرفش القلل القناوى دى D:
يعنى انا اعرف القلل
هعمل سيرش عليها :)

والله ما قلة ثقافة
انا اعرف القلة العادية
واعرف الزير كمان :)
بيكسروه فى حفلة التخرج فى سنة ستة ان شاء الله :))))))))

مالها الكولمنات :) زى القلل بس على ملون :))

ستندثر ان شاء الله كمان سنوات

بس اللى استعجبه مدى الانحدار اللى شهدته مصر

يعنى اللى يقارن بين الاثارات المصرية المستخدمة للشرب والقلة الفخار العادية !!
يجد اختلاف كبير فى الشكل

والدى عرفهالى حالا :)))
طلعت اللى فى مخيلتى على فكرة
بس مكنتش اعرف انها قناوى
جيل تسعنيات بئى :)))))

افتكر شربت منها مرة
هى طريقة عملها الترشيح وبتسقع المية بسبب الفخار مش عارفة الميكانزم اوى بس اللى فهمته من بابا :))

وكمان ممكن يكونوا استوحوا منها مقولة

كل اناء ينضح بما فيه .....صح :))

بس بجد اكيد هيا صحية
يعنى الناس كانت بتشرب منها ولا بيجلهم فشل كلوى ولا بتاع
بلاش اقول نسبة الفشل الكلوى فى مصر دلوقتى كام :))) بعد استخدام الكولديرات والكولمنز :))

والله انا سعيدة انى عرفت منشأ صنع القلل او الراجل عمو قناوى اللى صنعها :)))

reemaas يقول...

مش صعب خااااااااااااااالص تلاقى القله يا استاذ ابراهيم

اقولك انا
من عادة الحياء الشعبيه والمناطق الرايفيه انهم بيجيبواا للبنت فى سبوعها قله وللولد فى سبوعه زير

ماعرفش ليه يعنى بس انا سمعت ده

فانت عليك وعلى عطار يكون بيبيع حاجات سبوع بس عطار قديم كده مش من بتوع اليومين دول ولو لقيتها ادعيلى بقى

ابراهيم رزق يقول...

مصطفى سيف

جارى البحث عن القلة
نفس و الله يا مصطفى فة ماء الزير و القلة بالذات لو كانت قناوى اصلى مش تايوانى
ههههههههههههه
حلوة قوى كلمتك و هو ده اللى بقصده

نورتنى
خالص تحياتى

ابراهيم رزق يقول...

شمس النهار

البواب عنده فريجدير
هههههه

بتوع القصارى معندهمش قلل و للاسف اغلب القصارى اصبحت بلاستك

جارى البحث يا افندم

نورتينى
تحياتى و تقديرى

ابراهيم رزق يقول...

zizi العزيزة الذيذة

طبعا الاغانى كثير عن القلل انا كنت بقول على سبيل المثال
سعيد بتذكيرى

القلل بتاعة السبوع لا تصلح للشرب لانها مدهونة بالبوية

نورتينى
تحياتى و تقديرى و حبى

ابراهيم رزق يقول...

Tarkieb

طبعا ده مشوار بعيد انا نفسى القلل تبقى فى متناول الايد

نورتنى
تحياى

ابراهيم رزق يقول...

منى ابو السعود

بزمتك مش كانت ميتها ليها طعم و تحسى كده انها طبيعية

و لا الزير بالذات لو كان تحت شجرة فى الطراوة و لا سواقين النقل لما كانوا يحطوا القلل على عربياتهم و يلفوها بخيش مبلول
متشكر قوى ربنا يخليكى لينا و على فكرة ساليناز قاعده جنبى و اقنعتها انى ابحث عن قلة

نورتينى
تحياتى

ابراهيم رزق يقول...

فاتيما
روح القلب الملائكية

طبعا قلة ابى من القلل الشهيرة
هههههه

المشكلة فى الذهاب الى اماكن بعيدة من اجل الحصول على قلة

فى انتظار عثورك على بياع قلل

ازاى انسى الاغنية دى اخص عليا اخص
متشكر لتذكيرى

و الله العظيم ساليناز قاعده جنبى و بتسلم عليكى و نفسها تشوفك

فعلا اجمل ما فيها جنانها

نورتينى
سلام يا ام جو

ابراهيم رزق يقول...

عمرو فكرى

و انا كمان بحب مية القلل
هههههههه

نورتنى
خالص تحياتى

ابراهيم رزق يقول...

كارمن

ههههههههه

ربنا يخليكى لينا

تحياتى

ابراهيم رزق يقول...

فاروق فهمى
استاذى العزيز
ملك الزهرات
و ابن بطوطة المدونين

تصدق انا عندى فى الصالون زير و لمبة جاز و مشنة حاجة ببلاش و بتعطى ديكور جميل

نورتنى
تحياتى و تقديرى

ابراهيم رزق يقول...

لولا و زهراء
زهراء

ههههههههه
موافق و كتكون اجمل قلة

انا اتحدث عن صعوبة شراء شىء كان اولى يكون بنتهى السهولة

زعلتينى على البلاص النونو هو كان زى قلة ساليناز نونو برده
هههههه

نورتينى
تحياتى

محطات ثقافية يقول...

بالتفكير في القلل نفكر بصانع أثقنها وتفنن في صنعها واضطر ان يتخلى عن مهارته في صنع القلل الى صناعة اخرى تتماشى مع العصر
موضوع جميل ووعدا لو لقيت بائع قلل اهيك وحدة
بوركت اخي

ابراهيم رزق يقول...

ريهام المرشدى

موجوده و تباع و تشترى و لها مريدين لكن توجد صعوبة فى شراءها

سعيد بتعليقك
خالص تحياتى

ابراهيم رزق يقول...

دعاء العطار

جارى البحث بكل جدية عن قلة بديلة لساليناز

نورتينى
خالص تحياتى

ابراهيم رزق يقول...

Doctora Heba

ههههههههههههههههه

اولا سلميلى على بابا و اشكريه على تصحيح المعلومة

لما يكون عندنا فى تراثنا و تاريخنا و صناعتنا حاجة نمتاز بها من طمى النيل

تمتاز بالاتى
1 رخيصة الثمن
2 شكلها حلو و تصلح كديكور فى الشقة
3 صحية لانها تمتاز بعملية تبريد طبيعى و تفلتر المياه و تخلصها من الشوائب و الاملاح كما ان درجة برودة المياه برودة طبيعية لا تؤدى الى تقلص المعدة

نتخلص منها بداعى التقدم و المدنية بينما الصين مازالت تأكل بالعصى و نقلدهم عندما ندخل المطاعم الصينية

بينما عندنا ما هو اجمل مثل القلة و الزير و الطاجن الفخار الاصلى و ليس البيركس او التيفال الذى يعطى للاكل مذاق جميل با الاضافة لانه صحى لانه مصنوع من مواد طبيعية لا تدخل للمواد الكيماوية فيه
هاقولك حاجة تانية فى الصعيد بعملوا البيض فى الطاجن فالبيض بينفش و طعمه جميل و من مميزات الطاجن انه يسخن ببطء و يبرد ببطء و بذلك يحتفظ بالطعام ساخن فترة طويلة
نفسى نحتفظ باشيائنا الجميلة و عدم التخلص منها بداعى المدنية البغيضة
ماذا يعبينا ان تكون فى شقتى او مكتبى او عيادتى قلة للشرب هل ينقص منى
ياريت نفوق قبل ان يرحل عنا عمو قناوى
ههههههههه

نورتينى
خالص تحياتى

ابراهيم رزق يقول...

reemaas

هههههههههههه
انا هادعيلك بس مش هادعيلك على المعلومات الغلط

زير ايه يا نور
بيجيبوا للبنت قلة و الولد ابريق
و بعدين دول لا يصلحوا للشرب عشان بيكونوا مدهنون بالبوية

نورتينى و متشكرين على معلوماتك
تحياتى و تقديرى

ابراهيم رزق يقول...

حلم

و الله العظيم هذا ما قصدته ان نحافظ على صناعة و على صانع مهم و شىء مفيد و صحى

ربنا يخليكى

نورتينى
خالص تحياتى

غير معرف يقول...

مساء الورد ابراهيم

لم أشرب في يوم من قلة ولكنني

أعتقد أن أي شيء طبيعي هو ألذ

بكثير من بقية الأشياء لذلك تذكرت

أواني فخارية نستخدمها في الرحلات

البرية تعطي طعم خاص جداً وجميل

لذلك أبحث لها عن قلة فهي تستحق

التعب ...

تحياتي وإحترامي

Heba Salem Youssef يقول...

الله يسلم حضرتك

والله معلومات رائعة

دا اللى اكتشفته ان قناوى دى نسبة الى قنا

:)))))

دنا معنديش ثقافة قديمة خالص

جزاكم الله كل خير

منيرة سوار يقول...

معلومات جديدة وظريفة عن القلل اخي ابراهيم, اعادتني لسينما الابيض والاسود وروايات نجيب محفوظ.
تقبل مروري اخي الكريم..

ستيتة يقول...

تعرف ان مية القلة مش صحية!!!!!!!!!!!!
الماء الصحي هو الخارج من القلة في الصينية المنقوشة
اه والله زي ما بقول لك كده
وبرضه تجيب لست البنات قلتها
هي مش سايبة
من السيدة
تمتعت بالبوست جدا