الاثنين، 15 أغسطس 2011

انى صائم

 مباراة فى شرب المخدرات و الرقص بين لوسى و غادة عبد الرازق  بقيادة مصطفى محرم و مباراة فى الرقص بين فيفى عبده و سمية الخشاب بقيادة ابنه حسين مصطفى محرم للصعود لنهائى كاس جهنم من الواضح ان طلبات النجوم اوامر و الترزية موجودة مصطفى محرم فى سماره و ابنه فى كيد النسا الست غادة ليها مزاج فى الشيشة طلباتك اوامر الست لوسى عايزة تغنى عنيا يا هانم الست فيفى تخطت السبعين ربيعا و عايزة ترقص تؤمرى يا هانم و طظ فى الدراما و طظ فى المشاهدين نحن طاقتنا يدوبك تستحمل مصطفى محرم لكن انه يجيب ابنه حسين حرام فعلا حرام
من غير الطبيعى ان كل قناة تعرض مسلسل ان تخرج علينا و تقول انه طبقا للاستفتاءت حقق هذا المسلسل اعلى نسبة مشاهدة و باى منطق يستضيفوا نجومه قبل ان ينتصف الشهر و كانه حقق جائزة الاوسكار ارحموا عقولنا قليلا الكلام هذا موجه الى عمرو اديب و قناة الاوربيت
الكوميديا لا تعنى التفاهة هذا الكلام موجه الى سامح حسين و مسلسله الزناتى مجاهد و هانى رمزى و مسلسله عريس ديلفرى هالة صدقى  و سيت كومها جوز ماما و حنان ترك و مسلسلها نونه الماذونة يستثنى من ذلك مسلسل الكبير قوى لاحمد مكى
تراجعت المسلسلات الدينية كثيرا و الدليل مسلسل الحسن و الحسين التراجع لا يقتصر على مصر بل  سوريا ايضا
توجد مجموعة من المسلسلات تحمل فكر جديد و اسلوب جديد من حيث التأليف و التصوير و الاضاءة و الديكور و الاخراج  بعضها نجح مثل المواطن اكس و خاتم سليمان و الريان و شارع عبد العزيز و بعضها فشل مثل دوران شبرا
حضرت حفلا غنائيا بعنوان غنا للوطن و هو العرض الخاص بتخرج الدفعة الثالثة لورشة مركز الابداع الحفلة كان بها مواهب جميلة و العرض مبهر بكل المقاييس و كان ختام الحفل المطربة العملاقة نجمة ستار اكاديمى نسمة محجوب اربأ بهذا الجيل ان يكون نجمه تامر شعر الصدر  هذا الجيل الذى استمعت اليه بالحفلة عار عليه تامر حسنى و عار ان يلقب هذا التامر بنجم الجيل الذى استمعت اليه
يا ترى انت فين يا بنى ادم انت و السبكى
اصبح نجوم رمضان هذا العام لميس جابر بتخاريفها و طلعت زكريا ببجاحته و عمرو مصطفى ببلاهته و  مرتضى منصور بسيدهاته  و فريد الديب بتلاعبه و محمد حموده محامى احمد عز بخوازيقه
يا عينى على الاعلانات سبق و تكلمت عن ضرورة مقاطعة الاعلانات المستفزة بريل و استرجل وا ستحملنا خليك كول و بقينا كول جدا لسه بتأكل البطاطس العادية و خايف من ماما و مخفناش لكن كله كوم و اعلان صحابك زى البوكسر فيه اللى ضيق و فيه اللى واسع وصلنا الى البوكسر ابشركم انتظروا مرحلة ما بعد البوكسر
بلد مجانين صحيح
ملحوظة
تحليلى للمسلسلات مجرد نظرة طائر محلق و ليست طائر مقيم حتى لا اظلم اى عمل


   
   

هناك 42 تعليقًا:

ريهام المرشدي يقول...

السلام عليكم و رحمة الله
أعجبني التحليل جدا و أسلم حل المقاطعه للتليفزيون كله :)
شكرا لك ...

شمس النهار يقول...

الحمد لله الحمد لله ربنا عافاني من عته المسلسلات
ماعنديش صبر اقعد اتابع انا هبل اكتر من تلاتين يوم
وياريت في جملة مفيدة
كان زمان 13 او 15 حلقة واقلب
مايعرفوش يعملوا زي بابا عبده
ولا ابو العلا البشري وكم الحوارات الراقية الجميلة اللي فيه
وحتي المسلسلات الطويلة اخر عهدي بها كان ليالي الحلمية
وهنا اوبشن الفرجة علي المسلسلات اتحرق عندي
:)))
ومش ناوية اركبله قطعة غيار كده كويس اوي
وبعدين ماتظلمش فيفي كله الا فيفي بقا
هي كانت بترقص في فرحي من 28 سنة وقول كان عندها 30 او 35 يعني نقول ستينايه او اقل سنه او اكتر سنة
هي بس اللي كنج سايز
:))))))

Unknown يقول...

حسبنا الله ونعم الوكيل

لــــ زهــــــراء ــــولا يقول...

ابراهيم ...

لاول مره هذا العام لا اتابع اى مسلسل على الاطلاق ولا حتى برامج استثنى من هذا مصطفى حسنى فى برنامج احبك ربى وكذلك القاهره اليوم احيانا ....

مش مهم تكون متابع جيد لكل المسلسلات ومش مهم تكون طائر متعمق لكن الاجمل عن جد ان تكون طائر محلق ^_^

عاوزه اقولك ان الاعلانات شئ مستفز وبصراحه منتظره ما بعد البوكسر ومش هاستغرب ابدا ابدا
بما انى درست دعايه واعلان وباعشق الاعلانات الرائعه عاوزه اقولك ان اعلان شكرا بتاع فودافون واعلان كوكا كولا افرد جناحات يعتبروا افضل اعلانات منذ رمضان الماضى

رغم انى مش باشوف مسلسلات لكن اصدقائى لما بيشوفوا اعلان حلو بيقولوا عليه عشان اشوفه على اعتبار انى مجنونه اعلانات هههههههههه

اللهم انى صائمه مش هاكلم بقى عشان الواحد مش ياخد ذنوب كفايه كده

زهراء

بسمة الورد عطر المشاعر يقول...

مساؤك هنا ... استاذ ابراهيم

اعجبنى جدا ما تفضلت وفضفت بصراحة انا مش من هواة مسلسلات رمضان ابدا , ولا من هواة الفضائيات خالص , واحمد لله على انه من عليا بهذه المنه والفضل , علشان مش اتعفرت لما اشوف البلاوى دى ,, حسبنا الله ونعم الوكيل فيمن يسمون انفسهم فنانين ,
بالنسبة للاعلانات بصراحة انت قلت اللى نفسنا فيه جدا وربك يرحمنا لا نملك غير الدعاء ,,
دايما بسعد بوجودى فى مدونتك وبيعجبنى رايك جدا
احترامى لما تطرح علينا, مودتى اخى

Casper يقول...

عليه العوض ومنه العوض في الاعلام اللى من غير رقيب

من الطبيعي جدا زي ما احنا عالم تالت في كل حاجة ان نكون ايضا عالم تالت في ابسط الاشياء

==========

تحياتي لفكرك وقلمك

Noha Saleh يقول...

بالنسبة لغادة ولوسى وفيفى واخواتهن مش هتكلم عليهم لانى ماشوفتش ومش ناوية اشوف مسلسلاتهم

الكوميديا السنة مش كوميدى خالص كان نفسى يكون فى محمد صبحى السنة دى

البرامج السخيفة او برامج المقالب اسخفها رامز قلب الاسد

وكلها سخيفة مش رامز بس

اما الاعلانات فالاعلان فكرة والفكرة هى اللى بتنجح الاعلان...والله يرحم اعلانات زمان بقى كانت حلوة وتتشاف لغاية دلوقتى لانها كانت فكرة واحترام

البوست حلو جدا والتحليل مظبوط مئة بالمئة:)

غير معرف يقول...

مساء الغاردينيا استاذ ابراهيم
انا بس نفسي افهم انت بتلاقي وقت للمسلسلات دي منين دا وانت طائر محلق لوكنت مقيم كنت قلت ايه هههههههههههه
نيجي بقى للجد للأسف الي بشوفه انه المسلسلات بتبقى جديدة في رمضان بستغرب هو في رمضان لازم يعني نبقى فاضين نشوف التلفزيون وهات يامسلسلات
ليست جميعها دينية او تماشي الجو الخاص برمضان وزي مانت شايف شلة فيفي وسمية ولوسي انما تقول ايه فعلا استخفاف بعقل المشاهد يعني ريح دماغك وبلاش تبص لتلفزيون :) شايف حليتها ازاي هههههههه "
؛؛
؛
لروحك عبق الغاردينيا
reemaas

εïз زهرة εïз يقول...

مفيش أحلى من ان الواحد يشتري دماغه وميتفرجش بقا

^_^

sabry abo-omar يقول...

ياعزيزى كله بيزنس .. لو كان فى مقاطعة حقيقية كانت الناس دى هاتقعد فى بيوتها ومش تشتغل..ربنا يهدى ويكرمنا بالهداية جميعا..تقبل مرورى واعجابى بكلماتك وكل عام وانت بخير

منيرة سوار يقول...

والله اضحكتني يا اخ ابراهيم..
تصلح ناقد للدراما.. فصفصت المسلسلات جميعها من الالف الى الياء..
اللي نعرفه واللي ما نعرفوش..
ولكن الحق معك.. فعلا شيء يفور الدم!
تقبل مروري اخي الكريم..

FAW يقول...

بجد مش عارف مين بيتفرج علي مسلسلات البذائة دي عشان القنوات تشتريها , حاجة تقرف بجد

فعلا , كله كوم وإعلان قطونيل ده كوم تاني :))

خليك طائر محلق إوعي تنزل . .

AHMED SAMIR يقول...

مجرد ان تحلق على مسلسل فيه غادة عبد الرازق او أخر فيه فيفي عبده
دة جرم انت ارتكبته في حق نفسك...!!
تحياتي لك على البوست الرائع دة

zizi يقول...

ابراهيم تقبل تحياتي وفعلاً انت ناقد ممتاز بتحط ايدك على المركز بتاع الحدث ..ويمكن فعلاً التلات اربع مسلسلات اللي بتقول عليهم هم اللي ممكن يتشافوا ومعاهم برنامج اشرف عبد الباقي جيم سؤال ودمتم..تحياتي

zizi يقول...

ابراهيم ماشاء الله دايماً تجيب التايهة ,,وياريتك تدخل ورشة فنية عشان تبقى ناقد رسمي ..اما كل مايعرض هذا العام فهو دون المستوى فيما عدا شارع عبد العزيز والريان والمواطن اكس ودوران شبرا والدالي بس الدالي برضه ممطوط على الفاضي يعني ماكانش لازم الجزء التالت ده بصراحة ويمكن برنامج س جواب برضه كويس ..اما الإعلان المستفز ده فمش عارفة فعلاً احنا رايحين على فين ..
انت عارف الفقي لما يسعد ينزله تعليقين ..انا التعليق ده كنت كاتباه الأول وفجأة ضاع مني وكتبت التعليق التاني وبعدين لقيت ده ياللا نصيب ..تحياتي

Bent Men ElZman Da !! يقول...

على فكره نظره الطائر المحلق هتبقى نفس الطائر المقيم
الفرق بس ان المحلق ربنا رحمه من المهازل المستمره اللى فى المسلسلات

السنادى بجد مفيش حاجه الواحد يتفرج عليها
انا عن نفسى مش متابعه الا المواطن اكس
الى حد ما احسن من غيرها

الاعلانات شئ مستفز بطريقه غير طبيعيه

انا مش عارفه هما ليه بيعملوا فينا كده واحنا فى ايام متفرجه

شكرا ليك :))

reemaas يقول...

بالنوسبة لطلعت زكريا فالبقاء لله وانا كنت بحب الراجل ده
بالنوسبة لرقص فيفى عبده فانا جالى الضغط وربنا حاجة يعنى مؤذية للعين

بالنوسبة للعلانات ففيها المستفز لابعد الحدووووووووود ومنها الحلو زى اعلان كوكاكولا

بالنوسبة للمسلسلات الكودى فحاجة تبكى والله
بالنوسبة لمسلسل الحسن والحسين فانا ماشفتوش بس سمعت انه اصلا ضعيف جدا دراميا والله اعلم بس ماعرفش ليه مش مرتاحة لعرضه يمكن لتجسيد شخصيات من بيت النبوة او ممكن علشان التحدى الفظيع فى عرضه لرائ الازهر

ابراهيم رزق يقول...

ريهام المرشدى

ههههههه
طبعا هو حل منطقى لكنى لا اجيده

نورتينى
تحياتى

ابراهيم رزق يقول...

شمس النهار

يا سلام سلم فين ايام ليالى الحلمية و الشهد و الدموع و ابنائى الاعزاء شكرا و الجميل محمود مرسى رحلة ابو العلا البشرى و الرجل و الحصان و قال البحر
ايام
نيجى للست فيفى عشان احنا رمضان مش هنقول غير الحقيقة هى عملت فيلم امراة واحدة لا تكفى مع ايناس الدغيدى و احمد ذكى عام 1990 بعد ما اصبحت فيفى عبدة يعنى هى دلوقتى فى اقل الحسابات على مشارف السبعينات مثلها مثل غادة عبد الرازق على مشارف الستينات بس نعمل ايه فى التوزيع الاستايل ده و السن ده مطلوب بشدة فى الدول العربية رجالة خايبة بعيد عنك
هههههههه
بقى فيفى هبة رقصت فى فرحك رقصت بالشيشة و لا مكنش لسه
ماشية معاك يا عم
مش بعيد ترقص فى فرح نور الدين

تحياتى

ابراهيم رزق يقول...

محمد الجرايحى
استاذى العزيز

و نعم بالله

نورتنى
تحياتى

ابراهيم رزق يقول...

لولا و زهراء
زهراء

ريحتى و بعدين هى المسلسلات هتروح فين

طبعا الطائر المحلق لا تختلف عن الطائر
المقيم لان اغلب المسلسلات بها مط فيكفيكى مشاهدة حلقة لكى تتابعى خمس حلقات

فعلا من اجمل الاعلانات اعلان فودفون هذا من الاعلانات اللى بيبث قيم جميلة بخفة دم و بسهولة لا اخاف على اولادى منه
تأثير الاعلانات على الاطفال كبير

نورتينى
تحياتى

ابراهيم رزق يقول...

Casper

فعلا عليه العوض فى الاعلام

متشكر لمجاملتك الجميلة

نورتينى
تحياتى

ابراهيم رزق يقول...

بسمة الورد

اولا اعتزر عن الخطأ فى ترتيب الردود

طبعا انتى سعيدة جدا جدا بعدم متابعتك للتلفزيون

اما كلامك عن الاعلانات فمعكى كل الحق

انا اسعد بوجودك و تشريفى بتعليقك

نورتينى
خالص تحياتى

ابراهيم رزق يقول...

Noha Saleh

طبعا انصحك بعدم المتابعة

طبعا كوميديا صبحى من الكوميديات الهادفة الله يرحم فؤاد المهندس و مدبولى و عوض و الهنيدى

اما البرامج السخيفة فماسورة و انفجرت لدرجة ان اصبح نجوم بيعمل فيهم مقالب

اما الاعلانات فمتفق معكى انه فكرة و لكن اى فكرة زمان كان الاعلانات من تأليف صلاح جاهين و حسين السيد و تلحين كبار الملحنين دلوقتى ؟؟؟؟
الطريق الى جهنم مفروش بالاعلانات

متشكر
نورتينى
تحياتى

ابراهيم رزق يقول...

ريماس
اختى الريماسية

وحشتنى و الله تعليقاتك
هههههههههههههههههه
يا بنتى انا دارس دراسات حرة نقد فنى و عملت فى المجال ده 8 سنوات و محبتش العمل الاحترافى يعنى النقد ده مجالى يعنى ممكن اشوف جزء من المسلسل احكم عليه و انا بقى لو مسكت كل مسلسل با التفصيل هازهقكم و مش هتيجوا تزورينى تانى
و بما ان المسلسلات بها مط و تطويل فسهل جدا متابعتها

نيجى بقى لنصيحتك المبجلة لا ينفع انا قلت لكى انا دارس نقد و النقد انا بأخذه هواية و الناقد يجب ان يرى جميع الاعمال لانى بتحط فى مواقف و حاجات بايخة لازم ابقى ملم و اخوكى معروف عنه انه لا يسكت و لا يجامل و ده اللى خلانى اسيب العمل الاحترافى يرضيكى ابقى عامل زى الاطرش فى الزفة
هههههههههههه

تحيات معطرة بالمسك و الفل و العنبر

ابراهيم رزق يقول...

Semsema

ياريت الواحد يقدر داء فى الواحد

نورتينى
تحياتى

ابراهيم رزق يقول...

sabry obo omar

فعلا هو بيزنس و البيزنس ده بيتاجر فى عقولنا و فى فكرنا و فى وقتنا

شكرا لك
نورتنى
خالص تحياتى

ابراهيم رزق يقول...

منيرة سوار

هههههههههه
انا فعلا عملت بالنقد الفنى مدة طويلة
متشكر على رايك الذى اعتز به

نورتينى
خالص تحياتى

ابراهيم رزق يقول...

FAW

للاسف اللى بيفرجوا كثير جدا

اعلان قطونيل مستفز مستفز مستفز

نورتنى
تحياتى

ابراهيم رزق يقول...

AHMED SAMIR

معك حق لكن للضرورة احكام
اشكرك على مجاملتك الكريمة

نورتنى
تحياتى

ابراهيم رزق يقول...

zizi العزيزة الذيذة

انا اسعد فقى بتلكا التعلقين
ههههههههه

طبعا انا متفق معكى ماعدا دوران شبرا
انا فعلا دارس نقد فنى و حاصل على دبلوم للنقد الفنى و عملت كمحترف مدة طويلة و لعلمك الكل بيخاف من لسانى فى الندوات
ههههههههههه

اما هذا الاعلان ربنا يستر طالما وصل الاعلان و الفلوس الى تلك المرحلة

تعيشى و تكتبى اعلانيين
نورتينى
تحياتى و تقديرى و حبى

ابراهيم رزق يقول...

Bent Men ALZaman Da

متفق معكى فى نظرية الطائر المحلق

المواطن اكس من الاعمال الجيدة و فيها جديد من حيث الصورة

فعلا الاعلانات اصبحت مستفزة
بيعملوا فينا و بفلوسنا

نورتينى
تحياتى

ابراهيم رزق يقول...

reemaas

صباح الخير بليل
هههههههههههههه

واضح يا ريماس تأثير الصيام

بالنسبة لطلعت ذكريا اللى مات و الله يرحمه الفنان الاسمر طلعت زين
با النسبة لرقص فيفى عبده الف سلامة عليكى من الضغط و انا ايضا جالى الضغط

بالنسبة للمسلسل الكوميدى و انا الخطأ الكيبوردى اللى انتى غلطيه كان هيجننى ههههههه فتعبيرك دقيق المسلسل الكوميدى حاجة تبكى

الاعلانات لا يوجد بها غير كوكاكولا و فدفون
مسلسل الحسن و الحسين بعيدا عن الجدال هو مسلسل سىء
نورتينى
و رمضان كريم
هههههههههههه

مصطفى سيف الدين يقول...

بصراحة الدراما العربية هذا الموسم سواء كانت مصرية او سورية اثبتت فشلها فشلا ذريعا
العام الماضي كان هنك مسلسل القعقاع كان جيدا هذا الموسم الحسن والحسين كان ضعيفا
اما المصرية فهذا العام ربما بين سبعين مسلسل لا تستطيع ان تتحدث الا عن الريان وخاتم سليمان بالرغم انهم يعيبهم كثير من المط والتطويل
نحتاج لعودة مسلسلات الخمستاشر حلقة علشان تبقى مركزة

شمس النهار يقول...

انت بتتكلم عن ابو العلا البشري
وانا ناشرة مقطع من الحوار الراقي الجميل
لما محمود مرسي كان بيتكلم عن الحب مع المعتزلة نسرين
حتت مشهد بمليون مسلسل من بتوع دلوقتي

تصدق ممكن فيفي عبده ترقص في فرح نور الدين اللي خاله الشحرورة لحد دلوقتي لسه بتقول تصريحات وبتتكلم عن جوازاتهااااااا
:))))
عالم مجنين :))))

دعاء العطار يقول...

انا الحمد لله ريحت دماغى من رمضان اللى فات ومش بتفرج ع أى مسلسلات حتى البرامج مش بقيت أشوفها

اصل بصراحه احنا مش ناقصيين وجع دمااااااغ

هو احنا فى ايه ولا فى ايه

وكللله كوووم وهطل عمرو مصطفى كوم تانى

انا الى الان بسال نفسى

هو عبيط .. ولا بيستعبط ؟

ابراهيم رزق يقول...

شمس النهار

مش بعيد فعلا تلاقيها فى فرح نور الدين

احكى لكى قصة عن فيفى عبدة لاحظت فى احد الافراح انها كثيرة الالتفات الى الفرقة براسها فلفت نظرى فاقتربت من البست و وقفت بزاوية خلفية لالتقط ماذا نقول
المفاجاة حنفية شتائم و الفاظ بذيئة توجها الى فرقتها
ههههههه

رمضان كريم

ابراهيم رزق يقول...

مصطفى سيف

متفق معك فيما قلته يضاف مسلسل المواطن اكس و شارع عبد العزيز و وادى الملوك

نورتنى
تحياتى

ابراهيم رزق يقول...

دعاء العطار

كويس انك ريحتى دماغك يا ريت اعرف اعمل زيك

لا عبيط و اهبل
فعلا عبيط عبيط و اهبل
ههههههههه

نورتينى
خالص تحياتى

حَنيّـن نِضال يقول...

السلام عليكم اخي الفاضل

أولا نحن لا نقول اللهم اني صائم و لكن اني صائم كلمة : ( اللهم اني صائم )
هذه دعاء , والمقام ليس مقام دعاء !

اما كلمة : ( اني صائم )
هذه من باب الإخبار وهي الأولى والأصح

لما رواه البخاري ومسلم عن أبي هريرة - رضي الله عنه - أن رسول الله - صلى الله عليه وسلم - قال "الصيام جنة فلا يرفث ولا يجهل وإن امرؤ قاتله أو شاتمه فليقل إني صائم مرتين والذي نفسي بيده لخلوف فم الصائم أطيب عند الله تعالى من ريح المسك يترك طعامه وشرابه وشهوته من أجلي الصيام لي وأنا أجزي به والحسنة بعشر أمثالها "

ثانيا طرح مميز و تحليل في الصميم

تقبل مروري ^_^

ابراهيم رزق يقول...

ريبال بيهس
اخى العزيز

متفق معك تماما فى كل ما سطرته

نورتنى
خالص تحياتى

ابراهيم رزق يقول...

haneen adam

اولا جازاكى الله كل خير

متشكر لمجاملتك الرقيقة

نورتينى
تحياتى