السبت، 20 أغسطس 2011

عريس تايه فى الحسين

بعد الانتهاء من مراسم الفرح طبعا بما انى دقيق فقد كنت اضع برنامج لما بعد الفرح البرنامج كان عبارة عن عزومة من صديق باحد المطاعم الموجودة بالباخرة نايل سيتى طبعا فكرت فى الاعتذار عن العزومة لكن بادرتنى زوجتى هو احنا هنركب مع مين و احنا رايحين نايل سيتى كما انى صديقى قد حجز ترابزيتين بالعشاء فطبعا الاعتذار قلة ذوق و جليطة و لكم ان تتصوروا مدى الورطة التى انا فيها حد فلحوص يسأل هى ايه الورطة فى عزومة فلة زى دى اجاوب عليه و اقوله اصل انت مش فاهم حاجة اصل اللى عازمنى صديقتى المطربة المغربية لانها تعمل بذلك المطعم

قلت امرى لله و اللى يحصل و ركبنا سيارة تعبانة  لاحد اصدقائى و مشينا فى زفة و وصلنا الى كوبرى 6 اكتوبر ثم الباخرة نايل سيتى طبعا وجدنا الصديقة فى انتظارنا بس من غير قبلات و وجدتها بالفعل حاجزة ترابزتين بجوار شباك الباخرة و قريبة من البست اقولكم الحق لم يعجبنى الجو العام جو مصنوع  انواع من الطعام ليس لها رائحة او نكهة تجلس على النيل و القاعة مكيفة النيل بجوارك دون ان تراه فجاة لمحت مراكب صغيرة تمشى فى النيل و عليها شباب يغنى و يرقص مع كاسيت بالمركب لمعت فى دماغى فكرة لماذا لا نؤجر مركب قلت لزملائى و تركنا نايل سيتى و اشترى احد اصدقائى كارتونة كنزى و اخرجت تورتة الزفاف من شنطة السيارة و اجرنا مركب و ركبت العروسة بجيبونتها المركب بصعوبة و احتفلنا و غنينا و لمسنا الماء اثناء احتفالنا بعيدا عن الاجواء الصناعية

بعد جولة المركب قلت فى عقل بالى لماذا لا نذهب الى الحسين فالجو صيف و الصيف يحب السهر طبعا ذهبنا و وقفت السيارة فى الباركينج بعيد و مشينا سيرا على الاقدام داخل الحسين وسط ترحيب من الموجدين بالحسين و بعضهم تصور معنا تقولش تامر شعر الصدر و مى عز الدين وصلنا الى مقهى نجيب محفوظ و بمجرد دخولنا المقهى صفق كل الموجودين و لحسن الحظ كان يوجد تخت شرقى غنا لنا اغنية لسيد درويش لكن احسست ان فى شىء ناقص ازاى اذهب للحسين و لا اتناول كوارع و ممبار من عند الدهان ميلت على صديق لى و قلت له طبعا وافقنى و لكن المشكلة كيف نذهب قلت لزوجتى احنا هنروح نصلى فى الحسين و انتو طبعا مش هينفع تصلوا ازاى بالجبونة بتاعتك و زوجات اصدقائى بالمكياج ذهبنا الى الدهان تناولنا الكوارع و الممبار التمام و رجعنا لنجد مفاجاة لقد اكتشفوا كذبنا تأخرنا قليلا فارادوا ان يستعجلونا و سألوا فاكتشفوا ان مسجد الحسين مغلق فى هذا التوقيت قبل الفجر نسيت ان اقول لكم ان جميع اصدقائى متزوجين لانى اخر من سقطت منهم كما ان جميعهم يتمتعون بحكومات قوية طبعا طوال طريق العودة فتحت لهم المحاضر س و ج  بينما انا  بجانب عروستى داخل السيارة انام فى سبات عميق بعد المجهود الكبير الذى بذلته طوال اليوم بالاضافة الى اكلة الكوارع و الممبار اللى كتمت على نفسى
بلد مجانين صحيح 

هناك 31 تعليقًا:

zizi يقول...

مش باقولك بلد خلابيص بصحيح ..لكن سبحان الله كل لعبك مكشوف اول بأول..وهذا ان دل على شيء بيدل على ان شقاوتك بريئة....وأظن الحاجات دي كل ما تفتكروها بتفطسوا على روحكم من الضحك ..ربنا يسعدكم دايماً ..تحياتي

زهرة الضحا يقول...

اللــــــــــــــــه
إيه الفرح الجميل ده

ما شاء الله عليكوا بجد, يحميكوا من العين يارب و يخليلكوا أولادكوا إنشاء الله

شمس النهار يقول...

وربنا مالكش حل ياابراهيم

:))))
دي ليلة فرح ولا عماشة في الادغال

وربنا انا لو منها كنت روحت علي بيت ابويا
اه بيت ابويا اولي بيه
:)))))
دي اكيد بتحب بتموت فيك علشان تكمل الليلة
:)))))))
ماحربتش تروح بيها الاستاد ليه بالمرة
:)))))

Unknown يقول...

السلام عليكم ،

ما شاء الله
جو الفرح جميل جداً ،
بس بعيداً عن الكوارع :) ..

ربنا يسعدك ،
دمت بخير .

Unknown يقول...

يعني العرسان كلهم بيبقوا مستعجلين و عايزين يقلبوا الفرح بسرعه و حضرتك واضح إنك مكنتش عايز اليوم يخلص هههههه
بس على فكرة الفيو في النيل سيتي من فوق جميل جداً مش زي الأماكن المغلقه...و زوجتك يا عيني ركبت مركب بالفستان و الله بطله و كل مدى بحس إنها إستحملت كتير :)...معلش يعني يا أستاذ إبراهيم:)

تحياتي ليك

الاحلام يقول...

المهم فى الاخر اخى العزيز ان تكون عشت يوم جميل وكنت سعيد فيه
وانه يكون عدى على خير وسلام
تمنياتى بدوام الصحه والسعاده دائما
تحياتى الاحــــلام

دعاء العطار يقول...

ههههههههههههههه

طب عارف يااستاذ ابراهيم انا طول عمرى اقول نفسى فرحى يبقى فى مركب

بجد بجد احلى فرح اتحكالى عنه هو فرح حضرتك

يابختكم بجد (: (:

reemaas يقول...

مش سهل انت يا استاذ ابراهيم خالص على فكرة

وبعدين ميه مره قلنا الكدب مالوش رجليييييييييييييييييييييين

يوم فرحك ده كان حلو بجد عجبتنى كل افكاره واحداثه

Bent Men ElZman Da !! يقول...

هههههههههههههههههه
ذكرياتك جميله اوى يا استاذ ابراهيم بجد ما شاء الله
حلوه اووى فكره المركب دى
ربنا يسعدك دايما :)

εïз زهرة εïз يقول...

ههههههههههه

مستمتعة جدااا بذكريات حضرتك

ياريت تكمل بقا D:

رحاب صالح يقول...

هههههههههههه
هي بلد مجانين صحيح
وحشتني كتاباتك بجد
معلش بقي
ظروف الامتحانات الملخبطة
هحاو اقرا اللي فاتني

ياسمين يقول...

لا بس كان ذكريات جميلة..بجد مش متخيلة..ان كل الأفكار دي حاجات بتطلع في دماغك تطبقها
بس سؤال فضولي دلوقتي بردو حضرتك مازلت مغامر ولا الزواج بيقضي تماما ع روح المغامرة ..ههه
بجد مواقف حضرتك كلها بتموت من الضحك

زينة زيدان يقول...

أخي ابراهيم

أشكر سؤالك

نحن الحمد لله حتى الان بخير لكن الجميع يشعر بخطر قادم.. هناك قصف لمواقع محددة واسرائيل تتوعد بالمزيد والتوسع والاجتياح..

رغم تهديداتهم نحن فرحين بالعملية العسكرية التي اوقعت باسرائيل وهزتها

لا تخشَ علينا إن الله بقوته وجبروته معنا

تحيتي للجميع

مصطفى سيف الدين يقول...

هههههههههههههه
والله ده فرح هيفضل محفور في التاريخ
يا بختك يا عم دخلت التاريخ من اوسع ابوابه
بس ازاي تاكل كوارع ومتعزمنيش
مش مهم الفرح الاهم الكوارع

ابراهيم رزق يقول...

zizi العزيزة الذيذة

زى ما قلتى برىء يا بيه

الحاجات دى الواحد مش بينساها

ربنا يسعدك

نورتينى
تحياتى و تقديرى و حبى

ابراهيم رزق يقول...

زهرة الضحا

متشكر على الدعوة و الامنيات الجميلة
سعيد بمرورك

نورتينى
خالص تحياتى

ابراهيم رزق يقول...

شمس النهار

هههههههه

كده برده اهون عليكى
ده انتى باين عليكى حما صعبة شوية

رحت معاها الاستاد بس بعد ما خلفت زياد و ساليناز

نورتينى
خالص تحياتى

ابراهيم رزق يقول...

زهرة نيسان

هههههههههههه

مالها الكوارع بس

نورتينى
خالص تحياتى

ابراهيم رزق يقول...

شرين سامى

تسمحى اقول لكى ان ده قصور نظر من العرسان الحياة و العمر ممتد لكن لا يوجد الا ليلة عمر واحدة ربنا يخليها واحدة بس
ههههههههههههه
فعلا الفيو فى نايل سيتى من فوق كويس بس المطاعم اللى موجودة تحت تخنق مش ممكن تكون على النيل و مكيفة لكن بينى و بينك المركب فى النيل تحفة

بطلة اه بطلة
ههههههههههه
تصدقى يا شرين ان دى كانت احلى حاجة فى الفرح خلصنا على تورتة كم دور و غنينا و فرحنا مع الاصدقاء فى وسط النيل
و لا يهمك انا باقول لكل الناس و كل اللى يعرفنى يقولى اللى يستحملنى يبقى بطل

نورتينى
تحياتى

ابراهيم رزق يقول...

الاحلام
اخى العزيز

فعلا عشنا يوم جميل
ربنا يفرحك باولادك
عقبال فرحهم يا رب

نورتينى
تحياتى

ابراهيم رزق يقول...

دعاء العطار

هههههههه
و الله يا دعاء احلى فرح فرحة طبيعية بعيد عن التكلف

انتى تؤمرى المركب موجودة يارب ربنا يفرح

عقبال ما نفرح فيكى قصدى بيكى

نورتينى
تحياتى

ابراهيم رزق يقول...

reemaas

فعلا الكذب مالوش رجلين بس انا نمت فى العربية الرك بقى على اللى كانوا صاحين

عقبال فرحك يا رب

نورتينى
خالص تحياتى

ابراهيم رزق يقول...

Bent Men ALZaman Da

فعلا من احلى الذكريات موضوع المركب
جربيه كده
ههههههههههه

نورتينى
خالص تحياتى

ابراهيم رزق يقول...

Semsema

انا اللى سعيد بتعليقك
عقبال فرحك يارب
هههههههه

نورتينى
خالص تحياتى

ابراهيم رزق يقول...

rehab saleh

اولا حمد الله على السلامة
ربنا يوفقك فى و ينجحك يا رب

ههههههههههه
فعلا بلد مجانين

يسعدنى ان تتابعى ما فات

نورتينى
تحياتى

ابراهيم رزق يقول...

ياسمين

فعلا الحاجات اللى بتطلع طبيعى بتبقى اجمل

اسوء شىء التكلف و الدليل مقولة الواحد لا يأخذ راحته اللى فى بيته
فيها ايه لو الواحد حاول يأخذ راحته خارج بيته بعيد عن الرسميات

السؤال اللى على جنب
المثل بيقول يموت الزمار و صباعه بيلعب
تقدى تقولى لسه صباعى بيلعب
هههههههههه

سعيد بزيارتك
خالص تحياتى

ابراهيم رزق يقول...

زينة زيدان
اختى العزيزة

لا شكر على واجب بل نحن جميعا مقصرين و لم نصل الى اداء الواجب

حمد الله على سلامتكم
ربنا يحفظ غزة و فلسطين و ينصركم
بأذن الله فرج الله قريب

نورتينى و متشكر لانك طمنتينى
تحياتى و تقديرى

ابراهيم رزق يقول...

مصطفى سيف

يا عم ان جت على الكوارع ليك عزومة كوارع عندى و من عند الدهان

نورتنى

خالص تحياتى

غير معرف يقول...

هههههههههههههههههههه

أيه ياابراهيم دنتا بهذلتها بس أكيد

هي كمان أنبسطت معاك ويمكن تعبت

شويتين عشان الفستان والحكايات دي

كلها بس عارف مستحيل تنسوا اللحظات

دي لأنها أجمل مافي حياتكم ..

الله يخليكم لبعض وتحتفلوا ب 100 سنة

زواج ..

غير معرف يقول...

مساء الغاردينيا أستاذ ابراهيم
هههههههههه
ياعيني ياعيني ايه الجمال دا لا أنت طلعت رومانسي بجد عرس على النيل وفرح في مركب وااااو بجد روعة هو صحيح ام زياد ياعيني عليها وهي متشعبطة بالفستان بس هتبقى احلى ذكرى ويارب يارب يارب يحفظكم من عيون الناس وتفضلو في احلى حب وسعادة والاهم انه صاحبتك كانت في انتظارك بدون قبلات :)
؛؛
؛

أعتذر للتأخير
لروحك عبق الغاردينيا
reemaas

افكار مبعثرة يقول...

طيب والله العظيم فرح تحفة و حاجة سبيشال كده غير تقليدية :)
بس كله كوم و اكلة الكوارع دي كوم تاااااااااني تسيب العروسة و تاكل لوحدك ده حتى اللي ياكل لوحده يزور :)))
ربنا يجعل حياتكو كلها فرح و سعادة :)