المعازيم جم

يعنى ايه تتعزم فى فرح عادى قوى يعنى تيجى من الشغل  اى قميص بحلقى و اى قميص محمحى و لو فى الشتاء بلوفر زى بلوفر شفيق او شيرز و لو كان يوم جمعة والواحد لابس الجلابية السكروتة المقلمة بالطول و الطاقية زى جلابية عبد المنعم ابراهيم فى بين القصرين نروح الفرح و خلاص و مبروك يا عريس مبروك يا عروسة و خلص الموضوع

نيجى بقى للستات ماذا يحدث عندما تتعزم فى فرح طبعا يتوقف الموقف طبقا لعدة عوامل

1. مقدارالقرابة و هل هى من الدرجة الاولى او الثانية او هى صداقة
2. نوعية المكان المقام به الفرح و نوعية المعازيم
3. الحالة المادية وهل اول الشهر او اخر الشهر

طبعا لو القرابة من الدرجة الثانية و الفرح غيرمهم يتم فحص ما بالدولاب من ملابس و مراجعته مراجعة تفصيلية و يتم وضع جدول للملابس و استبعاد ماتم لبسه فى افراح سابقة ثم يتم معاودة المقياس و هل زاد الجسم او خس و مدى ملائمته للحجم الحالى ثم يبدء مرحلة شراء الاكسسوار المناسب للفرح من طرح وايشاربات اذا كانت محجبة و احذية و شنط و خلافه 

ناتى الى الفرح اذا كان من الدرجة الاولى يبقى هتشترى جديد يا حلو و تنزل بدل المرة عشرة ثم تبدء مرحلة الاكسسوار و الحيرة و التغيير حتى لحظة الصفر اى موعد الفرح

تدخل الفرح من دول و انت لابس الجلابية السكروتة او القميص و البنطلون و الشبشب تلاقى حواليك الستات بيلعلطوا ويبرقوا ترتر و خرز و ابيض واحمر و برتقالى و كل واحدة باصه للبس التانية و تبص للبس بتاعها طبعا كل واحدة تشكر للتانية فى ذوقها لكن زى ما انتوا عارفين اللى فى القلب فى القلب و احنا الرجالة الغلابة قاعدين ملحوسين بجلبيتنا بشبشنا

مرة واحد صاحبى من نوعية بحبك و عاوز اتجوزك هاحكى لكم عنه فى بوست تالى كنت معزوم انا و هو فى فرح عجبته بنت شاور لى و قالى يا ابراهيم عايز اتجوز دى طب اهدى دلوقتى مش ممكن على صرخة واحدة عايز اتجوزها يعنى عايز اتجوزها شوف جمالها شوف شياكتها  المهم عملنا اللى ربنا قدرنا عليه وخدنا معاد عشان نشوف هيتجوزها ازاى و طبعا خدنا معاد لصاحبتها معاها 

فى المعاد المحدد جلسنا انا وصاحبى فى الانتظار فجاة وجدنا بنتين بيقولوا مساء الخير قلنا لهم مساء النور فى حاجة سيادتك انا فلانة و فلانة . مش ممكن انتم متاكدين ان انتم اللى كنتم فى الفرح مش بتضحكوا علينا و بعتم اخواتكم الصبيان  اتضح ان فلانة و فلانة اللى احنا شفناهم فى الفرح انا فيا انوثة عنهم و دى كانت نهاية اللى يفكر يتجوز بنت شافاها فى فرح

                                                    بلد مجانين صحيح