الثلاثاء، 2 أغسطس 2011

انا مريض

لا تتجبر الانسان و لا تحيره
يكفيه ما فيه من عقل بيحيره
اللى انهارده بيطلبه و يشتهيه
هو اللى بكره هيشتهى يغيره
عجبى ؟؟؟


انا مريض و عيان مريض مرض مزمن و عارف عندى ايه  حاولت اتعالج كتير لكن واضح ان الفيروس تمكن منى اصبح موجود فى دمى و ممكن يعدى اللى حواليا ساعات الناس بتضايق منى و ساعات مش بيضايقوا لكن انا معنديش ذنب لانى مريض و ليس على المريض حرج
الفيروس اللى عندى هو التلقائية و البساطة الفيروس ده موجود فى دمى و بيلقط اى حد يكون عنده ربنا خلقنى بالفيروس ده ممكن الفيروس ده يروح غلط لحد و يضايقه لان بعض الناس يضايقها التلقائية و البساطة و اللى يجى على لسانى اقوله  دون ان اجرح

عشان الناس اللى بتضايق فكرت انى اتعالج لكن بعد شوية لقيت لو اتعالجت مش هابقى نفسى و انا مبحبش ابقى الا نفسى هيبقى عندى ازدواجية فى الشخصية  و طالما انا بتلقائيتى و بساطتى و ضميرى احرص كل الحرص انى مجرحش حد و لا ابوح بسر احد حتى لو لم يطلب منى ان هذا سر و اغفر لو حد جرحنى ممكن اضايق او ازعل لكنى قبل ماضايق او ازعل يسبقتى التسامح و مع ذلك اعتذر لاى احد قد اكون تجاوزت معه او ضايقته دون ان اقصد لكنى قررت الا اتعالج لانى انا اما من يستحقون و يحتاجون للعلاج من تتعدد وجوههم و ملامحهم لا تعرف لهم وجه هل هو متدين ام فاسد هل هو عاشق ام خادع هل هو رحيم ام بغيض هل هو كريم ام بخيل و قبل كل ذلك هل هو صادق ام كاذب قد تستطيع ان تخدع الناس بعض الوقت لكن لا تستطيع ان تخدع الناس كل الوقت و عندما يكتشف الناس الخداع تسقط اوراق التوت و تظهر كل العورات و لا تستطيع سترها 
لذا قررت الا اتعالج ما رايكم دام فضلكم اتعالج انا و لا يتعالجوا هما و اوعدكم انزل لراى الاغلبية  هل اكون انا ام اكون غيرى مع اعترافى انى مريض

هناك 36 تعليقًا:

غير معرف يقول...

بالعكس ياهيمة كن كما انت فما اجمل التلقائية دي نعمة ربانية ودليل علي العفوية ونقاء السريرة والبساطة ومع اني بختلف معاك في حاجات جوهرية بس متاكد من انك انسان كويس ومتاكد اكتر اننا هنكون اصدقاء عما قريب

Bent Men ElZman Da !! يقول...

لا على فكره مش مرض
ده اجمل حاجه التلقائيه
وان الواحد يقول اللى جواه على طول كده من غير زواق ولا حركات
المشكله دلوقتى ان ناس كتير مابقتش تحب التلقائيه ولا الصراحه
بتحب الكلام المتزوق
يعنى العيب مش فى التلقائيه ولا انها مرض
العيب فى الناس اللى مش قادره تتقبلها

وبعدين ماينفعش اصلا الواحد يكون الا نفسه :)

حفيدة عرابى يقول...

صباح الفل
ممكن أدعى انى بالصدفة تابعت جزء من كلام ممكن يكون السبب فى البوست ده

متفقة معاك جدا انك تكون نفسك
لكن مادام مش هتعرف تكون الا نفسك حاول ..حاول يعنى تقلل من زعل نفسك لما تاخد كل صدمة والتانية من المعاملات مع الناس

فيه حاجة تانية أهم
جوايا شعور قوى ان الموقف اللى حصل مكانش مقصود بيه أى حاجة تضايق حضرتك
لكن يمكن ظروف ..ضغوط .حاجات اكبر من الطاقة النفسية ساعات بتخلى الواحد يقول كلام مش عايز يقوله أو مش يقصد بالظبط المعنى اللى وصل من كلامه

أنا واثقة ان فيه فى النص سوء تفاهم وان الصورة مش قاتمة زى ماحضرتك متخيلها

كتير هنا فى البلوجر أنا شخصيا حبيتهم جدا فى الله ..فيه منهم اللى شفتهم ومنهم لأ
فالكل بما فيهم أطراف المشكلة عندهم القدرة على التمييز بين اللى بيتكلم بنية صافية وبين اللى نيته مش مظبوطة

فلو حد من الغاليين علينا زعلنا فى يوم هنفتكر له الحاجات الحلوة التانية وهنفتكر اننا لازم نلتمس له سبعين عذر

ولا احنا صحاب بس لما نكون كويسين ومزاجنا رايق ولما مزاجنا يبوظ صحابنا مش هيستحملونا ؟ :)
تحياتى لحضرتك

zizi يقول...

اناطبعاً مش عايزة عزومة ..وبعدين انا ردي كاتباهولك بالخط الحياني "اللي انا عايزة الطم بيه "في مدونتي روح طل ونهارك زي الفل وبعدين كده عشان كنت مشغولة بشوية تواريخ في مدونة ما حانبقى نتباحث فيها ..وبعدين متهيألي المدونات لكل الناس واللي على دقنه دبانة يهشها والا ايه؟؟؟

zizi يقول...

ماتوافق بقى يا ابراهيم عايزة انزل كيس الزبالة ومستنية لما المدونة تفتح ..وقديما قالوا في نشيد الحرية انا حرٌ يابلادي انا حر ههههههههههههههههه

وقالوا في الأمثال :اللي يقولها جوزها ياعورة تلعب بيها الناس الكورة ....واللي يقولها جوزها اضربك بالجزمة تبقى العيشة معاه مالهاش لازمة ..وقالك اللي مايسمعش كلام ابوه وامه ياما الدنيا حاتفرده وتلمه..ومعلش يا ابراهيم انا اصلي عندي حبة ضيقة والدكتور قاللي علقي في مدونة صديقة هههههههههههههههه

وكفاية كدة عليكوا واقعدوا بالعافية ...لألألأ انتوا طبعاً تقعدوا براحتكم ماقصدش العافية دي لا العافية التانية ايوه هي دي اللي تقعدوا بيها ..تحياتي

faroukfahmy يقول...

فين الظرف فين ماعودتناش على كده لأ ومقام السيدة والحسين
مع انى انا ياابراهيم بعتبر نفسى اقرب اصدقاءك الى قلبك يثبت ذلك ثبات اتصالناشبه اليومى ونداءك لى يان يجمعنا المكان الذى نرتاح فيه
الا اننى بصراحة فوجئت بصراخ مدونتك الذى اقلقنى وهز من راحتى وسكون نفسى وقرأت امورا استعصى على فهمها
وباعتبارى انا حبيت نفسك كما وجدتها وارتحت لها وانست بها ..فكن لنفسك التلقائيه بها ولها ولا تغييرها ارجوك فتغييرها سيفقد هويتها الاصلية وتزييف معالمها اللؤلئية المرمرية وساعتها سنفقد الطريق للوصول اليك
روق ياابريهيم ورجعلنا الابتسامة بسرعة من تانى

منيرة سوار يقول...

لا تتعالج اخي ابراهيم.. ابقى مريضاً!
فهذا اجمل مرض ممكن ان يصاب به انسان
تقبل مروري اخي الفاضل..

reemaas يقول...

لى لما نكون احنا صح والاغلبيه غلط يبقى احنا اللى نتغير

طب ماهم اللى يتغيروا ويبطلوا يزعلوا من كلمة الحق

يسمعوا الكلام ويعرفوا معناه قبل ما يزعلوا منه

انت صح طبعا واوعى تخف خليك كده

بس ماتزودهاش اوى بردوا خليك عفوى بس من غير لق طوب

Mona Hekal يقول...

صباحك يا رب زي الفل
اكيد حضرتك ملاحظ اني مش غاوية تعليقات
بس لازم بقي المرة دي اعلق لان ربنا يعلم معزة حضرتك في عالم التدوين كله و ده مش كلامي لوحدي ومش هارغي كتير هاقولك بس خليك زي ما انت بتلقائيتك اللي كلنا بنحبها و اللي بتخلق جو من الحميمية بين المدونين و بعضهم بيبان اوي في ردودهم عليك و ردك عليهم

و كفاية بقي كده علشان نازلة رايحة شبرا اشوف رمضان اللي علي حق :)

مصطفى سيف الدين يقول...

مفيش احلى من البساطة والتلقائية حتى لو جبتلك مشاكل بس على الاقل اللي في قلبك على لسانك
ونصيحة متكونش غير نفسك لانك لو حاولت تبقى حد تاني اكيد مش هتعرف
تحياتي

Heba Salem Youssef يقول...

السلام عليكم ورحمة الله وبركاته

زيارتى الاولى للمدونة
لان لفت نظرى العنوان جدا فى احدى المدونات التى اتابعها ..

هذا ليس مرض ولا شئ
بل التصنع هو المرض وان كان الغالب

التلقائية نوعان :

تلقائية محمودة وهى ان فطرة الشخص ودودة
كلماته تخرج دون ترتيب
تجدها شفافة ونقية
روحه طيبه
كلامه لا يحمل اذى لأحد
هذا النوع وان قل
ولكنه اكثر من نعاملهم شفافيه
حتى وان طلبنا رأيهم
انتقدونا نقدا منطقيا مع القليل من المدح الشأن الذى يجلب التفاؤل وعدم تحطيم الأمال
انهم مقومونا

هناك تلقائية غير محمودة :
وهى التى نسمها بالعامية كلامه دبش
هو لا يعقل كل ما يقول
متهور لدرجة انه قد يصدر منه كلمة تؤذى مشاعر من امامه
يفكر فى الانا دون الاخرين
هذا خير له ان يقوم نفسه
يحسن من سلوكه
حتى اذا نقد احدهم
نقده نقدا لازعا لا هوادة فيه وقد يؤدى لتحطيم الأمال
هناك كثيرون كذلك
هم انفسهم يشعرون انهم كذلك
لا يلقون ذلك تحت مسمى التلقائية
قبل ان يتفوه الشخص بكلمة
اقل شئ ان ينظر ردة فعلها على الاخرين
هل ستفرحهم
هل ستؤذى شعورهم
هذا ليس صدقا فى المعاملة
بل انها لخير طريقة لابعاد الناس عن ذلك النوع
البشر بطبيعتهم يميلون لمن يشجعهم
لا من يفت من عزائمهم بالكلام الغير مجدى

الحق حق
ولكن الطريقة التى يعرض بها لها دور مؤثر ومحورى فى استجابة الاخر

وعلى المرء الاصلاح من سلوكه وتقويمه اولا بأول

والآن حضرتك فكر جيدا
اي النوعين حضرتك

اجابة السؤال على محملين
وليس علينا التعميم

لنجدد جميعا النيه فى رمضان باحسان التصرف وتقويم النفس

نسأل الله ان يعفو عن الجميع

رمضانكم مبارك ان شاء الله
وكل عام انتم بخير ..

هبة

دعاء العطار يقول...

ع فكره مش انت اللى مريض

المرضى بجد الناس اللى 100 وش زى ماقلت

اووووووووووعى تبقى حد تانى غيرك لانك مش هتعرف تكون غيرك وهتوه من نفسك

دمت بكل خير (:

zizi يقول...

كان فيه زمان مونولوج بيقول :
ماتستجبش ماتستغربش ..فيه ناس بتسأل ولا تتقلش وناس بتتقل ولا تسألش..ووش يكش ووش يبش ووش بستة وتلاتين وش..
مش عارفة ليه اختار ستة وتلاتين بس يمكن عشان الوزن ؟؟ولو منه حا قول ووش بمية وتمانين وش..ولاتزعل يابو زياد وروح حل الفزورة عشان تكون الألفةوكل اللي على مدونة ابراهيم دلوقتي يروح عندي يحل الفزورة وكل سنة وانتم طيبين ..

ذو النون المصري يقول...

كن نفسك و لا تحاول ان تكون غيرها
لن تكسب اي شيء اذا خسرت نفسك

ابراهيم رزق يقول...

غير معرف

متشكر على تعليقك و انشاء الله نبقى اصدقاء

تحياتى

ابراهيم رزق يقول...

Bent Men ALZamn Da

الله يخليكى
فعلا لا ينفع الا ان تكون نفسك

نورتينى
تحياتى

ابراهيم رزق يقول...

حفيدة عرابى

انا عارف انك عارفة الموضوع
احب اقولك انى مش زعلان انا فعلا زعلت لحظتها لكن بعد شوية مشى الزعل

طبعا لازم الواحد يستحمل

اتفق معكى انه يوجد سوء تفاهم فى الموضوع

تحياتى

Tears يقول...

و تتعالج ليه...عيش كما انت و استمتع و الاخرين لما يعرفوك كويس ح يتكيفوا معاك و بالعكس فيه ناس بترتاح مع الدوغرى اكتر من اى حد

ابراهيم رزق يقول...

zizi العزيزة الذيذة

لان اعلق على تعليقك لانه لا يحتاج تعليق و كل لبيب بالاشارة يفهم

نورتينى و شرفتينى

لكى منى كل تقدير و احترام يا اجمل و احن ام يا مربية الاجيال

ابراهيم رزق يقول...

فاروق فهمى
استاذى العزيز


فاصل و ساعود بأذن الله
ههههههههه

ساحافظ على ان اكون نفسى بحبكم و تقديركم و معزتكم لى

نورتنى و شرفتنى
تحياتى و تقديرى

ابراهيم رزق يقول...

منيرة سوار

ههههههههه

حاضر لن اتعالج

سعيد بتعليقك

نورتينى
تحياتى

ابراهيم رزق يقول...

reemaas

حاضر هافضل مريض عشان خاطرك

هههههههههه
كده برده تفتكرى انا هلق طوب

نورتينى
تحياتى

carmen يقول...

بالعكس هو ده الصح مش محتاج تتعالج ولا حاجة :)

تحياتى لك

ابراهيم رزق يقول...

منى ابو السعود

تعليقك شرفنى و اسعدنى و ياريت تقللى من نعليقاتك عند الناس بس عندى انا لا يا ريت تشرفينى كمان و كمانت

يعلم الله مدى المعزة التى اكنها لكى و للجميع و مدى تقديرى

سلام طاير حاير جاى من المطرية لشبرا
احلى سلام و تحية لشبرا و ناس شبرا

نورتينى
تحياتى

ابراهيم رزق يقول...

مصطفى سيف

متشكر على تعليقك و فعلا مش هاكون اللى نفسى

نورتنى
خالص تحياتى

ابراهيم رزق يقول...

Doctora Heba

يعلم الله انى احرص كل الحرص على عدم جرح احد و قد ذكرت ذلك فى البوست لانى و الحمد لله اعرف حددوى و ارفض التد خل فيما لا يعنينى

سعيد بزيارتك الاولى و ارجو دوام التواصل

نورتينى
خالص تحياتى

ابراهيم رزق يقول...

دعاء العطار

اصبتى فعلا فيما اريد
المرضى فعلا اللى ب 100 وش

نورتينى
تحياتى

ابراهيم رزق يقول...

ذو النون المصرى

اولا شكرا على زيارتك للمرة الاولى و على نصحيتك
فعلا لن اكون اللى نفسى

نورتنى
تحياتى

ابراهيم رزق يقول...

Tears العزيزة

فعلا انا قررت الا اتعالج
ههههههه

نورتينى
تحياتى

ابراهيم رزق يقول...

كارمن الرقيقة

فعلا لا يصح الا الصحيح

نورتينى
خالص تحياتى

ابراهيم رزق يقول...

الاخ الغير معرف

لم انشر تعليقك لعدة اسباب
التعليقات السابقة كلها بالاجماع ترد على ما ذكرته و اصبحت انت الشاذ الوحيد و انت من تحتاج الى علاج

عودت نفسى طوال حياتى الا اتحاور مع ثلاث من يتعصبون و من يدعون المعرفة و من يتلونون

واضح ان سيادتك من الثلاثة
تفترض انك تعرفنى و انك عالم ببواطن الامور و لو كنت تعرفنى او عالم ببواطن الامور لظهرت بشخصيتك الحقيقية التى اكاد اعرفها و حاورتنى فكر بفكر و نترك الحكم للناس من منا على حق فى فكره و من على باطل و اتحداك ان تتظهر لانك لو مقتنع بفكرك لظهرت

واضح العصبية فى ردك و العصبية لا تظهر الا فى حالات الضعف و التعصب فى الراى دليل على قصور فى الشخصية

اما التلون فردى عليه قد يأتى فى حينه

الحمد لله اعرف حجمى اما العيب فى من لا يعرف حجمه و طوال حياتى و الحمد لله لم اتدخل فى حياة اى فرد الخاصة

تحياتى
كل سنة و انت طيب
اتمنى ان تظهر و ساعت

zizi يقول...

ايه يا ابراهيم فيه حاجة والا ايه والا حد سخيف وفيه من الجبن الذي يجعله يخفي شخصيته انا شفت من الأنواع دي كتير ودول اللي ممكن نطلق عليهم اللهو الخفي ودول على رأي المثل اللي بيقول عتاب ال.....اجتنابه ..سيبك وكبر يابو زياد ..تحياتي

Ramy يقول...

أزيك يا استاذ ابراهيم

مش عارف اقول لحضرتك ايه صدقنى

بس بأمانة

انا لما شوفت حضرتك اول مرة دى كانت الملاحظة الأولى ليا تلائيتك

مش عارف هتصدقنى و لا لأ

يمكن انا كنت هقولك على ده كذا مرة بس كنت بأحرج اتكلم

لا طبعاً متتعلجش لان تلقائيتك لا تجرح ده اللى لاحظته فيك المرات القليلة اللى شفت فيها حضرتك

لدرجة انى كنت هقولك ان انت مش من الأقصر ههههههه

رمضااان كريم

faroukfahmy يقول...

اعود اليك يا ابراهيم مرة اخرى وانا فى اشد الانفعال
بصراحة يا ابراهيم انا حزين ممن بتطاولون على بساطتك وتواضعك وتلقائيتك معتقدين بغفل وحهل ان فى الساطة ضعفا ووهنا
من يقرأ لك ياابراهيم لا ينساك
من يراك ياابراهيم بالعين لايسلاك
من احتك بشخصك لايفكر فى ســــواك
وجدت فيك ياابراهيم خصال افتقدناها من زمن بعيد
الحــب الصافــــى
الاخلاص الشــــافى
الود الواصــــل
الولاء الآصـــــل
السؤال الدائـم
الحس الراهــــــف
الرشاقة الواسمــة
والوسامة الراشقة
انا ياابراهيم فخور بصداقتك ومحبنك وودك
انا لاأقبل ان يُمسّك حبيبى ممن يجهل شخصك ولا يهمنا او يشرفنا معرفته
الفاروق

ابراهيم رزق يقول...

الفاروق
استاذى العزيز
ملك الزهرات
و ابن بطزطة المدونين
وافصحهم
صاحب الطيبة
ابن البلد الطيب
الذى طاف العالم
و لم ينسى باب الشعرية
و لم ينس عربة الفول و السيدة التى تصنع الطعمية
ماذا اقول لك سيدى
كل حرف كتبته عنى وسام اضعه على عنقى
انت اكبر من تقول على حرفا
فالحروف منك تساوى الذهب
انت كالبحر به الكنوز كامنة
فنحن نسألك عن اللالىء
فهل تبخل به علينا
الغير معرف لا تلقى له بالا
يكفى انه غير معرف

تحياتى يا استاذى و اشكرك بشدة

شمس النهار يقول...

فين تعليقي هنا راح فين هو انا بعلق في محطة مصر
:)))))

طبعا انا مش هفتكر التعليق علشان كان كبير جدا لأنك دست علي الدمل اللي عندي

((عندى هو التلقائية و البساطة الفيروس ده موجود فى دمى و بيلقط اى حد يكون عنده ربنا خلقنى بالفيروس ده ممكن الفيروس ده يروح غلط لحد و يضايقه لان بعض الناس يضايقها التلقائية و البساطة و اللى يجى على لسانى اقوله دون ان اجرح))

ده كمان بيعمل مشاكل لاحصر لها بس ولا يهمني هي دي الفطرة

خاليك عيان ياابراهيم
خاليك عيان