السبت، 16 مارس 2013

غيرنى حكمك غيرنى


امس حلمت حلم جميل انى اسير فى طريق اخضر فى اخضر به اشجار جميلة يقف فوق غصونها طائر النهضة ينتهى الطريق ببنزينة ابيض فى ابيض بها كيروسين و غير مزدحمة مشيت فى الشارع وانا يغمرنى التفاؤل و البهجة و الانشراح بعد ان شاهدت طائر النهضة   اتسوق و اشترى وجدت بائعة الفجل و الجرجير جالسة اعطيتها خمسون قرشا اعطينى فجل و جرجير نظرت لى نظرة كانى كائن من القرون الوسطى حزمة الفجل او الجرجير بخمسون قرشا نظرت الى الحزمة وجدتها عبارة عن عودين من الفجل او الجرجير بعد ان تنظف لن تسفر عن شىء تركتها و ذهبت الى بائع الخضار فركت عينى و انا اشاهد الاسعار ما هذا البتنجان ب 8 جنية يعنى طبق باب غنوج بالطحينة يكلف الشخص 15 جنيه يعنى طبق بتنجان مخلل يكلف عشرة جنيه بلاها بابا غنوج و بلاها بتنجان مخلل خلينا فى البسلة الخضراء ايه ده عشرون جنيها لا خلينا فى البامية كذلك عشرون جنيها لا نأكل فاصوليا خضراء فعلا الفاصوليا دائما رخيصة الكيلو ب 15 جنيه و الواحد يعمل الفاصوليا بانيه و لا يشويها و لا يعملها شوربة تركت بائع الخضار و نظرت الى سيدة فلاحة تضع امامها قليل من الملوخية فعلا خلينا فى الملوخية خدى يا ست خمسة جنيه هاتى كيلو ملوخية و هاتى الباقى نظرت لى نظرة من فوق لتحت وقالت الكيلو ب 10 جنيه
ذهبت الى بائع الفراخ اوزن لى هذه الفرخة وزنها وقال لى خمسون جنيها لا اريد فراخ اعطنى كيلو بانيه ب 42 جنيه يا بيه ماذا حدث للفراخ واضح ان طائر النهضة قد خلص على علف الفراخ فارتفع سعره صحيت من النوم قبل ان اذهب للجزار و افاجىء بعجول النهضة اكلت كل علف المواشى
سيدى الرئيس اعترف انك ساويت بين المسلمين و المسيحيين اصبح المسلمين صامئين اجباريا مثل المسيحيين اصبحوا لا يتناولوا الا العدس و الفول حتى البطاطس المحمرة و الباذنجان اصبحوا محرومين منها     
سيادة الرئيس اعترف ان حكمك غير فى كثيرا اصبحت شخصية جديدة اصبحت اتصرف تصرفات غريبة امس بعد خطابك فوجئت بنفسى  اغنى اغنية لتامر حسنى على اخر الزمن انا اقف و ادندن اغنية تمورة شعر الصدر كل مرة اشوفك فيها ببقى نفسى اااااه اااااه و منذ عدة ايام ظبطتنى زوجتى و انا اتسلل ليلا و الجميع نيام افتح التلفزيون خلسة واشاهد برنامج اباحى لخالد عبد الله على قناة الناس نعم احتاج للعلاج و الحالة تدهورت بعد ان اصبحت استمع من زوجتى تفاصيل المسلسل التركى فاطمة دون ان ابدى اى ملل بل اصبحت اتابع الجزء الثانى من مسلسل فيفى عبده كيد النسا بكل تشوق اصبحت اقتنع بما يقوله توفيق عكاشة و صارت الهلوسة تطاردنى و اتخيل ان الزمالك فاز بالدورى  ولم افق الا على طبق العدس الساخن الذى اعدته زوجتى لاجد نفسى دون ان ادرى اتصفح كتابا لبلال فضل

بلد مجانين صحيح

هناك 11 تعليقًا:

الازهرى يقول...

وصحيت ؟؟؟؟؟

لو انا منك كنت كملت فى الحلم
دا جنة بالنسبة للى ممكن يحصل لو استمرينا على نفس الوتيرة

ليلى الصباحى.. lolocat يقول...

صباح الامل والتفاؤل استاذ ابراهيم :)

تقريبا اصبحنا كلنا بنحلم واحنا صاحيين اما احلام الليل فلم نعد نراها لان الهموم لم تترك لنا مساحة للنوم والراحة

فعلا شر البلية مايضحك
اسلوبك الساخر فى وصف الحالة التى وصلنا اليها يجعنا تعيد حساباتنا الف مرة

ضاقت ولما استحكمت حلقاتها فرجت
نسأل الله تعالى ان يصلح الاحوال

ومفيش كلام يكفى لوصف المشاعر اللى عايشينها المصريين كلهم

تحياتى لك بحجم السماء

;كارولين فاروق يقول...

غيرني حكمك غيرني هههههههه
تنفع مطلع اغنيه هههه
انا كمان بقيت اصدق عكاشه ايه المشكله
كله في الكليتش كوليشن كان
ولا اي اندهاش انت في مصريا باشا
نجيب كاكولا ولا جولاااااااااتي
بلد مجانين صحيح
علشان كده لازم ماتفهمش حاجه
مع تحياتي كانت معكم اذاعه ال اف اتش

آخر أيام الخريف يقول...

لووووووووووووووووووووووووووووووووووووووووول مش بقولك أنا : آجى من هنا .. نهضضضضضضضضضة أروح هنااااااااااااا ... نهضةةةةةةةةةة .. هنا أو هنا ... نهضةةةةةةةة

faroukfahmy58 يقول...

انا بس زعلان منك يا ابراهيم فانا متعود ان ارافقك فى معظم مشواويرك اشمعنى بقى مشاويرر احلامك
وايه فايدة اللى بتقوله بعد ما صحيت من نومك وضاع عليك وعليتا الحلم
كل حلم وانت طيب يا راجل يا طيب

شمس النهار يقول...

انت متأكد ان ده حلم مش كابوس
:))))

Ramy يقول...

شوفت بقى ادى المساواة و لا بلالااااااش (:

ههههههههههههه

افكار مبعثرة يقول...

ونزود على اغنية تمورة اغنية هي الحالة ايه...اشتغلت
ربنا يستر هي الحالة اشتغلت فعلا ومش عارفين هتخلص امتى ربننا يستر عليك و علينا
تحياتي

ريهام المرشدي يقول...

السلام عليكم
عجبتني حكاية المساواة و لكن الهدف أعتقد أننا نصبح نباتيين ، أفيد برضو ، و على فكرة كيلو البانية بقى بـ 50 جنية و طبعا الرد الطبيعي "بلاها فراخ خالص ، و اللحمة طبعا بلاها من زماااان، دي حتى مضرة بالصحة و بتجيب و العياذ بالله نقرص "
لنا اللـــــــــــــــه.

zizi يقول...

ابراهيم ..أولاً آسفة على التأخير..لكن يعلم الله كم المشاغل التي كنت فيها ثم كملت بسرقة الشنطة وما تبعها من مشاوير لعمل محضر في قسم الدقي ثم لعمل بطاقة جديدة ثم لعمل بدل فاقد لوصولات حجز المصيف وهكذا مع كمية من الإكتئاب مع شوية خوف بالإضافة إلى كل اللي بتقوله واللي انا شخصياً لمساه تماماً دلوقتي والمضطر يركب الصعب وانا راكباه خالص لكن لسه باحاول ما اولولش لآخر المشوار ..وبمناسبة طائر النهضة خد عندك :وياما قلتلك انا ..واحنا في عز الهنا ..قلتلك يارئيسنا ..قلتلك يا قائدنا ..لاانا اد النهضة ديا وطيور النهضة ديا ..خايف ل في يوم وليلة تبيض عليا ياحبيبي ..تبيض عليا ..مع خالص تحياتي وشكري ..
وعلى فكرة من هذا المنبر اوجه كلامي لكل الإخوة والأخواتاللي كانوا مدييني ارقام موبايلاتهم ياريت تبعتوهالي تاني على مدونتي في رسايل مش للنشر عشان زي ما انتوا عارفين الموبايل اتسرق وياريت حتى اللي ماكانش عندي نمرته قبل كده ويحب يبعتهالي يبعتها ولكم جميعاً خالص الشكر والتحية ..

ابراهيم رزق يقول...

اخوتى الاعزاء

ساعود لاحقا للرد عليكم تفصليا

تحياتى