الأربعاء، 13 مارس، 2013

سبع ايام مرسى البواب


تنهيدة كبيرة و عميقة خرجت من داخلى تنهيدة حنين الى الزمن الجميل زمن العزوبية بعيدا عن رق و استعباد الزواج زمن الهواء النقى و السعادة و لمن لا يعرف طقوس المصيف للشباب ان فكرة التصييف تأتى فى لحظة خاطفة بعبارة عفوية تيجى نروح اسكندرية اذا لقت العبارة القبول يذهب كل فرد الى منزله يحضر شنطته و هى عبارة عن شنطة هندباج بها كم شورت على تيشرت مع بنطلون جينز احيانا و شبشب بصباع او ريكو و كوتشى فقط بدون اى لاوازم اخرى ثم نذهب الى محطة القطار او موقف الميكروباص
فى احد اعياد الاضحى خطر ببالنا ان نسافر الاسكندرية اخذنا نفسنا و سافرنا حوالى سبعة من الشباب ذهبنا الى عروس البحر المتوسط و كالعادة عند الوصول نبحث عن سمسار ليجد لنا احدى الشقق المفروشة و لكنه موسم عيد الاضحى و لا توجد شقق فارغة فجميع الشقق تم تأجيرها تعبنا من المشى مع السماسرة فقلنا نسأل السماسرة المقنعين و هم البوابين وقع فى نصيبنا عم مرسى البواب فعلا هذا اسمه بكل نية سليمة عم مرسى كان رجل فى الخمسينات اخذ على عاتقه البحث لنا عن شقة و عندما اعياه التعب و حل الليل قررنا الرجوع للقاهرة نجر اذيال الخيبة وعرض عم مرسى البواب ان نتناول الشاى فى حجرته قبل ان نسافر وافقنا و دخلنا شقته او حجرته وجدنا شقة نظيفة فى الصالة كنبتين استنابولى نظاف و حجرة بها سريرين و حمام بلدى معتبر و مطبخ صغير جدا سالته المدام فين يا عم مرسى قال فى البلد بتعيد اما انا فموجود هنا عشان موسم وكل سنة وانت طيب حينها خطرت لى فكرة لماذا لا نقيم فى حجرة البواب فنحن تقريبا لا نحتاج الغرفة غير فى النوم ساعات قليلة والاستحمام و تغيير الملابس عرضت الفكرة على زملائى قالوا سيرفض قلت نعرضها و نرى و كانت المفاجاة وافق عم مرسى ولكن بشروط اولها مبلغ محترم مثل اى شقة ثانيها ان نحل محله فى حالة وجودنا بالحجرة طبعا وافقنا و قلنا فى عقل بالنا ايه المشكلة كل الموضوع دكة و نجلس عليها ايه المشكلة
و فى العمارة الراقية بشارع اسكندر ابراهيم بميامى بدات الرحلة عم مرسى يقوم بعمله نهارا و عندما نحضر يتركنا والان اسألكم هل فكرتم ان تكونوا عم مرسى البواب لمدة اسبوع طبعا لم يخطر ببالكم اول الزبائن سيدة تنادى يا عم مرسى يا عم مرسى يخرج لها احد زملائى ليجيبها عم مرسى فى مشوار اى خدمة ممكن تغير لى الانبوبة حاضر يا افندم و يذهب لها ليغير الانبوبة طبعا طلع لها بالشورت لانه لم يحضر بناطيل ليتلقى وابل من اللوم كيف يصعد لها بالشورت وماذا يحدث اذا حضر زوجها الان ينزل صديقى مسرعا محملا باللوم و اللعنات لنبحث عن اخر يرتدى بنطلون يصعد لها ثم تبدء رحلة البحث عن مفتاح ثم جلدة للانبوبة
سيدة اخرى نادت يا عم مرسى يا عم مرسى كان الدور على لكى اقوم بدور عم مرسى بحثت عن صديقى الذى يرتدى البنطلون خلعه و ارتديدته و صعدت لها فقالت لى انا عايزة ربع كيلو جبنة تركى مش عارف ليه بيقولوا عليها تركى ميقولوا رومى و خلاص و زيت و صابون و عيش فينو حاضريا هانم و نزلت زى الباشا و بعد ان احضرت القائمة فوجئت بها تقول لى ان كوكى ابنتها تريد توست و مربى فاضطريت ان انزل مرة اخرى و احضر التوست و المربى لست كوكى هانم
ليلا تنام على انغام اصوات المواتير فكل شخص قام ليلا ليشرب او يدخل الحمام تسمع فاصلا من العزف للسيموفنية السابعة للمواتير بالذات لو فى شخص فى العمارة عنده اسهال فالسيموفنية لا تنقطع ابدا اما قمة الماساة ليلا عندما تكون تغظ فى نوم عميق لتسمع النداء الشهير عم مرسى عم مرسى افتح الباب طب البيه او الهانم مخدش مفتاح باب العمارة معاه ليه هو تقيل او بيكهرب و لكنه متكل على عم مرسى و فى نهاية الرحلة جاء عم مرسى ليودعنا و يطلب مننا حصته فى البقشيش من سكان العمارة فاجبناه اننا لم نوافق ان نأخذ بقشيشا فقال لنا بصوت جهورى انا مالى ده موسم وضيعتوه عليا حد قالكوا متخدوش بقشيش انا مليش دعوة ده قوتى و قوت عيالى يا واخد قوتى يا ناوى على موتى كلامك صحيح يا عم مرسى وايه رايك انت يا عم مرسى
                                        بلد مجانين صحيح 
 اشكركم جميعا
اشكر كل من علق
او اتصل بى تليفونيا
ربنا ميحرمنيش منكم جميعا

وارجع وأقول لسه الطيور بتفنّ
والنحلايات بتطنّ
والطفل ضحكه يرنّ
مع إن مش كل البشر فرحانين

هناك 26 تعليقًا:

نسرين شرباتي "أم سما" يقول...

هههههههه
بتحن لأيام العزوبية ههههههههه
.....
حلو هالبوست كتير وضحكني كتير
وعم مرسي مع إني أشك إنه مش أسمه الحقيقي
مبسوطة بعودتك للتدوين

re7ab.sale7 يقول...

جميل اوووي
ربنا ما يحرمنا من كلامك الحلو

ليلى الصباحى.. lolocat يقول...

كده انا اطمنت عليك جدا هههههه

الحمد لله مادام بلد مجانين رجعت لنا تانى يبقى حالة الاحباط والاكتئاب قلت شوية ويارب عقبال ماتنتهى من عندنا كلنا خالص خالص هههه

هو سؤال صغنن اوى اوى
يعنى مش كنتم تشتغلوا لامهاتكم احسن وفى بيوتكم يعنى ما اخدتوا الا البهدلة وقلة القيمة فى بلاد الغربة ههههه


بس تعرف ( شوية جد )
واضح انها كانت ايام عفوية وجميلة وطيبة ...هى عشوائية.... بس جميلة

ربى يسعدك اخى ابراهيم ويجعل القادم افضل فى عيونك وقلبك ويارب زياد ما يعمل زى ابوه والا بقى الاسكندرية الان مفيهاش عم مرسى زى زمان لكن فيها مزز وحاجات تانية ههههههه

تحياتى لك بحجم السماء

faroukfahmy58 يقول...

شفت يا ابراهيم لما رقت راقت ميتك وسبحت فى ذكرياتك الماضية ايام ما كانت الدنيا دنيا
كل شئ كان يهون سواء قمنا بعمل البواب او عمل الخباز اهو كله اكل عيش ولو من غير ملح اهم حاجه البال الرايق والنفس مفتوحه على شط بحر الهوى
ربنا يروق بالنا جميعا حبيبى
والف حمدالله بالسلامه

Casper يقول...

ما أجمل ذكريات الماضي :)
رائع ما سطرت يا استاذ ابراهيم

موناليزا يقول...

أراها مغامرة مثيرة :)
تتقمص دور مش بتاعك والمفروض تأديه على أكمل وجه لأ وكمان أنت اللى تدفع فلوس فى الآخر :)

بيعجبنى كلامك عن عادات الشباب
وفعلا فرق كبير بين أن يحضر الشاب شنطته لسفر يستغرق أيام وبين فتاة تحضر شنطتها للسفر لنفس المدة :)

بـت خـيـخـة وأي كـلام يقول...

:)))

شمس النهار يقول...

ضحكتني ياابراهيم علي الصبح :))

مصطفى سيف الدين يقول...

و هذا ما لم يفهمه مرسي
اذا لم يقم بنفسه بما وجب عليه لن يحصل على البقشيش

منور دايما يا كبير مدونتك و بيتك

richardCatheart يقول...

هههههههههه طب وانتم ليه ماتقولوش عليها تركى وخﻻص ايه رومى دى ؟!

Deyaa Ezzat يقول...

اللهم ديم علينا الحرية والعزوبية
^_^

amiraali يقول...

يااااه ايوه كده...
والله كنت هزعل اوي لو دخلت ولقيت حضرتك مش كاتب بوست...
:))

أمـانـى عـادل يقول...

ما أجمل حياةالشباب!!
يسافروا فى أى وقت ويناموا فى أى مكان ويرتدوا أى حاجة ،، حياتهم بسيطة وسهله:))

وما أجمل الذكريات وما تحمله من لحظات فرح ومرح وسعادة،،


دمت طيباًأستاذى الفاضل
:)

ابراهيم رزق يقول...

ام سما

هو فى احلى من ايام العزوبية
ههههههههههههههه

تحياتى لكى ولزهراتك

ابراهيم رزق يقول...

re7ab.sale7

ربنا ما يحرمنى منكم و من لمتكم حولى

تحياتى

ابراهيم رزق يقول...

ليلى الصباحى
اختى العزيزة

متشكر جدا على كل مشاعرك الطيبة ربنا ما يحرمنى دايما من مرورك و طلتك عليما

هههههههههههههههههه
مش عارف زياد هيعمل ايه بس هو تقريبا نسخة منى

نورتينى

تحياتى

ابراهيم رزق يقول...

faroukfahmy58
ملك الزهرات
وابن بطوطة المدونين

ربنا يروق بالك بقدر حبك و عطائك للاخرين
و يخليك يارب لزهراتك و لينا

بحاول يا استاذى و ربنا يسهل

نورتنى
تحياتى

ابراهيم رزق يقول...

Casper

الاجمل هو مرورك و تعليقك

شرفتنى
نحياتى

ابراهيم رزق يقول...

موناليزا

انتى عارفة انك اصبتى كبد الحقيقة

الواحد بيستفيد من خبرات التجربة

هههههههههههههههه
ما احنا بنقول كده على البنات محدش بيصدقنا

تحياتى

ابراهيم رزق يقول...

بت خيخة واى كلام

نوران عندنا
يا مرحبا يا مرحبا

نورتينى
تحياتى

ابراهيم رزق يقول...

شمس النهار

شمس الشموس
ههههههههههههههه
سعيد جدااااااااااااا انى ضحتك

نورتينى
تحياتى

ابراهيم رزق يقول...

مصطفى سيف


و هذا ما لم يفهمه مرسي
اذا لم يقم بنفسه بما وجب عليه لن يحصل على البقشيش


مش هعلق على كده و هكتفى بذلك

نورتنى
تحياتى

ابراهيم رزق يقول...

richardCatheart

مارو
ههههههههههههههه
لا احنا اغلبية و عندنا الصندوق
و الصندوق مبيكذبش
ههههههههههه

وبعدين انتوا يا اسكندرانية عندكوا حاجات غريبة

قمه ما تقولوا الناصيه
مشروع متقولوا الميكروباص

هههههههههههههه
نورتينى

تحياتى

ابراهيم رزق يقول...

Deyaa Ezzat

فعلا العزوبية نعمة ربنا يدومها
ههههههههههههه

نورتنى
تحياتى

ابراهيم رزق يقول...

amiraali

و انا اقدر ازعلك
ههههههههههههههه
بجد متشكر قوى


نورتينى
تحياتى

ابراهيم رزق يقول...

امانى عادل

فعلا ذكريات الشباب جميلة جدا
نورتينى و شرفتينى بتعليقك

تحياتى