الأربعاء، 19 يونيو 2013

انا بذىء ومغفل ولى الشرف

كتب الاستاذ ماجد القاضى بوست عنوانه 

و بما انى من الناس التى على راسها بطحة فقد رديت بتعليق شبه مختصر على البوست  الاستاذ ماجد القاضى طبعا بكل ديمقراطية و احترام للراى و للراى الاخر لم ينشر التعليق فكان واجبا على ان ارد على البوست بقليل من التفصيل 
يقول الاستاذ ماجد البعض تحولت مدونته إلى مكان كريه الرائحة تفوح منه كراهيته للجماعة الوطنية الإسلامية الشريفة والمخلصة (الإخوان المسلمون) حيث يلقي فيه هو ومعظم زواره قمامتهم؛ لتضحي مدونه مقلبا كبيرا لقمامة الكراهية والحقد والغل والعياذ بالله...!!! 
من وجهة نظر الاستاذ ماجد ان كل من يعارض الجماعة الاسلامية العفيفة الشريفة البكر الرشيد الاخوان المسلمون هى قمامة و هكذا تحولت مدونات المعارضين الى مقلب قمامة واجدنى لاول مرة فى ردى اقول (بدون تعليق) 
يقول الاستاذ ماجد و البعض تحولت مدونته - بعد عملية غسيل مخ يبدو أنها أجريت له - إلى بوق كبير ينقل - بالحرف - أكاذيب وترهات وضلالات وأباطيل وهرتلات إعلام العار الفلولي أو العلماني نحو التيار الإسلامي إجمالا والإخواني خصوصا والرئيس المحترم الذي أنعم الله به علينا بأخص الخصوص..!!!
اقر واعترف اننى ممن اجريت لهم عمليات غسيل مخ من اكاذيب وترهات وضلالات وأباطيل وهرتلات إعلام العار الفلولي أو العلماني و اعلام الفلول كم برنامج توك شو على كم فضائية و لكن ماذا عن قناة مصر 25 التى تسبح بحمد الاخوان 24 ساعة فى اليوم فى جميع البرامج بالاضافة الى قنوات الناس و الحافظ و الرحمة و الحكمة و الموعظة و راديو مصر و غيرها بالاضافة الى الاعلام المصرى بقنواته العديدة و اذاعاته التى يجلس على كرسيه الوثير وزير اخوانى قلبا وقالبا
يقول الاستاذ ماجد المشكلة أن هؤلاء المدونين الذين حولهم الإعلام بنجاح ساحق - ساعده خلل نفسي واضطراب سلوكي لديهم - إلى حمقى وجهلاء ومغفلين..! لكنهم للأسف لا يدركون أنهم.. حمقى وجهلاء ومغفلين..!!
اشكرك واعدك ان اذهب الى الطبيب النفسى لكى اتعالج قبل ان يستشرى فى المرض والذى بدات اعراضه فى الظهور واولها معارضتى للجماعة الاسلامية الوطنية البكر الرشيد العفيفة الاخوان المسلمون
يقول الاستاذ ماجد كم تمنيت أن يقف هؤلاء وقفة جادة مع أنفسهم وأن يراجعوا ما كتبوا في الفترات السابقة...!
فما زالوا يهرتلون ويشتمون ويسبون منذ شهور عديدة.. والإخوان لا يلقون لهم ولأمثالهم بالا ويعملون ويجدّون لبناء المؤسسات الوطنية التي يمكنهم من خلالها خدمة الوطن بالعمل لا بالكلام.. فيوفقون - بمعونة من الله ثم بمعونة من شرفاء وطنيين - يوما بعد يوم في:
على يدى اتابع الانجازات التى ينجزها الاخوان و اتابع قياداتها و هم يبنون مستقبل مصر طوبة فضة و طوبة دهب و لا يتوقفون عن البناء ابدا كما انهم يمشون فى خط موازى مع البناء بالجهاد فى القدس وسوريا و على يدى بالصدفة البحتة كنت  عند فرحات مدينة نصر وجدتهم هناك باعلامهم يجاهدون بعد مؤتمر نصرة سوريا  جهاد الكباب والكفتة والجهاد الاكبر مع الحمام المحشى و المشوى
يقول الاستاذ ماجد
نيل أغلبية (مجلس الشعب)..!

باطل بحكم محكمة 
- نيل أغلبية (مجلس الشورى)..!
باطل بحكم محكمة

- الوصول بـ(رئيس) منهم إلى سدة الحكم..!
باطل لان ما بنى على باطل فهو باطل وتم ترشيحه للرئاسة بموافقة اعضاء مجلس شعب باطل

يقول الاستاذ ماجد - الوصول إلى (دستور) مشرف عالميا..! 
بدون تعليق

يقول الاستاذ ماجد - نيل الأغلبية في معظم (النقابات المهنية)..!
راجع انتخابات النقابات المهنية الاخيرة

يقول الاستاذ ماجد - نيل الأغلبية في معظم (الاتحادات الطلابية)...!
راجع معلوماتك

يقول الاستاذ ماجد - تقديم نماذج مشرفة من (الوزراء) الأكفاء...!
امثال صلاح عبد المقصود و وزير الثقافة و وزير الرى والسيد وزير التموين بتخفيض المقرارات التموينية و تحسين رغيف الخبز فى وسائل الاعلام فقط وازمات الانابيب والسولار و البنزين و الكهرباء والغلاء والمرتبات الخ الخ الخ

يقول الاستاذ ماجد - تقديم نماذج مشرفة من (المحافظين) الأكفاء...!
على يدى المحافظين الاكفاء و لكنى لا اتذكر اسم محافظ واحد له انجاز ويمكن ان تذكرنى باسمه وانجازه كما ان تغييرات المحافظين الاخيرة فضيحة ليست فى مصر ولكن على مستوى العالم فبمجرد تعيين محافظ الاقصر تناقلت وكالات الانباء الخبر و تم الغاء الحجوزات السياحية الى الاقصر كما ان هناك محافظ اخر من شدة حب الجماهير له تنكر فى زى منقبات و هو يدخل مبنى محافظته خشية التفاف الجماهير حوله وتكرر الامر فى بنى سويف والمنصورة و الغربية
يقول الاستاذ ماجد  تقديم مئات الآلاف من الخدمات لأبناء هذا الوطن في كل قرية ومدينة على مستوى القطر المصري...!
اعتقد ان القيام بالخدمات ليس حكرا على الاخوان كما ان الله تعالى يقول
{يَا أَيُّهَا الَّذِينَ آمَنُواْ لاَ تُبْطِلُواْ صَدَقَاتِكُم بِالْمَنِّ وَالأذَى كَالَّذِي يُنفِقُ مَالَهُ رِئَاء النَّاسِ وَلاَ يُؤْمِنُ بِاللّهِ وَالْيَوْمِ الآخِرِ فَمَثَلُهُ كَمَثَلِ صَفْوَانٍ عَلَيْهِ تُرَابٌ فَأَصَابَهُ وَابِلٌ فَتَرَكَهُ صَلْداً لاَّ يَقْدِرُونَ عَلَى شَيْءٍ مِّمَّا كَسَبُواْ وَاللّهُ لاَ يَهْدِي الْقَوْمَ الْكَافِرِينَ }البقرة

يقول الاستاذ ماجد كل ذلك.. بينما هؤلاء ما زالوا يهرتلون هنا على مدوناتهم دون أن يقدموا شيئا مفيدا حقيقيا لوطنهم الذي يعلنون حبه ليل نهار..!!
وأهمس في آذانكم بهذا التحذير: والله لأسائلنكم أمام الله على كل كذب كذبتموه وكل إفك أفكتموه وكل لفظ بذيء أطلقتموه في حقي وفي حق إخواني جميعا... وأبدا لست لكم بمسامح..!!!

قال تعالى : "احْشُرُوا الَّذِينَ ظَلَمُوا وَأَزْوَاجَهُمْ وَمَا كَانُوا يَعْبُدُونَ مِن دُونِ اللَّهِ فَاهْدُوهُمْ إِلَى صِرَاطِ الْجَحِيمِ وَقِفُوهُمْ إِنَّهُم مَّسْئُولُونَ مَا لَكُمْ لا تَنَاصَرُونَ بَلْ هُمُ الْيَوْمَ مُسْتَسْلِمُونَ .." {الصافات : 22-26} .
لذا نحن الذين سنختصم مرسى ونسأله عن دماء جيكا والحسينى ابو ضيف و محمد الجندى و غيرهم ونسأله عن ضحايا قطار البدرشين و نسأله عن الجوعى و المساكين
هذا هو ردى المختصر  واتمنى ان تثروا البوست بتعليقاتكم و وجهة نظركم
وارحب بكافة التعليقات و الشتائم من امثال حمقى وجهلاء ومغفلين و مرضى بخلل نفسي واضطراب سلوكى ماعدا شتائم الاب والام

هناك 17 تعليقًا:

الازهرى يقول...

عن الأمل

http://fiteforme.blogspot.com/2013/06/30.html

إهدى وروق دمك :)

لــــ زهــــــراء ــــولا يقول...

معلهش يا استاذ ابراهيم كلنا اعصابنا شادة وخايفين على احوال البلد
ربنا يسلم مصر من كل سوء
وانا معنديش شك ان كلاكما ( معارض ومؤيد) ترديون مصلحة مصر اولاً

لولا

Ramy يقول...

أستاذ أبراهيم

انت عارف انى بأعز استاذ ماجد جدا

و هو عارف كدة كويس

بس انا من الصدمة حقيقى انا اتصدمت فيه جدا

لأنه انسان مثقف و محترم

بس مش قادر اتصور انى مش شايف كل دة

مش تحيز لحد او انى اتجنى على الأخوان لأنهم هما اللى من نفسهم مبينين مدى انانيتهم و فى كلام صعب كتير ينطبق عاليهم

انا يمكن مرضتش اعلق عنده علشان بس انا مصدوم فيه شخصيا

مش قادر اتصور انه بيفكر زيهم
لأنى اتعاملت معه ممكن معاملات بسيطة بس تقدر تستشف منها انه انسان كويس

بس للأسف

أحمد أحمد صالح يقول...

السلام عليكم أستاذ إبراهيم.
كنت كتبت قصيدة أولها (لا أتبع من وصف بإختيار الله) تعليقا على نكتة الإخوان بأن مرسي إختيار ربنا، والغريبة إن ولا واحد من أصدقائي الإخوان علق عليها!
..
المهم!
أعتقد أن الأستاذ ماجد-وأنا لم أعرفه إلا مما كتبه هو ونقلته أنت- نهجه هو نفس نهج ونفس أيدلوجية الإخوان، يقينية إستقامة وحكمة وطهر وسمو ذاتي بمجابهة إعوجاج وحماقة ونجاسة ودنو الأخرين!
رغم إن سبحان الله ربنا حظـَّر من يظن أنه محسن وعلى صواب أكثر من تحذيره للمخطئ فقال( هل ننبؤكم بالأخسرين أعمالا، الذين ضل سعيهم في الحياة الدنيا وهم يحسبون أنهم يحسنون صنعا).
أظنني لست في حاجة لسرد ما تعلمه وما يعلمه غيرك أستاذ إبراهيم، فقد تعبنا- سواء أكان في العوالم الأليكترونية الإفتراضية أو في العالم الواقعي- من الجدال مع عقول قد تبرمجت على فكر وأيدلوجيا معينة ولا تملك من أمرها شئ. والعينة بينة كما يقولون، وأظن أفعال الإخوان تخطت مرحلة العينات ووصلت لمرحلة إنتاجية متقدمة!
يكفي فقط أن أؤكد أن الدين إن كان بعيدٌ عن أحد فهو بعيدُ عن من يدعيه، وبعيد عن من يستغله لخدمة دنياه ومن يتاجر به عن علم ونية وقصد أو عن غباء وبلاهة.
.

النسر المهاجر يقول...

هو الااستاذ ماجد ده مكنش واخد باله ان المرشد بتاعه كان بيخاطب مبارك ويقوله احنا ولادك ولا ايه ولو عايز الفيديو اجيبهوله .
فى حين ان المدونين الى مش عاجبينه كانوا بيكتبوا الى هما عايزنه وكانوا بينتقدو السياسه بتاعته ورغيف العيش وأزمة الكهربا الى حصلت فى عهد مبارك طبعا الأزمات فى عهد مبارك كانت حنينة أوى بالنسبه للى بنشوفه دلوقتى
لما سواق يحط البديره الى تعجبه وصغار الأخوان يتاجروا فى الدقيق المدعم ودى كمان عندى ليها فيديو
وبعيدن هو نسى إن اقل مدون فى عالم التدوين عنده قدره انه يكتب وينتقد أحسن منه هو نفسه على الاقل مش بايعين أفكارهم وعقولهم لشوية مجانين مقابل الفلوس الى بتدخل جيب الأستاذ ماجد نفسه
حتى المدونين الى بينتموا للإخوان بيقبلوا النقد والتعليق مادام فى سياق الإحترام وطبعا دول قليلين جدا لان الإخوان معرفوش يربوا نفسهم علشان يربوا النشئ بتاعهم طول مهو قادر وهو بيتكلم بلسانه حس انه هيقع يجرى على عباية الدين
علماء الازهر الى هما مرجعيه اسلامية بعضهم افتى بجواز النزول والمطالبه بالحق والقضاء على الظلم
ورئيسك يا استاذ ماجد قال فى بداية حكمه لو الناس مش عايزانى امشى وحدد لو مليون واحد بس مش عايزينى أمشى أظن فيه أكتر من 80 مليون واحد مش عايزنك


فافى يقول...

طبعا قريت واتفرست وروحت علقت عنده قبل ماكمل قرايه عندك وانا على يقين انى تعليقى مش هيتنشر طبعا
مش عارفه اقولك ايه يا استاذ ابراهيم ؟!!!!!!
احنا فى مأساه وتخلف وتفكير ضحل وغباء وترديد كلام من غير فهم وبعدين يزعلوا اننا بنقول عليهم خرفان !!!!!
ا لا يسعنا الا قول انا لله وانا اليه راجعون اللهم اجرنا فى مصيبتنا واخلفلنا خيرا منها

رحاب صالح يقول...

انا برغم احترامي للأستاذ ماجد واعتزازي جدااا جداا جداا بصداقته
الا اني اعغتب عليه جدا جدا جدا
وكتبت ده له ف التدوينة
وبرغم اني عندي امتحان بعد يومين بس مقدرتش اني معلقش عندك وعنده
ربنا يستر ع الايام الجاية

ستيتة يقول...

معلش
التدوينة دي كلها عن ايه؟
إن كان أجعص ما فيهم عريان فكرا وحديثا؟
بلا اخوان بلا جماعات اسلامية بلا خرفان بلا هم
اللهم نجي مصر من الإخوان والسلفيين والجهاديين والإرهابيين
اللهم ارحمها من رجال تلبس طرحة وأرزقها بفرحة
وردها إلى أهلها واحقن دماء ابناءها وقدرنا نبني مستعمرات للخرفان فلا أمل في استرداد عقل من ذهب عقله منهم

وبمناسبة إنك حرقت دمي في البوست ده فياريت الكل يفتكر مين أول واحد قسم مصر لبتوع ربنا وليبراليين علمانيين كفرة ها يقلعوا أمه الحجاب
أمه هو؟
أمين اللي يتشدد للي جابوا امه

مشيني يا عم من هنا انا حاسة اني مش ها اعرف أرجع طبيعية تاني

Bent Men ElZman Da !! يقول...

أنا مصدومة حقيقي!!!!!!
أ.ماجد أعرف إنه شخصية محترمة ومثقف وواعي جداً
فـ مش قادرة أتخيل بجد طريقة كلامة دى !!
مش بتكلم عن وجهه النظر بس طريقته فى عرض وجهه النظر دى بطريقة مستفزة كده
مش مشكلة إنك تقول رأيك لكن المشكلة إنك تغلط فى المعارض ليك لا وكمان تكفرة وتوصفة بأنه جاهل وزباله !!!
لو دي افكار واسلوب المؤيدين لمحمد مرسي يبقى إحنا حقنا نترعب مش نخاف بس !!!!!!!

aya mohamed يقول...

انا اتصدمت فى اكتر من مدون فالموضوع بالنسبالى بقى عادى جدا
كمان عارفة من فترة طويلة انتماء ماجد القاضى
بس اللى اتصدمت فيه هو الجدال بالباطل
انا معنديش مشكلة انك تبقى اخوان وانك تستميت فى الدفاع عنه
بس مش تيجى تقولى عكس الحقائق اللى الاطفال نفسهم عارفينها
الاستخفاف بعقولنا بقى سمة مميزة للاخوان واتباعهم ودى كمان حجة لينا عليهم
{ ولا تلبسوا الحق بالباطل وتكتموا الحق وأنتم تعلمون }
ربنا يعافينا

candy يقول...

الغريبة أن أستاذ ماجد كان عمال يتكلم عن قيول الأخر .. وكان بيصيح لواحد من الدار مسحه وقال أن فى إيده دم .. وهو كان بيقول أزاى كتاب ومثقفين ومش بنقبل بعض ..

ورغم أن بوستاته كانت مستفزة جدا بالنسبة لى .. زى العينة اللى حضرتك جايبها ..
وزى يوبست كان كاتبه مرة أنك لما تسمع نقد من حد على الرئيس المبجل أتأكد قبل ما تسمع الكلام أنه مش علمانى ومش فولو ومش ... ومش ... ومش مسيحى !!

واحترمته برضه وقلت دا اختبار لقبول الأخر بالنسبة لى ..

دلوقتى بدور عليه فى قايمة اصداقئى مش لاقياه !!

نشكر الظروف.

Noha Saleh يقول...

أنا مصدومة
ماكنتش أتخيل إن أستاذ ماجد يكتب كده
بس للأسف ده مش خيال ده واقع
أنا أصلا كمان ماكنتش أعرف إنه إخوانى غير بعد الثورة

gogo!sf يقول...

بصفتى احد المغيبين الجاهلين المضحوك عليهم
احب أأيدك فى كل كلمه فى البوست وخصوصاً تفنيدك لمزاعمهم الكاذبه سواء لعبه الانتخابات او اعتقادهم بأنهم جماعه الله المختارة مع الاعتذار لليهود ولا استطيع ان اضيف جديد سوى ان اقول ان الخوف كل الخوف ان يصدقو انفسهم وتظل نظارة النهضه التى لا ترى سوى انجازات الاخوان الوهميه فوق اعينهم الى الابد
تحياتى

عزيزى ابراهيم موعدنا 30/6

نادر
nader vok

مصطفى سيف الدين يقول...



المشكلة يا ابراهيم ان كل طرف شايف انه صح و انه اللي عايز المصلحة العامة و كل اللي مش شايف كده زيه اما جاهل أو احمق او مغيب او مغسول دماغه ، طيب ليه ميكونش هو نفسه اللي كده و ان في حقيقة تايهة ؟ علشان هو عاش وسطهم و اتطبع بطبعهم فبقت ليهم مصداقية بالنسباله ، اوكيه متفق معاك بس انا مش مضطر اشوف زي مانت شايف علشان ليا دماغي الخاصة ، انا بحترم ماجد و عارف اد ايه هو انسان محترم بس المشكلة ان في حاجة انكسرت جوة الكل و عملت شبورة على العين فبتتداخل الصور ، انا ما مضيتش لتمرد و مش خارج يوم تلاتين بس ده مش معناه ان اللي هيخرجوا منافقين و خونة و جهلاء و مغفلين ، هم برضه مصريين و بيحاولوا يعبروا عن رأيهم نيجي لمسألة العنف ، مفيش دين و لا انسان بيبرىء استعمال العنف للتعبير عن الرأي بس بصراحة انا ماسمعتش حديث للعنف من مصادر مسئولة غير من المؤيدين زي ابو اسماعيل و عاصم عبد الماجد علشان كده لازم يكون في حل ، مرسي جاب حكومة فاشلة كل يوم بيزيد استبدادها و قرارتها الغلط على الاقل بالنسبالي آخرهم مثلا بعد ما اقرت زيادة هامش الربح للصيدلي من سنة معرفتش تطبق القرار علشان معرفتش تضغط على اصحاب المصانع و النهاردة طلعت قرار بضريبة جديدة على الصيدليات بتتاخد مقدما و اتطبق فوري ، حكومة زي دي بتيجي على الحلقة الأضعف و بتسيب الحيتان ايه الفرق بينها و بين اللي سبقها و لما نيجي نتكلم و نقول حكومة فاشلة يطلع الكبير يقولنا ارى ما لا ترون ، استاذ ماجد انا مش مغفل او مغيب انا انسان مصري مطحون و مظلوم في عهد مبارك و عهد مرسي لحساب الأعيان و رجال الاعمال ، استاذ ماجد يمكن مش هتصدقني لو قلتلك اني مكنتش بحب الاشتراكية و لا الناصرية بس بعد اللي شفته من قرارات استعباطية من حكومة قنديل بدأت اميل للاشتراكية ، محدش ضد الشريعة و لا الاسلام ، بس الحكومة دي اصلا بتتطبق الشريعة ؟ او هتطبقها ؟ و لا الهوا ، المتاجرات مستمرة من الطرفين فليكن الاعتزال

نور الدين (محمد الجيزاوى) يقول...

فليحترق الاخوان فى الجحيم
وليمسحوا أستاههم بوجه رئيسهم الأبله
وسنستمر فى تعرية سوءتهم القذرة
منذ عام مضى يا استاذ ابراهيم كتبت مقال عنوانه (عفواً ياولاد الوسخة انتو بتشتغلونا) وبحمد لله تحقق كل ماتنبئت به وظهر وجههم القبيح
بالمناسبة كان مقالى هذا سببا فى أن قام صاحبك هذا بعمل حظر لى على الفيس بوك ههه واللطيف انه فعل هذا بعدما بادرت أنا بحذفه
لكنى لم احذفه لأنى ضضقت به ذرعاً كما فعل هو بل والله حذفته اشفاقاً عليه من رؤية قلمى وهو ينحر عنق سادته ومرشده
الخلاصة :
لاخير فى إخوانى ولا امل فى فهمهم اوتفهمهم هو قوم لاعيون لهم فيبصرون ولا آذان فيسمعون يقودهم صوت راعيهم فيدورون حيث دار وأينما حط يحطون .

Unknown يقول...

أنا قريت تدوينة أستاذ ماجد و إتصدمت..أنا طبعاً بحترمه جداً على المستوى الشخصي لكن موقفه الأخير لا أجد تعليق مناسب عليه غير إني فعلاً إتصدمت..يعني الموضوع موصلش لإقصاء الطرف الآخر و إعتباره شوية حمقى و جهلاء..و لو إني عارفه إن ده رأيهم فيما بينهم لكن ماكنتش أتخيل إنه يُعلن بالشكل ده.
أنا للأسف بعاني كون ناس قريبين مني جداً بيفكروا بنفس الطريقه..لدرجة ممكن تصل لتكفير اللي هينزل يوم 30..لدرجة ممكن تصل لوصفك بالحماقه و الجهل و قلة الدين و التربية..أنا بجد حزينه على الطريقه اللي بقينا بنتعامل بيها مع بعض..إزاي همّا نيتهم سليمه للدرجه دي..إزاي قادرين يصدقوا نفسهم و يثقوا في كمية الكدب و الخداع اللي حواليهم, و إزاي متخيلين إن في ملايكة على الأرض إسمهم "إخوان" و إنهم لوحدهم اشرف ناس في مصر و كأننا كلنا بقينا مش شرفاء, كمية الدونية اللي بيفكروا بيها فينا بشكل غير معلن مش طبيعيه..
الخروج عن الحاكم حرام؟؟!! طب إنتوا كنتوا بتنزلوا في يناير 2011ليييييييه؟؟
هتنزلوا تقفوا يوم 30 جنب إلهام شاهين و توفيق عكاشه؟؟!! طب و إنتوا كنتوا بتنزلوا في يناير 2011 جنب شيريهان و بسمه و جيهان فاضل لييييييه؟
أنا مش فاهماهم..كل اللي متأكده منه إن مصر في آخر أولوياتهم..مصر دي طز فيها و فأبوها لكن المهم الجماعه و الحكم و المناصب اللي تقريباً إستولوا عليها كلها من غير كفاءة و ده اللي بيضيعنا و يرجعنا لورا..و هما مش شايفين أو مش عايزين يشوفوا..كل رئيس حكم مصر له حسناته و سيئاته..كل سياسي مرّ علينا له حسناته و سيئاته..إحنا معندناش رُسل..إزاي بيألهوه كده..لدرجة إنهم لما يتزنقوا يلوموا الشعب يلوموا الأرض يشتموا مصر و أبو مصر و الشعب الزباله اللي ناقص ربايه..الشعب الجاهل يا عيني اللي مبيعرفش يوفر في الكهربا و بيصرف بدون حساب للمستقبل..الشعب اللي بيفتح أنوار الشوارع بالنهار..الشعب اللي بيقطع النور على البيوت و يسيبه في الكباريهات..الشعب اللي قابل يفرط في نيله و يأجر قناة السويس..الشعب اللي مش متحضر اللي نزل في يناير 2011 عشان يطالب بحقوقه من غير عنف و لا تهديد و لا طمع في كراسي و سلطه..دلوقتي بقى العيب في المصريين!!
و بالمناسبة أنا مبتفرجش أساساً على التليفزيون عشان يبقى معمولي غسيل مخ و أتشرف بكل مدونة دخلتها و علقت فيها و قريت فيها و إتأثرت..حتى لو كانت بتشتم و بتسخر و بتعبر عن رأيها لأني بحترم حرية الرأي و لأني بحترم زملائي المدونين و بحترم إخواتي المصريين و العرب..بكل توجهاتهم و أديانهم.

أندروميدا يقول...

لا تتعجب يا سيدي ... فالشيزوفرينيا .. صارت مرضا للعصر .

قرأت ما كتبه .. ولم اعلق .. فهو (( من )) المدونين .. كما كتب .. وبالتالي .. ماقاله .. يسري عليه أيضا .

والقضية ليست في إسقاط الإخوان ... ونما نحن بحاجة الي إسقاط الجهل بالأساس .

تحياتي .