الخميس، 7 مارس 2013

غواص فى ترعة النغم و اسالونى

نوران الشاملى 
عملت تجربة و قالت اسالونى
الصراحة عجبتنى تجربتها
و اجابتها على كل الاسئلة بصراحة
لو عايزين تسالونى اى سؤال
انا تحت امركم
و هحاول اجاوب بكل صراحة
يا ريت تسألونى و انتم بتستمتعم بهذه الغطسة
  

الثلاثي المرح

فرقة غنائية ، من أغانيها : حلاوة شمسنا ، حمادة حمادة ، يا أهلا ً ، صلوا ع النبي ، يا أسمر يا سكر ، اللولي ، سبحة رمضان
تكونت الفرقة من وفاء محمد مصطفى و صفاء يوسف لطفي و ثناء الباروني ،التقين في برنامج الهواة الذي كان يقدمه بالإذاعة ديمتري لوقا .
صفاء كانت تغني لأسمهان ، و وفاء لفيروز ، و ثناء لسعاد محمد
و في حديقة معهد الموسيقى العربية ( ملتقى أهل المغنى ) التقت صفاء و ثناء، و اشتركتا بالغناء في بعض الحفلات مع فرقة صلاح عرام ، و التي كان يغني بمصاحبتها في حفلات الجامعات و الأفراح كل من بليغ حمدي و محرم فؤاد و ماهرالعطار .
التقيا بعلي إسماعيل بعد أن انضمت لهما وفاء ، ولحن لهم  عمركشي حبيت
كتب للفرقة : صلاح جاهين ، مرسي جميل عزيز ، صالح جودت ، عبد الفتاح مصطفى
و لحن لها : منير مراد ، أحمد صدقي ، سيد مكاوي ، محمد الموجي ، عبد العظيم محمد ، حلمي بكر ، عبد العظيم عبد الحق ، حلمي أمين ، علي إسماعيل
توقف نشاط الفرقة عندما أصبحت وفاء معيدة بجامعة الأزهر ، ثم سافرت كأستاذ إلى الكويت ، كما تزوجت ثناء من المخرج حسن الإمام ، و اعتزلت الفرقة 
يا مين يصحيلى العصفور
كلمات عبقرية و بسيطة لعبد الفتاح مصطفى
 لحن عالمى للموسيقار على اسماعيل 

 

 منتش خيالى يا ولا
بساطة الكلمة و سلاسة اللحن
عبد الفتاح مصطفى و على اسماعيل

العتبة جزاز
دى بقى مختلفة
كلمات عبد الفتاح مصطفى
و الحان العالمى على اسماعيل

    



هناك 17 تعليقًا:

مصطفى سيف الدين يقول...

سبحة رمضان لولي و مرجان :)

بحب اسمعهم على فكرة
سؤالي بقى
اللي اعرفه ان المدام بتدخل دايما هنا

بعد كتابتك عن تشارليز ثيرون كان ايه موقفها بقى ؟ :)

شمس النهار يقول...

الثلاثي المرح دول بحبهم جداااا

ودايمااقول المغنين اليومين دول عاملين زيهم مع فارق جودة الصنعه
الموجود دلوقتي سلق بيض مش اكتر:)

اكيد الناس اغلبها هتسألك انت بتسمي ولادك الاسامي الغريبه دي ليه :)

faroukfahmy يقول...

الابراهيمى
انا التقى بدونتك الزاخرة وتتراقص اذنى وعينى امام بساطة الكلمة وسلاسة اللحن
اتساءل واكذب نفسى والكذب خيبه تقيله هل سيتكرر عبد الفتاح مصطفى وعلى اسماعيل وفرقة الثلاثى المرح ..
اشك واشك واشك الى ان يصل شكى الى نهاية البوست ؟ !!!!!!!!!!!!!!!!!!
والى لقاء جدسد مع غطسه من غطساتك

faroukfahmy يقول...

آسف غطص بدلا من غطس

Do3aa El_attar يقول...

كنت وانا صغيرة بحب أغنية العتبة جزاز ولازلت بحبها جداااً .. سبحان الله في حاجات بتعيش أكتر من عمر البني آدم نفسه

جميلة اختياراتك أستاذ إبراهيم :)

موناليزا يقول...

بسم الله الرحمن الرحيم
السؤال الأول: إيه سر صورة واجهة المدونة وبنوتك نايمة وفى بقها بسكوتة ؟

السؤال الثانى: لاحظت إن فى غالبية حفلات التوقيع اللى بتروحها بتاخد سالى معاك وأخوها لأ .. ليه بقى التفرقة العنصرية دى ؟

السؤال الثالث: علاقتك بزياد عاملة ازاى وليه مابتتكلمش عنه؟

هذا وبالله التوفيق وأحب أدى الفرصة لبقية الزملاء :)

;كارولين فاروق يقول...

هههههههه
اولا اللي حاطط الصور في الفديو بتاع
العتبه جزاز رهيييييييييييب هههههههه
تحفه
سؤالي قريب من سؤال سيف
هل المدام متابعه مدوناتك اول بأول وايه تعليقها؟
تحياتي

ابراهيم رزق يقول...

مصطفى سيف

و انا بحبهم قوى

______________

اللي اعرفه ان المدام بتدخل دايما هنا

بعد كتابتك عن تشارليز ثيرون كان ايه موقفها بقى ؟ :)

ج طبعا هى عارفة موضوع نشارليز ثيرون من قبل ما انشر اصل زى ما انت عارف فضحى ههههههههههههه

تحياتى

ابراهيم رزق يقول...

شمس النهار
شمس الشموس

غريبة يا شموسة ان تعليقك نفس تعليق سيف انك بتحبيهم قوى
هما فعلا يتحبوا

________________


اكيد الناس اغلبها هتسألك انت بتسمي ولادك الاسامي الغريبه دي ليه :)

ج بحب الاسامى الغريبة و المميزة و فى الاول بيبقى فى اعتراض شديد و بعدين بيتعودوا اصل الاسم فى الاول و الاخر تعود و الدليل فى اسماء كتير اعجمية ملهاش معنى زى ابراهيم لكن الناس متعودة عليها

نورتينى

نحياتى

ابراهيم رزق يقول...

faroukfahmy58

ملك الزهرات
و ابن بطوطة المدونين

انا التقى بدونتك الزاخرة وتتراقص اذنى وعينى امام بساطة الكلمة وسلاسة اللحن
اتساءل واكذب نفسى والكذب خيبه تقيله هل سيتكرر عبد الفتاح مصطفى وعلى اسماعيل وفرقة الثلاثى المرح ..
اشك واشك واشك الى ان يصل شكى الى نهاية البوست ؟ !!!!!!!!!!!!!!!!!!

دايما يا فاروقنا اعجز على الرد على حلاوة تعليقك و بلاغته و جمال قولك

مفتكرش يا استاذنا ممكن يتكرروا يعنى عبد الفتاح مصطفى بدعائه الشهير للشيخ النغشبندى مولاى انى ببابك قد بسطت يدى

و على اسماعيل و عبقريته مع فرقة رضا

اشك يا استاذى

تحياتى

ابراهيم رزق يقول...

doaa elattar

فعلا فى حاجات كتير بتعيش معانا اكثر من البنى ادمين

نورتينى

تحياتى

aya mohamed يقول...

غطسة النهاردة جميلة جدا
اما بقى اسالونى
فانا هسال سؤال معكوس
تفتكر انا ممكن اسالك ايه ؟ :D

ابراهيم رزق يقول...

موناليزا

عجبنى قوى ترتيبك للاسئلة و كده الواح هيعرف يجاوب بسهولة
هههههههههههههه

_______________________

السؤال الأول: إيه سر صورة واجهة المدونة وبنوتك نايمة وفى بقها بسكوتة ؟
ج انت فاكرة القصة الشهيرة بتاعة سيدنا عمربن الخطاب مع الرومى حكمت فعدلت فامنت يا عمر
الانسان لا ينام الا اذا شعر بالامان و مدونتى اشعر انها واحة الامان لى اتمنى ان يجد كل زوار مدونتى بالراحة و الامان

السؤال الثانى: لاحظت إن فى غالبية حفلات التوقيع اللى بتروحها بتاخد سالى معاك وأخوها لأ .. ليه بقى التفرقة العنصرية دى ؟
ج ههههههههه كويس انها تفرقة مش ذكورية الاجابة عند زياد هو اللى بيرفض لان له دماغ لوحده مرة جى معايا التحرير جننى و مرديش يقعد خالص

السؤال الثالث: علاقتك بزياد عاملة ازاى وليه مابتتكلمش عنه؟
علاقتى بزياد كويسة بس هو دماغه ملحوسة و ليه اهتمامات لوحده انتى عارفة كورة و بلاى ستيشن و مصارعة


نورتينى

تحياتى

ابراهيم رزق يقول...

كارولين فاروق
كلارينت الفاروق

فعلا الاخراج دمه خفيف جدا فى اغنية العتبة جزاز
هههههههههههههه

______________________

هل المدام متابعه مدوناتك اول بأول وايه تعليقها؟

ج طبعا متابعة المدونة و تعليقاتها مبتختلفش عن تعليقاتكم و اتبسطت جدا لما كتبت عنها و بعتت لينك البوست لاختها

نورتينى

تحياتى

ابراهيم رزق يقول...

Aya Mohamed

الاجمل من الغطسة مرورك

تفتكر انا ممكن اسالك ايه ؟ :

ج ههههههههههههه ممكن تسالى اسئلة كتيرة
حددى اى سؤال و بلاش طمع عشان اجاوب

نورتينى
تحياتى

Bent Men ElZman Da !! يقول...

دايماً أسمع أسم الثلاثى المرح ده كتريقة يعنى
بس أول مرة أعرف إنهم فرقه فعلاً

أممممممم
أنا عايزة أسال حاجات كتير على فكرة
بس خلينى أسال على حاجة واحدة مش هابقى طماعة
فاكرة التدوينات عن الشخصيات اللى حضرتك قابلتهم
قولى من الشخصية اللى كنت بتتمنى تقابلها ومش حصل لحد دلوقتى ؟
ولو قابلت الشخصية دى أيه أول سؤال هتسأله ليه؟؟؟؟

ابراهيم رزق يقول...


Bent Men ElZman Da


ههههههههههههههههه
انت مكنتيش تعرفى ثلاثى المرح دول ليهم اغانى حلوة كتير

اسالى كل اللى انت عايزاه

________________________

قولى من الشخصية اللى كنت بتتمنى تقابلها ومش حصل لحد دلوقتى ؟
ولو قابلت الشخصية دى أيه أول سؤال هتسأله ليه؟؟؟؟

ج طبعا انا كان نفسى اقابل جمال عبد الناصر و محمود مرسى و ام كلثوم و جمال حمدان انا قابلت نجيب محفوظ و اسامة انور عكاشة
لكن الشخصية اللى نفسى اقابلها على مستوى العالم المخرج الامريكى مارتن سكورسيزي و على فكرة كان موجود فى مصر بدعوة من مكتبة الاسكندرية و سافرت مخصوص عشان اقابله لكن القطار كالعادة عملها معايا و اتاخرت عليه
و كنت عايز اساله انت ليه معملتش فيلم تاريخى عن مصر

اما على مستوى العرب فحلم حياتى انى احضر حفلة لفيروز او اقابله و اسالها انتى ازاى ملكيش و لا اغنية وحشة و ازاى بتغنى بالاحساس ده

اسالى اى سؤال عايزاه

تحياتى