الجمعة، 6 مايو، 2011

اعلانات مبوبة (ملفات و سيدهات)

             مكتب اللا مستشار مبتلى مكسور
              واولاده اخمد و امبير و امبيرة
                لاعداد الملفات و السيدهات
     خبرة ثلاثون عام فى اعداد الملفات و السيدهات

يعلن المكتب بمناسبة قرب انتخابات الرئاسة عن توافر عدد من الملفات و السيدهات سابقة التجهيز بكافة انواعها
   اخلاقية -- فساد -- كسب غير مشروع -- بلطجة

كما يعلن المكتب عن استعداده لعمل ملفات و سيدهات حسب الطلب باسعار ليس لها مثيل

يوجد قسم للتسجيلات الصوتية والشتائم  مزود باكبر خبراء الصوت دولبى ديجتال استريو

كما يعلن انه لاول فى مصر يوجد احدث اجهزة مستوردة  من الولايات المتحدة
     جهاز تحويل ثورة 25 يناير         الى انتفاضة 25 يناير
     جهاز تحويل البلطجية                الى ثوار
     جهاز تحويل عميل ضد الشهداء    الى وكيل عن الشهداء

كما يعلن المكتب عن وصول الجهاز المعجزة
جهاز تحويل السيدهات نظام ميدان مصطفى محمود الى سيدهات نظام ميدان التحرير بجودة و سرعة فائقة

                    الجودة شعارنا
                    العراقة تراثنا
   

هناك 30 تعليقًا:

كريمة سندي يقول...

إعلانات مميزة جدا ياريت تكون ببلاش مش بفلوس

مصطفى سيف يقول...

قال كمان ان 25 يناير مش ثورة
مفيش ثورة قادتها تامر ووائل :)
على اساس ان اي حد اسمه تامر ووائل مش من حقه يبقى قائد
وبعدين يا استاذ ابراهيم الانسان ايه غير سي دي عند مرتضى منصور
تحياتي واشكرك

Ramy يقول...

ما دام المكتب لسه موجود

يبقى الثورة لسه بتقاوح

علشان تنجح

بس دة مُرتقب انه يحصل

هى عادة و لا هنشتريها

............

أنا أسف بس مكن أسأل يعنى أيه سالزياد

انا متابع من بدرى بس مكنتش بعلق لظروف

تحياتى

faroukfahmy58 يقول...

حبيبى
احجز اول كرسى عشان مشتريش تذكرة من السوق السوداء بعدين ارجع حالا وتركت جرنال على الكرسى عشان مفيش حد يقعد عليه

زهرة نيسان يقول...

السلام عليكم ،

جميلة جداً ،
تسلم ايدك ..
ما خفي كان أعظم ،
ولازم الناس تساير الموجة ..

يسلم فكرك ،
دمت بكل الخير .

شيرين سامي يقول...

ما بقاش الا مرتضى سي دي عايز يرشح نفسه و لسه سامعه واحده على الراديو كانت هتخليني أخبط العربيه بتقول هو ده اللي هبقى متطمنه لو بقى رأيس و هحس ان ورايا ضهر..!!
روعه الاعلان يا أستاذ ابراهيم خصوصاً الأسماء :)

على فكره حضرتك مؤلف في مدونة المعطف يعني ممكن تغير الديزين أو تضيف أي شئ زي ما تحب.
تحياتي و تقديري لك

faroukfahmy58 يقول...

ابرهيم ياخويا
بصراحه انا لست سياسيا واكره الكلام فى السياسة والحمد لله انك قلت حسب الطلب وطلبى سيديه للشتائم فى باب الاخلاق
1-عتاب وليس شتيمه لحماتى لانها فى مقام امى ولكن تدخلها فى كل كبيرة وصغيرة فى امرنا يزعجنا
2-شتيمه للصبيه اللى بتلعب فى قارعة الطريق واهليهم سيبونهم وعملنها نوادى
3-الباعة المتجولون قليلى الذوق والادب ويجبروك على شراء خضروات او فاكهة فاسدة والا يقذفوك بالشتائم
4- سيّاسْ العربات فى اشارات المرور اوحتى فى محطات البنزين وهم يوسخوا ماهو نظيف او يمسحوا زجاج العربات النظيف من غير طلب لكى يحصلوا على فرده
5- الشباب اللى واقف على نواصى الشوارع ويعاكسون حريمنا من بنات وستات حتى الكبار فى السن
6-ارتفاع اصوات الميكروفونات فى جميع الاماكن مما اصابنا بالتلوث السمعى
7-نظرة الفضوليين من المارة لبناتنا وستاتناسواء كن منفردات او كنا برقتهن
8-المرتديات للملابس الضيقة جداوالتى تكشف اكثر مما تستر
9-الحشريين وتدخلهم فيمالهم وليس لهم
10- الجار ابو عيون جريئة
11- البوابون الذين اصبحوا اصاب العمارات
ا12- اغفال الاحياء عن تغطية البلاعات والحفر
المكشوفة والتى تتصيد اطفالنا وعواجيزنا فى جوفها
الظاهر ياابراهيم انا هكتب مدونه داخل مدونتك من حبى فيك ( اخوك الفقرى فاروق

د/دودى يقول...

انا خايفه ما ارشحش مرتضى الاقى لنفسى سيدهات برضه عنده يودنى فى داهيه ...

شعار حملته الانتخابيه هو : انتخبنى و الا...

سكندري يقول...

أزيك يا أستاذ إبراهيم

حلو الأعلان خصوصاً موضوع اجهزة التحويل (:

بس بيني و بينك أحنا مش لازم نقلق خاااااااالص من موضوع زي ترشح مرتضي للرئاسة ، اللي عايز يترشح يترشح ، هو يعني هيعرف يكسب و لا له شعبية ،ولا هيكسب قلوب و قول الناس بعد فضائحة دي ، إذا كان بيعمل مشاكل مع طوب الارض وهو مستشار فما بالك لو بقي رئيس جمهورية بقي
بصراحة الفكرة مضحكة أصلاً مش قادر اتصوره في بدلة الريس ،هههههههههههههههههه
الخلاصة يعني دع القافلة تسير

سيدهات
اقصدي سلامات (:

reemaas يقول...

يعنى اللى خلىحمدين صباحى يترشح يخلى مرتضى يترشح
دى هتبقى فرررررررجة

Shaimaa يقول...

طب ما احنا متفقين أهوه ان العباسية أنسب مكان لمرتضى مكسور ...
بس أنا خايفة والله على العيانين الغلابة اللى جوه العباسية ...زنبهم ايه نبليهم ببنى آدم زيه؟
يالله يمكن يتشغل فيهم ويعملهم هما سيديهات

تخاريف مترجــِــمة يقول...

لا بجد اعلان تحفه ..

جاي في ميعاده :)


المكتب ده مكانه اكيد في حته فيها برجين عالين :)


تفكير بحق رائع ،، نحييك عليه
تحياتي

ريــــمــــاس يقول...

جهاز تحويل البلطجية الى ثوار

؛؛
؛
ابراهيم رزق
صراحة بفكر لو الجهاز ده موجود ايه الي حيحصل هههههههه
؛؛
؛
لروحك عبق الغاردينيا
كانت هنا
reemaas

ابراهيم رزق يقول...

كريمة سندى

عشان خاطرك من غير فلوس

منورانى دائما
خالص تحياتى

ابراهيم رزق يقول...

مصطفى سيف
اخى العزيز

هيبتدى الموضوع بكلام اهبل
على رايك البنى ادم غير سى دى عند مرتضى
و الحياة مجموعة ملفات عند مرتضى

منورنى
خالص تحياتى

ابراهيم رزق يقول...

رامى

اولا شرفتنى بزيارتك لاول مرة
بأذن الله ستنجح الثورة

سالزياد هو المقطع الاول من اسم بنتى ساليناز و اسم ابنى زياد فيصبح الاسم سالزياد اقصد به ان المستقبل هو اولادنا
نورتنى و ارجو زيادة التواصل
تحياتى

ابراهيم رزق يقول...

فاروق فهمى
استاذى العزيز

غالى و الطلب رخيص
بس سيادتك هتحتاج بجانب السيدهات بعض الملفات
مثلا سى ديه لحماتك متسجل فيه مكالمة تليفونية و يا ريت لو متصور عشان تقدم بلاغ لنقابة الحموات
سى دى للبواب و هو بيقفل مفتاح الماتور عشان صوت الماتور بيزعجه
ملف للباعة الجائلين يثبت تهربهم من الضرائب
سى دى فيه صور للبنات بالملابس الضيقة
و هكذا المكتب مش بيلعب المكتب عنده تاريخ
بس و النبى لو السى دى بتاع البنات اللى بتلبس ضيق عجبك ابقى اعمل لى نسخة
منورتى دايما
خالص تحياتى

ابراهيم رزق يقول...

د دودى

اكيد ليكى ملف عنده

انا سمعت انه مصورك فى سى دى و انتى بتضربى سندوتش كبده و مخلل فى كافتريا الكلية
و هيحتفظ به عشان يضيع برستيجك
احذرى
منورانى
خالص تحياتى

ابراهيم رزق يقول...

شرين سامى
اختى العزيزة

انا مش بيضايقنى غير الناس المغيبة دى الحقيقة واضحة و هم بيصدقوا الكدب بقدرة قادر بقى هو ابنه كانوا فى ميدان التحرير ابن الكداب ده مبيتحركش غير بمظاهرة و كاميرات تلفزيون مالوش صورة و لو بموبايل
و لا الغتت و لاده دول اللى هيتفوقوا على سماجة جمال مبارك
و مصالحه واضحة مناسب القذافى و بيهاجم قطر عشان لبيا
اما المدونة هو فى ذوق بعد ذوقك
منورانى دايما
خالص تحياتى و تقديرى

ابراهيم رزق يقول...

اسف جدا اخطئت فى ترتيب الرد و الله خطا غير مقصود

ابراهيم رزق يقول...

زهرة نيسان

اختى العزيزة
اسف على خطأ ترتيب الرد اعتذر

متشكر على مجاملتك و سعيد جدا انها نالت اعجابك

منورانى دايما
خالص تقديرى و احترامى

ابراهيم رزق يقول...

سكندرى

اخى العزيز

سعيد جدا بزيارتك لاول مرة احنا زارنا النبى

الخوف من الناس المغيبة اللى بتنسى و بتصدق انا نفسى الناس اللى زيه تدارى خيبتها و تستخبى مش عايزين قصة صفوت الشريف تتكرر
نورتنى و شرفتنى
ملفاتى و سيدهاتى
تقديرى و احترامتى

ابراهيم رزق يقول...

REEMAAS

حمدين الصباحى رجل شريف و له تاريخ مشرف و صحفى محترم

لكن صاحبك تاريخه معروف

منورانى
تحياتى و تقديرى

ابراهيم رزق يقول...

Shaimaa

بس يا ريت لما يروح العباسية ياخذ اولاده معاه عشان نرتاح منهم دول سمجين اكتر منه
هو سيهاتوا جاهزة معاه

نورتينى و شرفتينى
خالص تحياتى

ابراهيم رزق يقول...

تخاريف مترجمة

متشكر على مجاملتك الرقيقة

طبعا المكتب فى برجين عالين

منورانى و مشرفانى
خالص تحياتى

ابراهيم رزق يقول...

ريماس

اختى المبدعة

الجهاز ده موجود بس بيغير فى الشكل اما الجوهر فبلطجية ولاد بلطجية

دايما منورانى

ارق و اجمل تحية لكى

Carmen يقول...

:‏)‏)) مكس روعة تسلم ايدك

لـــولا وزهـــراء يقول...

"
الجودة شعارنا
العراقة تراثنا
"
ههههههههههههههههههههه

معرفش ليه مش بحبه ومش بستريحله لله ف الله

ربنا يدي كل واحد على قد نيته
لولا

ابراهيم رزق يقول...

كارمن
اختى الرقيقة

شكرا دائما تعطينى اكثر مما استحق

منورانى دائما
تحياتى و تقديرى

ابراهيم رزق يقول...

لولا و زهرا

اختى الرقيقة

القبول من عند ربنا

توجد حكمة تقول ان معدن الانسان يظهر عند غضبه و سيدهاته و الفاظه موجودة و دليل عليه
هههههههه

منورانى بتشريفك و تعليقاتك
خالص تحياتى