الأحد، 8 مايو، 2011

الاسد المرعب و الفك المفترس

من منا لم يتابع مباريات الدورات الرمضانية او يلعب بها و اللى معندوش فكرة عن الدورات الرمضانية فهى دورات تقام فى شهر رمضان بين عدد من الفرق و تقام فى قطعة ارض فضاء او مركز شباب او حتى فى الشارع و طبعا الفرق من الهواة كل مجموعة من الجيران او ابناء شارع يكونون فريقا هذا فريق الكتكتوت الشرس و هذا فريق عفاريت شبرا و هذا فريق نجوم الليل وغالبا النهائى بيكون بين فريقى الاسد المرعب و الفك المفترس طبعا تحظى هذه الدورات بتنظيم جيد مثلا يتم الاستعانة بواحد يشبه الحكم بصفارة ليحكم و يحمل فى جيبه جلدتى كراسات احدهما حمراء و الاخرى صفراء لاستخدامها ككروت و طبعا  يتم احضار مكبر صوت و يتقمص احدهم شخصية معلق و هات يا تعليق طبعا المنافسة فى المباراة النهائية تحتدم بين فريقى الاسد المرعب و الفك المفترس و قد تتخللها بعض المشاجرات بين المشجعين او اللاعبين و تنتهى المبارة و يفوز احد الفريقين و يتسلم كاس من الصفيح تساوى بضعة جنيهات و ميداليات متواضعة سعر الميدالية اثنين جنية فى العتبة بينما تصل الى ثلاثة جنية فى ميدان روكسى او اربعة جنية فى جامعة الدول العربية عشان الاخوة السياح العرب و الحبيبة بينما رسوم اشتراك الفريق الواحد فى البطولة حوالى مائة جنية

ذكرت هذا الموضوع بسبب موضوع كامليا شحاتة عشرات البرامج و عشرات الروايات و عشرات الضيوف هذا برنامج يعلن عن مناظرة بين فلان و فلان و على التليفون فلان الفلانى
و هذا برنامج نقاش محتدم بين المحامى الفلانى الذى يحمل مستندات و محاضر نيابة بينما المحامى الاخر يحمل توكيل من كامليا شحاتة و صور لها معه و مع زوجها فى مكتبه
و هذا فريق يتوعد بمظاهرة مليونية ضد فلان و هذا فريق يقول ان هذا ليس من حقكم و عليكم الالتزام بشرعية القانون
و هذا المتحدث باسم شيخ الازهر و هذا المتحدث باسم البابا شنودة
عشرات الحوارات و عشرات المستندات و جدال قانونى و جدال مجتمعى و مشاجرات و مهادنات و فى النهاية الكاس  هى كامليا شحاتة مع احترامى و تقديرى لها لن تضيف الى الاسلام شىء و لن تنقص من المسيحية شىء مطلوب فقط الشفافية و الصراحة فهى ليست سر من اسرار الكنيسة و ليست لها علاقة با المخابرات الامريكية و مكانها ليس بسر حربى 
ثم حدثت الطامة الكبرى ظهرت كامليا فى قناة مشبوهة متطرفة تعادى الاسلام و تهاجم سيدنا محمد صلى الله عليه و سلم مع مذيع مشبوه وفى هذا عدم كياسة ممن سمح بظهورها فى هذه القناة و يا ليتها ظهرت فى استوديو بل ظهرت عن طريق الكونفرنس
طبعا توجد مشكلة فى موضوع كامليا شحاتة لانهم لم يناموا و يحلموا فاختاروا كامليا شحاتة كلامهم عنها به بعض الحقيقة و الحل الحقيقة الكاملة و لا شىء غيرها حتى لا يظهر اكثر من كامليا شحاتة من الخيال لان عدم وجود الحقيقة تربة خصبة للاكاذيب و الاشاعات  انتم تلعبون باالنار و العاب خطرة

فلماذا التعتيم لمصلحة من الاحتقان و الدخول فى معركة و مشاجرات و منافسات الفائز فى النهاية يفوزبكاس من الصفيح اسمه كامليا شحاتة 

ملحوظة
كتبت هذا البوست قبل احداث امبابة و اعتذر كمصرى و ليس كمسلم عنها و احذر من المزيد لان الازهر و الكنيسة لم يتعاملوا بشفافية فى هذا الموضوع لوئد الفتنة يجب اختيار الوجوه المعتدلة لتمثيل المؤسسات الدينية لان الغالبية من الشعب بسيطة من السهل اثارتها او تحريكها نحو سياسة القطيع كجماهير الكرة 
ملحوظة اخرى
يجب عدم ظهور نجيب جبرائيل و مايكل منير و حسام البخارى و ابو يحى فى الاعلام حتى لو بقرار عسكرى
الشعب يريد عدم ظهورهم
  

هناك 26 تعليقًا:

faroukfahmy58 يقول...

كبيرى ابراهيم
عشرات البرامج وعشرات الروايات عن موضوع كاميليا اللى ناقصتا بس انتاج فيلم عنها بس المشكله مين ينتج الفيلم المسلمين والا المسيحيين السلفيين والا الاخوان المناهضين والا الموالين البلطجية والا المأجورين الحالمين والا النائمين
لك الله يامصر ايه اللى جرالنا

لـــولا وزهـــراء يقول...

"كتبت هذا البوست قبل احداث امبابة و اعتذر كمصرى و ليس كمسلم عنها و احذر من المزيد لان الازهر و الكنيسة لم يتعاملوا بشفافية فى هذا الموضوع لوئد الفتنة يجب اختيار الوجوه المعتدلة لتمثيل المؤسسات الدينية لان الغالبية من الشعب بسيطة من السهل اثارتها او تحريكها نحو سياسة القطيع كجماهير الكرة "

وطالما لسة فيه تعتيم المشاكل هتتفاقم وهتبقى دايرة واسعة صعب احكام غلقها


* كاميليا هتضيف للحقيقة سواء كانت مسلمة او غير مسلمة
هي مش شخصية دبلوماسية ولا ذات منصب حساس بيعتموا على اخبارها الشخصية محتاجين حد يهدي الرأي العام عشان الرويبضة متتكلمش ع الفضئيات بما ليس لها فيه
لولا

Ramy يقول...

مش عارف

أقول لحضرتك قد ايه الواحد تعب نفسياً

من الرغى و اللت و العجن فى المواضيع دى

بس اللى أكتشفته أننا كمصريين على أختلاف أنتمائتنا ده هو أحنا

تحياتى

غير معرف يقول...

باكتبلك دلوقتي ياابراهيم وانا خايفة قوي على مصر ..مصر ماتستاهلش منا كل هذه التفاهات ..احنا لافي عهد الرسول صلى الله عليه وسلم ولا في عهد المسيح عليه السلام ..يعني الأمور كلها اتغيرت وكلنا في الأول والآخر عبيد الله يعني لاعبيد لمسلم ولا لمسيحي وياريت الناس كلها تشيل ايدها من مواضيع الدين دي ونخليهاونخليها جوة الجوامع والكنايس وبس ..ونخلي البيوت هي العامل الأساسي لتعليم الدين ونبطل القنوات الدينية بنوعيها ونخلي برنامج ديني اسلامي يوم الجمعة على القناة الأولى الحكومية ونخلي برنامج ديني مسيحي يوم الأحد على نفس القناة ..وبس خلاص اما كل المشايخ والدعاة اللي هالين علينا من كل حدب وصوب فدول مكانهم يقعدوا على مكاتبهم في الأزهر وتستمر خدمة الفتاوي اللي بالتليفون وعلى فكرة بتكون ردودهم في منتهى الجمال والإختصار الغير مخل ..اما كل التهريج اللي حاصل ده وييجوا كل واحد نافش ريشه عشان يقول كلمتين مالهمش اي لازمة غير تشويش اذهان الناس الغلابة فده حرام والله حرام وعمر الإسلام ماكان فيه كل الترهات دي ..ولاعمر الإسلام ماحايزيد بكاميليا او ماشابهها ولاحايقل اذا مادخلتش فيه هي وامثالها ..والعكس صحيح بالنسبة للمسيحية ..بس لازم الأزهر يوضح حاجة مهمة مش اكتر ولا اقل ..ان ممكن المسلم يتزوج مسيحية وتبقى على دينها عادي ..لكن مش ممكن المسيحي يتزوج مسلمة الا اذا غير ديانته اولاًللإسلام ويكون الأفضل انه يغير ديانته للإسلام عن اقتناع بالدين الإسلامي دون اي ضغط عليه وليس من اجل الزواج بالمسلمة فقط لأن ده ما يعتبرش اسلام خالص لوجه الله وربنا سبحانه وتعالى في غنى عن اي عقيدة لاتكون خالصة لوجهه الكريم ...
ياولادي الكرام مسيحي كنت او مسلم والله والله والله ربنا في غنى عن كل اللي بتعملوه ده ولو ربنا كان عايزنا كلنا مسيحيين ماكانش بعث الإسلام كديانة والعكس صحيح وقبل الإتنين كان خلانا كلنا يهود ياريت نرتاح بقى ونقعد ونلم نفسنا ونعلنها في كل مكان :الدين لله ..والوطن للجميع ..ياريت نعلنها كلنا وياريت اي حد فيكم ممكن يكلم الحكومة يوصلها بس ان احنا مش عايزين كل القنوات الدينية دي وعايزين الأخوة المسيحيين ما يحسوش انهم محاصرين في كل حتة بشيخ او داعية ولاننسى كم عشنا قروناًونحن لاندري من فينا المسيحي ومن المسلم واقسم بالله اني لم يكن معي لا أنا ولا اخوتي نسخة من مفتاح شقة امي _رحمها الله_في شبرا والوحيدة التي كان معها مفتاح كانت طنط ام فيفي _المسيحية _جارة ماما وكنا نطمن منها على امي لأننا جميعا كنا لانستطيع رؤيتها سوى في العطلة الأسبوعية ..والأجمل اننا بعد وفاة امي تنازلنا عن شقتها لحفيد طنط ام فيفي الذي كان على وش جواز ..عايزة اقول يا جماعة الدنيا احلى من كده بكتيروصحيح انا خدت المدونة ايجار من ابني الحبيب ابراهيم لكن كنت محموقة قوي فعذراًولازم نشوف حل ..لازم

ساسو يقول...

دام قلمك متألقا
من نجاح لنجاح

مصطفى سيف يقول...

تصدق بالله
لسه كاتب اخر مقطع عندك في كومنت على الفيسبوك بالرغم مكنتش لسه قريت البوست بتاع حضرتك
الكومنت يمكن بالحرف علشان كده مش لاقي كلام اقوله تاني غير اني متفق معاك تماما في ان الازهر والكنيسة لازم يقومو بمسئولياتهم في التوعية والارشاد والشفافية والاخلاص في حل المشكلة
ما حدث بالامس في امبابة مهزلة
ودليل اننا بالرغم اننا شعب له سبعتلاف سنة الا اننا لسه في كي جي وان ديمقراطية وحضارة
تحياتي

zizi يقول...

باكلمك تاني عشان احط الurl لمدوناتي
1-مدونة القلب الأخضراني::
اhttp://zeinabsadekragab.blogspot.com
2_مدونة:ماتيجوا نعيش عمرنا ..ربيع العمر
http://zeinabsadek.blogspot.com
3-مدونة اتمشى بين ضلوعي
http://etmashabaindolo3y.blogspot.com
وفيه حاجة عايزة اهديها لكل قرائك الأفاضلحايلاقوها لما يدخلوا على مدونتي الجديدة اتمشى بين ضلوعي ..بس برضه دا ما يمنعش اني اشوفهم على مدوناتي التانية عشان يشوفوا حكايتي مع :شريف واريج ...ادخلوا وحاتعرفوا كل حاجة
وفي حاجة كمان بلغني بيها الأستاذ ابراهيم ..اني ابتدي انزل بالحلقة 15 من معطف من قيود ..وصدقوني انا خايفة جداًمنالتجربة دي لكن عارفة اني داخلة وسط ناس حلوة وان شاء الله اكون عند حسن ظنهم
وباي باي بقى

كريمة سندي يقول...

كل سنة وأنت طيب مقدما والفكرة جميلة

د/دودى يقول...

الاول كده مايكل منير طالع مع عمرو اديب يعنى طلبات الشعب متنفذتش المره دى...

ياما اتكلمت لاقيت نفسى بدخل فى مناقشات فى الايدلوجيات و انت عارف...

انا قلت من فتره لو الست دى طلعت و قالت انها مسيحيه شكلنا هيبقى زى الزفت بعد التجعيير و الزعيق ده كله...

خلصنا من كاميليا فاضل عبير ...

سؤال : هو مفيش غير الستات اللى بتسلم فى مصر؟؟

ريبال بيهس يقول...

مساء العطر ابراهيم

في البداية أقدم التعازي في ضحايا الأحداث المؤسفة في مصر .

ثانياً للأسف هناك من يقوم بعملية شحن طائفي للبسطاء الذين لم يفهموا اللعبة بعد وبالفعل يتحركون بسلوك القطيع نظير أتباعهم لشخص موثوق أو على درجة من التدين فلا يصدقون سواهلأنه مثل السلطة المطلقة لديهم وكان الاجدر برجال الدين إيقاف الهتافات الطائفية والتي تطلق بقصد وبدون قصد حتى حدث الإنفجار الطائفي للأسف والذي سقط فيه العشرات والملوم هنا هم رجال الدين الذين لم يحتوو الإحتقان فكانت النتيجة دموية ...

أعود وأقول هناك من يلعب بالنار في مصر وهدفه واضح تماماً وهو إشعال الطائفية لهدف محدد ومفهوم ويجب على المصريين التنبه لهذا الأمر ...

تحياتي وتعازي

أمال الصالحي يقول...

سحقا لمن يزرعون الطائفية والبغضاء بين أفراد الشعب الواحد، ويحاولون دس سمومهم لإبطال حركة التقدم ..هم المستفيدون الوحيدون من نشر الفرقة والنزاعات اللامنتهية..

وجع البنفسج يقول...

انا حزينة جدا على احداث امبابة ، ويارب ماتتكررش ثاني ، وكل تعازينا لاهالي الضحايا ..

ربنا يبعد عنكم شر الفتنة الطائفية .

ابراهيم رزق يقول...

فاروق فهمى
استاذى العزيز

العفو يا استاذى انت كبيرنا و على راسى مقامك كبير
اما الفيلم اللى ناقص ده هيبقى فيلم كومدى تراجيدى سسبنس اكشن
تفتكر هينجح
حقا لكى الله يا مصر
خالص تحياتى

ابراهيم رزق يقول...

لولا و زهراء

و الله يا لولا بعد ما ظهرت على شاشة التلفزيون اكدت رائى اضعاف اضعاف

نعم لماذا التعتيم هى سر عسكرى

خالص تحياتى

ابراهيم رزق يقول...

رامى

اخى العزيز

انا مش عارف هاقولك ايه

انا بعزى نفسى فى المسيحين اللى قتلوا
و بعزيك فى المسلمين اللى قتلوا

خالص تحياتى

ابراهيم رزق يقول...

امى العزيزة المعرفة

تعليقك بوست منفرد ادعو الجميع لقرائته

و ساكتفى
بدون تعليق منى

تحياتى و تقديرى و حبى
كلمة على جنب
انا كنت عارف انك هتجيبى سيرة طنط ام فيفى و متسالنيش عرفت منين

ابراهيم رزق يقول...

ساسو

متشكر على مجاملتك الرقيقة

خالص تحياتى

ابراهيم رزق يقول...

مصطفى سيف

اخى العزيز

متفق معك تماما
لكن ثلاثون سنة ظلام تؤثر على البصر

خالص تحياتى

ابراهيم رزق يقول...

كريمة سندى

كل سنة وانتى طيبة

خالص تحياتى

ابراهيم رزق يقول...

د دودى

شاهدت اللقاء و انا اللى باعتبر نفسى معتدل اثارنى بحديثه المستفز فما بالك باخوانا السلفيين و الناس البسطاء

اما موضوع الستات فبدء المشوار بكامليا وعبير و سيمتد الى روائح و ينتهى بفلة

خالص تحياتى

أنا حرة يقول...

أخى الكريم
السلام عليكم ورحمة الله وبركاته
دخلت هنا أسجل مرورى وإحترامى لشخصية قد أختلف معهاا ولكن أحترمها وأعتز بالتواصل معها
ولا أخفيك سرا اننى لا أتفق مع هذه الرؤية المطروحة وكذلك مع معظم التعليقات
تعرف وجهة نظرى فى هذا الموضوع وهى وجهة نظر أقتنع بها جدا ولا ألزم أحد بها ولهذا فلنتركها جانبا حتى يقضى الله أمرا كان مفعولا وأنا أتمنى أن يتم التحقيق هذه المرة لعل التحقيق مع عبير بعد ظهورها يظهر خفايا هذا الموضوع فيرى الجميع القضية بوضوح
تحياتى وتقديرى

ابراهيم رزق يقول...

ريبال بيهس

اخى العزيز

اشكرك على مشاعرك الطيبة و الجميلة تجاه مصر

متفق معك تماما فيما تقوله و لذا لن اعلق على تعليقك بكلمة اخرى

منورنى دائما
خالص تحياتى

ابراهيم رزق يقول...

امال الصالحى

اختى الفاضلة

سيرد الله مكائدهم باذنه و سرجعوا خائبين

منورانى
تحياتى و تقديرى

ابراهيم رزق يقول...

شجن البنفسج

اختى العزيزة

متشكر على مشاعرك الطيبة
يارب متكررش

دايما منورانى
تحياتى و تقديرى

ابراهيم رزق يقول...

انا حرة
اختى الفاضلة

اعرف اننا قد نكون مختلفان فى وجهة النظر لكننا متفقان على الهدف كما انى اكن لكى كل تقدير و احترام و الاختلاف و النقاش شىء جيد و وجهات النظر هى اراء شخصية لا نلزم بها احد و لكن قد اعيد انا التفكير و هذا يحدث و وارد انا لا اتحجر على ارائى اذا ثبت غير صوابه
سعيد بالتواصل المحترم رغم الاختلاف هذه الحياة قد نلتقى فى نقاط و قد نختلف و لكن يبقى الاحترام و مصلحة و رفعة مصر و هذا هو هدفنا جميعا
منورانى
تحياتى و تقديرى

Carmen يقول...

لكل شخص مسؤول قصر ولم يكون علي قدر المسؤولية حسبنا الله ونعم الوكيل
تقبل مروري