السبت، 11 يونيو، 2011

فينك يا عم عبده

من اكثر الاشياء التى اكرهها اسرائيل و صوت تامر حسنى و ورق النتيجة طبعا ورق النتيجة عارفين باكرهه ليه اما اسرائيل و تامر حسنى طبعا لا تعرفوا  نتكلم جد شوية طبعا اثناء خروجى من المنزل اسمع صوت طيب حنون من ام زياد ابقى خد ورقة النتيجة اللى على الترابيزه دى معاك و انت خارج طبعا ورقة النتيجة دى بيبقى فيها طلبات حسبة ثلاثون جنيه لبن و عيش و زبادى و لانشون او فوق المائة جنيه اذا كانت  تتضمن مسحوق الغسيل بتاعع  الحضرى طبعا انتو فاهمين
زمان و انا صغير كنت باحلم ابقى كبير تعب القلب و اتغير ايه ده انا هاغنى و لا ايه زمان كنت اذهب الى عم عبده البقال ازيك يا عم عبده عامل ايه ادينى ربع كيلو جبنة براميلى على ربع جبنة رومى و شوية زيتون و زجاجة زيت حسابك كام يا عم عبده خد الحساب تمام التمام
حاليا نذهب انا و العائلة الكريمة الى فرع من الفروع المنتشرة لسلسلة السوبر ماركت الشهيرة محسوبكم بخبث امسك بالسبت الحديدى الصغير لكن نظرة رقيقة من ام زياد جعلتنى اترك السبت الحديدى بسرعة  و امسك بالعربة الضخمة طبعا تكفل زياد و ساليناز بجر العربة و تنسيق المشتريات بينما امسكت زوجتى بورقة العرض الخاص دخلنا الى قسم الادوات المنزلية امسكت ام زياد بثلاث دست مشابك ليه يا ستى قالتلى دول ميكفوش اسبوعين عيالك بيلعبوا بهم او بيرموهم من البلكونة ماشى امسكت بطقم كوبايات هو انتى عايزاه يا ستى قالت عليه عرض مش هيخسر
طبعا ملئت العربة ببعض الاشياء ذهبنا الى قسم اخر امسكت ام زياد بكيس مسحوق الغسيل ميلت عليها قليلا و قلت لها احنا جبنا مسحوق امس قالت ده عليه عرض صابونتين لوكس استسلمت امسكت بزجاجة الشامبو و قالت و الله كويس ده الزجاجة دى عليها عرض معجون حلاقة ينفعك و ايه ده شاور كمان عليه عرض ليفة مش هيخسر
انتقلنا الى قسم البقالة امسكت ام زياد بزجاجة سوداء ايه ده يا ام زياد ده صويا صوص لتتبيل الفراخ و الشيش طاووك و امسكت بزجاجة اخرى ايه دى ده ويسترن صوص بتاع ايه ده للحوم ثم امسكت بزجاجة ثالثة ايه ده ده دمجلاس ليه يا ام زياد ده عشان البيكاتا ثم زجاجة الكاتشاب و المايونيز و الفلفل الاحمر و   و   و
طبعا لم اذكر الكورن فيلكس عرض 1 +1 و الجيلى و البسبوسة و الايس كريم و الكاستر و الكيك كله عليه عروض 
مشينا قليلا وجدنا فرصة هائلة عشر كوبيات زبادى عليها كوباية و خمسة زبادو عليه واحد و العرض الشهير تخفيض عشرة جنيهات على الجبن الركفورد يا ستى انا مش بحب الجبن الركفورد ده جبنة معفنة الاجابة جاهزة مش ممكن عيالك يحبوها حاضر يا هانم  و ايه ده يا ام زياد دى جبنة مودزريلا ليه يا ام زياد دى عشان البيتزا طب ما نمشيها شوية جبنة رومى مبشورة مينفعش هكذا قالت و هكذا استسلمت
طبعا تكرر كل ذلك فى اقسام اللحوم و الاسماك طبعا لا تنسو عروض العصائر و المياه الغازية و الشيكولاتة و البسكويت التى تكفل زياد و ساليناز بمتابعتها و اخبار امهم بها اول باول
طبعا الشىء المستفز هو وضع الحلويات و الشيكولاتة و المصاصة المستوردة امام الكاشير طبعا زياد و ساليناز امسك كل منهم بمصاصة اكتشفنا عند العودة الى المنزل ان سعر الواحدة خمسة جنيهات  مالها العسلية
طبعا خرجت الفاتورة حوالى متر و نصف وسط ضحكات زياد و ساليناز و دموعى على جيوبى التى اصبحت خاوية
جلست على الرصيف المقابل وسط كم كبير من الشنط و قد امسك زياد و ساليناز بالمصاصة بينما امسكت بمعجون الحلاقة الذى فى العرض و اقول احلق دقنى لو جيت هنا تانى و مع ذلك بحلق دقنى و باجى صحيح بلد عروض عروض  فينك يا عم عبده يا بقال  بلد مجانين صحيح
 


 

هناك 25 تعليقًا:

Ramy يقول...

(:
عموماً فى ناس كتير بيحبه العروض

مابالك بالسيدات اللى هما أصلا بيحبوا الشراء

ف لما يشوفوا عروض عمروهم ما هيفوتوها

و حضرتك كان حظك حلو المرة دى كان السوبر ماركت كله عرووض (:

ربنا يخليهملك و تعيش و تجبلهم

أم هريرة (lolocat) يقول...

هههههههه
والله انا خايفة عليك من الحسد
خفة دم ماشاء الله واسلوب ساخر راقى جدا من الاوضاع السائدة

ربنا يبارك لك فى ام زياد وفى زياد واخته هههههه والله واضح انها ست بيت وام حنون

شوية جد /
بيعجبنى جدا اسلوب البلاد الاوروبية فى شراء مستلزمات المطبخ
يعنى مثلا لو الواحد ساكن وحده ممكن يشترى الفاكهة (بالحبة ) يعنى واحدة تفاح او اتنين وهكذا حسب احتياجه وهذا المبدأ يطبق فى كل السلع

لكن العربى مشهور بالكرم (( العبيط )) يحب (( يمنجه )) نفسه واسرته حتى لو هيرمى باقى المشتريات فى سلة المهملات

ياريت نتعلم ازاى ننسق مشترياتنا حسب الاحتياج الحقيقى

شكرا لك جدا جدا
وربنا يرزقك برزقهم ههههههه

تحياتى لك

zizi يقول...

انت حاتقولي على عم عبده دول تقريباً كان اسمهم عم عبده وتلاقي مايطلق عليها عرضاً رُخامةزي الزفت وكلها بقع زيت لأنه غالباً بيبقى بتاع التموين كمان..اما احلى جبنة براميلي واسطمبولي ورومي كانوا من عنده وكان احيانًايبقى عنده عيش محمص بنوعيه البلدي والشامي ..بس هي العروض على حسب الست فيه ستات سهل التأثير عليهم دول ياويلك إذارحت معاهم وكانو عارفين _أو _معتقدين ان معاك فلوس ..مايهداش لهم بال الا اذا خلوك عالبلاطة...وبجد بجد مش باشكر في نفسي لكن دايماً في العروض بالذات اذا ماكانش العرض مغري تماماً ماخدوش وافضل تفضل معايا فلوس احسن من عرض مش محتاجاله بتاتاً..وده انا بشوفه احسن وكل شيخ وله طريقة ..تحياتي

موناليزا يقول...

تعيش وتجيب لهم:)

على فكرة انا عارفاها المصاصة ام خمسة جنية دى..حاجة تغيظ لانها طلعت نزلت مصاصة يعنى
كنت هجيبها فى مرة لولاد اخوبا وانا من عادتى بحب اشترى كميات فباخد راحتى واختارت كذا واحدة بألوان مختلفة ولما عرفت السعر اتصدمت.. واشتريت لهم حاجة تانية:)

Carmen يقول...

علي فكرة كل الستات كده :d
تسلم ايدك

مصطفى سيف يقول...

بلد مجانين مجانين يعني
انا كل شوية في شركات تتصل بينا في البيت تقولك رقمك كسب معانا وكسبت عرض كذا او كذا طقم حراري مثلا او ماكينة حلاقة او تلفزيون وده سعره كذا بس علشان انت كسبت معانا هيبقى بنص التمن
طبعا اللعاب يسيل ويقول دي فرصه مش هتتكرر
وادفع يا معلم وشيل حتى لو مش محتاجه
اعتقد ان العروض بتجري في دم الشعب المصري
تحياتي

Ms Venus يقول...

فى حاجات كتير فينا عاوزة تتغير

لا عاوزة تتنسف


بس ازاى ؟.... معرفش !

د/دودى يقول...

الهايبر ماركت خرب الدنيا و على يدى ... ماما حلت تلك الازمه بامتناع كلى عن زياره تلك الاماكن بعد قصور شديد فى مصروف الشهر فى تلك المره اللى عملتها فيها ...هناك الرخيص غالى لانك هتجيب حاجات عمرك ما كنت هتجيبها و بكميات ...دور لك على عم عبده جديد ارخص

ريــــمــــاس يقول...

مساء الغاردينيا أستاذ ابراهيم
لا المرادي مش حاجي مع ام زياد عليك
لاني حسيتك غلبان جداً هههههههههه
ربنا يخليهالك وتعيش وتجيب لها
هو الست تحب حاجة قد المشتريات كويس الي بتحب جوزها واولادها اكتر هههههههههه
؛؛
؛
لروحك عبق الغاردينيا
كانت هنا
reemaas

خيط الحرير يقول...

بسم الله والصلاة علي رسول الله
مالها العسليه...والفول والطعميه
عارف أحيانا بيصعب عليه الرجاله بس بصراحه برجع وأقول هما بيعملوا أيه يعني إلا الصرف ...ولا بيذاكروا للعيال ولا بيقولوا للواد صلي ولا للبت أسكتي ولا بيردوا ع التليفون ولايبوظوا الأكل ويرجعوا يطبخوا من جديد..خلاص يبقي يصرفوا ..بس بصراحه أنا لسه بشتري من عم عبده ..مالو يعني طاجن الباميا في الفرن والحلو رز معمر..وشوية دقيق ونخبزو رغيفين بلدي علي حتتين جبنه قريش عليهم وش اللبن ولا شوية قشطه...بس أنسي بقي المنظفات والشامبو والكريمات ..(نهار وليل )آه كله إلا ده...ومتنساش قفصين فروله علي خوخ0 علي مشمش عشان الأطباق والعصاير..وفي النهايه الحسبه يا عم تصرفلك بعد التوفير والذي منه بتاع 1500جنيه شهريا مع أكلتين قرديحي ف الأسبوع..(كشري بقه..أو مسقعه بفتفوتة لحمه ولا صنية عجه أي حاجه والسلام) وأنت ف الأرياف من غير النور والميه والإيجار وهدوم الأعياد والمدارس والمناسبات (لو الناس بطلت تتجوز)وهلم جر ...
الله يخربيتك يا حسني أنت واللي معاك ..سرقونا نهبونا ومن بلدنا ها يطفشونا..
كلنا نعاني يا أخي..حتي في أبسط لأماكن
عارف جرب سياسه الضحك علي أم زياد..ربي معاها العيال وساعدها في المذاكره وأشتغلها في صحي ولذيذ يمكن ترحمك من شغل المولات.
أشكرك فعلا لأنني هنا أبتسمت.

Magician يقول...

طلبات كثيرة

فاتورة كبيرة

هم المصروف الذي لا يبقى لآخر الشهر

ولكن بسمتهم تغسل كل ذلك

شكرا شكرا

دعاء العطار يقول...

هههههههههههههه

مساء العروض

" طبعا زياد و ساليناز امسك كل منهم بمصاصة اكتشفنا عند العودة الى المنزل ان سعر الواحدة خمسة جنيهات مالها العسلية "

مش عارفه والله مالها العسليه .. دى حتى لذيذه خالص

ربنا يخليهوملك يارب ويخليلك أم زياد ويباركلك فيهم (: (:

ابراهيم رزق يقول...

رامى
اخى العزيز


كان حظى حلو الى اخر جنيه معى

خالص تحياتى

ابراهيم رزق يقول...

ام هريرة
اختى الفاضلة

متشكر جدا لمجاملت و سعيد بتعليقك

ربنا يخليكى

طبعا البلاد الاوربية كل واحد بياخذ احتياجه كنت فى اليونان الميزان الديجتال موجود تاخذ تفاحة او موزة و تحاسب
هنا الفكهانى تقوله اثنين كيلو يقولك خليهم ثلاثة عشان نقفل الحساب او نقفل الميزان

نورتينى
خالص تحياتى

ابراهيم رزق يقول...

zizi

امى العزيزة

يا عينى على العيش المحمص مع طعمية سخنة و حتتين جرجير و الله العظيم احلى من الجبنة الركفورد
هى عملية عرض السلع فيها اغراء لانك ترى السلع امامك
اما عم عبده فانت محدد ايه
ها فكرك بحاجة البقالين زمان كانوا بيعملوا سندوتشات بنفسهم
افتكر و انا صغير ان البقال كان يفتح علبة التونة بنفسه و يحط عليها خل و شطة
فينك يا عم عبدة

نورتينى
تحياتى و تقديرى و حبى

ابراهيم رزق يقول...

موناليزا

طبعا المصاصة دى معروفة و موجودة امام الكاشير يعنى هتشترى يعنى هتشترى

ربنا يخليلك ولاد اخوكى

نورتينى
خالص تحياتى

ابراهيم رزق يقول...

كارمن
اختى الرقيقة

و شهد شاهد من اهلها
ههههه

نورتينى
خالص تحياتى

ابراهيم رزق يقول...

مصطفى سيف

اخى العزيز

فعلا عالم عروض عروض و يقدملك العرض كأنه بيخسر

تحياتى

ابراهيم رزق يقول...

Ms Venus

معكى حق حاجات عايزة تتنسف

نورتينى
خالص تحياتى

ابراهيم رزق يقول...

د دودى

الله يكون فى عون بابا و عون ماما

متفق معكى تماما انا باذهب الى البقال محدد طلباتى على قد اللى فى ايدى

نورتينى
خالص تحياتى

ابراهيم رزق يقول...

ريماس
صباح الفل و الورد

اخيرا صعبت عليكى عشان تعرفى انى غلبان ههههههه بس كويس انا طلعت بمعجون الحلاقة

ربنا يخليكى و يرزقك بفارس الاحلام

نورتينى
تحيات معطرة بالمسك و العنبر

ابراهيم رزق يقول...

خيط الحرير

سعدت بكى جدا و بتعليقك اللى زى العسل

طبعا هو فى اجمل من طاجن البامية او الرز المعمر على وشه القشطة و لا العيش البيتى اللى يتاكل حاف حتى اخر لقمة

صحى و مفيد مبقاش ينفع اللعبة انكشفت

اما اقتراحك الاخير اذاكر مع الاولاد لا اروح السوبر ماركت اصلى محسوبك انتيخ كبير هههههه

نورتينى و ارجو دوام التواصل
خالص تحياتى

ابراهيم رزق يقول...

Magician

متفق معك تماما
طبعا بسمتهم تسعدنى

سعيد بمرورك
اتمنى زيادة التواصل

تحياتى

ابراهيم رزق يقول...

دعاء العطار

ههههههههه
فعلا مالها العسلية على الاقل عسل اسود مليان حديد مش جلوكوز
و بعدين فى الاول و الاخر مصاص مالها ام جنيه

نورتينى
خالص تحياتى

ياسمين يقول...

ههههههههه ربنا يكون في عون حضرتك واديك طلعت بمولد بحمص ومعجون حلاقة كمان هههههه دلوقتي الأطفال مش بتاعة العسيلة ام جنية زمان كانت بشلن هههه دول بتوع العسيلة ام عشرة وممكن بخمسين كمان هههه