الأربعاء، 15 يونيو، 2011

انا و الفول

بمناسبة قيام  محل فول شهير بتوقيع عقد رعاية للموقع الرسمى لنادى الزمالك الحبيب  لا اعرف تاريخيا كيف بدء الحوار بين المصريين و الفول فالفول مرتبط تاريخيا بالمصريين لدرجة من الصعب ان يمر اسبوع على اى مصرى دون ان يفطر فول مهما كان مستواه
محسوبكم بيحب الفول وباروح ورا الفول اى حتة لكن مش اى فول لازم وش القدرة طبعا اغلبكم لم يأكل وش القدرة لانه مرتبط بتوقيت معين و هو بعد الفجر عادة ارتبطت بها انا و اصدقائى من ايام الدراسة نسهر نصلى الفجر بالمسجد ثم نديها الفول التمام
طبعا كل مطاعم الفول الشهيرة تشرفت بركوبها اقصد بزيارتها بدء من البغل بالمحلة الكبرى و انتهاء بالجحش بالسيدة زينب طبعا لا ننسى محمد احمد بمحطة الرمل بالاسكندرية و جاد الاصلى بتاع اسكندرية مش التايوانى بتاع القاهرة اذكر ايضا اخر ساعة و نجف و التابعى بمناسبة التابعى اذكر هذه القصة
صديق لى من الاقاليم وعدته بعزومة كبيرة حضر نفسه للعزومة و قعد يومين ميأكلش ذهبت الى التابعى اللى راحو رئيس الوزراء جلس على الترابيزة وجد الاجانب يملئون المحل حضر المتر و اعطانا المنيه امسك بالمنيه فول بالزيت فول بالسمنة فول بالزبدة فول باللحم المفرومة صرخ صائحا اخيرا لقيت لحمة استغربت و قلتله فيه ايه قال اخيرا لقيت لحمة كله فول فول استغربت من كلامه مرة اخرى وقلت ما احنا فى مطعم فول تملكه الزهول وقال طب لما ده مطعم فول و طعمية طب الكباب و الكفتة يتباع فين

قد حالفكم الحظ بالذهاب الى هذه المطاعم لكن المتعة الحقيقية للفول هو الوقوف على عربة الفول طبق الفول المعتبر بالطحينة و الزيت الحار مع شوية سلطة طماطم و عودين جرجير و خس حاجة ممتعة كلكم محرومين منها
من اشهر العربات الشهيرة عربية حمدان و عربية عم عبدة دولار
و عم عبدة دولار لمن لا يعرفه تقف عربيته بشارع سليم الاول بالزيتون امام مدرسة ابن خلدون الثانوية امام سوبر ماركت اولاد رجب دعاية مجانية اهو يفتخر عم عبدة دولا بزبائنه و انهم من جميع الطبقات و لا يجرء اى زبون أن يسأله لماذا طبق الفول و السلطة بعشرة جنيه يسحب طبق الفول من امامه و يقوله متجيش تأكل عندى تانى شوف ليك محل كباب على قدك
التقيت صباحا ببعض اصدقائى و قلنا نديها فول قالوا نديها فول ركبنا سيارة احدهم و ذهبنا الى حمدان قام معانا بالواجب العيش المحمص و الفول و البيض و وقفنا نأكل بكل استمتاع كان من ضمن المجموعة صديق يعمل مديرا للعمليات بشركة طيران اوربية شهيرة  بمحطة القاهرة و اذ فجاة تظهر زوجته المدرسة كانت فى طريقها الى مدرستها مع زملائها صدمت زوجى اللى لف العالم يقف على عربية فول اقول ايه لزمايلى المدرسات او التلاميذ بتوعى و تأزم الموقف و صارت مشكلة عائلية كبيرة هى تتمسك بعدم وقوفه مرة اخرى و هو يتمسك بعربة الفول الى ان وصلوا الى حل وسط بوقوفه على عربة الفول فى الاجازات المدرسية او فى غير اوقات المدرسة
بلد مجانين صحيح   

هناك 20 تعليقًا:

ريبال بيهس يقول...

مساء الورد ابراهيم

بصراحة كذا أنا ماليش في الفول كثير

بس هي أكلة بجد تقوم الجسم وتعطيه

قوة وفي نفس الوقت تعطيه أحتياج

يوم كامل من البور لأني أتذكر في

مرة أكلت فول ولا جوعت إلا اليوم

الثاني ....

تصدق بالله نفسي في فول مع السمن

والمخلل ...

ريــــمــــاس يقول...

مساء الغاردينيا عمنا مضبوط
<<< مش حتنساها ابداً
بس عارف بجد لما بشوف عربة الفول في المسلسلات المصرية ببقى حاسة انه الفول بتاعها مختلف ونفسي اجربه يبقى ان شاء الله اجرب فول عم عبده على مسؤليتك وطبعا انت الي عازمني ونعزم السيد ريبال الي عاوز فول مع مخلل <<<< لازمه فول عشان التخشيبة بتاعت العين الزايغه شفت قد ايه قلبي طيب وحنين <<< شريرة هههههههه
عاوزة تخسرك بتعزم السعودية كلها عندك
ربنا يخليك ويديك الصحة والعافية
ويارب وجبة الهنا
؛؛
؛

على فكرة راح افتقد ركنك الجميل وخفة دمك ومدونتك المرحة الحلوة لسفري الليلة بس لازم لما ارجع اقرأ كل بوست فاتني :)
؛؛
؛
لروحك عبق الغاردينيا
reemaas

كريمة سندي يقول...

ومين ما بيحبش الفول والفوالين تحياتي

Magician يقول...

الفول غذاء الفقراء

وغذاء الأغنياء

به فوائد

به لذة

شكرا شكرا

reemaas يقول...

انا اول مرة اعرف ان فيه فروع للبغل فى المحلة انا كنت فكراه فى المنصورة وبس

هههه
عموما انا من الناس اللى بياكلوا وش القدرة فى اى وقت لاننا بنعمله بيتى حضرتك

دعاء العطار يقول...

الست اتصدمت ياعينى

بس عارف أحسن حاجه البساطه

فيه حاجات قليله أوى بتخللى الواحد مبسوط وفرحان ... بالرغم ان فيه حاجات ممكن تكون فى نظر الناس سبب للسعاده وبالنسبه له هو ولا حاجه

أنا كمان بحب الفول ع فكره بس أكيد مش ع العربيه D: D:

هبة فاروق يقول...

ان خلص الفول انا مش مسئول دة حتى عدوية غنى للفول
بحب الفول جدا وخاصة من العربية
تحياتى

أم هريرة.. lolocat يقول...

السلام عليكم
انت فكرتنى باخويا
طبعا الحمد لله كل البيت وقت الفجر بنصلى جماعة
بعد الفجر بقى بيكون البيت هايص وكأننا فى الضهر
يقوم ايه بقى اخويا حبيبى بيكون جعان قوم ايه نلاقيه لبس لبس الفول حاكم الفول عند اخويا له طقوس معينة ولبس مخصوص مثلك تمام هههههههه قوم ايه ينزل وبعدين يرجع بعد شوية معاه من خيرات ربنا الجميلة

علب الفول الجاهزة والطحينة الجميلة والبصل الاخضر والطعمية ام سمسم السخنة
والسلطة المعتبرة غير المخلل طبعا
قوم ايه خير اللهم اجعله خير كل العيلة تتجمع ويكون فطار محترم من اللى قلبك يحبه لانه ماينفع نقف طبعا على عربية فول دى من الممنوعات طبعا ههههه لكن اخواتى الرجاله مش بيهمهم طبعا وبيعملوا مثلك هم واصدقاءهم خاصة فى رمضان فى السحور

بالمناسبة كل سنة وانت طيب الايام الطيبة على الابوب واحب اكون من اوائل الناس اللى تهنيك
شكرا لك اخى الكريم على مواضيعك الجميلة
اشعر دائما انى اجلس مع اخى ويحكى لى عن مغامراته المختلفة
تحياتى لك :)

شيرين سامي يقول...

هههههههه
أنا كمان بحب الفول بس مش أوي كده و مكالتش غير من التابعي و جاد و آخر ساعه بس نفسي أجرب ركوب الفول:)
تحياتي ليك

شيرين سامي يقول...

نسيت أقولك صحيح حد يعزم حد على فول ده لو أنا ههههههههه

Carmen يقول...

والله عندك حق متعة بجد وهي احدي مظاهر تراثنا المصري

ابراهيم رزق يقول...

ريبال بيهس
اخى العزيز

نفسك فى فول بالسمنة و مخلل غالى و الطلب رخيص

تحت امرك يا افندم

نورتنى
خالص تحياتى

ابراهيم رزق يقول...

ريماس
مساء الفل و العنبر


ههههههههههه
ده انا عشان خاطرك و خلطر ريبال اعزم السعودية نفسها

عم عبده دولار نفسه اغير اسمه الى عبدة ريال

على فكرة لما تيجى مصر هاكلك عنده مش هتندمى
تروحى و تيجى بالسلامة رحلة سعيدة
فى انتظارك

دايما منورانى
تحيات معطرة بالورد و الياسمين

ابراهيم رزق يقول...

كريمة سندى

محدش ما بيحبش الفول

نورتينى
خالص تحياتى

ابراهيم رزق يقول...

Magician

متفق معك تماما

نورتنى
خالص تحياتى

ابراهيم رزق يقول...

reemaas

العكس صحيح الاصل فى المحلة و الفرع فى المنصورة

ابقى اعزمينا بقى على الفول البيتى
ههههههه

نورتينى
خالص تحياتى

ابراهيم رزق يقول...

دعاء العطار

فيها ايه لما نقف على عربية فول

تعرفى يا دعاء فى ممثل اصبح شبه شهير و كان بيقف معانا الوقوف على عربة الفول متعة و مش شايف انها تقلل من الواحد
لكنها حبكتها

جربى مرة كده و اقفى على عربية فول مفيهاش حاجة مش انتو بتطلبوا المساواة فى كل حاجة جت على عربية الفول
هههههههههههههه

نورتينى
خالص تحياتى

ابراهيم رزق يقول...

هبة فاروق

يا مرحب بالفول و محبى الفول
فعلا لو خلص الفول انا مش مسئول
هههههههههههه

نورتينى
خالص تحياتى

ابراهيم رزق يقول...

ام هريرة
اختى العزيزة

يا مرحب باخوكى و كل محبى الفول

يا سلام ع الفطار الجماعى ما احلاها اللامة
ربنا يخلوكى لبعض و يهنيكوا و يسعدكوا ببعض

يعلم الله انى اعتبرك بمثابة اختى
كل سنة و انتى طيبة

نورتينى
خالص تحياتى

ابراهيم رزق يقول...

شرين سامى
اختى الفاضلة

تابعى ايه و اخر ساعة ايه و جاد ايه
هههههههههههههههههه

يا سلام على وقفة العربية و هات عودين جرجير يا عم عبده قشر لينا بيضتين يا عم عبدة شوية سلطة خضرا يا عم عبدة تحسى بمتعة الفول
تعرفى يا شرين انا مستغرب الحاجة الوحيدة اللى البنات معملتهاش لحد دلوقتى الوقوف على عربة فول
سؤال برىء يا بيه
ماذا تفعلين لو رايتى زوجك يقف على عربة فول هههههههههه

هو انا عزمته فى اى حتة انا عزمته عند التابعى اللى بيرحوا رئيس الوزراء

نورتينى و اسعدتينى بتعليقك
خالص تحياتى