الأحد، 5 يونيو، 2011

بيب بيب اهلى

محسوبكم اللى هو انا اهلاوى غيرمتعصب جدا معتدل فى تشجيعى جدا جدا فى جميع مباريات الاهلى ترتفع حالة الطوارىء فى البيت سواء كانت مباريات كرة قدم او سلة او طائرة او حتى اسكواش لى طقوسى اثناء المشاهدة اجلس على الارض امام التلفزيون بكل عصبية تجلس جانبى زوجتى و هى تحمل فوطة و علبة مناديل متفهموش غلط المناديل لكى تمسح بها العرق اما الفوطة فلكى تمسح بها الشاشة اذا بصقت على الحكم او احد اللاعبين  طبعا اذا لم اكسر الشاشة كما حدث من قبل فى احد المباريات
زياد و ساليناز طبعا اصبحت لهم طقوسهم يوم المباراة يرتدون التيشرتات الحمراء طبعا يوم سعدهم لو الاهلى فاز الهدايا المالية من ستهم الاهلاوية جدا غير المتعصبة مثلى تماما اما انا فاعطيهم  شيكولاتة جلاكسى و ايس كريم و كل ما يطلبوه منى كما من الممكن ان اسمح بمرة اضافية من مكرونة اندومى اما لو خسر الاهلى يا سواد ليلهم لن احكى ما يحدث منى
طبعا اغلب تزويغاتى ايام ثانوى و جامعة كان بسبب مباريات الاهلى لا تفوتنى مباراة حتى مباريات الناشئين تعرفت على اغلب المشجعين و صارت بينى و بينهم صداقة ميمى و جزرة و عم حسين و ريعو و حربى كما كنت التقى ببعض الفنانين الاهلوية لما ربنا فتحها عليا و تركت الدرجة الثالثة واصبحت من رواد الدرجة الاولى مثل الفنان الراحل ابراهيم عبد الرازق و الفنان صلاح السعدنى و المخرج الراحل اشرف فهمى والناقد الفنى الراحل سامى السلامونى اذكر مرة ان امتحان احدى المواد جاء اثناء مباراة للاهلى فى نهائى افريقيا و لعب الشيطان فى راسى ان اترك المباراة و اذهب الى الامتحان لكن بسرعة تغلبت على الشيطان و قلت اعوذ بالله من الشيطان الرجيم و ذهبت الى المباراة اما المادة فلا ضرر ان امتحن بها العام المقبل
يوم عقد قرانى كانت مباراة الاهلى و الزمالك واشتريت التذاكر و لعب الشيطان براسى ايضا ان اشاهد المباراة من خلال التلفزيون لكن تغلبت عليه بسرعة ايضا و اصريت على عقد قرانى الساعة الثالثة عصرا  نظرا لان عندى مشغوليات هامة بالعمل لدرجة ان اعمام زوجتى لم يحضروا عقد القران لكن لسوء حظى ان المرة الاولى و الاخيرة التى اظهر بها على شاشة التلفزيون بعد احراز الاهلى هدفا و اصبحت فضيحتى تنقل بالاقمار الصناعية و على الهواء مباشرة   
اتذكر العديد و العديد من الذكريات اتذكر عندما تنفذ التذاكر كيف نعطى خمسون قرش او جنيه الى الجندى الواقف بالحصان على اسوار الاستاد لكى نركب على الحصان و نتسلق اسوار الاستاد اتذكر ايضا فى المباريات الهامة كيف نعود الى المنزل سيرا على الاقدام لعدم وجود مواصلات و لكننا لا نشعر بالمسافة لاننا نسير فى افواج النصر غالبا لانى انتمى للنادى الاهلى
اتذكر كيف تعلمت التبرع بالدم عن طريق السيارات التى كانت تقف امام الاستاد ثم يعطونا بعض الهدايا و علب العصير و البسكويت
اتذكر جميع مجلات الاهلى التى احرص على اقتنائها  كل يوم خميس طبعا غرفتى ايام العزوبية كانت مليئة بصور لاعبى النادى الاهلى
نظرا لاعتدالى و عدم تعصبى طبعا الفاكهة المفضلة لى هى البطيخ و الفراولة اما الموز فلا اتناوله الا عصيرا مختلطا بالفراولة اما اللبن فلا اسمح به الا مرغما من اجل الاولاد و بعد صد و رد من زوجتى و تهديدها بترك المنزل و الوقوف محتجة امام البان المالكى 
طبعا محسوبكم ذاكرة الكترونية لمباريات الاهلى و اشهر اللاعبين و اشهر الاهداف و بالذات المباراة الشهيرة ستة واحد الشهيرة ببيبو و بشير و احفظ جدول مباريات الاهلى و اخطط مواعيدى  
طبقا لمواعيد مباريات الاهلى طبعا لا ينافسنى فى ذلك سوى زياد ابنى صاحب السبع سنوات الذى استعين به اذا اصاب الذاكرة اى عطل
مع انى مشجع معتدل و غير متعصب و بشجع الاهلى اصبحت معرضا للاصابة بالضغط و السكر و الشاى و القلب والشريان التاجى فماذا كان سيكون حالى لو كنت بشجع الزمالك كان زمانى طبعا احمل لقب المرحوم لانى اتساءل دائما عن التكوين العصبى و التشريحى والبيولوجى للمشجع الزمالكاوى و قوة تحمله و صبره على المكاره اكيد لهم الجنة
هل يوجد لديكم طبيب نفسى يعالج حالتى و يحولنى الى مشجع متعصب لانى بصراحة حاسس بعقدة الذنب و التقصير ناحية نادى القرن النادى الاهلى الحبيب بلد مجانين صحيح 

هناك 36 تعليقًا:

مصطفى سيف يقول...

هههههههههههههههههههههههه
يعني مكنتش تعرف ماتش الاهلي والزمالك كان يوم ايه تقوم تظبط كتب الكتاب عليه
أخر كتب الكتاب يوم مكنش هيجرى حاجة :)
واضح فعلا انك مش متعصب استاذ ابراهيم
الحل علشان تبقى متعصب انك تبطل تتفرج على كورة خمستاشر يوم
او اتفرج على ماتشات برشلونة والدوري الاسباني وقتها صدقني مش هتطيق تتفرج على التهريج اللي عندنا وبعدها هتبقى متعصب جدا :)
تحياتي

reemaas يقول...

هههههههههههه ده انت كده عداك العيب يا استاذ ابراهيم

ريــــمــــاس يقول...

صباحك غاردينيا أستاذ ابراهيم
هههههههههههههه
كل دا ومش متعصب مش كفاية عقد قرانك الي عملته العصر عشان المباراة امال لو كنت متعصب كنت عملت ايه ؟ هههه
بس حلوة اوي الكلينكس والفوطة وربنا بحن على ام زياد دي الظاهر طول المتش بتكون واقفة جنب حضرتك تنشف في عرقك وتمسح بصقتك على التلفزيون صراحة صراحة ام زياد ست عظيمة بليز قولها ريماس الي بتحب واحد لاهو من السماء ولا الارض يعني الي بتحب الملاك بتسلم عليكي هههههههههههه "
؛؛
؛
لروحك عبق الغاردينيا
كانت هنا
reemaas

فتافيت يقول...

ههههههههههههههههههههه
انا اهلاوية .. معتدلة جدا جدا جدا... وماليش في التعصب خالص مالص بالص
حتى ان كان ليا خطيب في الماضي. وكان زملكاوي.. ولما ماعرفتش استيبه فسخت!! :))

اذكر مرة ان امتحان احدى المواد جاء اثناء مباراة للاهلى فى نهائى افريقيا و لعب الشيطان فى راسى ان اترك المباراة و اذهب الى الامتحان لكن بسرعة تغلبت على الشيطان و قلت اعوذ بالله من الشيطان الرجيم و ذهبت الى المباراة اما المادة فلا ضرر ان امتحن بها العام المقبل

ههههههههههههههههههه ههههههههههههه
هامووووووت من الضحك وربنا

ولا موقف كتب كتابك.. ده ايه حظك ده
يالهوووووي لما ربنا يحب يكشف حاجة
الكدب اصله مالوش رجلين :)))

على فكرة انا هاعمل بوست قريب
عن الأهلي... يعني كتغير في حملة التدوين اليومي... وماينفعش اكتب تلاتين بوست
ومايكون فيهم بوست أحمـــــــر ^_*

re7ab.sale7 يقول...

هههههههههههه
ربنا يكون ف عون المدام
بصراحة هي كتير صعبانة عليا
ثم انا زمالكاوية بقي هه
ليك شوق ف حاجة....؟ شوفت اهو انا اتعلمت كلام مش حلو خالص اهوه
بحاول اتابع بس مش قادرة بجد لان ضغط المذاكرة والانيميا الل يعندي مش مخلياني اتابع كتير
تحياتي لسالي وزياد ونسيت اقولك اني بجد عجبني كتير تفسيرك لمعني الاسم ومتشكرة فعلا لانك زودت معرفتي
تحياتي يا اهلاوي يا اللي مش متعصب
وبمناسبة البطيخ والفراولة
واندومي وجالاكسي
يا ريتني كنت بنتك بقي عشان جالكسي والفراولة بس

كريمة سندي يقول...

والله أنا زملكوية رغم إني مش مصرية بس أحب أشجع الزمالك - زا زا زمالك -

هههههههههه

تحياتي لك

وجع البنفسج يقول...

يبدو انك مش متعصب خالص ..!!

عموما انا اهلاوية صميمة رغم اني فلسطينية بس احنا طول عمرنا بنشجع الاهلي والزمالك .. ما عدا ابويا .. بيشجع المقاولون العرب .. " مش عارفة ليش " ؟؟؟؟ يمكن علشان كلمة عرب !!

استمتعت بالقراءة ..

فاتيما يقول...

لأ مش هتلاقى دكتور للأسف
مش من قلتهم يعنى
بس أصل مينفعش دكتور اهلاوى
و اللى هيعالجك م العقدة دى
لازم يكون زملكاوى أصيل
ومفيش دكتور زملكاوى ف اايام الفحلوقى دى
الا و هتلاقيه يا نضرى
يا ف عنبر الخيطيرن
بالعباسية قاهرة
أو بالمعمورة اسكندرية
يا ف ترب الامام أو البساتين


خليك كدا بقى وامرك الى الله
انا اهلاوية حضرتك
ومتعصبة
و معايا شهادة معاملة الاطفال
وعاوز جلاكسى وآيس كريم
ممكن ؟

:)

دعاء العطار يقول...

هههههههههههههههههه

بصراحه بصراحه فعلاً مقصر أوووى مع الأهلى

ايه الناس المعتدله دى ؟ D: D:

ضحكتنى ياأستاذ ابراهيم كالعااااااده

بسنت يقول...

هههههه
أكيد طبعا غير متعصب وحد يقدر يقول غير كدا
ولانه فرق كبير فريق عظيم
فأختك أهلاويه بردوا

Mona Abo - Elso3od يقول...

استاذ ابراهيم
مش قادرة المرة دي اخرج زي كل مرة من غير كومنت اصلي بصراحة مش بفوت لك بوست بس نعمل ايه بقي عندي فوبيا الكومنتات بحب اقرا و اجري لا من شاف و لا من دري
بس بصراحة و من غير زعل اصلي شريرة شوية و فرحت لما ظهرت في التليفزيون يوم كتب كتابك هههههههههههههههههههه
بجد بقي انا بحييك علي حسك الفكاهي العالي جدا و كمان بشكرك علي كومنتاتك عندي اللي غالبا بكسل ارد عليها
تحياتي لحضرتك و للمدام الغلبانة معاك وقت المتشات :))

zizi يقول...

ايه الحلاوة دي يا ابراهيم ..ده كله
..
ومش متعصب ..فعلاً واضح واعرف ناس كتير ..وساعات بيكونوا ستات كمان بيشجعوا بتعصب لدرجة ارتفاع الضغط والحاجات دي ..لكن انت والحق يقال

معتدل جداً ربنا يديمه عليك اعتدال ..

ويخليلك المدام ..تحياتي

شيرين سامي يقول...

ههههههه تعرف يا أستاذ ابراهيم بابايا كان بيعزمنا على سندويتشات شاورما لو الأهلي كسب و أمن صغيره كنت بتفرج على متشات الأهلي و عارفه أسماء اللعيبه كلهم لحد ما كبرت و حسيت ان شكلي وحش أوي قدام البنات هههههه بس كنت بحب الكره أوي لكن دلوقتي مباقتش فاضيلها بصراحه.
بس هو ليه كل الرجاله كده..يعني الكوره و لا العروسه؟...و عموماً أكيد هي قامت بالواجب الا اذا كانت طيبه أوي و بتحب الكوره هي كمان:)
تحياتي الشديده لحضرتك و لزوجتك البطله

قهوة بالفانيليا - شيماء علي يقول...

أنا كمان أهلاوية جداً ..
من غير تعصب .. لكن بانتمي فعلا للأهلي انتماء قوي :)
بس فعلاً مواقفك المذكورة كلها مضحكة :)
و خصوصا يوم عقد القران دة :)
ربنا يخلي ساليناز و زياد .

ريبال بيهس يقول...

صباح الورد لأهلاوي مش متعصب

يمكن الأهلي الفريق الوحيد اللي

أتابعه في الدوري المصري لأني أحترمه

كثير فيكفي الأسماء اللي تحمل أسمه

تخلينا نوقف لنادي القرن بكل

إحترام بس بعيد عن العصبية يكفيني

الأهلي بتاعنا بس بصراحة يا ابراهيم

أنت مقصر مع ناديك كثير بجد محتاج

جرعات تعصب زيادة بس وقتها بعيد

الشر راح تشوف كل أنواع العيا من

ورا التعصب والعصبية دي كمان ياعم

لا تعصب ولا تتعصب هو الأهلي بينخاف

عليه ماشاء الله ...

كل قرن و الأهلي اروع كمان وكمان

تحياتي

rack-yourminds يقول...

طيب انا هقول كلمتين وهجري بسرعه ,,,انا زملكاوي وانتظرنا بقي في مباراة القمه هههههههه

ابراهيم رزق يقول...

مصطفى سيف
اخى العزيز
معلش مكنش ينفع لانى حددت كتب الكتاب و بعدين اتحاد الكورة حدد الماتش

طبعا باتابع الدورى الاسبانى و الانجليزى لكن الادمان وحش

نورتى
خالص تحياتى

ابراهيم رزق يقول...

Reenaas

طبعا عادانى العيب مش كده

نورتينى
خالص تحياتى

ابراهيم رزق يقول...

ريماس

صباح الورد الاحمر و الفل الاحمر و الياسمين الاحملا

طبعا مش متعصب لانى كتبت الكتاب و لم اؤجله للعام القادم

سلامك وصل الى ام زياد و هى بتسلم عليكى

نورتينى
تحيات معطرة و متزوقة بالفل

ابراهيم رزق يقول...

فتافيت

هههههههههه
يا مرحب بالاهلاوية المعتدلين مينفعش يا بنتى يبقى خطيبك زمالكاوى كل مشكلة تبقوا عايزين حكام من اروبا

فى انتظار بوستك عن الاهلى و ارجو ان يكون بنبرة معتدلة مثلى تماما احنا بنخاطب الناس مش عايزين تعصب ههههه

نورتينى
خالص تحياتى

ابراهيم رزق يقول...

رحاب صالح

مش مصدق انك زمالكاوية و لا يمكن عشان كده انتى عيانة و عندك انيميا
ممكن تقيس الزمالك فى الدم انا اعرف ناس كانوا زمالكاوية و اتعالجوا و دلوقتى كويسين خالص ههههههه

شرفينى تجدى ما يسرك من جالاكسى و اندومى و ايس كريم

تورتينى
خالص تحياتى

ابراهيم رزق يقول...

كريمة سندى

اعرف ناس كانوا زمالكاوية و اتعالجوا و دلوقتى كويسين خالص
ممكن اقولك اسم الدكتور
هههههههه

نورتينى
خالص تحياتى

ابراهيم رزق يقول...

شجن البنفسج

طبعا مش متعصب خالص

يا مرحب بالاهلاوية بيب بيب اهلى
عارفة يا امتياز اكتر حاجة حببتنى فى ابو تريكة هو حبه لفلسطين و غزة و وقوفه معهم
للفلسطنيين تاريخ مع الاهلى بدء من فواد ابو غيدة و مروان و ممدوح سمارة و انتهاء برمزى صالح
موضوع المقاولون العرب ده غريب ده حتى فى مصر محدش بيشجع المقاولون
هههههههه

نورتينى
خالص تحياتى

افكار مبعثرة يقول...

ههههههههههههه
لا فعلا مش متعصب بالمرة انا الوم عليك هذا التقصير
وبالمناسبة وعلى فكرة يعني انا زملكاوية و عادي عايشة و متعايشة و افخر بذلك و زي ما قلت لنا الجنة
تحياتي ليك :)

ابراهيم رزق يقول...

فاتيما
روح القلب الملائكية

طبعا مش هيرقوا دكتور

يا مرحب بكبيرة و روح الاهلاوية

الجلاكسى و الايس كريم تحت امرك

نورتينى
تحياتى و سلامى الى جو يا ام يوسف

ابراهيم رزق يقول...

دعاء العطار

شفتى بقى التقصير

طبعا معتدل جدا

نورتينى
خالص تحياتى

ابراهيم رزق يقول...

بسنت

اولا شرفتينى
طبعا غير متعصب

يا مرحب بالاهلاوية الصعايدة بلد طاهر ابو زيد و مجدى عبد الغنى و هادى خشبة

نورتينى
خالص تحياتى

ابراهيم رزق يقول...

منى ابو السعود

يا مرحب يا مرحب
لو اعرف ان الاهلى هو اللى هيخليكى تعلقى كنت كتبت من زمان و بما انى غير متعصب فاعتقد ان هذه احدى فوائد الاهلى

معلش بقى موضوع كتب الكتاب ما يقع اللى الشاطر ههههه
متشكر على مجاملتك الجميلة
اتمنى مزيد من التواصل

نورتينى
خالص تحياتى

ابراهيم رزق يقول...

zizi

امى العزيزة

معندكيش علاج للاعتدال
اصلى انا مبحبش التعصب

نورتينى و شرفتينى
تحياتى و تقديرى وحبى

ابراهيم رزق يقول...

شرين سامى
اختى الفاضلة

يخونك الشاورمة اللى قعد ياكلهالك صديقى و زميلى فى الكفاح الاهلاوى باباكى العزيز كل هذه السنوات و تنسى الكورة و قدرتى تقوليها مابقتش فاضيالها يخونك سندوتشات الشاورمة من عند رضوان او سمسمة ده كلام ههههههههه

هى بتحب الكورة مش بمزاجها لان انا و امى و زياد و ساليناز مشجعين معتدلين جدا جدا جدا
حسستينى ان زوجتى بتحارب فى الجيش هههه

نورتينى
خالص تحياتى

ابراهيم رزق يقول...

قهوة بالفانليا

يا اهلا بشيماء الاهلاوية الجامدة
متشكر على مجاملتك
لكن يوم كتب الكتاب كان فضيحة مصورة

نورتينى
خالص تحياتى

ابراهيم رزق يقول...

ريبال هيس
اخى الفاضل

والله اللى انته كتبته عن الاهلى ده من اجمل ما كتبت يداك ههههه

يا ريت تقول لى انت بتشجع ايه عشان نرده لك انا تحت امرك هلال اتحاد النصر الاتفاق كله ماشى معانا

نورتنى
خالص تحياتى

ابراهيم رزق يقول...

rack-vourminds

من فلبك هاتستنى فى مبارة القمة
ده جوزيه بتاع ستة واح بيبو و بشير انت فاكر

نورتنى
خالص تحياتى

ابراهيم رزق يقول...

افكار مبعثرة

غريبة انت متاكدة انك زمالكاوية و عادى عملتى تحليل الزمالك فى الدم قبل الماتشات و بعدها انصحك تكشفى و تعملى تحليل لو فى الاول ممكن العلاج بسرعة و تبقى اهلاوية ههههههههه

تورتينى و شرفتينى
خالص تحياتى

موناليزا يقول...

يا راااجل
كل ده ومش مُتعصب
حتى زياد بقى هو كمان حافظ مواعيد الماتشات!!
زياد اللى احتمال كبير يكون مش حافظ جدول الضرب:)
حتى زوجتك بتقدم طلب عشان توديها المالكى
ولا يوم كتب كتابك..حد يعمل كده برضه!!

بس بغض النظر عن كل الحاجات دى ياريت تبقى تعمل حسابى مع الأولاد فى جلاكسى:)

Carmen يقول...

شكلك اهلاوي كاتب البوست بالاحمر :))