الخميس، 29 ديسمبر 2011

راس السنة كنيش

بناء على طلبكم سانشر شعر زياد و لكن بما انى غيور و اغلبكم ترك البوست و علق على شعر زياد فانى نكاية فى زياد و فيكم سانشر شعره اولا لتنسوه بعد ذلك و لا انسى ان اذكركم انى وضعته مثل ما كتب اى لا تسالونى عن معنى غامض و اذا قابلتكم اى كلمة صعبة عليكم الاستعانة بمختار الصحاح او المعجم اللغوى
                      وطنى
وطنى وطنى ارض الحب وطن الفن وطن الروض
وطنى وطن الشمس وطنى الاجمل فوق الارض
الارض و المستقبل مثل الشجر وطنى وطنى
شعبى اسد ضد الظلم  و فراشات وقت السلم تغنى
وطنى و طنى وطن الشمس  


بمناسبة قدوم راس السنة احكى لكم عن ذكرياتى مع راس السنة طبعا زمان راس السنة كان مختلف جدا عن راس السنة حاليا زمان كانت عينها خضراء و شعرها اصفر كانت راس بحق و حقيق

قررنا انا و مجموعة من زملائى ان نحتفل براس السنة الحمد لله الجيب عمران كل واحد فى جيبه من خمسة و عشرون جنيه لثلاثون جنيها حلو جدا نذهب لمسرحية سعر التذكرة خمسة عشر  و ناكل فول و طعمية عند التابعى او اخر ساعة او كشرى عند لوكس او صبحى او ناكل رغيف حواوشى و نقضيها مية مية نزلنا بربطة المعلم على شارع عماد الدين كانت على ما اعتقد مسرحية ولاد الشوارع لعلى الحجار تعرض على مسرح مصر المغلق الان و كانت مسرحية احمد بدير تعرض على مسرح الريحانى و كانت توجد مسرحية لعادل امام تعرض على مسرح ليسيه الحرية امام وزارة الداخلية بالشيخ ريحان ايه اللى جاب سيرة الداخلية ابعدى يا داخلية ابعدى يا داخلية انا اسف ذهبنا الى المسرح لم نجد تذاكر بخمسة عشر جنيها طبعا انا كنت متعود اقطع من فئة خمسة عشر جنيها و عندما تبدء المسرحية اجلس على اى كرسى فارغ بالامام بينما زملائى يجلسون بالخلف طب يا ستى خمسة و عشرون جنيها لا يوجد ايضا لا يوجد تذاكر الا بمائة و خمسون جنيها يا ساتر ده احنا لو جمعنا كل الفلوس التى معنا لن تصل الى هذا المبلغ نذهب الى مسرح الريحانى تكرر نفس الموقف ماذا نفعل ناكل الاول ثم نقرر ذهبنا الى اخر ساعة بشارع الالفى تناولنا طاجن فول باللية و طعمية و سلطة ثم خرجنا و اذا تقع اعيننا على ملهى شهر زاد كباريه يا حلاوة طبعا نحن كل علاقتنا بالكباريه من افلام الابيض و الاسود و البنات و الرقص و اسماعيل ياسين و شادية و احنا التلاتة سكر نباتة و فريد الاطرش نوره نوره يا نوره و محمد فوزى و نعيمة عاكف نظرنا لجيوبنا انها تقريبا خاوية وجدنا رجل عجوز يجلس على كرسى امام الملهى سالناه هى التذكرة بكام يا حاج قال بعشرة جنيه تمام عز المطلوب و طب و سعر المشروبات كم سالنا مشروبات زى ايه يعنى قلنا حاجة ساقعة او عصير فى حدود ثلاثة جنيه يا سلام عز الطلب شفتوا حظنا حلو ازاى على الحجار ايه و سماح انور ايه ده حتى عامله زى الراجل شوف صور المطربين و صور الراقصات و المنلوجست ده حمادة سلطان و فكرى الجيزاوى احنا مش بنشفهم غير فى التلفزيون و قطعنا التذكرة بعشرة جنيه و دخلنا و نحن طالعين على السلالم ياما شاله علينا تطالعنا صور المطربين و الراقصات و نحن نمنى انفسنا بليلة من ليالى الف ليلة و ليلة

دخلنا الى القاعة كانت تقريبا فارغة اخترنا ترابيزة بجوار البست فى الاول و جلسنا فى انتظار البروجرام بعد قليل امتلئت القاعة و بدء البروجرام و جاء الجرسون تحبوا تشربوا ايه انا حاجة ساقعة و اللى بجانبى عصير المهم جميعنا طلبنا يا حاجة ساقعة يا عصير نظر لنا الجرسون باستغراب لكنه احضر لنا الحاجة الساقعة و العصير و بدء البروجرام براقصة و بدء الرواد فى رمى الاموال عليها و نحن جالسون فى احسن موقع امام البيست ثم ظهر مطرب و جاء لنا الجرسون مرة اخرى تحبوا تشربوا ايه يا بهوات ما احنا شربنا عصير و حاجة ساقعة لا انا قصدى تشربوا بيرة شمبانيا ويسكى تحبوا تتعشوا لا الحمد لله احنا مش بنشرب خمور و لسه متعشين فول و طعمية عند اخر ساعة جنبكم تركنا الجرسون و هو يضرب كفا بكف

جاء لنا بعد قليل رجل واضح انه صاحب الملهى يا مديره  قال بصوا يا بهوات دى ليلة مفترجة و الترابيزة اللى انتوا قاعدين عليها دى لازم تجيب اقل حاجة الفين جنيه اليوم و زى ما انتوا شايفين الصالة مليانة نظرنا له و قلنا له يعنى ايه مش فاهمين قال يعنى لازم تطلبوا قلنا له انت مش فاهم اولا احنا كلنا طلبة ثانيا احنا مش بنشرب خمور ثالثا لو عصرتنا كلنا كده مش هطلع مننا خمسون جنيه بعد ما قطعنا التذكرة ام عشرة جنيه بتاعتكم داس الرجل على اسنانه بشدة و لكنه تكلم بهدوء طب لما انتوا مش بتشربوا خمور بتيجوا عندنا ليه و الله حظك و حظنا نعمل ايه بصوا يا بهوات انا هاقول لكم حاجة اتفضل قول , انا هارجع لكم ثمن التذاكر و الحاجة الساقعة و العصير هدية من المحل نظرنا الى بعضنا و قلنا و الله فكرة لاننا بدانا فى الزهق و لكن العشرة جنيه هى اللى كانت مخليانا قاعدين عملا بمبدء وجع البطن و لا دلق الطبيخ و وافقنا على الديل و نزلنا على السلالم و سط صور الفنانين و الراقصات يا ماشالله علينا و جيوبنا متعمرة بالعشرة جنيه و كلنا و شربنا و الحمد لله و سنة سعيدة عليكم بأذن الله  
                                                بلد مجانين صحيح
 


 

   

هناك 13 تعليقًا:

faroukfahmy يقول...

طب ولله يا ابراهيم احنا ممكن نكرر العملية دى تانى ونطلب مشروبات كتيرة على حساب المحل وناخد كمات خلو رجل عن الكراسى التى تركناها ودى مسألةفاتت عليكو بس ممكن تكررها انا وانت وناخد معنا كمان تراكيب هوه يقدر يسد معانا فى العملية دى
اهو نطلع بحاجة فى يومين الزنقة ديه

ياسمين يقول...

شعر زياد لذيذ اووي ما شاء الله عليه..!!
بالنسبة رأس السنة فعلا زمان كانت شقراء هههههههههههههههههه
بجد موقف فظيع دلوقتي عجزت ولا كان كان

افكار مبعثرة يقول...

ماشاء الله على شعر زياد ربنا يحميه و يبارك فيه يارب:)
اما بقا بخصوص راس السنة بتاعك فاظن يعني كانت تحفةةةةةةةةةةةةة يعني اكلت و شربت و شفت حاجات من اللي بتطلع في التليفزيون و كمان اخدت عشرة جنيه ههههههههههههههههههه محظوووووووووظ :)
تحياتي ليك و كل سنة و انت طيب :)

سواح في ملك اللــــــــــــــــــه- يقول...

ايه ياابراهييم

انت جايبلي ثائر صغير

احنا كنا سدينا مع الثائر الكبير

هههههههه

علي فكرة

هو عنده اذن موسيقيه

بيحاول يقفل بقافيه لذيذة

ربنا يخليه

Tarkieb يقول...

البوست ده للاسلاميين عشان تقولهم ما بشربش خمره....دوقرم هههههه.

نيسآان يقول...

ما شاء الله ...اللهم صلِ على سيدنا محمد.
من شابهه اباه فما ظلم !
الله يسعده ويحميه ويجعل وطنه جنّه من جنّات الارض.

رأس السنه كانت كنيش,,,و دلوقتي بقت ايه؟؟؟ قرعه؟؟؟

nour alqamar يقول...

جميله جدا ربي يحفظهولك ..وكل عام وانته بخير يارب ..
تحياتى لك
نور

ستيتة يقول...

إرجع يازمان حن يا ماضي
ايام الفول بالليه ماكان عادي
ولا سبزموكنيولاز ولا بريم بران

المهم قضيتم راس سنة منفلت منضبط
وانا مع رأي تركيب
بلاش زغزغة الإسلاميين دي:)

واختم بشعر زياد
أيوة منسيتش
ما شاء الله عليه
ها يكون شاعر كبير

تحياتي

مصطفى سيف الدين يقول...

بسم الله ما شاء الله على زياد بس يعني قوله في شعر احلى اليومين دول ويمشي حاله كويس اوي خليه يقتدي بالشاعر اللي قال رجب حوش صاحبك عني وهو هيفلح ويبقى زي الفل ان شاء الله
اما بالنسبة لليلة المفترجة دي كويس اوي انك خرجت على رجلك وجيبك عمران
واوعى تكررها تاني يا نجم

شمس النهار يقول...

ان شاء الله زياد هيبقا شاعر كبييييييييييييير

انا بقا راس السنة عندي مشكلة كبييييييييرة
:))))

انها بيتبعها يناير وانامابحبش شهر يناير
:)))
http://shams-elnahar.blogspot.com/2009/01/blog-post_27.html

ده بوست كتبته عن شهر يناير
:))

مع ان يناير ده ممكن اكتب فيه كتب
كل يوم فيه ليه ذكري عندي انيل من اللي قبلها
من 1 الي 31 الحمد لله انه مش 33
:)))))

لــــ زهــــــراء ــــولا يقول...

هههههههههههههههه

قرأتها لاخر حرف واستمتعت جدا بقرائتها

ذكرياتك جميلة وفاكرة المسرحية كانت بتتعرض من فترة يااااه هو انت من ايامها (: ( بهزر)


لولا

نسرين شرباتي "أم سما" يقول...

عندي ملاحظة::
انت دايماً تذكر في أغلب بوستاتك الكشري :)
شكلك بتحبه كتير
،،،،،،،،،،،،،،،،

وعجبتني الليلة لأن فلوسكم رجعت ليكم في النهاية :)
،،،،،،،،،،،،،،،

كدت أن تنسيني شعر ابنك
ما شاء الله ليه مستقبل وشكله موهوب زي والده
ابن الوز عوام

ليلى الصباحى.. lolocat يقول...

السلام عليكم

اسمح لى اليوم هو يوم زياد :)

ماشاء الله
لو هذا الشعر له دون تدخلك فأبشر بموهبة راقية عظيمة
بارك الله فيه ماشاء الله

ربى يسعده ويرزقه الصلاح والتقوى ومستقبل مشرق ان شاء الله


كل سنة وانت وزياد بخير