الأحد، 22 مايو 2011

اه يا دماغى

                            اه يا دماغى


برنامج يا مسهرنى او يا مسفرنى للمذيعة انجى على تركت الفن و دخلت للسياسة فى حلقتين احدهما استضافت بثينة كامل مع الثورة و ضد مبارك و فى الحلقة التى  تليها استضافت لميس جابر ضد الثورة و مع مبارك و فى الحلقتين معاهم معاهم عليهم عليهم منتهى السذاجة و السطحية و البلاهة لا اسئلة لا فهم لا معلومات لا ثقافة حد يقولى اسم الكلية التى تخرج مذيعات بهذه السطحية و اسم من عينهم بالتلفزيون هذا جيل صفوت الشريف و انس الفقى اه يا دماغى

مرتضى منصور اقام شادر فى بلدته لترشيح نفسه رئيسا للجمهورية لم يحضره الا عدد قليل جدا هل مازال عبده مشتاق و لا هيقول ممدوح عباس او شوبير السبب و حياة احمد و امير و اميرة و جوزها سيادة المستشار اللى فلقتنا بيهم  ارحمنا شوية اه يا دماغى

ايهما افيد لمصر نبيل العربى افضل وزير خارجية فى تاريخ مصر ان يظل وزير خارجية لمصر ام ينتقل الى الجامعة العربية التى تحتضر اعتقد ان مصر هى الخاسرة و كان افضل ان يفوز قطرى بمنصب الامين على الا نخسر وزير خارجية بمثل هذه القامة اه يا دماغى

الاخوان المسلمون ركبوا الناقة و شرخوا كل اهتمامهم منصب على الانتخابات البرلمانية فقط اه يا دماغى

فواد عزيز غالى و مجدى يعقوب و يوسف شاهين و نجيب الريحانى و هانى رمزى و فكرى مكرم عبيد و جورج سيدهم و موسى صبرى و ميلاد حنا و ميلاد بسادة اقباط مصريون ام مصريون اقباط ام مصريون مصريون ام اقباط اقباط لم افكر سوى انهم مصريون وطنيون اه يا دماغى
 

 اسلمى يا مصر اننى للفدا
 ذى يدى ان مدت الدنيا يدا
ابدا لن تستكينى ابد
اننى ارجو مع اليوم غدا
و معى قلبى و عزمى للجهاد
و لقلبى انتى بعد الدين  دين
لكى يا مصر السلامة
و سلاما يا بلادى
ان رمى الدهر سهامه
اتقيها بفؤادى
و اسلمى فى كل حين
انا مصرى بنانى من بنى
هرم الدهر الذى اعيا الفنا
و قفة الاهرام فيما بيننا
لصلوف الدهر وقفتى انا
فى دفاعى و جهادى للبلاد
لا اميل لا امل لا الين
لك يا مصر السلامة
وسلاما يا بلادى
ان رمى الدهر سهامه
اتقيها بفؤدى
و اسلمى فى كل حين
ويك يا من رام تقييد الفلك
اى نجم فى السما يخضع لك
وطن الحر سما لا تمتلك
و الفتى الحر بافقه ملك
لا عدا يا ارض مصر بكى عاد
اننا دون حماكى اجمعين
لكى يا مصر السلامة
و سلاما يا بلادى
ان رمى الدهر سهامه
اتقيها بفؤادى
و اسلمى فى كل حين
للعلا ابناء مصر للعلا
و بمصر شرفوا المستقبلا
و فداء لمصر الدنيا فلا
نضع الاوطان الا اولا
جانبى الايسر قلبه الفؤاد
و بلادى هى لى قلبى اليمين
لكى يا مصر السلامة
و سلاما يابلادى
ان رمى الدهر سهامه
اتقيها بفؤادى
و اسلمى فى كل حين
                           تاليف مصطفى صادق الرافعى





هناك 30 تعليقًا:

غير معرف يقول...

لاحظنا تميز مدونتكم و لهذا ندعوكم للإشتراك فى مجموعة تدوينى البريدية و هى مجموعة أنشأتها حديثا تهدف لتبادل الأخبار و الخبرات بين المدونين، و تعريف المدونين بالإدراجات الجديدة بهدف زيادة عدد زوار المدونات و تحسين نوعية التدوين عموما
الشرط الوحيد هو عدم إرسال أى محتوى مخل بالآداب أو يحتوى على سب و قذف أو يسئ للمقدسات و الأديان

للإشتراك إدخل على موقع المجموعة http://groups.google.com/group/myblogging

حسن على

افكار مبعثرة يقول...

انا كمان و الله عاوزة اقول اه يا دماغي من اللي بشوفه في البلد اليومين دول
اوافقك تماما فيما يخص نبيل العربي ياريته فضل وزير خارجية مصر
تحياتي لك

faroukfahmy يقول...

سلامة دماغك يا ابراهيم لأ احنا عاوزينها..مين يقدر يعمل اللى انت بتعمله
واتناول كلامك واحده واحده
1-انت بتقرأ افكارى يااخى مش عارف اختاروا مثل هذه المذيعة منين مش عارف اختاروها منين من اقاصى العشوائيات بالدويقة او من منطقة منازل الزلزال بالهضبة السفلى قوى بالمقطم او من على الكوبرى الخشبى ببولاق الدكرور والا من عمق العلوه عند العدوى بباب الشعرية شالله ياعدوى او من مساكن القبور عند ترب اليهود بالرافعى مع احترامى للناس الحلوين ساكنى هذه الساكن والظاهر التليفيون عمل مسابقة لاختير اجهل الجاهلين وافصح عاجزى الكلام عشان برامج الفقر والجهل والمرض الله يرحم المذيعه صفية صلاح الدين زوجة اخى عماد فهمى فى عملية فتح قلب بمستشفى الفؤاد كانت .... الله يرحمها
2- اما عن مرتضى منصور فبالرغم من انه جمعتنى معه ظروف غير طيبه اثناء ترشيحه رئيس لنادى الزمالك وانا عضو عامل به والفت شعر لجنابه مطلعه مرتضى منصور من غيره مترضوش ورضينا بالحلو والحلو مش راضى بينا يامرتضى .. بخاطره
3- العربى صحيح عربى ويالله من ضمن خسائر مصر
4- انا معك فيما قلته وفيمن ذكرتهم فعلا مصريون وطنيون واخص بالذكر الدكتور ميلاد ميخائيل حنا عضو مجلس الشعب السابق واستاذ المدنى بكلية هندسة عين شمس فقد كان مسيحى معتدلا ونزيهاوجريئا ولبقا وقد جمعتنى به صداقة حينما كان مستشارا هندسيا بوزارة الاقنصاد والنجارة الخارجية ايام وزيرها الدكتور حلمى السعيد ربنا يدى الاثنين الصحة والعافية

كريمة سندي يقول...

والله صداع بجد هو الجامعة العربية مش ماتت خلاص لما قامت الثورات ولقينا بعض المقاعد خالية عايزين نوجع دمغنا بيها ليه

Ms Venus يقول...

مصر كلها بتصرخ

اه يا دماغى


ربنا يستر ..

Carmen يقول...

الله
بعشق القصيدة دي روعة
مقال رائع تسلم ايدك استاذ ابراهيم تحياتي

د/دودى يقول...

ست انجى وغيرها استحلوا الحكايه على طريقه الشعب يريد طعم البرتقال ...حاجه بقت تعل

عمو مرتضى عنده سيدهات علينا كلنا فاوعى تشتمه و الا هيطلع لك يوم ما نشلت حته الفراخ اللى خدتها من التلاجه و انت عندك 6 سنين و كله بالمستندات...

انا بقى مش هاقول اه يا دماغى انا مصره على ان يالهوووى هى الحل

Unknown يقول...

طوارد خواطر أنا كمان كتبت مره من شهرين تقريباً مقال اسمه آه يا دماغي :)
أنا كل ما أجي أعتذر عن تقصيري معلش أصل أنا مش بدخل على المدونه الا كل كام يوم عشان كده مش بقدر أتابع كل البوستات لكن حضرتك طبعاً مميز دائماً.
و كلنا دماغنا وجعتنا و مش عارفين نصدق مين و نضع ثقتنا في مين
ربنا يستر
تحياتي و تقديري لك

أم يقول...

الله المستعان من وجع الدماغ دا ربنا ييعنكم بجد تحياتي

دعاء العطار يقول...

فعلاً والله أه يادماغى

بالنسبه ل انجى على فهى كده من زمااااان تتفرج عليها بس عشان تضحك وتحمد ربنا ع نعمة العقل

اما موضوع ترشح نرتضى منصور للرئاسه

فنووووووووو كووووومنت

فعلاً فعلاً أه يادماغى

zizi يقول...

على فكرة يا ابراهيم انا قارية مدونتك دي من الضهر ويمكن كنت من اول اللي قروها عشان ساعتها ماكانش لسه حد كتب اي تعليق ...بس انا بقى بينزل عليّ الوحي بالليل ..واقعد كده استمخ بعد ماعمل كام تليفون مع ناس مسئولين كبار قوي في البلد وبعدين ادي قرار في كل وجع الدماغ ده اللي انت بتقول عليه ..

بص يا سيدي الست ..الست ..الست ..ايوة!!! افتكرت.. انا شفتها في مولد سيدي

أبو الشخاليل..وكانت قايمة من الصبح للّيل..ويومها شافها

المخرج ..الهمام ..وكان عنده زكام ..
وقالها انتي تنفعي مذيعةهوا ..ومالكيش من الهوا دوا ..

ومن يومها ياحبة عيني وكلام بينك وبيني..وقامت عشانها الثورةومافيش فايدة بالمرة ....

اما مرتضى منصور فمن حقه ان يرشح نفسه ومن حقنا ان نقول لا

وبالنسبة لوزير الخارجية فمصر دائماً تخسر وزراء خارجيتها النابهين ونفس الحكاية حصلت مع السيد عمرو موسى ..
وعموما مصردايماًولادة بس ندور كويس ..

ومعروف منزمان ان الإخوان لابدين في الدرة وربنا يستر ..

اما بالنسبة لكل اللي انت ذكرتهم دول فأنا كواحدة من هذا الشعب المصري الغاليعمري مانسى طنط أم فيفي ولو سمحت تضيفها عندك في هذه الموسوعة وانا متأكدة ان كل واحد أو واحدة من اللي بيقروا دلوقتي عندهم مئات بل آلاف من طنط أم فيفي ..احكوا عنهم ينوبكم ثواب في الوطن اللي غرقان لسه في ..هلال وصليب ..وسايبين

حسني وحبيب.........

والنبي ياصفية غطيني ...مانا قلت لك من الأول ...مفيش فايدة ...تصبحوا على خير وماتنساش تاخد قرصين كيتوفان يا ابراهيم قبل ماتنام ..

مصطفى سيف الدين يقول...

بالنسبة للمذيعة ده حال كل الاعلام في بلدنا مش هي بس ولو سألتني هاقولك المفروض المذيع يبقى محايد مش مع حد ولا على حد علشان يعرف يدير الحوار
بالنسبة لمرتضى منصور ادعي بس انت شادي ووائل يكبروا هتسألني مين شادي ووائل دول اللي بيقول عليهم المستشار انهم قادوا الثورة
بالنسبة لنبيل العربي احنا ضحينا بوزير خارجية بدون سبب وكنت اتمنى ان منصب امين جامعة الدول العربية يتم تدويره على كل البلاد العربية ميبقاش حكر لمصر
بالنسبة للاخوان المسلمين بصراحة افكار الاخوان المسلمين عليها علامات استفهام كتيرة
وفي النهاية الاقباط مصريون لهم حق المواطنة وقدموا كتير اوي لمصر من علماء وادباء وسياسيين نشرف بكونهم ابناء بلدنا مصر الحبيبة
تحياتي

ليلى الصباحى.. lolocat يقول...

السلام عليكم

بثينة كامل .... علامة استفهااااااااام كبيرة اوى اوى عندى ..........
من مدة قبل الثورة بقليل شاهدت فيلم تسجيلى لهذه المخلوقة هى وبعض السيدات (( مجازا يطلق عليهم سيدات)) اشكالهم غير طبيعية بالمرة السيجارة فى ايدى كل منهم واشكال ملخبطة كما لو انهم خرجوا من خلاط كهربائى ويتكلموا فى تحرير المرأة
والتغيير فى البلد وحل مشاكل الناس بأسلوب ماما امريكا كده

لا اعرف ولا افهم ولا اتصور كيف هذه ال..( البتاعة )) عايزة تكون رئيسة علينا هى المشرحة ناقصة قتلى !!!!!!!!

مرتشى والباقيين اعتقد ان الصورة لسه عليها ضباب وتساؤلات كتير وترتيب كتير ولندع الفاسد يحلم والصادق يتمنى وبالنهاية لا يصح الا الصحيح

شكرا لك اخى
دمت بخير

لــــ زهــــــراء ــــولا يقول...

حضرتك المذيعات دول بيختاروهم منظر بس
بالنسبة لمرتضى منصور انا دماغي وجعاني منه من زمااااااااااااااااااااااااان
لولا

Humman being يقول...

*مش انجى على بس ده النموذج ده بسم الله ماشاء الله كتير جدا فى فضائيات كتير .... بس القائد بتاعهم "انجى على " دى قمة البلاهة والغباء

يوم لما مرتضى منصور ده يختفى من الساحة تماما هوه وأمثاله هحس ان ثورة مصر نجحت 300%

أكتر حاجة حسيت بعدها ان مصر رجعت 1000 خطوة ورا هيه استبعاد نبيل العربى من وزارة الخارجية اللى هوه كان مقصود ... بس عارف اللى يوجع فعلا اننا احنا اللى بنعمل كدة فى نفسنا ... زى ما نكون مش عارفين نعيش من غير تراجع .... مش عارفين نطلع من منهج وروتين حسنى مبارك

مش هصدق أبدا موضوع فتنة وطائفية والمصطلحات الجديدة دى مهما عملوا ... هصدق بس كلمة مصرى

وتسلم الدماغ الصح اللى كتبت البوست ده

ابراهيم رزق يقول...

hassan

يشرفنى هذا

سعيد بمرورك
خالص تحياتى

ابراهيم رزق يقول...

افكار مبعثرة

نعم مصر خسرته كوزير خارجية

اه يا دماغنا كلنا

نورتينى
خالص تحياتى

ابراهيم رزق يقول...

فاروق فهمى
استاذى العزيز
ملك الزهرات

اولا خالص التعازى لك و لاخيك فى الفقيدة المحترمة المرحومة صفية صلاح الدين المذيعة التى شهدت لها منى الشاذلى و حاربها جيش الفساد بقيادة صفوت الشريف و اوقفوا برنامجها الناجح شاشة رمضان دون سبب الا لانها لم تكن على هواهم و لم تكن تعرف طرقهم الملتوية مثلها مثل د هالة فهمى و غيرهم
صديقى اعد سلسلة على المدونة عن من حاربهم النظام السابق و كانوا من معارضيه و توفاهم الله قبل الثورة مثل الدكتور عبد الوهاب المسيرى و الدكتور نصر ابو زيد و الفريق سعد الشاذلى و يسعدنى ان تكون المرحومة صفية من ضمنهم ارجوك استاذن اخيك الاستاذ عماد و يكون لى الشرف
اما مرتضى منصور اخشى ان يكون مصور لسيادتك سى دى و انت تاكل كبدة ضانى عند سيدى الشعرانى و بيهددك هههههه
اما السفير العربى فعلا خسرناه
الدكتور ميلاد و الدكتور حلمى السعيد شخصيات محترمة
سعيد بزيارتك
و خالص تقديرى و احترامى

ابراهيم رزق يقول...

كريمة سندى

متفق معكى تماما
فعلا فقدت الجامعة بريقها

نورتينى و سرفتينى
خالص تحياتى

ابراهيم رزق يقول...

Ms Venus

اه يا دماغنا كلنا

شرفتينى

خالص تحياتى

ابراهيم رزق يقول...

كارمن

اختى الرقيقة

وانا كمان بعشق هذه القصيدة

نورتينى
خالص تحياتى

ابراهيم رزق يقول...

د دودى

فعلا الجماعة دول استحلوا الحكاية

بالنسبة للسيدهات بتاعتى و انا بنشل الفراخ اعترفت لامى و سامحتنى
دورى انتى على السديهات بتاعتك و انتى بتضربى سندوتشات الكبدة فى كافتريا الكلية هههههههه

مكس من اه يا دماغى على يا لهوووووى

نورتينى
خالص تحياتى

ابراهيم رزق يقول...

شرين سامى

لا تعتذى عن التأخير

يسعدنى هذا التوارد و يشرفنى

متشكر لمجاملتك الرقيقة

فعلا كلنا دماغنا و جعنا

نورتينى
خالص تحياتى

ابراهيم رزق يقول...

ام

و نعم بالله هو المستعان

سعيد بزيارتك

نورتينى و شرفتينى
خالص تحياتى

ابراهيم رزق يقول...

دعاء العطار

سلامة دماغك

كنا الاول بنضحك و لكن اصبحنا نستفز

نو كومنت على كومنتك هههههه

نورتينى بزيارتك
تحياتى

ابراهيم رزق يقول...

zizi

امى العزيزة

استمتع جدا جدا جدا بتعليقك و اخشى ان افسده بالرد لذا من موقعى هذا اقول
بدون تعليق

اسعدتينى و نورتينى بزيارتك
خالص تحياتى و تقديرى و حبى

ابراهيم رزق يقول...

مصطفى سيف
اخى العزيز

متفق معك تماما اخى العزيز فى جميع النقاط

سعيد جدا بزيارتك

دايما بتشرفنى و تنورنى

خالص تقديرى و احترامى

ابراهيم رزق يقول...

ام هريرة

اختى الفاضلة

المشكلة مش فى بثينة كامل او لميس جابر المشكلة فى من تدير الحوار ببلاهة و غباء

و فى النهاية بأذن الله كما قلتى لا يصح الا الصحيح

نورتينى و شرفتينى

خالص تحياتى و تقديرى

ابراهيم رزق يقول...

لولا و زهراء

المذيعات دول و الله يا لولا لا قصة و لامناظر ههههه

اما مرتض فربنا يرحمنا يارب

سعيد بتعليقك
نورتينى و شرفتينى
تحياتى

ابراهيم رزق يقول...

Shahmaa

فعلا المذيعات بهذا النموذج كثيرات لكن انجى بالذات اخذت شهرة لا تستحقها نهائى

متفق معكى تماما و ابصم بالعشرة فى باقى تعليقك

متشكر لمجاملتك الرقيقة
سعيد جدا بمرورك

نورتينى
خالص تحياتى