الخميس، 9 يونيو 2011

ظلبطة

يشتكى الجميع من المعاكسات و المعاكسات ليست ظاهرة  حديثة لكنها قديمة قدم الحضارة الفرعونية و تشهد بذلك البرديات و الصور المنحوتة بل تم تأليف كتب فى حوارات المعاكسات و من اشهر المؤلفين فزلوك عنخ و مسبسب اوتون كما كانت المعاكسة موجودة ايام الجاهلية و كيف كان عنتر العبسى يقف على ناصية القبيلة يعاكس فى عبلة حتى وقعت فى غرامه
و فى الاربعينات و الخمسينات و بقية الحقب كانت المعاكسة موجودة و لكن بطريقة خفيفة مثل ايه العسل الابيض ده متكونش امك نحلة او الله ما صلى على كامل الدسم و يا ارض اتهدى ما عليكى قدى يا صباح الورد و التفاح ابو خمسون قرش
طبعا لم يحدث تطور فى اساليب المعاكسة حتى جيلى طبعا انا لا ادعى انى كنت ملاك لكن كانت هناك اسس تربينا عليها و تعلمناها تقريبا كل جيلى ان من تسير فى الشارع مثل اختك و يجب ان تحافظ عليها
شىء اخر افتقدناه بشدة مفهوم كان منتشر و هو بنت الحتة و بنت الحتة مثل اختك لا يجوز ان تعاكسها بل يجب عليك حمايتها حتى بروحك و يا سواد ليله لو حد عاكسها من منطقة اخرى هذا يعتبر اعتداء على الحتة و تقوم معركة و مشكلة لا تنتهى الا باعتذار مقدم ممن عاكس و انه لا يقصد
طبعا المعاكسة كانت ايامنا من نوعية اجمل واحدة اللى فى النص متبصلوش قوى هما بيكونوا اتنين ماشين 
ايه يا عم الحلاوة دى ميكونش باباكى حلوانى
و هكذا
اذكر من تجاربى القليلة جدا فى المعاكسة انى كنت فى الاقصر و شاهدت فتاة سمراء تجلس على حمار و تسير به اردت فقط ان انكشها فقلت لها يا انسة يا انسة باب الحمار اللى ورا مفتوح فنظرت لى شزرا و قالت لى حتى انت يا مسبسب و همت فى النزول فتحركت خلفا و قلت يا فكيك
اثناء ثانوى كانت مدرسة حلمية الزيتون الثانوية بنات و مدرسة الارومان الثانوية بنات على بعد خطوات من مدرستى طبعا صديق لى كان من المسبسبين دفع عشرة قروش لعم على الفراش عشان ينط من على سور المدرسة فى الحصة الثالثة طبعا روميو رجع لنا فى الحصة السادسة ظلبطة لقد تم ظبطه امام مدرسة البنات من قبل الشرطة كل ما فعلوه معه حلقوا له شعره على الزيرو طبعا ايامها لم يكن حلق الشعر على الزيرو موضة و اتفضح صاحبنا و اطلقنا عليه اسم بلاطة ومن يومها اصبح مقترن به حتى الان مع انه اصبح مهندس و تزوج و خلف طبعا زوجته لا تعرف السر نحن فقط نعرفه و نبتزه طبعا
اختصارا للموضوع ان المعاكسات زادت و انتشرت بطريقة فجة طبعا الحل يجب ان يبدء من البيت من طريقة التربية الصحيحة و التوعية طبعا انا لا احب اتكلم كلام انشاء لكن هذا هو الواقع الذى نعيشه
يجب فرض عقوبات واقعية تطابق العصر لان الحلاقة ظلبطة الان ستجعلهم يقفون امام مدارس البنات من اجل الحلاقة المجانية يجب تدريج العقوبات  مثل الحرمان من الدخول على الفيس بوك شهر او اجباره على رفع بنطلونه الساقط عن طريق حمالات الكترونية او حلق سالف من السوالف و يسير بالشارع بسالف واحد و فى حالة تكرار المعاكسة تشدد العقوبة و تصعد الى حرمانه من وضع الترتر على التيشرت ثم نضطر الى العقوبة المشددة الكبرى الحرمان من الاستماع لمطرب الجيل و الاجيال القادمة تامر شعر الصدر الشهير بتامر حسنى بلد مجانين صحيح
   

هناك 15 تعليقًا:

مصطفى سيف الدين يقول...

انا مش عارف كنت باعلق على الانتخة لقيت نفسي دخلت في الظلبطة
هو النهاردة ايه انت توهتني يا عم :)
بس علشان متجيش تاني الاقصر وتعاكس البنات بتاعتنا
طبعا موضوع المعاكسة موضوع خطير ولازم يكون في ردع مش بس من الاسرة لكن المجتمع ويا سلام لو في قوانين يبقى حلو اوي
بس انت مش شايف ان شهر حرمان من الفيسبوك كتير ده لو اتحكم عليه بالاعدام اهون
تحياتي

كريمة سندي يقول...

والله المعاكسات أصبحت في كل مكان من الكبير قبل الصغير تحياتي

Emtiaz Zourob يقول...

شايف ، اهو ابن الحتة مصطفى زعل علشان بتعاكس بنات الاقصر يا مسبسب !!

::::

فعلا اخلاق زمان كانت غير ، سبحان الله في كل حاجة .. احنا بقينا في زمن المسخ على قولة فلان الفلاني ..

ربنا يتوب علينا . بلد مجانين صحيح!

zizi يقول...

على فكرة يا ابراهيم ..احنا كل يوم عمالين نجمع عنك وصف لغاية ماحانعمل رسماية خياليةوبعدين نطلعك مرة وانت في التحرير...يعني انت مسبسب (دا إذا كان شعرك لسه ماوقعش نصه بفعل عوامل التعرية )ومأنتخ وبكرشومابتشربش غير العصائر يعني مابتشربش مثلاً مهلبية شاي ..شفت بقى فاضل حاجات بسيطة ونطلعك من بين مليون انسان ابيض ابو ضحكة ترد الروح اعرفه من بين مليون انسان ...

انت عارف الواحد مخلي التدوينات بتاعتك دي للترويح بعد عناء اليوم ..

حاجة حلوة صحيح سلمت يداك ..

الاحلام يقول...

يعنى اقف على ناصيه وعاكس وعلى ضمنتك انت هههههههههههههههه
موضوع غايه فى الاهميه لكن البيئه والاسره عليهما عامل كبير جدا فى هذا الموضوع فهناك من ينصاع وهناك من يتجاهل
دمت بكل خير تقبل تحياتى ابوداود

غير معرف يقول...

مساء الغاردينيا استاذ ابراهيم
يادي الخيبة دنا كنت فاكرة حضرتك
مؤدب جداً <<< مش شتيمة واللهي
اقصد كنت فاكرة ان عمرك ماعاكست
يعني ماشي جنب الحيط ههههههههههه
انا كل يوم بتصعب عليا ام زياد
<<<< مش حتسيب ام زياد في حالها
ويعني انت اما حاولت تنكش زي مابتقول مالقيتش غير واحدة راكبة حمار ههههههههههههه
طيب الحمدالله الي جت سليمة
بس عارف احنا لو نطبق عقوبة الحرمان من النت يبقى كأنه إعدام :)
بس زي ماقلتالحكاية كمان التربية والتنشئة في بيئة ومجتمع يعلم الشاب انه فعلا اي بنت زي اخته "
؛؛
؛
لروحك عبق الغاردينيا
كانت هنا
reemaas

هبة فاروق يقول...

ههههههههه والله معاك حق ان عقابهم يكون زى ما حكمت فى اخر البوست لان العقاب بتاع زمان وهو الحلق ظلبطة اصبحت موضة للجيل الجديد
عجبتنى كتابتك الساخرة خفيفة الظل
تحياتى

ابراهيم رزق يقول...

مصطفى سيف
معلش اللخبطة منى انا

انا و الله ما كنت باعاكسها انا عجبنى شكلها و هى راكبة الحمار قلت اهزر معاها بس يظهر الصعايدة جامدين مش بيهزروا هههههه
و بعدين ما انا صعيدى و من الاقصر

نورتنى
تحياتى

ابراهيم رزق يقول...

كريمة سندى

متفق معكى تماما

نورتينى
خالص تحياتى

ابراهيم رزق يقول...

شجن النفسج

هههههه مظلوم يا بيه انا كنت بهزر بس

فعلا احنا فى زمن المسخ

نورتينى
خالص تحياتى

ابراهيم رزق يقول...

zizi

هههههههه انتى كده مش هتخلينى اخد راحتى

على فكرة انا لسه حالق دلوقتى بناء على فرمان صادر من ساليناز و ام زياد
اكيد هنعرف بعض من القلوب

متشكر على مجاملتك الجميلة

نورتينى
تحياتى و تقديرى و حبى

ابراهيم رزق يقول...

الاحلام
اخى العزيز

عاكس بس مش على ضمانتى هههههههه
انا لسه حالق

تورتنى
خالص تحياتى

ابراهيم رزق يقول...

ريماس

مظلوم يا بيه و الله العظيم مظلوم ههههههه انا كنت بهزر بس بجد الفتاة كان شكلها حلو و هى راكبة على الحمارة حبيت اهزر معاها لكن انتى متعرفيش الصعايدة ميعرفوش الهزار
انا مش ماشى جنب الحيطة انا جوة الحيطة

نورتينى
تحيات معطرة بالورد و الياسمين

ابراهيم رزق يقول...

هبة فاروق

حمد الله على السلامة
نورتى المدونة

سعيد بتعليقك و متفق معه تماما
متشكر لمجاملتك الرقيقة

نورتينى
خالص تحياتى

ياسمين يقول...

ههههههه حلوة العقوبات اللي ع الموضة دي ههههههه
مش عارفة الصراحة ..المعاكسات بقت سخيفة جداا ...ومستفزة جداا...
طيب لو ولد مش بيحب الفيس هههه ولا تامر حسني نعمل ايه ساعتها هههه