الجمعة، 17 يونيو 2011

توك توك فى الشقة

انا شارب تلاتة استيلا و يجى 8 كمان اى دى
انا راجل قوى مش قلة
انا عامل دماغ قراقيش
علشان مبقاش فيه حشيش
3 سبعات بسكوتة نفض و متقليش
كله معانا يعيش
خلاص مبقاش فى بنى ورجع الاخضر و ملى السوق
دماغى مبقتش تاكلنى و مش تعبان و عايز افوق
ما بقتش ارص حجارة ما بلفش اى سيجارة
انا عامل دماغ كتاكيت و بخبط فى العفريت
تلك هى المقدمة و اليكم باقى الاخبار


شربت حجرين ع الشيبشة 
مع توتو و سبع و ويشا
يانى يانى يانى
مش هاعمل كده تانى
و خدنى جعران و الكابتن
و رحنا عند عماد فيشا
و نزلت و انا ماشى فى الشارع
شوفت الا نازل للطالع
فضلت ماشى مع نفسى و قلت اشوف اللى فى نفسى
اروح ادور اروح ادور على نفسى
و يانى يانى يانى
من الحجر الاولانى
و يانى يانى يانى
ولعت الحجر التانى
شوفت تعلب كان بينط
كان بيلعب و يا البط
شوفت ديك كان شايل فيل
شوفت نملة ديلها طويل
و قابلنى قطر يا عم البيه
غصب عنى دوست عليه
و اتهيألى  ان انا فى بولاق
واللى شايفها كانت وراق
اوعوا تقولوا دماغى مش فيا
دى الوراق جنب المنوفية


دخلت ساليناز و بتسألنى يعنى ايه ستلا يا بابى بكل براءة الاطفال قلت لها يعنى النجم ضحكت و قالت هو النجم بيتشرب يا بابا قلتلها لا قالتلى ستلا دى بتتشرب و كمان اى دى انا عايزة اشربهم وقفت و فركت عينى ساليناز بنتى اللى فى كى جى 2 عايزة تشرب ستلا و كمان اى دى يا للعار و تقمصت يوسف وهبى و لسه هاقولها اخرجى عليكى اللعنة اذ فجاة اسمع من بعيد جهاز الكمبيوتر مشغل فيلم اسمه محترم الا ربع مش محترم و لا حاجة انتاج اللى مش محترم السبكى و بطولة اللى مش محترم محمد رجب تشاركه طفلة ترقص و تغنى على اغنية انا شارب 3 ستلا كل هذه المشهيات امام طفلة لم تتجاوز  عمرها خمس سنوات التقيل جاى ورا سمعت الاغنية وجدتها تحكى عن تفاصيل اخذت الاغنية و ذهبت الى متخصص فى الشئون المزاجية و اليكم هذا الحوار
انا                يعنى ايه اشرب 3 ستلا و كمان 8 اى دى
المتخصص     نظر باستغراب يعنى عامل دماغ كبيرة قوى
انا                يعنى ايه دماغ قراقيش
المتخصص    يعنى دماغ كيمياء يعنى برشام      
انا               يعنى ايه تلت سبعات بسكوتة
المتخصص   الحشيش المضروب قطعة حجم البسكوتة 
انا               ما هو البنى و ما هو الاخضر
المتخصص   البنى الحشيش و محدش لاقيه و الاخضر الترامدول 
 
خرجت مذهولا من هول التفاصيل اغنية تحمل تفاصيل حقيقية عن شرب الخمور و تعاطى الحشيش و اكل القراقيش كل هذا فى قالب غنائى راقص فى فيلم ترقص طفلة على الاغنية مع ممثل معروف مع انتشار الاغنية فى الميكروباصات و التكاتك و الافراح ماذا ننتظر من اطفالنا نقول لهم اسمعوا فيروز او ام كلثوم دى ساليناز بتقعد تسمع معى فيروز و حافظة بعض اغنياتها مستوى الذوق و القبح نزل الى هذه الدرجة


نعود مرة اخرى الى ساليناز حاولت اعرف هى بتسمع ايه وحاولت اطبق نظريات التربية الحديثة و الفت نظرها الى  اغانى الاطفال العادية بطريقة غير مباشرة و ان ابعد اذنها عن هذه الاغانى لتسمع الاغانى المعروفة اللى تربينا عليها محمد فوزى ليلى نظمى او حتى الست نانسى عجرم و اغنية شاطر شاطر فقلت لها بصى يا ساليناز الاطفال الحلوة متسمعش الاغانى دى تسمع الاغانى اللى بتتكلم عن الحيوانات و الطيور و الاطفال معلومات مفيدة عن الاكل و الشرب

قاعد فى الشقة و اذ فجاة احسست بتوك توك فى الصالة تملكنى الذهول توك توك فى الشقة خرجت مفزوعا توك توك فى شقتى و كمان مشغل  شربت حجرين ع الشيشة فعلا توك توك الصوت يأتى من الصالة خرجت مفزوعا وجدت ساليناز تسمع الاغنية تقمصت مرة اخرى المرة دى زكى رستم فى فيلم انا و بناتى و قلت و صرخت قلبى قلبى ساليناز بنتى بتسمع شربت حجرين ع الشيشة و انا ماسك قلبى وجدت ساليناز تتكلم بعصبية مش انت يا بابى قلتلى اسمع اغانى فيها طيور و حيوانات و الاكل و الشرب و فى نفس اللحظة سمعت
شفت تعلب كان بينط
كان بيلعب و يا البط
شوفت ديك كان شايل فيل
شوفت نملة ديلها طويل

تذكرت انى السبب قلتلها تسمع اغانى عن الطيور و الحيوانات 
كمان سى هوبا مكفهوش شربت حجرين ع الشيشة
بيدى الاطفال معلومات غلط و بيقول شفت تعلب بيلعب مع البط
و الديك بيشيل فيل و النملة ليها ديل

امسكت بقلبى و احسست بالخطر  فكرت هى الاطفال فى الزمن ده مفروض تسمع ايه  و احسست انى السبب وضعت يدى على راسى و انا اقول  اه يانى يانى يانى مش هاعمل كده تانى
بلد مجانين صحيح


   
   




هناك 28 تعليقًا:

مصطفى سيف الدين يقول...

لا بجد غلطان يا استاذ ابراهيم
المفروضتفطمها وتفهمها البنانيت القمرات متسمعش غير تمورة او الهضبة
والولاد الحلوين ميسمعوش غير هيفا وروبي
انت كده بتبوظ اخلاق ولادك لما تسمعهم حجرين ع الشيشة واربعة ستيلا
بعيد عن البوست احب اشكرك على الشرح الوافي لاغنية اربعة ستيلا اخيرا فهمت المقصود بيها مكنتش اعرف غير الترمادول (الاخضر ) بس هههههه
مش عارفين نودي جمايلك فين :)

ليلى الصباحى.. lolocat يقول...

ههههههههههههههههه


هقولك كلمة واحدة ايووون كلمة واحدة
يخرب بيت شيطانك هههههههههههههه


مش ممكن ومش معقول ومستحيل خفة الظل دى

حقيقى وانا اقرأ كنت اتحسر على الجيل الصاعد بس جيل ايه بقى لما تكون انت ابوهم اكيد لازم يطلعوا عفاريت ماشاء الله


شوية جد /

منذ قيام الثورة وانا بقول فيه ثورة تانية لازم تحصل وبقوة ثورة داخل النفوس والعقول
كنت بقول لاستاذ محمد عمارة صاحب مدونة انا مش معاهم اننا محتاجين شوية مية مغلية ومسحوق قوى ونغسل بيهم العقول دى علشان البلد تنضف منهم

( بمعنى احلال وتجديد ) للقيم والمبادىء

كان فيه موضوع كتبنا فيه انا وبعض المدونين اسمه لو كنت المسؤل يتخيل لو كل واحد فينا بقى وزير هنعمل ايه للبلد .... كان من ضمن الامور المطروحة للنقاش الميكروباصات واغانى الميكروباصات

http://lolocat-q.blogspot.com/2011/01/blog-post_24.html

كلامك النهاردة فى منتهى الخطورة والاهمية ويحتاج اعادة كتابة فيه مرة واتنين وتلاتة

ربنا يستر على اولادنا ويحفظهم

اعتذر لطول التعليق :)

تحياتى لك

Carmen يقول...

هي دي الحاجات اللي بتربي ولادنا !!!

reemaas يقول...

قلبى وجعنىىىىىىىى من كتر الضحك يا استاذ ابراهيم

ماهو انت طول مابتمنعها تسمع هتفض تحاول وتسمع ولو منعتها النهاردة هتيجى بكرة وتسمع الادهى والاضل سبيل

فكرتنى بعهد بنت صحبتى عندها4 سنين تقريبا

بقولها يلا نغنى ياعهد لقتها قامت وقفت وبدأت تغنى
الست لما .....لما لما

مها البنا يقول...

انا ازاى مش شفت المدونه دى قبل كده؟
مدونه جميله جدا .. ونقض خفيف وبناء فى نفس الوقت

ان شاء الله متابعه مع حضرتك

دمت فى حفظ الله

ايام الضحك والدموع يقول...

السلام عليكم
البهظ بيه : ولما النشارة غليت والتجار اتملعنو ..بقيت ابيع الشاي من غير نشارة ...الزباين طفشت وقالوا اني بغش الشاي.

د.صلاح : لإنك
فسدت زوقهم ببضاعتك المغشوشة
جميل راتب و يحيى الفخرانى ف الكيف..تلك النوعية من (الفن)هى فعلا فساد للذوق العام ...وادينى ف الهايف وانا احبك يا ناننس
تحيتى لحضرتك

Emtiaz Zourob يقول...

مش عارفة من وين ابدأ تعليقي .. عموما انا سمعت الاغنية دي قبل هيك في الافراح عندنا في فلسطين وماكنتش فاهمة غير حجرين على الشيشة ، شكرا على الشرح المفصل والترجمة الفورية للأغنية المزاجية ، ده اللي بيغني مش مطرب ده محشش !!
المشكلة انه هذه هي نوعية اغاني عصرنا ، ولما نبقى عايزين ننظف ودان اولادنا نسمعهم هيفا ونانسي .. طيب اخبار ام كلثوم وفيروز ايه ؟؟

ربنا يخلي لك ساليناز ، بس المشكلة انك مش ح تقدر تمنعها من سماع الاغاني الهابطة دي .. صعب .. اطفالنا مابسمعوش مننا اي حاجة ، عناد في عناد " زينا واحنا صغيرين برضه "
بس بصراحة بلد مجانين مجانين ..

Unknown يقول...

أول مره أعرف كلمات الأغنيه و معناها مع اني سمعتها كتير مش في فرح و لا في الشارع في التليفزيون يا أستاذ إبراهيم متخيل.
فكرتني مره خدت آمن لصيدلية و فضلت أتكلم مع ناس و سبته مع عامل صغير في سنه لقيته جي يقولي (سمعت أغنيه حلوه أوي إسمها أنا شارب سجاره بني) بصراحه زعقت و بهدلت الدنيا و بعدين فهمته براحه و بقب بيحرم يقول كلمة (سيجاره) بس.
فعلاً التربيه دلوقتي مش سهله و الاعلام بيروج لكل ما هو مُسف.
بوست يجنن كالعاده في بلد المجانين اللي احنا فيها دي :)

تحياتي الخالصه لك

لــــ زهــــــراء ــــولا يقول...

فيلم اسمه محترم الا ربع مش محترم و لا حاجة انتاج اللى مش محترم السبكى و بطولة اللى مش محترم محمد رجب تشاركه طفلة ترقص و تغنى على اغنية انا شارب 3 ستلا

...............................
حسبي الله ونعم الوكيل في كل حد بيسئ لاخلاقنا ولاولادنا وبيشوه صور مجتمعنا وبيجرف اطفالنا دون ان يشعر لطريق خاطئ لمجرد المكسب المادي

لولا

افكار مبعثرة يقول...

كتبت في قالب ساخر رائع مشكلة حقيقية بجد
مستوى الذوق و الفن انحدر بشكل بشع هنربي ولادنا ازاي و نسمعهم الفن الراقي اما يشوفوا اللي طاغي دلوقتي هو الاسفاف
بس تحفة الجزء بتاع اغنية الحيوانات و الطيور و شفت تعلب كان بينط
بيديهم معلومات غلط ههههههههه
تسلم ايديك

دعاء العطار يقول...

ههههههههههههههههههههههههه

هههههههههههههههههههههههههههههه

تعرف ياأستاذ إبراهيم ان أغنية الشيشه دى جاتلنا فى الإمتحان

أه والله جات فى الإمتحان

كانت مادة نقد فنى وكان مطلوب مننا اننا ننقدها

عشان تعرف ان ساليناز مش غلطانه ولا حاجه أهو كلام بيجى فى الامتحانات أهو D: D:

بس بجد مت من الضحك كل مااتخيل شكل ساليناز وشكلك وانت عامل يوسف وهبى

موناليزا يقول...

شكرا على توضيح مرادفات الاغنية
لانى كنت هسأل عنها:)

أوقات كتير لما بكون بتفرج على التلفزيون مثلا وييجى ولاد اخويا ببقى محتارة أجيب لهم قناة إيه ماهو فيه حاجات كتير ماينفعش يشوفوها أغلبية الحاجات ضرب وعنف وقتل أو الفاظ بذيئة
وبقول برضه ليه الاعلام مايعملش حساب وجود اطفال وبسأل فين الرقااابة

Ms Venus يقول...

انك تربى طفل صح فى وسط كل اللى حوالينا ده

شىء صعب لاكبر حد

فعلا مهمة صعبة جدا ومسئولية كبيرة

Bent Men ElZman Da !! يقول...

تربيه الاطفال دلوقتى مابقتش سهله ابدا
حتى لو منعتهم
بتبقى فى عوامل خارجيه كتير بتأثر عليهم
التليفزيون والشارع والناس اللى حواليهم
وموضوع الاغانى ده بقى منتشر فى كل حته
يعنى لا مفر
التربيه بقت صعبه فى ظل اللى بيحصل ده كله
ربنا يخليلك بنتك :))

ابراهيم رزق يقول...

مصطفى سيف

طبعا لازم يسمعوا كده

بعدين عمالة تغلط فى كلمات الاغنية عمال تكتب اربعة ستلا متشوهش الاغنية الاغنية تلاتة ستلا بس جبت الرابعة منين قول محدش شايف حاجة
هههههههه

نورتنى
تحياتى

ابراهيم رزق يقول...

ام هريرة

معلش بقى لازم ولادى يستحملونى
ههههههههههه

هاحاول اتابع الموضوع بأذن الله

سعيد بتعليقك
خالص تحياتى

ابراهيم رزق يقول...

كارمن
اختى الرقيقة

للاسف هذا هو الواقع

نورتينى
خالص تحياتى

ابراهيم رزق يقول...

reemaas

الست لما الست لما هههههههههه

عرفتى تغنيها قولى متكسفيش
هههههه

خالص تحياتى

ابراهيم رزق يقول...

مها البنا

يا الف مرحب

نورتينى و شرفتينى
شرف لى ان تتابعينى
متشكر لمجاملتك الجميلة

خالص تحياتى

ابراهيم رزق يقول...

ايام الضحك و الدموع

مثل هذه الاغانى فى الكيف اصبحت رحمة بالنسبة لما يحدث

نورتنى
خالص تحياتى

ابراهيم رزق يقول...

شجن البنفسج
اختى العزيزة

متفق معكى تماما

طبعا الممنوع مرغوب

ربنا يخلى اولادك و يحفظهم لكى

نورتينى
خالص تحياتى

ابراهيم رزق يقول...

شرين سامى
اختى الفاضلة

سيجارة بنى دى اغنية مختلفة

بجد فعلا الواحد مش عارف يعمل ايه

اى خدمة على معانى الاغنية
ههههههه

نورتينى
خالص تحياتى

ابراهيم رزق يقول...

لولا و زهراء

فعلا حسبى الله و نعم الوكيل فيهم


نورتينى
خالص تحياتنى

ابراهيم رزق يقول...

افكار مبعثرة

فعلا مستوى الذوق انحدر و اصبح فى الارض

متشكر لمجاملتك

نورتينى
تحياتى

ابراهيم رزق يقول...

دعاء العطار


فى الامتحان
طب عرفتى تترجميها ازاى
ولا حلتيها من غير ترجمة

ههههههههههههههههه

نورتينى
خالص تحياتى

ابراهيم رزق يقول...

موناليزا

طبعا مشكلة

طب نفرجهم تلفزيون كوالا لامبور

نورتينى
خالص تحياتى

ابراهيم رزق يقول...

Ms venus

فعلا صعب جدا

نورتينى
خالص تحياتى

ابراهيم رزق يقول...

Bent Men Alazman da

ماذا نفعل نضعهم فى صناديق زجاجية

سعيد بتعليقك
و ارجو التواصل

نورتينى
خالص تحياتى