الأحد، 19 يونيو 2011

ابتسم انت بتتشتم

عمرك اتشمت و ابتسمت او عمرك اتشمت و مقدرتش تعمل حاجة
عمرك قريت على سيارة ميكروباص او نقل متبصليش يا عبيط انا جاية بالتقسيط ايضا الم تقرا متبحلقش كده يا لوح انا جاية بطلوع الروح و ايضا سوقوا بالراحة يا بهايم عشان السواق نايم وايضا لا تجحش محسوبك الجحش طبعا معروف لا مؤخذة من هو العبيط و اللوح و البهايم و الجحش
نأتى للبيه الحكيم طبعا الحكمة ليها ناسها تلاقيه بيقول
الرجولة مواقف و الندالة دروس
لو كان الرزق بالجرى ماكنش حد حصلنى
اللى يخاف من العفريت يعمل عبيط 
لما كنت عصفور اكلونى و لما بقيت اسد صاحبونى
اللى امه بتدعيله احسن من اللى امه تديله
عتاب الندل اجتنابه
مفيش صاحب يتصاحب
لو كان الجرى بالرتب كان زمانى لواء
نيجى للبيه اللى خايف من الحسد يقول ايه
دى قصة كفاح مش جاية على المرتاح
متبصليش بعين راضية ده انا طلع عين اهلى فى السعودية   
الحلوة من دمياط و عليها اقساط
الحلوة من حلوان و صاحبها راجل غلبان
الحلوة خوخة جت بعد دوخة
ماتقوليش دى بكام دى جات بدهب المدام
نيجى لصاحبنا اللى فرحان بنفسه كله يوسع ليه نشوفه هيقول ايه
من حق التقيل يدلع
ان عشت هذلكوا و ان مت ربنا يسهلكوا
شوفوا الجديد يا بلد التقليد
تركب معايا اسليك تنزل اولع فيك
تعمل حسابى اقدرك تهزر معايا اعورك
دلعها فى الغيارات و ريحها فى المطبات
الحلوة لما تدلع تخلى الاسفلت يولع
ان نام السبع شوية كلاب يكلوه
و لقد رصد ابو الاجتماع الراحل الدكتور سيد عويس هذه الظاهرة فى كتاب مهم جدا اسمه هتاف الصامتين لكن ما لم يرصده الدكتور سيد هتافات التكاتك مثل
مع روتانا توك توك مش ممكن هتمشى على رجليك
ماشى على رجلك ليه ده التوك توك بقى بجنيه
شغل المساحات و عاكس فى البنات
تروح شمال تيجى يمين احنا برده سواقين
بلد مجانين صحيح 




 
 

هناك 15 تعليقًا:

دعاء العطار يقول...

هههههههههههههههههههه

دايماً بحب أقرا الحاجات دى وببقى نفسى أسأله اشمعنى الجمله دى ؟

الموضوع حلو اوى ومبطلتش ضحك كالعاده

أنا بقيت أدخل البلوج عشان أضحك


بس السؤال بقى

جمعت الجمل دى كلها ازااااااى ؟

D: D:

ربنا يخليك لينا يااستاذ ابراهيم وتضحكنا كمان وكمان (: (:

غير معرف يقول...

انت عملت التجميعه دي ازاي؟ عامل رسالة ماجستير على الميكروباصات؟

انت متعرف على سايس ولا ايه؟؟
من انتم؟ من انتم؟

***********************

مها ميهوووو

reemaas يقول...

هههههههههههههههههه
مش ممكن مالكش حل

كل مرة بفضل اخمن هتكتب عن انهى جنونة بس مابعرفش انشن صح معاك

تعرف انى كنت راكبه مواصلة قريب وفعلا لفت نظرى اللى مكتوب على العربيه اللى قدامى

ماتبصليش بعين راضية وشوف اللى اندفع فيا

ههههههههههههههههه

د/دودى يقول...

هههههههه "عضه اسد ولا نظره حسد" و "انا على انت مين؟؟" و كل مرادفات اتهامك بالحسد و النداله و دنو المستوى موجهه لك دون محاوله للدفاع عن نفسك...انت زعلان قوى من الكتاب ففى الواقع شتيمه حبايبنا دول وصلت للواقع فاذا برجال محترمين بيتشتموا عالطاير و هو بيجرى و عارف انه مش هيسمع ردها و تظهر تلك النظره و الابتسامه الصفراء لاحساسه بانه شتم دكتور ولا مهندس دون رد!!

Ramy يقول...

لالالا

أسم البوست

هنيالك يا فاعل الخير و الثواب (:

و نسيت تقول

اللى جيباهم وخداهم

مبتصليش بعين رادية شوف اللى أدفع فيه

(:
(:
(:

مصطفى سيف الدين يقول...

ههههههههههههههههههههه
حرام عليك يا استاذ ابراهيم هتموتنا من الضحك على جنان البلد دي
تحياتي

كريمة سندي يقول...

هو ما فيش حد عاقل نقدر نتكلم معاه هنا كلهم مجانين تحياتي

ههههههههههه

Bent Men ElZman Da !! يقول...

ههههههههههههههههههه
جامده اوى الجمل دى
جمعتهم ازاى دول
انا كنت فاكره الموضوع من اوله حاجه تانيه
مافتكرتش انك هتتكلم عن الموضوع ده

بقت ظاهره غريبه اوى
والا اللى بيكتب اسم ولاده وبيديهم القاب

مها البنا يقول...

للأسف رغم ان البوست خفيف .. لكنه مش يضحك وعميق جدا
لو إنتبه الناس لهدر كرامتهم وسبهم بطرق صارخه .. لصدر قانون يجرم تلك الجمل لما تحمله من إهانات لا يرضى عنها العرف والدين سويا.

لكن بما إننا بنقرا الجمل دى على السيارات وبنضحك .. يبقى لحضرتك حق فعلا تقول :

بلد مجانين صحيح (قلبوا الموازين)

Ms Venus يقول...

هههههههههه


صدقنى احنا شعب محتاج دراسة

المصريين فعلا غير اى شعب تانى


لو اتعمل علينا دراسة هتلاقى العجب

شمس النهار يقول...

مش ممكن ضحكتني ضحك

كتير وانا سايقة بقارالحاجات دي وبضحك

المصري مبتكر بطبعه

وبن نكته

ايام الضحك والدموع يقول...

السلام عليكم
تلك الشعارات عبارة عن كوكتيل عجيب من خفة الدم والذكاء ..فأى سائق حياته كلها ع الطريق وبيقابل أشكال وألوان من الناس وف جملة واحدة بيقول خلاصة تجربته...وإليك الاتى:
الاحساس نعمة
من كتر غدر البشر حبيت السفر
ما حدش فاهم حاجة
تحياتى

سكن الليل يقول...

ههههههههههه
مش ممكن الموقف اللي بتشتغل فيه دة
دة مالتي اوبشنز
دلنا عليه يسترك يسعدك
^____^
بجد مالهاش حل
طول الطريق ببص على العربيات أستلقطلي
كام كلمة ينفعوني
بس مش عارفة دة جنان ولا خفة دم
ولا تحت اي تصنيف
المهم ياريت تيجي على كلمة مكتوبة
اهم شيء اسلوب الحياة
وطريقة التفكير

**

والتوكتوك مش بس وسيلة مواصلات
التوكتوك بتاع حوارات

:P:P

غير معرف يقول...

صباح الورد ابراهيم

كنت جاية أعلق على الإدراجات اللي

فاتتني لكن للأسف شفت خبر الوفاة

فطغى الصمت إحتراماً للموقف ...

تحياتي

آرثـر رامبـو يقول...

أستمتعت بالقراءة


؛ )