الأحد، 26 يونيو 2011

العذاب شوبنج

اهدى هذا الجزء الى القلب الطيب ملك الزهرات الانسان الخلوق الحنون المثقف الواعى الاستاذ فاروق فهمى و اقول له ان شعب البلوجر كله يريده ان يفتح التعليقات مرة اخرى على ان يفعل خاصية الاشراف على التعليقات كما اهنيه ببوسته الاخير و ذكرياته مع كيمو و لولو

الجزء الثانى من اتكلم
الشوبنج يعنى ايه شوبنج يعنى تكون قاعد فى حالك كده مستمتع و انت بتتفرج على ماتش الاهلى و هو بيكسب او تكون مستمتع كده بمنتهى الروح الرياضية على ماتش للزمالك و هو بيخسر تقوم تسمع الصوت الحنين احنا عاوزين ننزل نشترى شوية حاجات للعيال طبعا ينزل الخبر عليك كالصاعقة و ترد بمنتهى الرقة هو مش احنا لسه مشترين حاجات للعيال الاسبوع الماضى فياتى الرد سريعا دى كانت حاجات للبس البيت
طبعا زياد و ساليناز بيراقبوا الموقف من بعيد طبعا لا اجد امامى الا الموافقة
طبعا محسوبكم لما بينزل يشترى بيشترى بسرعة الصاروخ انظر الى الفاترينة عجبنى البنطلون عجبنى التيشرت او القميص او الحذاء ادخل اشترى عندك مقاس كذا موجود اللون كذا موجود ادفع و امشى
طبعا كل ده عند الستات مرفوض تبدء الرحلة بمشاهدة المحلات و يحدث هذا الحوار
هى  ايه رايك فى الفستان ده
انا   جميل
هى  طب ايه رايك فى الفستان ده كمان
انا   جميل
هى  طب الفستان ده اجمل و لا الفستان الاول
طبعا انا نسيت شكل الفستان الاول او بمعنى اصح لم اهتم ان انظر اليه انا كان غرضى يعجبها و تشترى و اخلص
انا  لا ده اجمل 
هى بس انا شايفة الفستان الاول اجمل
انا  خلاص نشترى الفستان الاول
هى انت عمرك ما تريحنى خالص و تساعدنى
انا  الفستانين حلوين نشترى الاثنين
نسيت اقول لكم اننا لم نستطع دخول المحل نظر لان زياد و ساليناز يمسك كل منهما بايس كريم و ممنوع دخولهم المحل بالايس كريم و علينا الانتظار ساعة من العذاب تقريبا لحين انتهائهم منه و بعد دخول المحل و فحص الفستاتين لم يعجبها اى منهما لان احدهما قماشته غير جيدة و الاخر بعد ان قاسته الست ساليناز لم تجده جميلا عليها
طبعا طوال سيرك فى المول او الشارع يقابلك بائعى البلالين و العرائس و الفيشار و عليك ان تشترى او تتجهم و ترفض حسب الحالة المزاجية
طبعا تتكرر هذه المشاهد و الحوارات مع كل قطعة تشترى و قد نرجع لنشترى قطعة ملابس تركنا محلها منذ اكثر من ساعة و عليك ان تحفظ اى محل كانت موجودة به
طبعا تتخلل رحلة الشوبنج زيارة لاحد محلات الوجبات السريعة كنتاكى او مؤمن او تكا او بيتزا هت لان العيال لا تتحرك الا بالبنزين و ده بنزينهم
اخيرا اعجبها فستان فرحت جدا و طرت من الفرحة و صرت اقبل الزبائن و الكاشير و انا اقول جول جول لكنى فقت من الفرحة على  الغاء الهدف و راية تسلل مرفوعة من الانسة ساليناز لان الفستان لم يعجبها و تبدء المفاوضات معها لاقناعها بجمال الفستان لكنها تنتهى غالبا بالفشل
طبعا زياد مثل حالاتى ما نختاره يرضى به طبعا مع طول فترة الشوبنج تزداد المشتريات و تفلس الجيوب رويدا رويدا
عند الرجوع الى المنزل نكتشف اختفاء شنطة بها جاكت خاص بساليناز و على المرور على جميع المحلات التى زرتها للبحث عن جاكت ساليناز و خرج الفرمان بالنزول حالا للبحث عن الجاكت و فشلت المفاوضات باقناعها بالانتظار للغد طبعا نزلت فى التو و اللحظة و لكنى لم اذهب لابحث عن الجاكت بل ذهبت الى الكوفى شوب لمقابلة اصدقائى نتبادل الاحاديث و ننسى الهموم هايد بارك زوجى يعنى و عند عودتى اخبرتها ان المحلات اغلقت ابوابها و اخبرتها ساذهب غدا بعد العمل للبحث عن الجاكت
طبعا كما وعدت و وعد الحر دين عليه ذهبت لابحث عن الجاكت و لكنى وجدتها تجربة فاشلة و تعب على الفاضى فذهبت الى المحل اللى اشترينا منه الجاكت و اشتريت جاكت اخر و عدت الى البيت سريعا و دخلت مختالا و انا اصرخ لقيت الجاكت لقيت الجاكت انا تعبت تعب انهارده انا لفيت محل محل و سالت كل البايعين خدى الجاكت اهو
واذ فجاة افيق على مفاجاة اخرى الجاكت الاصلى موجود لقد نزلت زوجتى صباحا و بحثت عنه و احضرته و اصبح هناك اثنين جاكت هل تم استنساخ الجاكت امسكت الجاكت فى يدى و انا اقول حقا العذاب شوبنج بلد مجانين صحيح
         

هناك 33 تعليقًا:

ياسمين يقول...

فعلا عذاب ..
بصراحة طيب ليه حضرتك تزل أصلا معلش التزول مع الرجالة حاجة مش حلوة بجد اصلهم بيزهقوا بسرعة والشراء دا بئا مزاج ..يعني هو أول محل ندخله نشتري ولا ايه ...ازاي يعني لازم نلف ع كل المحلات ههههه اسألني أنا خبرة ف الحاجات دي مدوبنهم محل محل هههههههه
بس موضوع الجاكت افكرت ان الجاكت هيطلع لونه مختلف مثلا لكن معتقدش انه هيلقه هههه
بس انصح حضرتك متروحش ...وبكدا حضرتك هتسريح وكمان هي هواية ستاتي يعني الستات بيستمتعوا بالحاجات دي اكثر..

مصطفى سيف الدين يقول...

اولا اؤيد طلبك واطلب من اخي الاكبر واستاذنا الاستاذ فاروق فهمي فتح باب التعليقات والا فاننا عند كل بوست ينشره سننشر بوستا في مدوناتنا فقط للتعليق :)وقد اعجبني بوست ليلى مراد وكمال الشناوي جدا وكنت اتمنى التعليق عليه
ثانيا اتفق معك بلد مجانين صحيح والستات مزودينها شوية في موضوع الشوبنج يعني علشان يشتروا فستان او شنطة محتاجين اسبوع كامل يتفرجوا على كل المحلات واسبوع تاني للتشاور مع اختها وبنت اختها وخالتها وعمتها واسبوع تالت علشان تكون اخدت القرار :)
تحياتي كالعادة بتتمتع باسلوب ساخر رائع

FAW يقول...

والله إنت من تاني جزء تعبتني وخوفتني من الجواز يا راجل :)

بقي كنتاكي وتكا دول البنزين ؟ ههههههههه

حرام والله

موضوع شراء الهدوم ده أبشع مشوار ممكن الواحد ينزله مع أي مؤنث

ربنا يقويك :)

كريمة سندي يقول...

الله المستعان .. والله شوبنج معذب بجد تحياتي

♥نبع الغرام♥♪≈ يقول...

دا قمة العذاب بجد


الله يكون بعونك

حاجه تزهق

موناليزا يقول...

:) كنت متخيل ان زوجتك هتستحمل طول فترة الانتظار ده كله على ما سيادتك تيجى من الشغل
أنا لو مكانها مكنش جالى نوم أصلاً

موناليزا يقول...

وعلى فكرة حضرتك نبهتنى لحاجة مهمة جداً فى الجملة دى
"طبعا انا نسيت شكل الفستان الاول او بمعنى اصح لم اهتم ان انظر اليه انا كان غرضى يعجبها و تشترى و اخلص"

بقى هى الحكاية كده بقى
وأنا أقول ليه كل ما اختار حاجة أخويا يقولى عليها جميلة

زهرة الضحا يقول...

بما اني لسه عامله شوبنج من 3 ايام فانا اقدر مدي العذاب اللي حسيته

ومع اني من معشر نون النسوه الاتي لا يرضين بالقليل
بس هو يعني لو لاقت الحاجه اللي عحبتها في الاول ما كانت اشترتها و خلاص بس هي مش لاقتها :)

Unknown يقول...

و ماله بقى الشوبنج متعرفش ان الصيد له متعه أكبر من الفريسه :)
و بعدين عايز تشتري حاجه أي كلام أو ذوقها مش حلو أو مش مظبوطه لمجرد انك كسلان تمشي شويه ده حتى المشي رياضه.
أنا معاك ان الشوبنج بأطفال متعب شويه بس ضروري أمال مين اللي هيقيس الأمهات بقى بتطلع عنيهم في موضوع القياس ده خصوصاً ان البروفات مفيهاش تكيف.
هههههههه
هتلاقيني دائماً بدافع عن مراتك و كلللل البنات خلي بالك هههههه
تحياتي ليك

غير معرف يقول...

صباح الغاردينيا عم مضبوط
ههههههههه قصدي استاذ ابراهيم تصدق بالله وحشتني مدونتك مدونة المجانين بصحيح :)
بص بقى انت تزعل ساليناز ليه كله الا سوسو مش عاجبها الفستان يبقى مش عاجبهاوبعدين انا عاوزة افهم حاجة دلوقتي الرجالة مش بتركز في الفستان في الشوبينج عشان حضراتكم تعبتو من المشي والف واما ترجع البيت وتقيس ليك الفستان حتطلع لها مية عيب ومايعجبكش الفستان بجد بجد انتو الرجالة حالة مستعصية <<<< جاية تعمل خناقة
بس بجد ضحكت من قلبي ههههههههه وانت ناسي الفستان الاول جميل انك تشتري الفستانين وام زياد تستاهل المحل كله <<< هتخسره مجرمة ههههههه
على فكرة كم مقاس سوسو عشان اخد الجاكيت النسخة التانية :) "
؛؛
؛
لروحك عبق الغاردينيا
كانت هنا
reemaas

reemaas يقول...

ههههههههههههههههه طب ماهو انت اللى غلطان تنزل لييييييييه اصلا

على فكرة بقى اوحش حاجة ان الواحدة تنزل مع واحد تشترى بتكلفتونا كده وخلقكم ديق

لا لا انت اديها الفلوس وهى تنزل


بايد جدا رسالتك للاستاذ فاروق كان نفسى ارد على اخر بوست كمان كنت عاوزة اقوله يخلى كل لقاء فى بوست

Bent Men ElZman Da !! يقول...

انا كنت ظالمه خطيبى ان كل حاجه بختارها يقولى عليها كويسه كويسه
طلع الموضوع منتشر مش هو بس :D
بالنسبه لينا الشوبنج والفرجه على الملابس متعه اصلا
مش عارفه ليه معاكم الموضوع صعب اوى كده ههههههه
بس ادى النتيجه ان بقى فى جاكتين نفس الشكل

faroukfahmy يقول...

لقد كان يا ابراهيم لما كتبت تأثيره البالغ على نفسى لما احتواه من عواطف مخلصةومشاعر صادقة وقد سطرتها يداك بمداد من نور المحبه
ولكن من اين الكلام البشرى ان يظهر بجلاء ما يختلج فى طيات الاضلع من عواطف سمحاء رقراقه
وانى فى مكانك اشكر صديقى الصدوق مصطفى سيف على ما ابداه من مشاعر صافية نحو شخصى فهو دائما ما يحملنا جمايل لا نستطيع ان نوفيه حقه فيها واعتذر له فى عدم ملا حقتى لجواهره المنثورة فى مدونته لما تحتاجه من ردود تتفق ومكانتها ووزنها وربنا يقدرنى .....كما اشكر اختنا الفاضلة حكيمة المدونات ورائدة احرارها انا حرة
على مشاركتها لمشاعركم
واخص بالذكر عزيزتناreemas على رجائها الودود لامر التعليق ،ونور اجد فى كتابتها راحتى وهنائى وسعادتى فهى نشيدى وقيثارتى
وانى من مكانك انحنى مستجيبا الى احبائى وبدونهم لن يكون لى احبه بانه فور رجوع ام عمر (كارولين من مصيفها سوف اعيد مربع التعليقات لانها ادرى منى بشئون البلوجر واخشى ان يضيع منى كما ضاع سابقا من اللعب فيه مابيصدق حد ييجى جنبه
ما حدث لك ياابراهيم من نسيان حدث لى اثناء تواجدى فى محل c&A بلندن عنما كنت اتسوق انا وزميل لى مدير عام شملا فى ذاك الوقت وبعد ان اشترينا حاجاتنا وركبنا الاتوبيس الاحمر ابو دورين فاجأنى بان جزءا مما اشتراه قد نسيه فى المحل وعاتبته على هذا النسيان فى بلد الغربه والمفاجأة الاكبر اننى فوجئت ايضا بنسيان بعض مشترواتى واخذنا نضحك على بعض ورجعنا فى نفس الاتوبيس ولكن كانت الساعة قد تعدت السادسةمساءا حيث تقفل المحلات فى جميع انحاء لندن
شوف بقى الفرق بيننا وبينهم فى مصر تفتح المحلات بعد الظهر وتسهر طول الليل حيث نهارنا بقى ليل وليلنا بقى نهار ، مع ان قرآننا يحثنا على غير ذلك حيث جعل الليل سكنا لنا نهايته
وكما وأمر مدوناتنا كما قال عزيزى سيف فى احد تعليقاته بانه يغلب عليها الكآبه
فاننى سوف اهدى الى احبابى الفراء بوستين ضاحكين بعنوان
(هوه البط بيصلى معانا صلاة الجمعة )
(حكايتى مع فتفت (فاتن حمامة ))ومع حكيم عبد الحكيم عامر نائب رئيس جمهورية مصر سابقا وبعدها سوف ارجع الى حكاياتى فى الهند والبلاد الاوروبية
مع اجمل تحياتى
الفاروق

zizi يقول...

عزيزي ابراهيم ...في الأول انت وحشتني جداً انت وكل حبايبنا المدونين الكرام كل باسمه وصفته ..ومعايا كيس لب مخصوص كل واحد ياخد شوية ومحمصات النصر بتسلم عليكم واحسن واحد اللي على راس علم الروم وخدوا من المسيحي عشان لبه احسن ..
اما مشكلتك مع الشوبنج فدي بتحصل في كل بيت فيه اطفال وبعدين انا كان عندي بنتي الصغيرة وهي صغيرة كانت تشتري كل حاجتها في الأول وبعدين تقعد (تزن )عشان رجليها وجعتها من المشي وعايزة تروح ..

والأحسن تسيبهم ينزلوا لوحدهم عشان ياخدوا راحتهم وبعدين حاتريح نفسك من اللف والدفع...

فيه حاجة عايزة انبه عليها من خلال مدونتك الأوسع انتشاراً وطبعاً هي دعوة لكل المدونين لكي ينشروا هذه الدعوة في مدوناتهم وهي دعوة للتبرع بالدم تنتهجها المدونة نوران وكذلك المدونة فاتيما ..وسوف يكون التجمع هذا الشهر يوم اول يوليو(الجمعة القادمة)الساعة التاسعة امام مبنى المصل واللقاح بالعجوزة وممكن ابراهيم يشوف التفاصيل عنهم وينقلها لكم ولكم الأجر والثواب ..تحياتي

الاحلام يقول...

ابوزياد
فيه ناس بائعين فاهمين التعامل مع الحريم ازاى والتعامل مع الرجال ازاى يعنى لما واحده ست بتشترى يزيد بالسعر علشان يفضل ينزل معاها لغايه السعر الى هو عاوز يبيع بيه لكن الرجل بيقوله السعر الطبيعى علشان هو مش بيفاصل
تحياتى لموضوعك الشيق سلامى لزياد وساليناز تقبل تحياتى الاحـلام

لــــ زهــــــراء ــــولا يقول...

سيدى الفاضل

اولا الستات دول حالهم عجيب فى الشراء بصراحه انا باتخنق منهم اوى اوى ^_^ وفى ناس من اصحابى بارفض انزل معاهم لانه خد بقى فوق اللى انت قولته انهم ممكن يدخلوا محل دهب ويبدوا يتفرجوا والخاتم ده حلو لا صغير هات دهب ابيض وفى الاخر هى مش هتشترى بس هى بتتفرج يمكن فى يوم تشترى شوفت خنقه اكتر من كده " اشد شعرى "

ربنا يبارك لك فى ابنائك ويقر عيونك بهم ويفرح قلبك يااااااااارب

يارب يحفظ لك اسرتك كلها يارب

زهـــــــراء

Mona يقول...

:))

ابراهيم رزق يقول...

ياسمين

يا ريت اقدر لكنها تعليمات عليا
ههههههه

طب هى هواية ستاتى انا اعمل ايه

نورتينى
خالص تحياتى

ابراهيم رزق يقول...

FAW

لا الجواز حلو قوى
متخافش اتكل على الله و اتجوز
سامحنى يارب

هههههه

نورتنى
خالص تحياتى

ابراهيم رزق يقول...

كريمة سندى

شفتى ازاى انا باتعذب

نورتينى
خالص تحياتى

ابراهيم رزق يقول...

نبع الغرام

شفتى بقى الرجالة مظلومين

نورتينى
تحياتى

ابراهيم رزق يقول...

موناليزا

شفتى ازاى انا كنت علنياتى و كنت فاهم غلط

اصل الستات كل اختيارهم حلو قوى
ههههههه

نورتينى
تحياتى

ابراهيم رزق يقول...

مصطفى سيف

اسف جدا على على خطائى فى ترتيب الرد

الاستاذ فاروق استجاب و الحمد لله

دول مزودنها كتير و التردد مرض العصر يا اخى ايبك اقصد يا اخى مصطفى
ههههههه

نورتنى
خالص تحياتى

ابراهيم رزق يقول...

زهرة الضحا

شفتى قد ايه بنتعذب

و الله الحاجات من وجهة نظرى كلها شبه بعض و قد نرجع للمحلات الاولى

نورتينى
خالص تحياتى

ابراهيم رزق يقول...

شرين سامى
اختى العزيزة

يا سلام بقى على موضوع القياس و الانتظار الممل و انت مقدامكش حاجة غير انك تقول حلو و مظبوط

بقى هى الحكاية كده
انصر اخاك ظالما او مظلوما
هههههههه

نورتينى
خالص تحياتى

ابراهيم رزق يقول...

ريماس
صباح الورد و الفل و الياسمين

حمد الله ع السلامة
هلا يا هلا
اشتاقنا ليكم ياما
هلا يا هلا

هو ان اقدر ازعل سوسو
ده انا باتمنى ليها ارضا

هو انا مخى دفتر هاحفظ كل الفساتين

بقى انا بحسبك بتسألى على مقاس ساليناز علشان تشترى ليها جاكت سينيه اتاريكى طمعانة فى النسخة التانية
ههههههههههه

نورتينى
تحياتى

ابراهيم رزق يقول...

reemaas

يا ناس يا هو دى تعليمات عليا انى انزل
لو كان عليا اقعد فى البيت و انتخ
هههههههه

الاستاذ فاروق استجاب و سعيد جدا باستجابته

نورتينى
خالص تحياتى

ابراهيم رزق يقول...

Bent Men ALZaman Da

عشان تعرفوا اننا مظلومين

الشوبنج بالنسبة لنا عذاب

نورتينى
خالص تحياتى

ابراهيم رزق يقول...

فاروق فهمى
استاذى العزيز

متشكر جدا جدا على سرعة استجابتك و سعيد بها جدا جدا

موقف طريف الذى تعرضت سيادتك له فى لندن
لكن صعوبة موقفى انى لم اعرف اى محل نسيت به الحقيبة

نحن فى انتظار ابداعك و ذكرياتك
نورتنى
خالص تحياتى و تقديرى

ابراهيم رزق يقول...

zizi العزيزة الذيذة

حمد الله على السلامة
فعلا محمصات النصر احسن واحد بيبيع لب فى مطروح
بمناسبة الشوبنج لما كنت فى مطروح و كان المحل ده كان زحمة جدا واحدة قدامى اشترت بالف و خمسمائة جنيه لب مش عارف هتعمل بيه اية

التعليمات العليا انى انزل معاهم
اسبهم ينزلوا ده يوم المنى بالنسبة لى

طبعا ادعوا كل المدونين للذهاب للتبرع بالدم و ساعلن عنه فى بوست منفصل

نورتينى و شرفتينى
تحياتى و تقديرى و حبى

ابراهيم رزق يقول...

الاحلام
اخى العزيز

متفق معك تماما الستات محدش يعرف يغلبهم
ههههههه

نورتنى
خالص تحياتى

ابراهيم رزق يقول...

لولا و زهرا

شفتى بقى
انتو بتتخنقوا
احنا بقى نعمل ايه
ههههههههه

متشكر على دعوتك الطيبة
نورتينى
تحياتى

ابراهيم رزق يقول...

Mona

متشكر لمرورك

نورتينى
خالص تحياتى