الثلاثاء، 28 يونيو 2011

زمان و انا صعلوك

 الجزء الثالث من اتكلم


مش عارف ليه هافف عليا زمان يا سلام سلم زمن العز بصحيح كنت ممكن افرتك الماهية فى عشر ايام هى عيشة و لا اكتر يا نور النبى
يالله يا شباب عايزين نتعشى عند ابو رامى ثوانى و نكون هناك يالله يا شباب عايزين نروح اسكندرية جرى ع البيت شنطة هاند باك صغيرة كم تيشرت و كم شورت و فوطة و شبشب و جرى تخلص
نروح اسكندرية نلاقى نفسنا فى الساحل الشمالى معلش انا قديم شوية مكانش فى ام بى ثرى او فور وكمانك فى ودانك تسمع اللى يعجبك و عايش سافرت بقى لقيت شقة ملقتش شقة مش مهم احنا فى مرة سافرنا اسكندرية و كان فى العيد و بحثنا عن اى شقة ملقناش و الفنادق كلها محجوزة فى شقة كانت هتفضى ثانى يوم العيد نمشى يعنى لا طبعا اقنعنا البواب و اجرنا الغرفة بتاعته اليوم ده حياة كلها سعادة حياة صعاليك طبعا انتو مجربتوش الصعلكة 
الصعلكة فى اسكندرية مثلا انك الصبح تكون بتفطر فول و طعمية عند محمد احمد بمحطة الرمل بليل بتتغدا عند قصر حسنى للمشويات و الصبح بتتغدا سمك مشوى على الصاج بابوقير و العشاء وجبة سمك و جمبرى و كابوريا عند قدورة فلست مش مهم اول يوم تبقى فى الشاطبى تانى يوم فى المنتزه نرجع بالطائرة فى قطار الصحافة او حتى مسطح ع القطار مش مهم
حاليا من اول قبض المرتب يتم وضع ميزانية من اول الشهر ثم يتم جدولة المرتب اكثر من مرة طوال الشهر ثم تنعقد الجمعية العمومية انا و زوجتى لاعتماد الموازنة النهائية
ناتى للسفر للمصيف من شهر تقريبا يتم اعداد الحقائب و كأنك ستهاجر و يتم اعداد تقريبا من عشر حقائب الى اربعتاشر و ربع حقيبة واحد فلحوص هيطلع و يسألنى هو الربع الحقيبة دى بتاعة مين هاقوله الربع حقيبة دى خاصة بى
طبعا من اول يوم للسفر مفيش راحة لو قاعد جوه قرية سياحية تراقب العيال و هى بتلعب لاحسن يروحوا ناحية حمام السباحة لو قاعد على البحر طبعا لا تستطيع ان تنزل البحر بمفردك ساليناز على كتفك و زياد فى ايدك طبعا لا تستطيع ان تجلس بهدوء تحت الشمسية يأتى بتاع الفرسكا ثم الايس كريم ثم البالونات ثم ثم ثم ناتى الى المشكلة الكبرى و هى الماء و الخضرة و الوجه الحسن طبعا الماء لا نستمتع به و الخضرة مش موجودة اصلا اما الوجه الحسن فانت خاضع لرقابة حكومية اشد من رقابة الامم المتحدة و منظمات العمل المدنى لدرجة لا تستطيع الالتفات يمينا او يسارا او اماما الاتجاه المسموح به ارضا فقط و الا طبعا انتو فاهمين
طبعا لا تستطيع الجلوس على البحر اكثر من ساعات محدودة خوفا على الاطفال من التعرض للشمس فترة طويلة
طبعا الخروج ليلا عذاب و بالذات لو نام احد الاطفال طبعا هم واضعين جدول للنوم يوم زياد ينام و يوم ساليناز تنام اما اليوم الثالث فزياد و ساليناز معا يناموا فى اليوم الرابع يحتفظ زياد و ساليناز بكامل طاقتهم لكن امهم تخرج علينا بأن انا مرهقة اليوم و كابس عليا النوم يالله نروح
و هكذا تبدء و تنتهى الرحلة الميمونة و انا اتذكر الايام الخوالى ايام العز ايام الصعلكة و اتمنى لو ترجع يوم واحد لكن نسيت ان اقول لكم ان مجموعة الصعلكة موجودة معنا فى نفس الرحلة لكن للآسف مع زوجاتهم لا نستطيع الفرار من هذا الكمين الزوجى الا لحظات بسيطة اثناء استحمام الاولاد من مياه البحر
بلد مجانين صحيح             

هناك 32 تعليقًا:

مصطفى سيف الدين يقول...

لو لم اكن عازبا لوددت ان اكون عازبا
او كما قال محمد عبد الوهاب
محلاها عيشة الحرية
مفيش احلى من الصعلكة وحياة الصعلكة عيشة من الآخر لا رحت فين ولا جيت منين ولا تصحى الصبح تلاقي حد فضى جيوبك
تحياتي

موناليزا يقول...

بكره لما الولاد تكبر تبقى تفتكر الأيام دى وتقول ولا يوم من أيامها:)

reemaas يقول...

ههههههههههههه
طب بزمتك بزمتك مش بتبقى مبسوط؟انكر بقى

على فكرة عيشة الحريه بتاعه الولاد دى بحقد عليهم بسببها

Bent Men ElZman Da !! يقول...

هى دى ضريبه ان الواحد يتجوز وحياته بيختلف :)

Unknown يقول...

السلام عليكم ،

أحلى أيام الخالية من المسؤولية ،
واجمل أيام مع اطفالنا .
وبكرة لما يكبروا هما كمان هتبقى أحلى وأحلى بإذن الله ..


دمت بخير والجميع .

غير معرف يقول...

صباح الورد ابراهيم

السفر بحد ذاته متعة لا يوازيها

شيء بدء من التحضير له وإنتهاء

برجوعك بالسلامة وأنت بكامل طاقتك

الإيجابية ...

بصراحة ما جربت السفر مع أزوجتي

وأطفالي لأني ببساطة لم أتزوج بعد

ولكن أعتقد مع كل ما قلت سيكون لها

متعة وشعور جميل يرافقك بصفتك

رب الأسرة وأنت ترى السعادة في كل

تصرفاتهم نتيجة لهذه السفرة ...

الحياة تحتاج أن نعيشها بدون تعقيدات

فهي هكذا أجمل ...

حفظك الله لأبنائك وحفظهم لك .

تحياتي

ياسمين يقول...

بتفكرني بكلام بابا ..ياااه أهلي ظلموني لما جوزوني صغير...
افتكر الحكاية دي بعد 20 سنة جواز هههههههه
أكيد بابا بيضحك خلاص بئا هو ادبس وخلاص ههههه
بس يعني انا مش عارفة الرجالة مش بيعجبها العجب ولا الصيام ف رجب ...لو متجوز يارتني ما اتجوزت لو مش متجوز يارب اتجوز وهيعمل البدع عشان يتجوز ...
مفيش حد عاجبه حاله..وبعدين دوام الحال من المحال بئا ياأستاذ إبراهيم وكلنا لها
والجواز شر لا بد منه ههههههه
وهنيالك يافاعل الخير والسعادة ههههههه
شحاتة مدوناتية ههههه
ربنا يسعد حضرتك يارب مع أولادك وزوجتك دائما وبكره أكيد الأولاد هيكبروا والمرور تكون أكثر هدوء..

faroukfahmy يقول...

تتصور يا ابراهيم انا عن نفسى لا افضل الابتعاد عن سكنى بالقاهرة حتى وانا فى ريعان الشباب قصدى الشيخوخة ههههههه
لو اقولك مش هتصدق
بنتى كارولين وجوزها واولادها حبايبى والست ام العيال سامحها الله فى الاسكندرية من اسبوع رغم انهم حاولوا استدراجى معهم ولكنى رفضت رغم ان لى مكانى المغلق هناك على البحر بميامى بالاسكندريةولكنى افضل ان اكون وحيدا مع نفسى فى هذا الحر المميت فى القاهرة وفى مسكنى وعلى سريرى الذى تعود ان يضمنى بعد صلاة العشاء مباشرة والا يبقى ليلى ليل سؤال وجواب انت كنت فين ويقعد يقلبنى شمال ويمين الى ان يهدأ واهدأ معه وانام والسلام ختام حتى اتم ما كتبته عن البطة التى صلت معنا الجمعة

♥نبع الغرام♥♪≈ يقول...

بزمتك ما هى حلوة

كل وقت وله اذاااااااان

قلبى معاك وربنا يعنيك

غير معرف يقول...

مساء الغاردينيا أستاذ مضبوط
<<< حالفة مية يمين لتمسكها عليه
طب بزمتك كدا انا ايه زنبي كل ماجيت مدونتك ببقى مبتسمة وبضحك كل الوقت طب عيني في عينك هو انت بجد بتقعد مراقب من ام زياد عشان الوجه الحسن ههههههه تلاقيك كل شويا عاوز تلعب الولاد في الميه عشان الوجة الحسن الي بيبلط في المية <<< بقت سمكة مش وجه حسن هههههههههه
اما حكاية زياد وساليناز عجبتني اوي وربنا بحسهم لزاز وطعمين ربنا يخليهم ليك ههههههه وهما عمالين ينامو ويخربو جوك :) <<< ابتسامة بخبث
بعدين انا عاوزة افهم ايه الفايدة من الصعلكة اهي حياة والسلام لافيها حبيبي من شفايف ام زياد ولا بابا من شفايف زياد وساليناز شفت قد ايه الحياة جميلة دلوقتي معاهم :)
ربنا يخليك ليهم ويخليهم ليك ويفضو لك جيوبك على طول ههههههههه
على فكرة ولايهمك كم مقاس سوسو وانا اجب لها الجاكيت انا كم ساليناز عندي :) "
؛؛
؛
لروحك عبق الغاردينيا
كانت هنا
reemaas

افكار مبعثرة يقول...

على فكرة انا بحقد عليكو جدااااااااااااااا على صعلكتكوا
لا حد كان يقوللوكوا رايحين فين ولا جاين منين و لا تخافوا تروحوا بالليل لوحدكوا ولا حاجة ابدااااااااااااا يا بختكو :)
احلى حاجة قلتها حكاية الربع شنطة بتاعتي دي ضحكتنيييييييييي :)
انا بجد متفقة معاك في العذاب و المسئولية بس متنكرش ان ليها جمالها
تحياتي ليك :)

آرثـر رامبـو يقول...

صدقت

أيام زمان لا هم ولا غم عايشين حياتنا بالبركـة ؛ (


تحيـة مسيـو .

شمس النهار يقول...

انا بقا هسيب البوست ده كله الجمييييييييييل

وامسك في سالينازا

جبت الاسم ده منين ياريس

لازما ولابد تحكي لنا جبت الاسم ده منين

وعايزة اقولك لو انت سبت المدام تخرج مع اصحبها زي زمان
ممكن هي كمان تسيبك تخرج مع اصحابك
هو ده الزواج الحديث

وعايزاك تهمس في ودنها همسة كده من تيته شمس
لو هي سابتك تخرج وتسافر يومين مع اصحابك هتشلها في عينك
وهترجع لها وحشاك هي والبيت والاولاد وخصوصا ساليناز:))
وهترجع تحكي لها عملتوا ايه والضحك والنكت وهتلاقوا حاجه تتكلموا فيها غير البيت والميزانية

وربنا يسعدكم

دعاء العطار يقول...

على فكره البوست ده اداااااانه ليكم مش لينا

لأنك قولت انك قبل الجواز عايش حياتك وحريه بقى مابعدها حريه

بذمتك فيه بنت عمرها استمتععت كده قبل طول حياتها

كلللللل حاجه قبل الجواز ممنوووووووووع

وكل حاجه بعد الجواز ممنوع ولو حتى جوزها متفهم .. فمسئولياتها بتكون كبيره

عرفت بقى اننا مظلومين ياعينى :( :(

وفعلاً فعلاً فيه حقد بقى D: D:

ابراهيم رزق يقول...

مصطفى سيف
اخى العزيز

فعلا مفيش احلى من الصعلكة و حياة الصعلكة

فينك يا حرية
هههههه

نورتنى
تحياتى

ابراهيم رزق يقول...

موناليزا

بس يكبروا بس دى السكة طويلة قوى

نورتينى
تحياتى

ابراهيم رزق يقول...

reemaas


حتى دى بصين لينا فيها و انا بقول هى راحت فين اتاريكوا حسدتونا هههه

نورتينى
خالص تحياتى

ابراهيم رزق يقول...

Bent Men ALZaman Da

دى ضريبة اصعب من الضريبة العقارية
ههههههه

نورتينى
تحياتى

ابراهيم رزق يقول...

زهرة نيسان

فعلا كلامك مظبوط هى المسئولية صغبة بس حلوة

ربنا يسعدك فى حياتك

نورتينى
خالص تحياتى

ابراهيم رزق يقول...

ريبال بيهس

طبعا السفر متعة و بالذات لو كان بلا قيود

ربنا يرزقك بالزوجة الصالحة

متفق معك تماما بما قلت

ربنا يحفظك و يسعدك
تحياتى

zizi يقول...

تصدق يا ابراهيم انا حسيت انك بتوصف بالفعل حالة كتير من الشباب ..لكن بقى دي ضريبة الإحساس بالأبوة واكيد هو احساس جميل ربنا مايحرمش حد منه ..وحالاً الولاد حايكبروا شوية وممكن تمارس معاهم ومع والدتهم ماكنت تصنعه في شبابك من امور الصعلكة المبكرة..وهذا بالتأكيد سيسعدهم مثلما يسعدك ..تحياتي

ابراهيم رزق يقول...

ياسمين

كلنا فى الهم سواء

كلنا ادبسنا و خلاص
بس الشحاتة اللى انتى بتقولى عليها دى صحيحة
هههههههههههههههه

ربنا يرزقك بواحد ميكنش عاش الصعلكة

تحياتى
نورتينى

ابراهيم رزق يقول...

فاروق فهمى
استاذى العزيز

هههههههههه
حد يسيب اسكندرية و يقعد فى القاهرة ده انا لو عندى الفرصة اعيش حياتى كلها فى اسكندرية
فكر كده و اخطف يومين معاهم مش هتندم

عجبتنى جدددددددددا حكاية البطة و فى انتظار باقى الحكايات و القصص

نورتنى و شرفتنى
خالص تحياتى و تقديرى

ابراهيم رزق يقول...

نبع الغرام

فعلا كل وقت و له اذان بس اذان عن اذان يفرق

هههههههههههه

نورتينى
تحياتى

ابراهيم رزق يقول...

ريماس
مساء الفل و الورد و الياسمين

ههههههههههه
انتى مش عايزة تنسى
انتى متعرفيش المراقبة بتبقى عاملة ازاى

بيتراقب الحركة التشريحية لعينك و عضلات رقبتك و كمان بيتراقب انت بتفكر فى ايه بكرة تتجوزى و تراقبى
هههههههههههه

يا سلام ع الصعلكة ميحسش بجمالها الا اللى عاشها
ربنا يرزقك بابن الحلال الملاك ابو جناحين
ههههههههههههه

انا كنت بهزر بس لو انتى مصممة معنديش مانع اقولك مقاس ساليناز
لما تنزلى مصر بأذن الله هههههههههههههههه

تحيات معطرة بالمسك و العنبر

ابراهيم رزق يقول...

افكار مبعثرة

هو الحقد ده اللى جابنا لورا
هههههههههههه

طبعا كل مرحلة لها جمالها بس فى المرحلة الاجمل

نورتينى
خالص تحياتى

ابراهيم رزق يقول...

ارثر رامبو

فعلا كنا عايشين بالبركة

نورتنى
تحياتى مسيو

ابراهيم رزق يقول...

شمس النهار

بقى اللى شدك فى البوست ده كله ساليناز
ههههههه
انا شرحت الاسم قبل كده و عشانك هاشرحه ثانى

ساليناز اسم فارسى مكون من مقطعين سالى و معناه زهرة و ناز و معناه الحب يبقى ساليناز زهرة الحب مثل صافى ناز الحب الصافى شاهيناز ملكة الحب شمسناز شمس الحب
هههههههه

لو هى عملت كده بقية الزوجات مش هيعملوا و بعدين بينى و بينك جربناها قبل كده و مستمتعناش كان ضميرنا بيأنب الواحد

نورتينى
خالص تحياتى

ابراهيم رزق يقول...

دعاء العطار

هو انتوا كل حاجة بصين لينا فيها ما البنات بتسافر تصيف مع اهلها على حساب باباها مش حسابها هى ههههههههه

الحقد اللى علينا ده هو اللى جابنا لورا

ادينا مدبسين اهو ههههه

نورتينى
خالص تحياتى

ابراهيم رزق يقول...

zizi العزيزة الذيذة

فعلا و الله معاكى حق بس تفتكرى لما الولاد هتكبر هيسبونا نمارس معهم الصعلكة و لا هيصعلكوا و يسبونا
ههههههههههه

ربنا يسعد و يهنيكى
نورتينى و شرفتينى
تحياتى و تقديرى و حبى

Unknown يقول...

يا سلاااااام طب ما احنا كمان كنا بنروح المصايف نتمنظر و نتعاكس و نفرح بنفسنا, نحط مانيكير و نلبس اللي يعجبنا و نسوق عجل و نتصور في كل شبر و نسرح و احنا بنسمع الأغاني.
دلوقتي بقى مصيف=عذاب , شايلين على طول و مش عرفين نلاقيها منين و لا منين من البنات المستهبلين فيها و لا من الأزواج اللي فاكرين نفسهم أيام الصعلكه, و طبعاً مفيش مانيكير و بنلبس اللي يريحنا مش يعجبنا و بنسمع الزن و الطلبات اللي مبتخلصش بس :)
كفايه كده انهارده ههههههه
لأ بجد أيام اللا مسئوليه كانت ليها جمالها بس دلوقتي الحياه من غير اللي بنحبهم متسواش.
بوست جميل كالعاده
تحياتي الخالصه لك و لأسرتك الجميله

ابراهيم رزق يقول...

شرين سامى

هههههههههههههههه

احنا قلنا حاجة احنا بنحن بس

سر فى اذنك احنا حاولنا مرة نرجع لايام الصعلكة لم نستمتع ضميرنا انبنا

فعلا الواحد اتعود على كده

تحياتى لكى و لاسرتك و الاستاذ امن