الثلاثاء، 28 يونيو 2011

امان ربى امان

تشتد الطوارىء فى المنزل جميع الاعمال المنزلية تم عملها و ما لم يتم عمله يؤجل الى الغد يخيم الهدوء على المنزل لا صوت يعلو على صوت المعركة منتهى التركيز منتهى اليقظة باقى من الزمن عشر دقائق باقى من الزمن تسع دقائق باقى من الزمن ثمانى دقائق باقى من الزمن سبعة دقائق باقى من الزمن خمسة دقائق باقى من الزمن اربعة دقائق باقى من الزمن ثلاث دقائق باقى من الزمن دقيقتين باقى من الزمن دقيقة استنوا كده انتو مستعجلين ليه انتوا معندكوش صبر هو انتو مش بتتفرجوا على مسلسلات تركية طبعا مش امتحان ثانوية عامة ده حانت الحلقة سبعة و تسعون من الجزء العشرون من المسلسل التركى سيلا طبعا يسبق المسلسل اعداد الشاى و الفيشار و الكيك لزوم التركيز 
طبعا بعد مسلسل سيلا سيتم عرض مسلسل العاصى على قناة MBC1 بعدها قناة  MBC4 تعرض طريق الخريف يليه مسلسل الغريب ثم تعرض MBCدراما مسلسل ليلة حيزران ثم رجل من قلب و مسلسل العصفور
قناة ابو ظبى تعرض مسلسل دقات قلب و العشق الممنوع اما قناة دبى فتعرض حصريا رفيق الدرب
طبعا حاولت اتابع اى مسلسل تركى فشلت فشل زريع الدبلجة تفشل اى متابعة و محسوبكم فى اللغة التركى لا اعرف سوى  امان ربى امان و مش عارف معناها ايه و المسلسلات اجزاء شغال كل جزء مائة حلقة شغال و اسماء خليل و زياد و يحى و جودت عاصم و ناديا و سيلا و لميس و دارين  كله شغال تركب المترو تسمع بنتين بيكلموا يا حلاوة سليم شفتى قد ايه رومانسى ثم تسمع تنهيدة تحرق قفاك و انت واقف مديهم ضهرك ثم تنزل لمصلحة حكومية  تسمع الموظفة تقول لزميلتها شفتى عاصم بعد ما مات صحى تانى انا والله فرحت بعد ما كنت بعيط اقعدت ازغرط و جبت للعيال مصاصة طبعا انا افتكرت عاصم جوزها فسالتها محاولا التقرب منها لكى اقضى المصلحة هو عاصم بيه ده زوج سيادتك و لا اخوكى نظرت لى نظرة نيوتن الى اجهل الجاهلين عاصم ده فى المسلسل التركى يا ؟؟؟ طبعا مش محتاجين علامات الاستفهام دى معناها ايه دى تيييت كبيرة معناها كده انى مش عايش فى الدنيا و مش بفهم 
انتوا مش عارفين المسلسل التركى ده بيعمل  ايه
معناه انك تبقى قاعد بتتفرج على الكورة مع شوبير او مساء الانوار مع مدحت شلبى فى تلفزيون حجرة النوم و تضطر مرغما انك تغادر الحجرة لكى تشاهدهم فى تلفزيون الصالة
انك طول ما انتى ماشى تسمع يا حلاوة سليم يا جمال عاصم يا رقة مهند بينما الشباب المصرى اللى زى الورد محدش بيعبره الايجبيشن الاصلى مش عارف فيه ايه مهند ده حتى واد معصعص و رفيع و باين عليه عنده انميا لمعلوكاتكم الخاصة هو ممثل من الدرجة الثالثة فى تركيا و غير معروف تقريبا لكن الدنيا حظوظ
هاقولكم على حاجة هتغيظ الجنس الناعم انا اتكلمت مع مهند اثناء زيارته للقاهرة و الله حسيت باختلاف يتكلم انجليزية ركيكة ال يعنى انا بتكلم انجليزى برفكت متخدوش فى بالكوا و الفضل الكبير فى شهرته للممثل السورى صاحب الصوت
صحفية صديقة فى مجلة الشباب طلبت منى مساعدتها فى اجراء حوار مع مهند فقلت لها مهند ايه و نور ايه الراجل اللى قاعد فى اللوبى ده المخرج الانجليزى نيكولاس روج ده عمل فيلم و قبل ان اقل لها تاريخه بادرتنى قائلة القراء بتوعنا لوكل انا عايزة حوار مع  مهند يا سلام مهند بقى لوكل يعنى مولود فى الدرب الاحمر او باب الشعرية يعنى
المثير للغيظ ان المسلسلات التركية بها كم كبير من المط و التطويل يلاحظه اى دارس او متخصص بمنتهى السهولة لكن يتم متابعتها دون ملل و بمنتهى الجدية مما فكرنى بفترة غزو الافلام الهندية و امان يارب امان بلد مجانين صحيح
  

هناك 29 تعليقًا:

غير معرف يقول...

صباح الغاردينيا أستاذ ابراهيم
بلاش مضبوط عشان ماتزعلش بس بجد ضحكت عليك وانت بتبص للست زي الي ضايع في وسط مدينة ملاهي ومش عارف عاصم مين الا بالحق هو عاصم مين ؟ <<< والله ماعرفوش
بجد من ساعة خلص سنوات الضياع ولميس ويحيى وبعد نور ومهند واخرها الاوراق المتساقطه مش بتابع تركي على فكرة انا من الجنس الناعم الي مش بيعجبها مهند وبجد مش عارفة الستات بتشوف فيه ايه يعني مش بيعجبني ههههههههه
اما سيلا حتضحك لو اقولك ماما مش بتفوت حلقة وبيبقى في حركة استنفار وتأهب عشان سيلا حتطلع دلوقتي طبعا ماما بيعجبها عشان حكاية العادات والعشيرة ومش عارفة ايه <<< امها حساسة جداً
بجد آمان ربي آمان هي العبارة دي مش كانت تقولها ممثلة مصرية قولها نسيت اسمها الي كانت تخينة ومش حلوة بس خفيفة دم ههههههههههه <<<< وصف يكسف
مشيها ليا :) "
؛؛
؛
لروحك عبق الغاردينيا
كانت هنا
reemaas

Noha Saleh يقول...

متفقة معاك تماما
فعلا بيبقى فيها مط وتطويل كبير جدا
انا مش من هواة المسلسللات التركية ممكن اشوف حلقة وارجع بعد فترة فى حلقة تانية الاقى الاحداث لم تتحرك
يمكن الناس متابعاها لان فيها جرعة رومانسية زيادة
احييك على مدونتك انا ماكنتش اعرف ان حضرتك عملت مدونة
الف مبروك وان شاء الله انا من المتابعين لها

مصطفى سيف الدين يقول...

القراء بتوعنا لوكل
الجملة دي جابت المفيد وقالت كل التعليق اللي كنت هاقوله
بجد المسلسلات المكسيكية والتركية تنرفز
والحمد لله ان عندنا في البيت محدش بيتابعها
تحياتي

دعاء العطار يقول...

ههههههههههههه

أنا كمان زى ريماس مش بيعجبنى شكل مهند خالص

نفسى أفهممم ... فين شكله الحلو ده ؟

أنا بحب الجمال المصرى .. لكن الجمال ده مايعجبنيش نوهائى

مش بحب المسلسلات التركى .. تابعت مسلسل واحد " لحظة وداع " ... وبالرغم انه حلو الا انه مش انتشر زى المسلسلات التانيه

احتمال لأنه حلو

انا زيك مش بحب التطويل اللى فى المسلسلات دى .. والغريب ان الناس فعلا بتسمعها للاخر وبتابع اكتر من مسلسل

انا عامة ودعت التليفزيون من زماااان .. ماله النت يعنى ..

ربنا مايحرمك من خفة الدم (: (:

zizi يقول...

لأكن انا الثانية زي بعضه ..اصل احسن رياضة للتخسيس ان الواحد يمشي بين المدونات كل يوم نص ساعة رايح ونص ساعة جاي وحاتشوفوا النتيجة ..هايلة ..ودلوقتي وانا معدية لقيت ابراهيم شادد حيله وكاتب بلوجاية جديدة فدخلت لقيتها زي العسل اما عن المسلسلات التركي فحدث ولاحرج ..واقولك الأغرب من كده النهارده اكتشفت ان مسلسل بولد اند بيوتفل لسه بييجي على ابو ظبي الساعة 4 العصر تخيل الحلقة كام 3958والشاطر اللي يكمل ....

بس حاقولك حاجة اهي حاجة بتشد الواحد من قسوة الواقع شوية ..
بس بجد لوحاتك بتاعة كل يوم حاجة غاية في الروعة وسلمت يداك ..

Bent Men ElZman Da !! يقول...

انا مفروسه اوى من المسلسلات التركيه دى
يوميا باخد كورس كده فى بيتنا من الساعه 12 الظهر لحد 4 العصر
يجى 5 مسلسلات تركى ورا بعض ببقى هاقطع فى شعرى
مابحبهاش المسلسلات التركى خالص
لانها اولا زيها زى المسلسلات العربى باختلاف ال 150 حلقه الزياده اللى هما بيحطوها
ومش بستظرف مهند ده ابدا
ده حتى بيطلع فى كل المسلسلات صايع وبتاع بنات
وباء وانتشر فى التليفزيونات المصريه المسلسلات التركيه دى
ربنا يكون فى عونا والله

reemaas يقول...

بقى بزمتك مهند معصعص؟
ههههههههههههههههههههههه

انا بتابعها من باب انى قاعده فى الصيدليه 7 ساعات ومافيش زباين فلازم ينقضوا باى طريقه


بس مش واصله معايا لدرجة الهوس دى

بحب رومانسيتهم اه


بس عارفه انها كلام مسلسلات

آرثـر رامبـو يقول...

صباح الخيـر

والله معاكـ حق المسلسل الواحد 400 حلقة
مع أني مو من متابعـي المسلسلات التركيـة
ولا العربيـة ؛ )
يستهوينـي التاريخـي فقط لأن لغتهـم مش بطالـة وفيها رجال أبضاي مثل الزير سالم صقر قريش عبد الرحمن الداخل .

إحترامـي .

Carmen يقول...

:‏)‏)) اه والله ده عبط رسمي واساسا ياريت لها معني او هدف الا كلها حاجات مبتذلة دون اي هدف
بلد مجانين فعلا :d

كريمة سندي يقول...

أصبحت أكتر من الهم على القلب .. والله شيء بايخ جدا ومثير للشفقة كل حاجة عندنا تاخد وقتها وتروح لحال سبيلها

لــــ زهــــــراء ــــولا يقول...

صباح الفل

بص بقى من غير تريقه ومن غير ما تقول انى جاهله كل الناس كانت تتكلم عن مهند وكان نفسى اعرف شكله وكنت مش مشغوله اوى به بس الناس بتتكلم عنه وانا مش اعرفه ومش جه فى بالى اتفرج على حلقه من مسلسله او اشوف صوره على النت انا عاوزه حد كده يكملنى عليه المهم كنت عند جماعه معارف ولاقتهم بيتكملوا عنه قولت حلو لما اسالهم حد معاه صوره راحت البنوته اللى فى البيت قالت تعالى المهم دخلت حجرتها ولك ان تكتشف انها عندها صور لهذا المهند اكثر من الصور التى يمتلكها هو شخصيا ارحمنى يارب قولت لها هو ايه نظامه اتنهدت وقالت حنين اوى وقلبه كبير وعليه نظره من عيونه ضحكت قولت لها يا بنتى يا حبيبة قلبى ده تمثيل قالت لا طبعا دى حقيقته انتى ما تعرفيش انه رومانسى طحن قولت لها فعلا رومانسى طحن ولايقه الجمله على بعضها رومانسى وبعدها طحن

انت عارف ايه السبب ان الناس تجرى ورا هذه النوعيه من المسلسلات انهم محتاجيين تغيير كل المسلسلات والافلام اللى عندنا او كوميدى او بوليسى او دراما وطبعا كلهم فيهم ضرب نار كاننا ناقين ضرب نار مش كفايه اللى بنشوفه

المهم الناس عاوزه تتفرج على حاجه جديده واحنا الرومانسى عندنا متمثل فى المدعو تامر حسنى وهو لابس قميص صدره مفتوح واى بنت تشوفه تبقى هتموت عليه

اذا كنت بتقول امان ربى امان
انا باقول ارحمنى يااااااااااارب

معلش رغيت شويه كتيييييييييير



زهـــــــراء

faroukfahmy يقول...

ارجوك ياابراهيم لاتكتب ردود الآن الا بعد ان اكتب تعليقى وهيعجبك قوى عشان انا بس عندى ضيوف مهمين

افكار مبعثرة يقول...

انا كمان على فكرة مش بيعجبني مهند و مش فاهمة هم عاجبهم على ايه :)
اما بقى بالنسبة للمسلسلات التركي جابتلي حالة نفسية من قناة لقناة تلاقيهم ف كل حتهو كلهم اصلا شبه بعض
بس برده يعني كده تبقى واقف و سامع الست بتجيب سيرة عاصم و متعرفوش :)
لازم تبقى uptodate :)))))
تسلم ايديك و تحياتي

عازفة الالحان يقول...

أهلآ بِك استاذ ابرأهيمْ .,
امآ التُركيـه فوقتهآ أطول من القصصًة نفسهآآ ..!
وم تِنلآم اذا مآ قَدرتْ تتأقلم مع اي مسلسل تُركِي ..!

حفِظك الربْ

دمت بخير

faroukfahmy يقول...

تتصور ياابرهيم يا خويا انا من اشد المعجبين بالواد مهند التركى ده لانه حلو ووسيم وله طلّه طلّقت زوجات من ازواجها هوه الاعجاب بالرجال قبل النساء وحش ربنا اعطاه جمال طبيعى مش مزوق باحمر وكريمات فى الوش والشعر زى بقيت الستات
يعنى مثلا شوف الحقد وصل حتى فى فناناتنا فواحده زى مريم فخر الدين المعقدة على آخر ايامها تقول على رشدى اباظة ملك وجهاء الرجال انا لااحبه لانه يتاع نسوان .. عنّك محبتيه يا مريم ..ومرة قالت لجيهان وهى تمثل معها فى مسلسل دور المسنين ( انتم معجبين قوى كده ليه بعبد الحليم دا انا كنت بكره اقرب منه عشان ريحة بقه وحشع ) ده كلام؟؟؟ يااسيادنا على واحد عيان ملقوش فى الورد عيب قالوا احمر الخدين
مهند بجانب جماله المشهود ووسامته الطاغية بيمثل الافلام الرومانيية اللى اتحرمنا منها بعد افلام الزمن الجميل الرومانيية التى تبرز اهمية المشاعر والانفعالات وتقلل من اهمية دور العقل والرأس ولا ننسى عبارة (بسكال الشهيرة ( للقلب مبرراته التى لا يعلم عنها العقل شيئا .. شعاراخالدا على مر العصور
اليست الرومانسية هى حرية الالهام ، واخاء الفنون ومساواة الاجناس الادبية
بل مزجها بعضها ببعض كما قال فيكتور هوجو بحق ؟!
وبعدين لا يعجبنا مهند فى رومانسيته فى الافلام ولا شكله ماكفاية الجمال اللى عندنا فى شباننا الفنانين ههههههه وهم كثيرين لاداعى لذكر اسماء لان معظمهم كانوا دفعة بنتى اللى اصلع واللى نحيف او سمين اكتر من اللازم واللى قصير واللى طويل اكتر من اللازم ولا عيب على خلقة ربنا كمان منقولشى على الحلو وحش بس حقيقى كلهم دمهم خفيف نهايته انا طولت عليك وفيه كلام كتير لم اذكره ولكن صوابعى تعبت من كتر الكتابه سلام ابراهيم
انا دلوقتى بكتب حكايتى مع فاتن حمامة وعبد الحكيم عامر نائب جمال عبد الناصر ارجو انتظارها هنعجبك قوى ياابراهيم
الفاروق
الفاروق

ابراهيم رزق يقول...

ريماس

اول تعليق يادى الهنا
بجد مظبوط منك زى العسل ههههه

سيلا بقى زوجتى و امى بيتبعوها على النت ممكن يشاهدوا اكثر من حلقة فى اليوم

انضمى الى جروب اللى مش معجبين بمهند
هههههه
الفنانة اسمها مارى منيب و هى جدة المطرب عامر منيب و هى صغيرة كانت زى القمر بس فعلا دمها خفيف

حاضر هامشيها عشان خاطرك
ههههههه


تحيات معطرة بالمسك و العنبر

ابراهيم رزق يقول...

Noha Saleh

اولا مرحب بكى و سعيد بتعليقك و يسعدنى التواصل

انا كنت بحسب ان انا بس كده اتارى فى كثير مش من هواة التركى
نورتينى
تحياتى

ابراهيم رزق يقول...

مصطفى سيف

تصدق ان الجملة دى غاظتنى لانى تربيت على مجلة الشباب و عبد الوهاب مطاوع الله يرحمه

احمد ربنا على تلك النعمة

نورتنى
خالص تحياتى

ابراهيم رزق يقول...

دعاء العطار

ههههههههههههه

هو كل حد داخل يقولى انا مش بحب مهند امال البنات اللى كانوا هيموتوا نفسهم عليه مين انضمى الى جروب اللى مش معجبين بمهند مع ريماس

نورتينى
تحياتى

ابراهيم رزق يقول...

zizi العزيزة الذيذة

المسلسل ده انا كنت باشهده و انا فى ابتدائى ايه دنيا تصدقى انا بافكر ابقى اتابعه و شوف الزمن عمل فى الناس ايه

نورتينى و شرفتينى
تحياتى و تقديرى و حبى

ابراهيم رزق يقول...

Bent Men ALZaman Da

تصدقى فعلا الموعد ده مقدس عند والدتى لا تشاهد التلفزيون الا فى هذا الميعاد

انضمى الى جروب غير المعجبين بمهند ده انا كنت فاكر غلط
ههههههههههه

نورتينى
تحياتى

ابراهيم رزق يقول...

reemaas

ايوه معصعص و انا اتكلمت معاه مده و الشكل اللى بتشوفيه فى المسلسل مختلف خالص و تحسى فيه بالبلاهة و الفضل للممثل السورى صاحب الصوت ده مش بيتكلم جملة مفيدة على بعض
ههههههههههههه
عايزة حاجة تانى و لا ازود

ربنا يعينك على السبع ساعات يعنى سبع مسلسلات اجبارى فعلا بتتعبى ههههههه
نورتينى
تحياتى

ابراهيم رزق يقول...

ارثر رامبو

فعلا انا بحب المسلسلات التاريخية

نورتنى
خالص تحياتى

ابراهيم رزق يقول...

كارمن
اختى الرقيقة

فعلا ده عبط رسمى فهمى نظمى

نورتينى
خالص تحياتى

ابراهيم رزق يقول...

كريمة سندى

فعلا متفق معاكى تماما بس يارب وقتها ميطولش ههههههه

نورتينى
خالص تحياتى

ابراهيم رزق يقول...

لولا و زهراء

و الله مش هتريق لان انا زيك كده برده لم احفظ شكله شاهدته عابرا و انا ماشى فى الصالة لكن اول مرة شاهدته كان فى مهرجان القاهرة

انتظرى بوستى عن تمورا

نورتينى
خالص تحياتى

ابراهيم رزق يقول...

افكار مبعثرة

انضمى الى جروب غير المعجبين بمهند

انا فعلا معرفش عاصم ده انا افتكرته زوجها و حبيت اخدم دى جابت للعيال مصاصة و زغرطت

والله ما عارف احدث نفسى اصل الموديل بتاعى قديم شوية هههههههه

نورتينى
خالص تحياتى

ابراهيم رزق يقول...

عازفة الالحان

اولا اهلا بكى و شرفتينى و اتمنى زيادة التواصل و دوامه

متفق معكى تماما

حفظك الله و رعاكى

خالص تحياتى

ابراهيم رزق يقول...

فاروق فهمى
استاذى العزيز

فعلا رد سيادتك مسك الختام

مريم فخر الدين معقدة نفسية و جلست معها و اجريت معها حوار اثناء عملى بالصحافة هى عقدتها النجوم مثل فاتن حمامة صفة اخرى بها سليطة اللسان مثلها مثل عايدة عبد العزيز ساعات بقول لنفسى كيف يجتمع الرجل المهذب الدكتور احمد عبدالحليم مع تلك السليطة ده مش موضوعنا
طبعا نحن افتقدنا الفنان الجان و اختلفت المقايس و اصبح الجان هنيدى و اللمبى و غيرهم
السينما المصرية كانت تعتمد على شكل الفنان واضرب لك المثل و اتمنى ان تشرك دكتورتنا الدكتورة جيهان فى هذا الحوار
المثل هو انور وجدى بمقايس الجمهور هو نجم و ممثل كبير و بطل العديد من الافلام و ايضا فريد شوقى بطل و ملك الترسو و لا خلاف عليه
من وجهة نظرى و من وجهة نظر المتخصصين انور وجدى ممثل ضعيف و فريد شوقى متوسط لا يقارن بمحمود المليجى و محمود مرسى و احمد ذكى انا اتكلم عن الممثل المشخصاتى و ليس النجم
نرجع لمهند كان لى الشرف و تكلمت معه اثناء مهرجان القاهرة من وجهة نظرى هو ممثل ضعيف و الفضل لنجاحه الى صوت الممثل السورى و لعل الدكتورة جيهان تفيدنى فى اهمية الصوت كاداة من ادوات التعبير و النجاح للممثل
فى انتظار حكايتك الجميلة مع سيدة الشاشة العربية و عبد الحكيم عامر بكل الشوق

تقديرى و تحياتى استاذى العزيز