الأربعاء، 8 يونيو 2011

محسوبكم مش انتيخ

محسوبكم حقانى كما تمتاز الزوجة المصرية بالبوز يمتاز غالبية الرجال المصريين بالانتخة لم يهرب من هذا الفخ سوى عدد قليل من الرجال من ضمنهم محسوبكم و ذلك بفضل التربية الصحيحة من والدتى الغالية ربنا يخليها لى
فلقد عودتنى امى منذ نعومة اظافرى حتى انتهائى من دراستى على الاعتماد على نفسى فملابس المدرسة تكويها بنفسها الحذاء
تلمعه لى يوميا اما جدول المدرسة فتحفظه صما طبعا عند قيامى من النوم اجد السندوتشات معدة للمدرسة و موضوعة فى الشنطة اما فى ايام الاجازات فغالبا طبق الفول التمام مع البيض و الجبنة و الزيتون عند عودتى من المدرسة اجد وجبة الغذاء قد اعدت و فى الغالب لا يعجبنى فتقوم باعداد غيره
اما فى مرحلة الشباب فالملابس تغسل اول باول و تذهب الى المكوجى بطريقة اتوماتكية الحمام يعد و لا شهريار اثناء الدراسة السندوتشات و العصائر و المشروبات الساخنة اول باول طبعا هى فاكرانى باذاكر و انا عمالة اقرا مجلات و جرائد و كتب الشياطين التلاتاشر و اشغل افلام فيديو لكن طبعا ممكن ضميرى ينقح عليا ابطل كل ده وبسرعة اقوم انام
بما انى مش انتيخ اتذكر انى فى رحلة الاقصر و اسوان استهلكت حوالى ثلاثون شراب طبعا الشراب استعمال مرة واحدة دماغكم متروحش بعيد كنت بجيب الشراب ابو اتنين جنية و نصف
طبعا فى المصايف الواحد لا يستعمل الشرابات الا نادرا
بمثل هذه الشخصية غير المئنتخة تزوجت طبعا بعد الزواج تاتى الى اسئلة غريبة لا تخطر على بال احد الا الازواج غير المئنتخين
لماذا عندما ارغب فى الشرب بكل ادب و تواضع انده على زوجتى من اخر الشقة لكى تحضر لى ماء مع ان الثلاجة على بعد خطوات
لماذا عندما اغير ملابسى اضعها فى مكانها و لا اضعها على الشماعة او فى الغسالة
لماذا عندما ارغب فى كوب من العصير لان محسوبكم دماغه مش متكلفة اى لا اشرب شاى او قهوة اطلب من زوجتى ان تصب لى العصير و انتظرها لو مشغولة اكثر من ساعة
طبعا لى تجارب ناجحة جدا فى التعامل مع المطبخ و المنزل
يوم اسود و مهبب بالنسبة لزوجتى لو احضرت اى ملابس من الدولاب بنفسى لانها ستجلس لمدة ساعة فى اعادة ترتيب الملابس من جديد
محسوبكم اول من اخترع البيض المشوى طبعا كلكم تعرفون المسلوق او المقلى اما المشوى فوصفته سهلة تضع البيض فى الماء ثم تضعه على البوتجاز ثم تذهب لتشاهد مباراة و تنساه الى ان يتفحم
اول من اخترع البيض الطائر و هو تضع كمية كبيرة من البيض على كمية كبيرة من الماء ثم تنزل من المنزل لقضاء بعض الاعمال  و عند العودة ستجد البيض فى سقف المطبخ
اول من عمل من الشاى مهلبية طبعا كان التيار الكهربائى مقطوع و حضر ضيف فى عدم وجود زوجتى  و بما انى اكره الانتخة قلتله تشرب شاى قهوة عصير حاجة ساقعة فطلب الرجل شاى بحثت عن الشاى قليلا فلم اجده لان الكهرباء مقطوعة فاحضرت باكو الشاى و وضعت الشاى فى الكوب ثم صبيت الماء طبعا عادانى العيب بكل شياكة وضعت الكوب على الصينية و قلت للضيف اتفضل هى شفطة و لم يكررها ثم اعتذر سريعا و غادر الشقة و بعدها عاد التيار الكهربائى فوجئت ان الكوب ملىء بالشاى حتى نهايته مقابل 2 سم ماء اى عبارة عن مهلبية شاى  اصل محسوبكم افرغ باكو  الشاى تقريبا داخل الكوب
اما فى غلى اللبن فمحسوبكم صاحب الرقم القياسى فى عدد فوران اللبن و مسجل باسمى فى موسوعة جينس للارقام القياسية و حاصل على الميدالية الزبادية فى فوران و تقطيع اللبن
نتيجة مجهودى الجبار مع زوجتى و تفانى فى التعاون معها اصدرت مرسوما ملكيا زوجيا بعدم دخولى المطبخ نهائيا
تحديث بعد قراءة البوست من جانب زوجتى اصدرت مرسوما ملكيا بأن اعترف ان الضيف الذى حضر و عملت له الشاى مهلبية هو شقيقها و بصراحة اتكسفت اقولكوا و لكن امام اصرارها و التهديد باستخدام الب..... اعترف امامكم
بلد مجانين صحيح
 
 

هناك 25 تعليقًا:

Ramy يقول...

مش عارف أعتبر نفسى منتأخ و لا لأ


بس فى البيت للصراحة مأنتخ (:

المرسوم الملكى دة أنقذ البيت (:

Mona Hekal يقول...

و الله حرام عليك الراجل الغلبان اللي عملت له مهلبية شاي و مش عارفة ايه الثقة دي كنت ازاي بتعزم عليه بقلب جامد كده ههههههههههههههههههه

و الله يكون في عون المدام و في عونا جميعا و الله لاعلم ابني يعمل كل حاجة علشان مراته في المستقبل ما تدعيش قصدي تدعيله
تحياتي لك
و في انتظارك غداً ان شاء الله

دعاء العطار يقول...

" لكن طبعا ممكن ضميرى ينقح عليا ابطل كل ده وبسرعة اقوم انام "

هههههههههههههههههههه

لاء بصراحه نفسك نفس لوااااامه

بالنسبه بقى لمهلبية الشاى ففكره حلوه أوووى للبنات لما تبقى عايزه تطفش عريس D:D:

وفى الأخر بتتكلم عن البوز المصرى .. دى زوجة حضرتك كده ليها الجنه والمفروض تاخد وسام هى وكل زوجه مصريه عندها حد مش مأنتخ خاااالص زى حضرتك D:D:

غير معرف يقول...

مساء الغاردينيا أستاذ ابراهيم
انت متأكد انه مراتك ماعندهاش بوز مصري
ههههههههههههههه
والله ام زياد دي صعبانة عليا
مش يبقالها بوز مصري
الا مجموعة بوز <<<< مش عارفة تجمعها ههههههههه
بس صراحة اول مرة اسمع عن مهلبية الشاي الظاهر دي بتتعمل من ايد ابراهيم رزق
؛؛
؛
لروحك عبق الغاردينيا
كانت هنا
reemaas

ليلى الصباحى.. lolocat يقول...

السلام عليكم
امبارح كنت ناوية لك على تعليق كبير فى بوست ((البوز المصرى )) بعد ان قراءته كام مرة وجبت بابا وماما واخواتى والجبايب والجيران علشان يقراوه معايا ويضحكوا شوية على موسوعة بلد مجانين
بس لحظك هذه الايام انا مشغولة وقلت اعلق عليه بعدين
دخلت وجدت الاستاذ اللى مش انتيخ هههههههه ولقيتك لحقت نفسك لانى كنت عايزة اقولك اعدل واكتب عن الرجالة شوية وافعالهم اللى تجنن هههه

شوية جد بقى /
تعرف اخى الكريم ان اسلوب كتاباتك الساخر بيلقى الضوء على سلبيات كتير اتمنى ان تزول من المجتمع المصرى
يعنى بالنسبة للبوز المصرى ( وده كلام بجد ) ان لو الزوج عرف ازاى يشارك زوجته فى بعض الامور بالبيت هى هتشعر بالراحة و عدم الاجهاد وبالتالى هيلاقى طلبات كتير تنفذ فى البيت وتتم بهدوء لانها هتكون مش مرهقة وقتها والافضل من كل ده هى هتحس ان زوجها مشفق عليها وحنين ودى من اجمل الصفات اللى اى زوجة تحبها فى زوجها

سيبك من الستات الشواذ اللى مفيش اى حل بينفع معاهم بس انا اتكلم عن القاعدة الطبيعية مش الاستثناء

بالتالى لو الزوج ( الانتيخ) لو فى اول سنة زواج اتفق الاتنين على قواعد ثابته فى الحياة واسلوب تعايش من اول يوم وكل طرف التزم بتطبيق هذه القوانين مفيش حد منهم هيشعر بالتعب ولا البوز هيكون له مكان فى البيت


شكرا لك اخى الكريم حقيقى اجد الابتسامة الهادفة فى مدونتك تزيل هم اليوم وعناءه باسلوب لطيف
شكرا لك
دمت بكل خير

ياسمين يقول...

هههههههه
لا بصراحة حضرتك مش مأنتخ خالص نواهئي ههههه
مش عارفة اكيد اللي يقول ع حضرتك كداا يبقي مش قرأ الاعترافات دي هههههه
ربنا يكون في عون المدام لها الجنة الصراحة هههههه وعجبني أكثر حكاية الضيف أكيد امتنع عن زيارتك تاني ههههه وياخسارة الشاي هههه

مصطفى سيف الدين يقول...

كلنا ذلك الانتيخ :)
يا حلاوة عيشة الانتخة
بصراحة موتتني ضحك
ول لم اكن انتيخا لوددت ان اكون انتيخا

zizi يقول...

يا مئنتخين ..هيه

عارف يا ابراهيم انا دلوقتي حاعمل ايه لزوم الأنتخة ..حاقوم اعمل كوباية شاي مضبوطة ...مش مهلبية ..واقعد اعيد في الكلام بتاعك عشان اضحك كمان وكمان وكمان...بجد بجد ...رغم كل الخسائر في المعدات اللي حكيت عليها ..بس متهيألي إذا كنت ....بأقول تاني إذا كنت..بتقلب الموضوع كل مرة بخفة دم وتهريج كان بها ..اما ان قلبت بجد هنا بقى المشكلة ..ياترى انت انهي في دول ...تحياتي وربنا يديمها عليك نعمة(أم زياد )ويسعدكم دائما..ويسعدنا احنا معاك بشاي العصاري.وشكري.تحياتي

reemaas يقول...

ههههههههههههههههه
صباح الانتخة انا قلت الرجاله دول مافيش فايدة فىيهم من نواحى المطبخ قالولى ظالمة اهو العينة بينه

غير معرف يقول...

هههههههههههههه

ياراجل عملت الباكو بحاله لكباية!!!

بصراحة كدا من الآخر الله يكون في عون

المدام على التجارب دي من بيض مشوي

لمهلبية شاي وفي النهاية كله هي

بتنظفه ...

د/دودى يقول...

ههههههههههههه....ضحكتنى و الله كإنك بتوصف بابا بالظبط و للاسف بتوصفنى انا بس على احسن شويه...

Carmen يقول...

افكار جامدة اما اكون مدايقة من حد :)))

ابراهيم رزق يقول...

رامى

ليوة كدة يا رامى قول الحق الصراحة حلوة

طبعا مش اى مرسوم
نورتنى
خالص تحياتى

ابراهيم رزق يقول...

منى ابو السعود

هو كلكوا عليا و لا ايه
الراجل ده كان شقيق زوجتى شفتى المشكلة صعبة ازاى

منورانى
خالص تحياتى

ابراهيم رزق يقول...

دعاء العطار

شفتى باديكى افكار حلوة ازاى

هو كلكوا عليا كده ليه مع انى راجل مظلوم

نورتينى
خالص تحياتى

ابراهيم رزق يقول...

ريماس

صباح الورد و الفل

طبعا متأكد هو مش انا زوجها يبقى لازم الابتسامة تملىء وجهها

ده كلام تيجى مع ام زياد عليا هههههه
مهلبية الشاى دى مسجلة باسمى

نورتينى
تحيات معطرة بالمسك و العنبر

ابراهيم رزق يقول...

ام هريرة

اختى الفاضلة

متفق معكى تماما فيما قلتيه
لكن الاجيال المئنتخة هههههه اللى طلعت دى ملهاش حل نتيجة التربية الخاطئة

الامل فى الاجيال القادمة و تربيتهم

سعيد جدا جدا ان البوستات عاجباكى

نورتينى
خالص تحياتى

ابراهيم رزق يقول...

ياسمين

الحمد لله حد شهد ليا اهو

ايه ده ما احنا كنا حلوين
نون النسوة بقى و بتشهدوا لبعض

نورتينى
خالص تحياتى

ابراهيم رزق يقول...

مصطفى سيف

نعم كلنا هذا الانتيخ
لو لم اكن انتيخيا لوددت ان كون انتيخا
ما احلاها عيشة الانتخة

نورتنى
خالص تحياتى

ابراهيم رزق يقول...

zizi

امى العزيزة

طبعا كوباية شاى مظبوطة
انا شوية دول و شوية دول هههههه
ام زياد بتسلم عليكى

نورتينى
تحياتى و تقديرى و حبى

ابراهيم رزق يقول...

reenaas

كده برده يا ريماس تيجى علينا ههههههه

نورتينى
خالص تحياتى

ابراهيم رزق يقول...

ريبال بيهس

هههههههههههه
طبعا المدام اتعودت

نورتنى
خالص تحياتى

ابراهيم رزق يقول...

د دودى

يا مرحب بيكى و باباكى فى الحزب بتاعى
نتشرف يا افندم بانضمامكم له هههههه

نورتينى
خالص تحياتى

ابراهيم رزق يقول...

كارمن
اختى الرقيقة

و افكار سهلة التنفيذ
هههههه

نورتينى
خالص تحياتى

Emtiaz Zourob يقول...

الانتخة حلوة مفيش كلام :)