الخميس، 1 سبتمبر، 2011

معاكسة لكى جى تو

دخلت على ساليناز و هى متعصبة و تقول لى يرضيك يا بابى و انا واقفة قدام السوبر ماركت مستنية زياد انا و صاحبتى اميرة لقيت اثنين صبيان بيعاكسونى و يقولى لى يا حلوة يا مزة و عندما قلت لزياد لم يفعل شيئا و قالى انا بتعصب فى الكورة بس

سالتها هما قد ايه اللى عاكسوكى قالت اكبر منى شوية و عندئذ فكرت و قلت الايام بتجرى بسرعة و الجيل الجديد استلم الراية و جيل بيسلم جيل لكن  ابتسمت و قلت و الله كبرتى يا ساليناز و بقيتى تتعاكسى

هى ساليناز اللى كبرت و لا سن المعاكسة اللى نزل  يا ترى ممكن نلحق الجيل ده و لا نبتدى مع المواليد الجدد افضل
بلد مجانين صحيح
  

هناك 37 تعليقًا:

zizi يقول...

ايه يا ابراهيم ..كبرت وبقيت بابي لبنت بتتعاكس ..يعني انا كده بقيت تيتا لبنت بتتعاكس ...لالالا..لايسلم الشرف الرفيع من الأذى .زحتى يراق على جوانبه الدم ..استناني انا جاية ومعايا الشلة ..ومعايا شوية بمب حلوين ..ومعايا الفزاعة ..بس اقف على ناصية الشارع انت وساليناز عشان اشوف المعاكسة من اولها بس انت اقف بعيد شوية عشان ماحدش يعرف انك معاها وانا حاجي "البهم "..
ياعم هو الظاهر الظاهرتين حصلوا سوا :البنات كبروا بسرعة والمعاكسة مستواها العمري قل شوية فحدث ماحدث ...تحياتي لك وللأسرة

ماشي بنور الله يقول...

ههههه
ربنا يخليلك يأخي وتشوفها عروسة ان شاء الله
علي فكرة معظم الصور اللي اتعرضت في الجرايد للمعاكسات وحالات التحرش كان أصحابها من وجهة نظري عيال صغيرين.

ربنا يستر الأيام اللي جاية

كل سنة وانت طيب والأهل بخير

ياسمين يقول...

ههههههه
ياربي علي العسل
القطط البريء كمان بتتعاكس
معاكسة أخوة هههه
وبعدين ازاي زياد ميعملش حاجة
كان مفروض يجيب طوبة من الأرض ويحدف
انا بهدي النفوس ههههه
مرة ابن خالي عنده 5 سنين ف حضانة
المهم بئا الولد بصراحة زي القمر
وعنيه خضرة واشطاطات بئا هههههه
فبيحكي لي انه بيتعاكس من البنات
والبنات بتقولوا عينك حلوة ههههه
يعني حتي البنات بتعاكس ..
جيل ما يعلم بيه الا ربنا...
بس المهم حضرتك لازم تأخذ حق البنت ..اومال ايه هي ليه حد يأخذ حقها الا بابها..
تربط الواد دا ف اقرب عمود وتجيب مصاصة وتحنسه انه ولا عمره هيدقها ههه
ع ق حجم الولد بئا
ربنا يحفظهم لحضرتك يارب
وكل سنة وحضرتك طيب

آخر أيام الخريف يقول...

هاهاهاهاهاهاههاهاهاهاهاهاهاهاهاهاهاهاهاهاهاهاهاههاهاهاهاهاهاهاهاهاهاها ربنا يخليهملك يا أستاذى :)

محمد الجرايحى يقول...

ما شاء الله فى تطور.......
ربنا يبارك لك فيها.
ونسأل الله تعالى الهداية لأبنائنا
اللهم ىمين

مصطفى سيف يقول...

يا حلاوة زياد ماعملش حاجة وانت كمان بتضحك؟
فين العرق الصعيدي يا هيما؟
انا قلت هتنزل تقول كخ للعيال دي

شيرين سامي يقول...

هههههههه للأسف المعاكسات بتبدأ فعلاً من بدري و ده من زمان على فكره لكن أكيد أختك (لو كان عند حضرتك أخت) مكانتش هتقول إنها بتتعاكس...طول عمرنا بنتعاكس و نسكت...الجديد بقى دلوقتي إن البنات بتتعاكس و بتقول و ده كويس عشان تلاقي حد كبير يفهمها و يوعيها إزاي تتصرف.

ربنا يخلهوملك :)
تحياتي و إحترامي لك

Bent Men ElZaman Da !! يقول...

عجبتنى اوى انا بتعصب فى الكوره بس دى ههههههههههههههههه
الاطفال دلوقتى مش بقوا اطفال اصلا
الاطفال مش بيتعدوا ال5 سنين وعارفين يعنى ايه مزه

ربنا يخليلك اولادك ويحميهم ليك :))

ريــــمــــاس يقول...

صباحك غاردينيا أستاذ ابراهيم
هههههههههههه
ههههههههههه
والله غصب عني ضحكت ياروح قلبي ياسوزي وبقيتي تتعاكسي ياعيني ياعيني دا بقى دليل انه ساليناز قمر :)
بعدين انا عاوزة افهم زياد دا متركب اخوها غلط ولا ايه ..ماكان سدح الولاد على الارض وهات ياكفوف <<< شريرة ههههههه
بس والله كان نفسي اشوف ردة فعلك انت ومامتها وانتو بتسمعو منها انها تعاكست لا وكمان مزه هههههههههه وربي عماله اضحك ..بس صراحة كان نفسي اخدها في حضني وهي متعصبه واسمع منها حكايتها هو صحيح حضحك وحمسك زياد من ودانه بس على الاقل استمتع بيها وهي تحكيلي :)
ربنا يخليهالك ويخليلك الشبل زياد الي بيتعصب للكورة بس طيب ياسي زياد اما نشوف لما تكبر وتحب ويمر واحد يقول لحبيبتك ياحلوة يامزة :)
المشكلة يااستاذ ابراهيم انه الايام دي مابقاش فيه اطفال وماشاء الله عارفين كل حاجة يعني انصحك تبدا مع المواليد الجدد وبدال ماتعلمهم ماما بابا تقولهم .. عيب ومايصحش دا لو سمع منك كمان ههههههههه"
؛؛
؛
بصراحة البوست دا يجنن عشان عن حبيبة قلبي ساليناز بليز كل فترة عاوزين مذكرات سوزي هنا :) "
؛؛
؛
لروحك عبق الغاردينيا
reemaas

candy يقول...

"هى ساليناز اللى كبرت و لا سن المعاكسة اللى نزل"

حلوة دى قوى :))))

المعاكسة لا سن لها :)

Noha Saleh يقول...

كى جو تو وبتتعاكس يعنى اللى بيعاكسوها فى ابتدائ

ماهو العيال بتقلد الافلام اللى بيشوفوها

ربنا يبارك لك فى اولادك

ريبال بيهس يقول...

مساء الورد ابراهيم

الله يخليها لك وتشوفها عروس قدام

عينيك بالنسبة لسن المعاكسة للأسف

أننا تعولمنا تماماً لدرجة أننا

أصبحنا نشك بأن العولمة طالت حتى

أطفالنا فكل ما يشاهدونه يدمر

حصونهم الطفولية لدرجة أننا نشاهد

أطفال يتحدثون في أمور خاصة قبل

عقدين من الزمن لم يكن يتحدث فيها

إلا الكبار أو المتزوجين ...

كل عام وأنت بخير

وعيدك مبارك

تحياتي وإحترامي

نهر الحب يقول...

ههههههه
لا للاسف كل حاجة في زماننا بقت غريبة واللي كنا شايفينه زمان حاجة كبيرةى دلوقتي بقه حاجة عادية

اول زيارة ليا هنا

تحياتي
:)

reemaas يقول...

لا طبعا انت اللى كبرت والسن نزل برده
ههههههههه
لا بس انا لفت نظرى موقف زيااااااااااد لازم يكونلك واقفه معاه
ربنا يحميهم لك

عمرو فكرى يقول...

بلد مجانين صحيح :D

عمرو يسرى يقول...

دا احنا مكناش عيال بقى

ابراهيم رزق يقول...

zizi العزيزة الذيذة

ههههههههههههه

حاضر يا فندم علم و سينفذ
كده الواحد يحس انه له ظهر

كل سنة و انتى طيبة
نحياتى و تقديرى و حبى

ابراهيم رزق يقول...

ماشى بنور الله
اخى العزيز

متشكر على امنياتك الطيبة
فعلا المعاكسة اغلبها من السن الصغيرة
ربنا يستر

كل سنة و انت طيب
تحياتى

ابراهيم رزق يقول...

ياسمين

ههههههههههه
ربنا يخلى لكوا ابن اخوكى القمر

لا ما انا زياد فهمته يعمل ايه بعد كده

لا اصل الاولاد اللى عاكسوا مشيوا خلاص

كل سنة و انتى طيبة

تحياتى

ابراهيم رزق يقول...

اخر ايام الخريف

هههههههههههههه
ربنا يخليكى انتى و مبدعة دائما

كل سنة و انتى طيبة
تحياتى

ابراهيم رزق يقول...

محمد الجرايحى
استاذى العزيز

نسأل الله الهداية لابنائنا جميعا
متشكر لتشريفك لى

منورنى
كل سنة و انت طيب
تحياتى

ابراهيم رزق يقول...

مصطفى سيف

ما اهو شر البلية ما يضحك

و بعدين الواد زياد باين عليه صعيدى تايوانى

كل سنة و انت طيب
تحياتى

ابراهيم رزق يقول...

شرين سامى


انا فعلا عندى اخوات لكن اكبر منى

انا اعرف ان المعاكسة تبدء من بدرى لكن كى جى تو يا شرين دى بدرى قوى
هههههههههه

فعلا الجيل القادم لا يسكت و اعتقد ان العلاج سيبدء من هنا

كل سنة و انتى طيبة
تحياتى

ابراهيم رزق يقول...

Bent Men ALZaman Da

هههههههههه
فعلا الاطفال بقت مشكلة
زياد بيتكلم معى فى السياسة و محاكمة مبارك

كل سنة و انتى طيبة
تحياتى

ابراهيم رزق يقول...

ريماس

صباح الفل و الورد و الياسمين

ههههههههههههههه
لو عمل كده كان طقم العيد من اول لبسة اتقطع
فعلا يا ريماس كان الموقف مضحك لانها بتتكلم بطريقة جادة جدا

فعلا يجب ان نبدء من المواليد الجدد
هههههههههههه

ساليناز بتسلم عليكى
نورتينى
كل سنة و انتى طيبة يا ريمسو
تحياتى

ابراهيم رزق يقول...

candy

فعلا المعاكسة لا سن لها و من شاب على شىء شاب عليه

كل سنة و انتى طيبة
تحياتى

ابراهيم رزق يقول...

Noha Saleh

لا العيال فاقت الافلام بمراحل
ههههههههه

كل سنة و انت طيبة
تحياتى

ابراهيم رزق يقول...

ريبال بيهس
اخى العزيز

متفق معك ان العالم تحول الى حجرة صغيرة و ليست قرية و اصبح الاطفال جزء من هذه القرية

متشكر جدا لامنياتك و دعواتك
كل سنة و انت طيب
تحياتى

ابراهيم رزق يقول...

نهر الحب

اولا سعيد بزيارتك و بتعليقك
اتمنى زيادة التواصل

ههههههههههه
فعلا احيانا اشعر بالتخلف و انى اصبحت ديموديل

شرفتينى بزيارتك
كل سنة و انتى طيبة

تحياتى

ابراهيم رزق يقول...

reemaas


هههههههههههه
فشر انا لسه مكبرتش العيال هما اللى كبروا

فعلا انا كان لى موقف مع زياد كلت الايس كريم اللى كان مشتريه بس بعد شوية اديته فلوس بشترى واحد تانى
لا انا بجد فهمته غلطه

كل سنة و انتى طيبة
تحياتى

ابراهيم رزق يقول...

عمرو فكرى

هههههههه
فعلا بلد مجانين
كل سنة و انت طيب
تحياتى

ابراهيم رزق يقول...

عمرو يسرى

ههههههه
فعلا احنا كنا كتاكيت

كل سنة و انت طيب
تحياتى

فاتيما يقول...

معلش يا ابراهيم

يعنى لما ساليناز متتعاكسش
اومال مين اللى يتعاكس ؟!!!!!!

الولاد دى عندها نظر
ومعذورين
زى الاخطل الصغير ما قال
ان عاكسنا فعذرنا
ان ف وجهنا نظر

ربنا يحرسها
وعقبال ما تعزمنا على فرحها
يا رب

ابراهيم رزق يقول...

فاتيما
روح القلب الملائكية

يا سلام يا فاتيما
يعنى عشان خاطر ساليناز قلبتى شعر الاخطل الصغير
هههههههههه

عقبال يارب ما نفرح كلنا بنجاح يوسف و بزواجه جميعا يارب

سلام كبير من ساليناز

تحياتى

haneen nidal يقول...

مساء الخير و حفظها لك و عقبال ما تشوفها بالفستان الابيض يارب

لا هو الجيل الي صار يخلص مراهقتو بدري بدري تلاي خلص مراهقة وهو بالحضان و دخل على الاشياء الاكبر . . . الله يحفظهم و يرعاهم هم جنود الغد و حماة الاوطان ^______^

شمس النهار يقول...

ضحكتني ياابراهيم ضحك
لا ياسيدي الجيل ده سابق عصره في كل حاجة
حتي في دي
خاليك اسبور ورياضي

بس موقف زياد ورده الطفولي ضحكني ضحك

ربنا يكرمك فيهم ويبارك فيهم

Ahmed demo يقول...

هههههههه لا بس حلو زياد انو بيمسك اعصابه في اي حاجة :D