الاثنين، 5 سبتمبر، 2011

فرخة بركة








فرخة بركة فرخة عتاقى لكن ورور
فرخة عتاقى لكن بيضها زى المرمر
فرخة بركة . بركة رزقه و زى السكر
جاله حرامى فى السرقة و لا شاهبندر 

استولى على كل الخير اللى بالبيت
حط فى كرشه كل البيض و الكتاكيت
يعمل عجة و كيكة لذيذة و بيض اومليت
كرشه بيكبر اكبر و اكبر و لا العفريت
بركة يدور علشان ياكل فى الفتافيت 

فرخة بركة بركت بركة  بركة كبيرة
و صحة بركة علت علة علة عليلة
و المنصر زاد من غله لكل كليلة
بركة بص لابنه و قاله بص يا حيلة
كانت الفرخة هى الفرحة و الهليلة
كانت القمحة و كانت السترة لكل العيلة

زاد المنصر  زاد من ظلمه على المظلوم
و ولاد بركه  هبوا و ثاروا  و بعدوا النوم
وقع  المنصر مسكوه العسكر  راح ملموم
لكن بركة عينه مش شايفة و فيها غيوم
اصل المنصر ساب فى بيته خروم و خروم
يدخل منها اتباعه يسيبه شوك و سموم
مش مكتبلك مرة يا بركة تفرح يوم 
يبقى خيرك قدام عينك وبيه محروم


  
 

 

هناك 18 تعليقًا:

zizi يقول...

ابراهيم العزيز ..هي دي زي بقرة حاحا النواحة ..هي تقريباً نفس المعاني ..حلوة يا ابراهيم ..الله ينور عليك ..يا بركة ..

ريــــمــــاس يقول...

صباحك غاردينيا استاذ ابراهيم
ولا نقول صباحك بركة
ههههههههه
عارف كنت فاكرة حتقول يلا قولوها عشر مرات
فرخة بركة بركت بركة بركة كبيرة
و صحة بركة علت علة علة عليلة
قعدت بكررها وبنت اختي جنبي واقولها يلا قولي معايا ..
استولى على كل الخير اللى بالبيت
حط فى كرشه كل البيض و الكتاكيت
يعمل عجة و كيكة لذيذة و بيض اومليت
البنت جاعت ههههههه عجبك اما اقوم اعملها بيض اومليت :)
بجد جميلة بس اكيد وراها حاجة الا فين بلد مجانين صحيح ماشفتهاش
؛؛
؛
لروحك عبق الغاردينيا
reemaas

haneen nidal يقول...

لزيزة كتييييييييير و مليانه معاني . . . تسلم ايدك ^___^

ريبال بيهس يقول...

مساء الورد ابراهيم

لا أعلم قد تكون أغنية تراثيه

وقرأتها أكثر من مرة ووجدت بين

السطور سطور ...

جميل جداً

تحياتي وإحترامي

محمود عسكر يقول...

جميل اسلوب الشعر الحلمنتيشي
والمعاني المختبئة بين السطور
معبرة ومفسرة لواقع نحياه
لكن إن شاء الله ييجي اليوم اللي يفرح فيه بركة وأولاده
والفرخة ترجع لصحابها ويرجع معاها كل الخير.

تحية وتقدير

مصطفى سيف يقول...

ربما كانت فرخة ولكنها تحولت لصقر اطاح بكل من ظلمها وطمع في بيضها
كلمات جميلة اوي تسلم ايدك يا ابراهيم

ريهام المرشدي يقول...

لسه لبركة ايدين طايله
تشترى ناس و ضماير خاينه

الله يرحمه يوسف وهبى
و ما الدنيا إلا مسرح كبييييييييير

افكار مبعثرة يقول...

تحفة و عميقة جداااااااا
تسلم المعاني اللي بين السطور
تحياتي ليك :)

Heba Salem Youssef يقول...

شعر رائع

الفرخة دى مصر شكلها

زينة زيدان يقول...

وصف للحالة التي نحياها
سرقة الرزق والفرخة
وبركة شخص في كل بيت يسكن
وللحرية واللقمة الحلال يحن
ومن بعده أولاده هزموا الظلم
والبركة لسا بيدور على حرية
ولقمة... وفرخة وقمحة

كلمات قريبة للعقل وللقلب تمتاز بالزجل المصري الشعبي... وروح المصريين الخفيفة

تحيتي

الاحلام يقول...

جميل كلماتك اخى والاجمل انها ممكن ان تؤلف الى اغنيه للاطفال كمان
سعيد بتواجدى دائما واستمتع بكلماتك دائما
تحياتى ابواود

Bent Men ElZman Da !! يقول...

حلوه اوووووووى
بتقول كلام كبير بطريقه بسيطه جدا
تسلم ايدك

re7ab.sale7 يقول...

الكلام المتواري
والمعني البعيد وليس القريب
مساء الورود والا نقول صباح بقي الساعة اتنين ونص بعد نص الليل
ههههههههه
عجبتني اووي علي فكرة
اهي بتحكي حالتنا دلوقت بالضبط

شمس النهار يقول...

ايه ده جيت اعلق بالجملة لاقيت خمس بوستات

:)))
لا كده مش هينفع خالص
قريتهم لاقيتهم كل واحد عايز تعليق لوحدة
:))

طيب انا قريتهم في الاوام اوام وهرجع اعلق علي كل بوست لوحدة في مكاااانة

كل سنة وانت طيب

reemaas يقول...

زى زيزى افتكرت بقرة حاحا نفس الوتيرة

حلوة كتير يا استاذ ابو خليل

zay maTigy يقول...

ـهههههههههههههههـ
حلوة ومعبرة وبطريقة مميززززززززة جدااا
يعنى ايه سالزياد ؟؟
تسلم استاذ ابراهيم :)

بسمة الورد يقول...

الله الله كلماتك الساخرة دايما راقية الاحاسيس

سلمت يمينك وسلم ابداعك الجميل

مودتى اخى

منيرة سوار يقول...

جميلة جدا اخي ابراهيم..
خفيفة الظل.. كما هي كل كتاباتك..
تقبل مروري اخي الفاضل..