الخميس، 24 نوفمبر 2011

كلام واحد غبى

هذا الكلام هو تحليل غبى من واحد لا يفهم و لا يعى ما يقول بينما الاغلبية هى من تفهم ان مصلحة مصر مع المجلس العسكرى ارجوكم خذوا هذا الكلام بمحمله الحقيقى فعندما يتكلم الاغبياء تتراوح ردود الافعال بين السخرية و الابتسام و الصمت و التجاهل ايها الاغلبية اسمعوا الكلام الغبى و ليس مطلوبا منكم سوى ردود الافعال السابقة
 عندما اتوا الى الحكم لم ياتوا باستفتاء و عندما طالبهم بعض القلة المندسة بالرحيل قالوا لن نرحل الا باستفتاء و الغبى يتسائل اولا من سيؤمن الاستفتاء و يشرف عليه هل هو المجلس العسكرى او الجيش او المشير او قواتنا المسلحة ام الشرطة العسكرية و هل يريدون وضع الشعب فى مواجهة و حرب اهلية ام هناك فائض اموال لكى تجرى استفتاء ب100 مليون جنيه ام التمسك بالكرسى الوثير لانه تم تنجيده بريش نعام

فى بيانه صرح بانه سيتم تسليم السلطة فى موعد اقصاه شهر 6 و الغبى يتسائل اين الوقت اذا كان الجدول الزمنى لانتخابات البرلمان خمسة شهور و نصف ثم تشكيل حكومة و وضع دستور و الاستفتاء عليه ثم انتخابات لانتخاب رئيس هل هى حبوب مهدئة او كلام فى الهواء ام ان اليوم اصبح 72 ساعة ام الاعتماد على ان الشعب استنشق غاز سيؤثر على ذاكرته

موقف الاخوان المسلمين الاخير وبياناتهم التى تشبه غزل البنات هشه و جميله و ملونة و برائحة الفانليا و تذوب فى الفم و بما ان تاريخ الاخوان المسلمين ملىء بالاتفاقات و العروض من ايام حسن البنا ثم عبد القادر شهيب الى مهدى عاكف حتى الان هل هو ديل او عرض بينهم و بين المجلس العسكرى و السؤال الغبى الذى يلح على لماذا لم يتم القبض على شاب واحد من الاخوان و يتم محاكمته عسكريا من اكثر 12 الف شاب من جميع التيارات السياسية قبض عليهم و اخرهم علاء عبد الفتاح هل الاخوان ليس بينهم شاب واحد شارد يخطىء اعتقد نعم لان الاخوان ملائكة على الارض و الملائكة لا يخطئون

الحل السحرى الذى يراه الاخوان للخروج من المأزق الحالى هو الانتخابات رغم ان اغلب الاحزاب علقت الانتخابات و اخرهم حزب المصرين الاحرار لا بأس اقيموا سرادقكم الانتخابية لكن لا تنسوا ان تزينوها بصور الشهداء و تنيروها بالطلقات و قنابل الغاز و ان تنظروا الى البرلمان بعيون الشباب التى فقدوها على ان تحتفلوا بعد الفوز بالكراسى و تشربوا  كاسات نخب دم الشهداء  
                                                        امضاء
                                                     واحد غبى
       
 

هناك 13 تعليقًا:

هبة فاروق يقول...

استاذى ابراهيم ارى نبره حزن وشجن هنا بل ارى الصاق بعض الصفات مثل الغيى ..وانت لا تمت لها بصله ابداااا
لا لست بغبى يا استاذى ولسنا كما ذكرت
استنشقنا غاز يؤثر على ذاكرتنا..بل نحن على وعى كامل بما يحدث ولكن دعنا نتجاهل بعض الاحداث مؤقتا
ختى تمر هذه الاحداث وتخرج مصر من عنق الزجاجه
تحياتى لقلمك السياسى الساخر

Bent Men ElZman Da !! يقول...

بالعكس
اللى مش شايف الكلام ده كله يبقى هو اللى غبى
المشير ماجاش باستفتاء عشان يقعد او يمشى بيه
دى فتنه وحركه ملعوبه منه اوى
بس الكرسى بيعمل اكتر من كده للاسف !!

faroukfahmy يقول...

ابراهيم يا حبى وعشقى
كثرت مسممياتك حتى احترت اقول ايه والا ايه
يغنينى عن اللف والتدوير والفحص والتمحيص انى اقول بصدق وامانة
ابراهيم بتاع كلــــــــــــــــــــه
انت غبى يا ابراهيم ؟؟؟؟؟؟؟؟؟؟
امال احنا نبقى ايه ؟؟؟؟؟؟؟؟؟؟
اذا كنا استنشقنا غاز يؤثر على ذاكرتنا كما قلت فان ذاكرتنا اصبحت وامست لها مناعة لاستنشاق اى غاز وذلك من اثر غاز ثانى اكسيد الكربون الخارج من القمامة المركونة كأنها ورود بين كل مسافة واخرى نمر عليها كانها مزارات يجتمع عليها الذباب العاشق والمتلهف للتزاوج ليخرج لنا ذريات جديدة تزيد من افراحنابنسلهم الوافر العامر وامراضناالمتزايدة المستعصية
كل اللى قلنه يا ابراهيم عت المسئولين والاحزاب صادف فهمه محل الغبى قبل العاقل لو كان عاقل مش مستعقل وكفاية آخر خبر بيقول اننا تقدمنا الى البنك الدولى اللى اترفض فى البداية بطلب قرض لاقتراض ماقيمته 3 واثنين من عشرة مليار وياترى الفايده كام ياعينى عليكى يا مصر
لسان حالك يقول يا ابراهيم للأغبياء كفاية عليكوا كده وحرام عليكم تعيشوا مع المستعقلين اللى غابت عقولهم وفرغت اذهانهم وانصهر فكرهم فى بللآعات السياسة واكوام الفمامة التى يلقى فيها حثث الشهداء
مش قادر اسيبك يا ابرهيم كيف يترك الجسد روحه يا روحى
الفاروق

مصطفى سيف الدين يقول...

الأخوان باعوا البلد وفضحوا نفسهم
عنيهم مش شايفة غير كراسي البرلمان ولا شايفة دم بيتنزف ولا كرامة بتنداس
مع انها واضحة زي الشمس الانتخابات لو بعد حتى سنتين هيكتسحها الاخوان
حسبي الله في كل من يبيع الوطن
تحياتي

zizi يقول...

ابراهيم ..من اين تأتي بكل هذا الشجن ..ونحن جميعاً نتألم ..على فكرة يا ابراهيم هو الراجل ما غلطش هو الراجل جه مرة مع منى الشاذلي "واحد منهم يعني " وقال احنا قدامنا لحد نص الفين وتلاتاشر عشان تكون البلد واقفة على رجليها وكله تمام ...لكن لما الناس عملوا المظاهرات دي قال شهر 6 الجاي ..مش عارفة ازاي حا يقدروا يختصروا الفترة الزمنية سنة بحالها ..لكن يمكن هم ماشيين بنظام الأم اللي بتحايل طفلها لحد ما ينام عشان مافيش اكل في الحلة اصلاً...عموماً انا مازلت احمل للجيش انه وقف مع الشباب في بداية الثورة وهو اللي اقنع الريس باتنحي والا كانت حاتبقى مذبحة ..ومازال الجيش يحمينا دي مسألة لاشك فيها وعلى فكرة الأيام الجاية حتثبت ان كان هناك قوى ثالثة في الميدان يعني المتظاهرين الصح كانو في الميدان ..وامبارح كان فيه دكتور جايبينه مع منى الشاذلي من دكاترة الميدان قال انهكان فيه ناس بييجوا مش باين عليهم ابداً انهم ثوار لافي لبسهم ولاطريقة كلامهم وبعضهم كان بيمنعهم بقوة انهم يدوله حقنة فاليوم عشان الفاليوم مع الزفت اللي هم واخدينه ممكن يموتهم في الحال وقالوا انهم نزلوا وهو وشيخ ووقفوا وسط المتظاهرين فالمتظاهرين قالولهم هاتوا سلك شائك واعملوا حاجز بيننا وبين الشرطة ماعدا دول بيقولوا حوالي 500بيشتموا شتيمة قذرة جداً وبيعملوا حركات بإيديهم ومصممين انهم يبقوا في شارع محمد محمود يعني العملية فيها إنّ والدكتور ده بيقول انه من السيدة زينب اصلاً وله اصدقاء هناك بيأكدوا له ان الحزب الوطني ما زال يعبث بالبلطجية سواء اللي برة والا اللي في المزرعة ..ابراهيم احنا عايزين ناس زيك يبقوا فاهمين الوضع على اصله ..واذا كان دا هو الغبا فياريت كل الناس اغبيا ..ربنا ينجي مصر

Ahmed demo يقول...

استاذ ابراهيم بجد لخصت كل القهر اللى انا فيه من اللى بيحصل الايام دي .. وبالنسبة للاخوان كل همهم الكرسي وبانت للناس اوي ان الاخوان فعلأً ملهمش علاقه بالدين هما بيستغلوه فقط

عمرو فكرى يقول...

http://a2.sphotos.ak.fbcdn.net/hphotos-ak-snc7/s720x720/377417_163029983795772_139070366191734_250386_232081986_n.jpg

((القاعدة الاولى للاخوان
احنا نستنى .. لو اتضربوا نشمت, ولو انتصروا نركب.
بس اهم حاجة اما تيجى تركب ماتنساش دعاء الركوب))

دعاء العطار يقول...

لا يااستاذ ابراهيم مش حضرتك اللى غبى

الغبى فعلاً اللى بيقول كلام مايصدقهوش واحد ف ابتدائى وعايزنا احنا نصدقه ونقول آميييييين

الغبى اللى يدى وعووود اكتر من مره ويخلف بيها وف كل مره منتظر من الناس تصدقه

الغبى هو اللى بيقتل عينى عينك وف الاخر يقولك لااا احنا ماضربناش ع صدور المواطنين رصاص

اه هما فعلا مش ضربوا ع صدور المواطنين ع عيونهم بس

الغبى هو اللى مفكر الناس مشغله قناة مش بتتكلم غير بلسانهم وفاكرين ان مفيش قنوات فضائيه واننا ف ثوره تكنولوجيه بتتنقل فيها الاخبار قبل ماحتى هما يعرفوا بيها

الغبى هو اللى بيتعامل مع شعب كل شعوب العالم انحنت له احتراماً لانه ادار ثوره بالحجم ده ف 18 يوم بدون قياده وهما لازالوا بيعاملونا ع اننا سذج

عرفت بقى ميييين الغبى ؟

رحاب صالح يقول...

والله انا هنفجر دماغي
لان كل المرشحين عندنا كلهم اخوان وسلف
يعني مصيبة من الناحيتين
طيب نعمل اية
يا اما منتخبش يا اما اروح اسقط صوتي
طيب والبلد يعني كدة هتنفع
اصلا الانتخابات واضح جدا انها طبخة ومسبوكة اووي
وبجد تعبت من كتر الكلام

فافى يقول...

مع احترامى لكل كلامك وارائك اختلف معاك فى الجزء الاخير بتاع الاخوان انا لست اخوانيه وكمان ضدهم قلبا وقالبا ولكن معلشى تحليل النقطه دة فلتت منك مش منطقيه على الاطلاق تقصد ايه من ورا ان المجلس بيعتقل الثوار العادين ومطنش الثوار الاخوان ؟؟؟؟؟!!!!
اكيد لأن الثوار الاخوان مش بيعملوا حاجه تستفز الشرطه وبيعقدوا كافيين خيرهم شرهم ولو هما مش كده على الاقل بيكونوا واخدين اوامر من قيادتهم بكده عارف ليه لان الناس دى عمللين ومنظميين معندهمشى وقت للعواطف مش بيعملوا حاجه ترجعهم لورا 10 خطوات

بسمة الورد عطر المشاعر يقول...

مساؤك خير استاذ ابراهيم

والله كل كلماتك فى عيوننا وخواطرنا اذا فكلنا اغبياء

ولكن حسبنا بالصبر والدعاء فلا نملك غيرها فالامل لابد ان يكون معنا فى كل لحظة وكل حين عله يرحمنا مما نحن فيه

مودتى واحترامى اخى

ليلى الصباحى.. lolocat يقول...

السلام عليكم


والله اخى العزيز انا مش عارفة اقول ايه
شعورى لايقل عنك حزن واسى

وقلبنا وجعنا بشكل كبير اوى
خلاص مش قادرين نتحمل اكتر من كده خداع وتسويف

مر تقريبا سنة على الثورة واحنا زى ما احنا مفيش جديد ...

الشرفاء والثوار والمصريين اللى بجد بيقدموا ارواحهم للوطن والبلد والكبار كل واحد مستنى نصيبه فى التورته وكراسى البرلمان والرئاسة


اما حقيقى بلد مجانين صحيح
وسلامتك من الغباء ان شالله الخاينين المفسدين


تحياتى وتقديرى

افكار مبعثرة يقول...

هل انت متاكد من صفة الغباء تلك التي تلصقها بصاحب التساؤلات
ان الحقيقة واضحة وضوح الشمس و اسمح لي من لا يراها هو اللي ممكن نقول عليه واحد غبي
تحياتي